མཛད༌པ། 9
9
ཤ་ཝུལ་ག་ཚེ་སོར་པ༌ལ།
1ཤ་ཝུལ་གི་ གཙོ་བོ་ག་ཕྱག་ཞུ་ཁཱན་བ་ ཤེ་ལེ་ཨན་ཡོང་ཨ་ཉི་ ཡ་ཧུ་དི་པ་ག་བླ་མ་གོང་མ་ བཞུགས་ས་ག་དི་ཝ༌ལ། 2ཉི་གཙོ་བོ་ག་ལམ་ག་ ཕྱག་ཞུ་ཁཱན་བ་ ཐོང་མ་ད་བུ་ཨ་ནེ་ལ་ ཕེ་ཝག་ཙ་དག་པེ་མ་ཝ་ མེ་ཝག་ཙ་དག་པེ་མ་ཝ་ཙུང་ཐཱན་ ཡ་རུ་ཤ་ལེམ་ག་ཏཱན་ ཕ་ལེ་དེན་གེ་ ཁྲོམ་ཆེན་ད་མཱས་ཀཱས་ག་ཆོ་ཁཱན་ ཡ་ཧུ་དི་པ་ཆོས་འཛོམས་བ་ཀ་ བཀའ་ཤོག་གནང་ཤོ་དག་ཉི་ ཞུ་ཝ༌ལ།
3ཤ་ཝུལ་ད་མཱས་ཀཱས་ག་ ཤེག་པེ་ཅམ་པ་ཀབ་ཉི་ ཡིད་ཀ་རྣམ་ཏོག་མ་ཝ་ ཞིང་ཁམས་གེ་དོང་ རོ་ཀ་ཀོ་ལོ་ལོ་ འོད་ཆར་བ༌ལ། 4རོག་ས་ག་ཐང་ཇོང་མ༌ལ། ཉི་ཤ་ཝུལ་ ཤ་ཝུལ་ ནཱན་གི་ ཇ་ག་ཧང་ཨ་ཉི་ མ་ལེག་པ་ཨན་ཅ་ཡ་དག་ཉི་ གསུངས་མ་ན་ཐ་ཝ༌ལ།
5ཉི་ནཱན་ཨི་བི་ཡ་ གཙོ་བོ་དག་ཉི་ ཤ་ཝུལ་གི་ཞུ་ལ་ཀབ་ཉི་ རོ་ཀི་གསུངས་མ་ལ་ ཇང་ནཱན་གི་ མ་ལེག་པ་ཨ་ཁཱན་ ཡི་ཤུ་གི༌ལ། 6དག་པ་ཀབ་ཉི་ ག་ཝུན་ཐཱན་ ཁྲོམ་ཆེན་ག་ཏཱན་དི་ཉི་ ནཱན་གི་ ཧང་ཨ་ལེ་ཁེ་ལེ་གི་ལ་སྨོ་ ཨོ་ཉ་ཀོར་གེ་ ཇི་གི་ཡེག་པེ་ཨ༌ཉི།
7ཤ་ཝུལ་ཀབ་ཉི་ ཏབ་ཐུར་དང་ཁཱན་སོ་ངོ་བ་ ཧང་རང་ཨ་ལེ་མ་སེ་ཝ་རི་ཉི་ ཐིང་ཆོ་ཝ༌ལ། རོག་ཏེ་བ་ཀི་ གསུང་སྐད་ན་ཐ་ཝ༌ལ། དག་པ་ཀབ་ཉི་ ཐོང་མུ་ཤོ་ ཨི་བི་རང་མ་ཐོང་མ༌ལ། 8ཤ་ཝུལ་ ས་གེ་ག་ཐིང་མ༌ལ། དག་པ་ཀབ་ཉི་ རོ་ཀི་རོ་ཀ་མིང་ ཏི་ཉི་གོད་པ་ཀབ་ཉི་ ཧང་རང་མ་ཐོང་མ༌ལ། ཨོ་ཉི་ཨ་དེན་གེ་ རོག་ཀབ་ཉི་དང་ཁཱན་བ་ཀི་ རོ་ཀ་ག་དང་གེ་ཙུང་ཉི་ ད་མཱས་ཀཱས་ག་ཏཱན་ རིག་ཉི་བུ་ཝ༌ལ། 9ཉི་ནོང་སམ་སག་པུ་ རོ་ཀི་ཧང་རང་ མ་ཐོང་མ༌ལ། ཉི་ཨུ་ཉུ་གང་ཀ་ ཧང་རང་མ་ཟ་ལཱན་ མ་ཇ་མཱན་ ཆོ་ཝ༌ལ།
10ད་མཱས་ཀཱས་ག་ དད་པ་ཨ་ཁཱན་ ཧ་ན་ནི་ཡ་དག་ཁཱན་ ཐུར་ཆོ་ཝ༌ལ། ཉི་རོ་ཀི་མཇལ་ཁ་ཉོང་ཉི་ ཨོ་ཉ་མཇལ་ཁ་ནང་ཀ་ གཙོ་བོ་གི་ རོ་ཀ་ཧ་ན་ནི་ཡ་དག་ཉི་ གསུངས་མ་ཀབ་ཉི་ གཙོ་བོ་ ཇང་ཨོ་ཐ་ཅ་ཨ་ཉི་ རོ་ཀི་ཞུ་ཝ༌ལ།
11གཙོ་བོ་གི་ རོ་ཀ་གསུངས་མ་ལ་ ག་ཐིང་ཐཱན་ ཐྲང་པུ་དག་ཉི་ར་ཁཱན་ གཞུང་ལམ་ག་ཏཱན་དི། ཉི་ཡ་ཧུ་ད་ག་ ཕའི་ག་དིན་ཐཱན་ ཁྲོམ་ཆེན་ཀྲར་སཱས་གེ་ ཤ་ཝུལ་དག་ཁཱན་ སོ་ངོ་ག་ཀོར་གེ་ཇིམ༌ཤོ། ཨོ་མ་རོ་ཀི་ ཇ་ག་ཏཱན་སྨོན་ལམ་ཏ་པེ་གང་ཅ་ 12ཧ་ན་ནི་ཡ་དག་ཁཱན་སོ་ངོ་ཐུར་ ནང་ཀ་ཨུན་ཐཱན་ རོ་ཀི་ལོག་ཉི་ ཐོང་ཆེན་དག་པ་གི་ ག་དང་རོ་ཀ་ཐུང་ཀ་ ཀེ་བ་ཨ་ཝ་ རོ་ཀི་མཇལ་ཁ་ ཉོང་པ་ཅ་དག༌ཉི།
13ཧ་ན་ནི་ཡ་གི་ ཞུ་ཝ་ལ་ གཙོ་བོ་ ཨོ་ཐ་སོ་ངོ་གི་ ཡ་རུ་ཤ་ལེམ་ག་ཆོ་ཁཱན་ ན་ག་དམ་པའི་སོ་ངོ་བ་ཀ་ ཧང་ཏེན་མ་ལེག་པ་ ཨ་ཝ་གི་ལ་སྨོ་ ཨོ་ཉ་ཀོར་གེ་ ཇི་གི་སོ་ངོ་མང་པུ་ཐུར་གེ་ ན་ཐ་ཝ༌ཅ། 14ཉི་ཐ་ག་བུ་ ན་ག་མཚན་ཞུ་ཁཱན་ ཐམས་ཅན་རང་ ལྕགས་ཀེ་བེ་ཆོག་པ་ག་དབང་ཚད་ བླ་མ་ཆི་ལུ་བ་ཀེ་ ཉོང་པ་ཅ་ཨ༌ཉི།
15དག་པ་ཀབ་ཉི་ གཙོ་བོ་གི་ རོ་ཀ་གསུངས་མ་ལ་ དི་ ཤ་ཝུལ་ཤོ་ ཇི་གི་ ཇ་ག་ལའི་ཨ་ཁཱན་ཨ་ཉི་ སི་ཝ་གི༌ལ། ཉི་རོ་ཀི་ ཡ་ཧུ་དི་པ་མང་གི་ཁཱན་བ་དང་ དཔོན་བ་ ཉི་ཨིས་རེལ་ སོ་ངོ་བ་ཀ་པོང་ཀ་ ཇ་ག་མིང་ག་ཀོར་གེ་ བཤད་པེ་ཁེ༌ལེ། 16ཧང་ཡ་དག་ནེ་ལ་ ཇ་ག་མིང་ག་ཡོར་ཀེ་ རོ་ཀི་ཧབ་ཏུར་ དཀའ་ཝ་ཅཱད་པེ་ཁེ་ལེ་གི་ལ་སྨོ་ ཨོ་ཉ་ཀོར་གེ་ ཇི་གི་རོ་ཀ་གེན་མེ་ཨ༌ཉི།
17ཉི་ཧ་ན་ནི་ཡ་བྱོན་ཐཱན་ ཨོ་ཉ་ཕའི་ནང་ཀ་ནུ་ཕ༌ལ། ཉི་རོ་ཀི་ རོ་ཀ་ཕྱག་ ཤ་ཝུལ་ག་ཐུང་ཀ་ཀེ་ཐཱན་ གསུངས་མ་ལ་ ཀོ་ཏ་ཤ་ཝུལ་ ནཱན་ཨུན་ཅ་ཨ་ཉི་ ལམ་བར་ཀ་ མཇལ་ཁ་གནང་ཁཱན་ གཙོ་བོ་ཡི་ཤུ་ རོག་ཏེན་གི་ ཇང་ཀུན་ཏི་ཝ་གི༌ལ། ནཱན་གི་ཐོང་མེ་རེ་ཆེན་ ཉི་ནཱན་དམ་པའི་ཐུགས་ཉིད་གི་ ཕུང་ཆེན་དག་པ་གི་ རོ་ཀི་ཇང་ཀུན་ཏི་ཝ་གི་ལ་ཨ༌ཉི། 18ཨོ་ཉ་ཐྲེ་ཀེ་རང་ ཤ་ཝུལ་ག་མིང་གེ་ ང་ག་སེབ་ད་བུ་ཐུར་ ཞུད་ཁེ་ཉི་ ཉི་རོ་ཀི་ ལོག་ཉི་ཐོང་མེ་རེ་བ༌ལ། ཉི་རོག་ག་ཐིང་ཐཱན་ ཁྲུས་གསོར་ཞུ་ཝ༌ལ།
19ཉི་རོག་ལྟོ་ཟ་དེན་གེ་ རོག་ལོག་ཉི་རང་ ཁེ་ཀོ་ཏག་པ༌ལ༎
ཤ་ཝུལ༌གི་ ད༌མཱས༌ཀཱས༌ག་ འཐེན་ལེག༌པུ་བཤད༌པ༌ལ།
ཤ་ཝུལ་ ད་མཱས་ཀཱས་ག་ དད་པ་ཨ་ཁཱན་བ་ཀབ་ཉི་ ནོང་ཉིག་ཙིང་སམ་ཕང་ཆོ་ཝ༌ལ། 20རོག་ཨོ་ཉ་ཐྲེ་ཀེ་རང་ ཡ་ཧུ་དི་པ་ ཆོས་འཛོམས་ཁོན་དིན་ཐཱན་ ཡི་ཤུ་ཤོ་ དཀོན་མཆོག་ག་ སྲས་གི་ལ་ཨ་ཉི་ བཤད་པ༌ལ།
21ཉཱན་ཁཱན་ཐམས་ཅན་རང་ ཡིད་ཆི་ཉི་ཡེག་པ་ལ་ ཡ་རུ་ཤ་ལེམ་ག་ ཨོ་ཐ་མཚན་ཞུ་ཁཱན་ སོ་ངོ་བ་ཤེ་ཁཱན་ ཨོ་ཐ་སོ་ངོ་མང་གི་སྨོ། རོག་ཐ་ཨོ་ཕེ་ ཇུང་ཚེན་བུ་ ཨོ་ཉ་སོ་ངོ་བ་ཙུང་ཐཱན་ བླ་མ་ཆི་ལུ་བ་ཀ་བཱརང་ཀ་ བུ་ལེ་ག་དེན་གེ་ ཨོ་ཕ་མང་གི་སྨོ་ཨ༌ཉི།
22དག་པ་ཀབ་ཉི་ ཤ་ཝུལ་ ལག་ཏང་ལག་ཏང་ ཤུག་ཅཱན་རི་ཉི་རང་ དི་ཝ༌ལ། ཉི་རོ་ཀི་ ཡི་ཤུ་ཤོ་ ཁིརིས་གི་ལ་ཨ་ཉི་ ཁུངས་ཀེ་ཅ་ཨ་ཉི་ ད་མཱས་ཀཱས་ག་ཆོ་ཁཱན་ ཡ་ཧུ་དི་པ་བ་ཀི་ རོ་ཀ་ལན་མཇལ་བེ་ མར་བ༌ལ། 23ནོང་མང་པུ་ཐུར་ག་ཚི་ངེ་ ཡ་ཧུ་དི་པ་བ་ཀི་ ཤ་ཝུལ་ ཤེ་ལེ་མིག་པ་ཕི་ཝ༌ལ། 24དག་པ་ཀབ་ཉི་ ཤ་ཝུལ་གི་ རོག་ཏེ་བ་ཀ་ འཆར་གཞི་ཀོར་གེ་སེ་ཝ༌ལ། ཉི་རོག་ཤེ་ལེ་དེན་གེ་ རོག་ཏེ་བ་ ཁྲོམ་ག་ཀོ་ར་ག་ ངམ་བི་ནང་མ་ཝ་ ཁུང་ཉི་ཆོ་ཝ་ཅ་གི་ཝ༌ལ། 25དག་པ་ཀབ་ཉི་ ཤ་ཝུལ་ག་སློ་མ་བ་ཀི་ བི་ནང་ག་རང་ རོག་ཤིང་རོང་ནང་ཀ་གོན་ཐཱན་ དེང་ཙི་གེ་དོང་ རིང་ཉི་ཀུན་ཏི་ཝ༌ལ༎
ཤ་ཝུལ་ཡ་རུ་ཤ་ལེམ་ག།
26ཤ་ཝུལ་ ཡ་རུ་ཤ་ལེམ་ག་ཤེག་ཐཱན་ སློ་མ་བ་ཀ་དྲེ་ཀ་ ནུ་ཕེ་གོད་པ༌ལ། དག་པ་ཀབ་ཉི་ རོག་ཏེ་བ་ཀི་ རོག་བུ་ སློ་མ་རི་ཝ་གི་ལ་ཨ་ཉི་ ལོ་དི་ལེ་ མར་བ་ཨ་དེན་གེ་ རོག་ཏེ་བ་ ཐམས་ཅན་རང་ རོ་ཀེ་ཡོང་ཁེ་ཝ༌ལ། 27ཨོ་ཉ་གེ་ བར་ན་བཱས་གི་ རོག་སྐུ་ཚབ་བ་ བཞུགས་ས་ག་ཏཱན་ རིག་ཉི་བུན་ཐཱན་ རོ་ཀི་ གཙོ་བོ་ ལམ་བར་ཀ་ ཧང་ཏེན་མཇལ་བ་གི་ལ་སྨོ་ ཉི་གཙོ་བོ་གི་ རོག་ཀབ་ཉི་ གསུང་གྲོས་མཛད་པ་ཀོར་གེ་ རོ་ཀི་རོག་ཏེ་བ་ཀ་ ཞུ་ཝ༌ལ། ཉི་ཨོམ་ཆང་རང་ ད་མཱས་ཀཱས་ག་ རོ་ཀི་དོ་རི་རི་ཨ་ཉི་ ཡི་ཤུ་ག་མཚན་ག་ ཧང་ཏེན་གསུང་བཤད་པ་གི་ལ་སྨོ་ ཨོ་ཉ་ཀོར་གེ་བུ་ བར་ན་བཱས་གི་ སྐུ་ཚབ་བ་ཀ་ཞུ་ཝ༌ལ།
28ཉི་གེ་ཤ་ཝུལ་ རོག་ཏེ་བ་ཀབ་ཉི་ཆོ་ཝ༌ལ། ཉི་ཡ་རུ་ཤ་ལེམ་ག་ ཐམས་ཅན་རང་ ཆ་པ་ཨ་ཉི་དིན་ཐཱན་ དོ་རི་རི་ཨ་ཉི་ གཙོ་བོ་ག་མཚན་ག་ གསུང་བཤད་པ༌ལ། 29ཉི་གིརིག་ག་ལོ་ཨ་ཁཱན་ ཡ་ཧུ་དི་པ་བ་ཀབ་ཉི་བུ་ རོ་ཀི་ཆཱས་ཨ་ཉི་ རྩོད་པ་ཕི་ཝ༌ལ། དག་པ་ཀབ་ཉི་ རོག་ཏེ་བ་ཀི་ རོག་ཤེ་ལེ་རྩིས་ཕི་ཝ༌ལ། 30ཉི་དད་པ་ཨ་ཁཱན་བ་ཀི་ ཨོ་ཉ་ཀོར་གེ་སེ་ཉི་ ཤ་ཝུལ་ཀའི་ས་རི་ཡ་ག་ རིག་ཉི་བུན་ཐཱན་ ཀྲར་སཱས་ག་ཏཱན་ ཀུན་ཏི་ཝ༌ལ།
31ཨོ་ཉི་ཨ་དེན་གེ་ ཡ་ཧུ་དི་ཡ་དང་ག་ལིལ་ ཉི་ས་མ་རི་ཡ་ག་ ཆོས་ཚོགས་བ་ཀི་ སྐྱིད་པུ་ཉོང་པ༌ལ། ཉི་དམ་པའི་ཐུགས་ཉིད་གི་ སེམས་གསོ་ཨ་ཉི་ ཤུག་ཅཱན་ཅོད་གནང་མ༌ལ། ཉི་གཙོ་བོ་གེ་ ཡོང་ཁེ་ཉི་ཆོན་ཅ་ཨ་ཉི་ རོག་ཏེ་བ་ཀ་ གྱངས་ཁ་དར་བ༌ལ༎
ཨེ་ནི་ཡཱས་དང་དོར་ཀཱས།
32པ་ཏྲུས་ ཨོ་ག་ཨོ་ག་རང་བྱོན་ཉི་ ཁྲོམ་ལུ་ད་དག་ས་ག་ཆོ་ཁཱན་ དཀོན་མཆོག་ག་ སོ་ངོ་བ་ཀ་བཱརང་ཀ་ ཤོན་གོད་པེ་ག་བྱོན་མ༌ལ། 33ཉ་ག་ རོ་ཀི་ཟ་ན་ཚ་ཁེ་ཉི་ ལེ་མེ་མར་བཱན་ ཉིང་ཡེན་དི་ཁཱན་སོ་ངོ་ ཨེ་ནི་ཡཱས་དག་ཁཱན་ཐུར་ རུ་མ༌ལ། 34པ་ཏྲུས་གི་ ཨེ་ནི་ཡཱས་ག་ གསུངས་མ་ལ་ ཨེ་ནི་ཡཱས་ ཡི་ཤུ་ཁིརིས་གི་ ནཱན་དྲག་ཉི་གནང༌མེ། ག་ཝུན་ཐཱན་ ན་ག་བཱརང་ཟང་ཤོ་ཨ༌ཉི། ཉི་ཨོ་ཉ་ཐྲེ་ཀེ་རང་ རོག་ག་ཐིང་མ༌ལ། 35ཁྲོམ་ལུ་ད་དང་ ཤ་རོན་ག་ཆོ་ཁཱན་ སོ་ངོ་ཐམས་ཅན་གི་ ཨེ་ནི་ཡཱས་དྲག་པ་ག་ཐོང་ཉི་ གཙོ་བོ་ག་ཏཱན་ལོག་པ༌ལ།
36ཁྲོམ་ཡོབ་པ་དག་ས་ག་ དད་པ་ཨ་ཁཱན་ མེ་ཝག་ཙ་ ཏ་བི་ཏ་དག་ཁཱན་ཐུར་ཆོ་ཝ་ལ་ (གིརིག་ག་ལོ་གེ་ཨ་ནེ་ལ་ དོར་ཀཱས་དག་པེ་གི་ཝ༌ལ། དེན་ཐ་ཤོ་ ག་ཤ་དག་པ་ག་རྩིས་གི་ཝ༌ལ།) རོག་སོ་ངོ་ གནམ་མེད་ས་མེད་ ལེག་པུ་ཆོ་ཝ་ཨ་དེན་གེ་ སོ་ངོ་དུག་པུ་བ་ཀ་ ཇ་རོ་ཨན་ཅ་གི་ཝ༌ལ། 37དག་པ་ཀབ་ཉི་ རོག་མར་ཉི་ཤི་དེན་གེ་ རོ་ཀ་ཕུང་པུ་ཟིག་ཐཱན་ ཕའི་ཐོ་ཀ་ཕའི་ནང་ཐུར་ག་ ཐ་ཝ་ཅ་གི་ཝ༌ལ། 38ཡོབ་པ་ཤོ་ ལུ་ད་ར་ག་ཆོ་ཝ་ཨ་དེན་གེ་ དད་པ་ཨ་ཁཱན་བ་ཀི་ པ་ཏྲུས་ ལུ་ད་ག་བཞུགས་པ་ལ་ཨ་ཉི་ ན་ཐ་ཉི་ ཨ་ཧ་བཱརང་ཀ་ དོ་ཟོ་དོ་ཟོ་བྱོན་ཤོ་ཨ་ཉི་ ཞུ་ལེ་དེན་གེ་ སོ་ངོ་ཉིག་ཙིང་ཀུན་ཏི་ཝ༌ལ།
39ཨོ་ཉི་ཨ་དེན་གེ་ པ་ཏྲུས་ག་བཞེངས་ཐཱན་ རོག་ཏེ་བ་ཀབ་ཉི་ བྱོན་མ༌ལ། རོག་ཉ་ག་ཕེབས་ཏེན་གེ་ རོག་ཏེ་བ་ཀི་ རོག་ཕའི་ཐོ་ཀ་ཏཱན་ ཞུ་ཝ༌ལ། ཉི་མོ་རེན་མ་བ་ ཐམས་ཅན་རང་ རོ་ཀ་ར་ག་ཨུན་ཐཱན་ དོར་ཀཱས་མ་ཤི་ལཱན་ ཆོ་ལེ་གང་ཀ་ དོར་ཀཱས་གི་ རོག་ཏེ་བ་ཀ་དེན་གེ་ ནམ་ཁཱན་ཁེན་ཇ་བ་དང་ ཁ་མུང་བ་གེན་ཉི་གེ་ཕ༌ལ། 40པ་ཏྲུས་གི་ རོག་ཏེ་བ་ ཐམས་ཅན་རང་ ཕིས་ཀ་ཤོ་ལེ་བིན་ཐཱན་ ཏོང་ཟིང་ས་ག་ཏེས་ཉི་ སྨོན་ལམ་ཞུ་ཝ༌ལ། ཉི་རོ་ཀི་ དོར་ཀཱས་ག་ཕུང་པུ་ག་ ལོ་ཀ་ཏཱན་གིར་ཐཱན་ གསུངས་མ་ལ་ ཏ་བི་ཏ་ ག་ཝུའི་ཨ༌ཉི། ཉི་དོར་ཀཱས་གི་ རོ་ཀ་མིང་ཏི་ཝ༌ལ། ཉི་རོ་ཀི་ པ་ཏྲུས་ཐོང་མ་ཀབ་ཉི་ རོག་ལང་མ༌ལ། 41པ་ཏྲུས་གི་ རོ་ཀ་ག་དང་གེ་ཙུང་ཉི་ རོག་ཐིང་མེ་ག་ རུམ་པ༌ལ། ཉི་པ་ཏྲུས་གི་ མོ་རེན་མ་བ་དང་ བཱརའ་དཀོན་མཆོག་ག་སོ་ངོ་བ་ ནང་ཀ་རཱན་ཐཱན་ དོར་ཀཱས་ཤི་ཝ་གེ་ ལོག་ཉི་ཝུ་ཝ་ག་ གེན་མ༌ལ།
42ཨོ་ཉ་ཀོར་གེ་ ཡོབ་པ་ག་ཆོ་ཁཱན་ སོ་ངོ་ཐམས་ཅན་གི་སེ་ཉི་ མང་པུ་ཐུར་གི་ གཙོ་བོ་ག་ དད་པ་ཨ་ཝ༌ལ། 43ཉི་པ་ཏྲུས་ མོང་ནང་ག་ལའི་ཨ་ཁཱན་ སི་མོན་དག་ཁཱན་ཀབ་ཉི་ ཡོབ་པ་ག་རང་ ནོང་མང་པུ་ཐུར་ བཞུགས་པ༌ལ༎
Currently Selected:
མཛད༌པ། 9: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
