མཛད༌པ། 8
8
ཤ་ཝུལ་གི་ ཆོས་ཚོགས་ཀ་ལུ་ཅོད་པ༌ལ།
1ཨིས་ཏི་ཕ་ནཱས་ བཀྲོངས་མེ་ཆོག་པེ་དག་ཉི་ ཤ་ཝུལ་གི་བཀའ་དྲེ་པ༌ལ། ཨོ་ཉ་ནོང་ཀ་རང་ ཡ་རུ་ཤ་ལེམ་ག་ཆོ་ཁཱན་ ཆོས་ཚོགས་ཁེ་པ་ གནམ་མེད་ས་མེད་ ཀ་ལུ་ཏཱད་པེ་གོ་ཙུག་པ༌ལ། ཉི་དད་པ་ཨ་ཁཱན་བ་ ཐམས་ཅན་རང་ ས་ཆ་ཡ་ཧུ་དི་ཡ་དང་ ས་མ་རི་ཡ་ག་ཏཱན་ ཏོར་ཉི་དི་ཝ༌ལ། དག་པ་ཀབ་ཉི་ སྐུ་ཚབ་བ་ཤོ་ ཡ་རུ་ཤ་ལེམ་ག་རང་ ལུས་པ༌ལ།
2ཆོས་སེམས་ཆོ་ཁཱན་ཚེ་བང་གི་ ཨིས་ཏི་ཕ་ནཱས་ག་སྐུ་ཕུང་ ས་ག་ཝང་ཕི་ཝ༌ལ། ཉི་རོ་ཀ་དེན་གེ་ གནམ་མེད་ས་མེད་ ཤ་དར་ཕི་ཉི་གེ་ཕ༌ལ། 3དག་པ་ཀབ་ཉི་ ཤ་ཝུལ་གི་ ཆོས་ཚོགས་མང་པུ་ མེ་པ་ཕི་ལེ་ག་རྩིས་ཨ་ཉི་ ཕའི་ནང་ནང་ནུབ་ཐཱན་ དད་པ་ཨ་ཁཱན་ ཕེ་ཝག་ཙ་དག་པེ་མ་ཝ་ མེ་ཝག་ཙ་དག་པེ་མ་ཝ་ ཕིས་ཀ་ཇག་ཉི་བུན་ཐཱན་ བཙོན་ག་ཙུག་པ༌ལ༎
ས་མ་རི་ཡ་ག་ འཐེན་ལེག་པུ་བཤད་པ༌ལ།
4ཏོར་ཉི་དི་ཁཱན་ དད་པ་ཨ་ཁཱན་བ་ཀི་ ས་ཆ་ཐམས་ཅན་ག་བྱོན་ཉི་ གསུང་བཤད་པ༌ལ། 5ཕི་ལིབ་ ཁྲོམ་ཆེན་ ས་མ་རི་ཡ་ག་ཏཱན་བྱོན་ཐཱན་ ཁིརིས་ག་ཀོར་གེ་ སོ་ངོ་བ་ཀ་བཤད་པ༌ལ། 6ཕི་ལིབ་གི་ གསུངས་ཁཱན་ཉཱན་ཉི་ ཉི་རོ་ཀི་མཛད་ཁཱན་ རྫུ་འཕྲུལ་བ་གོད་ཅ་ཨ་ཉི་ སོ་ངོ་མང་ཀི་ ཕི་ལིབ་གི་གསུངས་ཁཱན་ག་ ན་ཐེན་ལེག་པཱན་ཉཱན་པ༌ལ། 7རྣམ་ཤེས་མ་ཙང་མ་ མང་པུ་ཐུར་ སོ་ངོ་བ་ཀེ་ ཕིས་ཀ་ཤོན་ཉི་ ཁོན་མ༌ལ། ཉི་རྣམ་ཤེས་མ་ཙང་མ་ ཤོ་ཉི་དིན་ཅ་ཨ་ཉི་ ཤ་དར་ཕི་ཉི་རང་དི་ཝ༌ལ། ཟ་ན་ཚ་ཁེ་ཁཱན་དང་ དང་མེ་མར་ཁཱན་བ་བུ་ མང་པུ་ཐུར་དྲག་པ༌ལ། 8ཨོ་ཉི་ཨ་དེན་གེ་ ཨོ་ཉ་ཁྲོམ་ཆེན་ག་ སོ་ངོ་བ་ གནམ་མེད་ས་མེད་ ཤོ་ནང་ཕེ་ཝ༌ལ།
9ཨོ་ཉ་ཁྲོམ་ཆེན་ག་ སི་མོན་དག་ཁཱན་ སོ་ངོ་ཐུར་ཆོ་ཝ༌ལ། ཨོ་ཐ་བ་མ་ཇུང་མེ་གོ་མ་ སི་མོན་གི་ མིག་འཕྲུལ་གེན་ཉི་ ས་མ་རི་ཡ་ག་སོ་ངོ་བ་ ཐམས་ཅན་རང་ ཡིད་ཆི་ལེ་བི་ཝ་ཆོ་ཝ༌ལ། རོག་རོག་ཏེན་གི་ རོག་ཤོ་ སོ་ངོ་ཆི་ལུ་ཐུར་གི་ལ་ཨ་ཉི་ ཡེག་ཅ་གི་ཝ༌ལ། 10ཉི་ཨོ་ཉ་ཁྲོམ་ཆེན་ག་ཆོ་ཁཱན་ སོ་ངོ་ཟེ་མུ་ཆི་ལུ་ ཐམས་ཅན་གི་ རོ་ཀི་ཡེག་ཁཱན་ག་ ཆ་གནས་ཐ་ཝ༌ལ། རོག་ཏེ་བ་ཀི་ ཡེག་པ་ལ་ རོག་ཤོ་ སྟོབས་དབང་ཆི་ལུ་དག་ཉི་ཆིན་ཁཱན་ དཀོན་མཆོག་ག་ སྟོབས་དབང་གི་ལ་ཨ༌ཉི། 11སི་མོན་གི་ ཡུན་ཐ་རིང་མུ་སག་པུ་ རོ་ཀ་མིག་འཕྲུལ་གི་ཨ་ཉི་ རོག་ཏེ་བ་ ཡིད་ཆི་ལེ་བི་ཉི་ ཐ་ཝ་ཨ་དེན་གེ་ རོ་ཀི་ཡེག་ཁཱན་ག་ སོ་ངོ་བ་ཀི་ ཆ་གནས་ཐ་ཝ༌ལ།
12དག་པ་ཀབ་ཉི་ དཀོན་མཆོག་ག་ རྒྱལ་སྲིད་ཀོར་གེ་དང་ ཡི་ཤུ་ཁིརིས་ག་ མཚན་ག་ཀོར་གེ་ ཕི་ལིབ་གི་ འཐེན་ལེག་པུ་བཤད་ཁཱན་ག་ རོག་ཏེ་བ་ཀི་ དད་པ་ཨ་དེན་གེ་ ཕེ་ཝག་ཙ་དག་པེ་མ་ཝ་ མེ་ཝག་ཙ་དག་པེ་མ་ཝ་ ཐམས་ཅན་གི་ ཁྲུས་གསོར་ཞུ་ཝ༌ལ། 13སི་མོན་རོག་ཏེན་གི་བུ་ དད་པ་ཨ་ཝ༌ལ། ཉི་རོ་ཀི་ཁྲུས་གསོར་ཞུ་དེན་གེ་ རོག་ཕི་ལིབ་ཀབ་ཉི་རང་ཆོ་ཝ༌ལ། ཕི་ལིབ་གི་མཛད་ཁཱན་ ཞིང་ཁམས་ག་ རྟགས་དང་རྫུ་འཕྲུལ་བ་ཐོང་ཉི་ རོག་གནམ་མེད་ས་མེད་ ཡིད་ཆི་ཝ༌ལ།
14སྐུ་ཚབ་བ་ ཡ་རུ་ཤ་ལེམ་ག་ བཞུགས་པེ་གང་ཀ་ ས་མ་རི་ཡ་ག་ སོ་ངོ་བ་ཀི་ དཀོན་མཆོག་ག་གསུང་ག་ དད་པ་ཨ་ཝ་དག་ཉི་མཁྱེན་ཉི་ རོག་ཏེ་བ་ཀི་ པ་ཏྲུས་དང་ཡུ་ཧན་ན་ ཀུན་ཏི་ཝ༌ལ། 15པ་ཏྲུས་དང་ ཡུ་ཧན་ན་ཕེབས་ཏེན་གེ་ ས་མ་རི་ཡ་ག་ དད་པ་ཨ་ཁཱན་བ་ཀི་ དམ་པའི་ཐུགས་ཉིད་ ཉོང་ཅེན་དག་པ་གི་ རོག་ཉིག་ཙིང་གི་ རོག་ཏེ་བ་ཀ་དེན་གེ་ སྨོན་ལམ་ཞུ་ཝ༌ལ། 16དམ་པའི་ཐུགས་ཉིད་ རོག་ཏེ་བ་ཀ་ཐུང་ཀ་ མ་བྱོན་མ་ཆོ་ཝ༌ལ། ཧང་ཡ་དག་ནེ་ལ་ རོག་ཏེ་བ་ཀི་ གཙོ་བོ་ཡི་ཤུ་ག་མཚན་ག་ཤ་ ཁྲུས་གསོར་ཞུ་ཝ་ཆོ་ཝ༌ལ། 17ཉི་པ་ཏྲུས་དང་ཡུ་ཧན་ན་གི་ རོག་ཉིག་ཙིང་ག་ཕྱག་ རོག་ཏེ་བ་ཀ་ཐུང་ཀ་ ཀེ་བ་ཀབ་ཉི་ རོག་ཏེ་བ་ཀི་ དམ་པའི་ཐུགས་ཉིད་ཉོང་པ༌ལ།
18ཉི་ཨོམ་ སྐུ་ཚབ་བ་ཀི་ རོག་ཏེ་བ་ཀ་ཕྱག་ དད་པ་ཨ་ཁཱན་བ་ཀ་ཐུང་ཀ་ ཀེ་བ་ཀབ་ཉི་ དམ་པའི་ཐུགས་ཉིད་གནང་མ་ག་ སི་མོན་གི་ཐོང་ཉི་ རོ་ཀི་སྐུ་ཚབ་ཉིག་ཙིང་ག་ ཏི་རུ་ཕུལ་བེ་རྩིས་ཕི་ཝ༌ལ། 19ཉི་རོ་ཀི་ཞུ་ཝ་ལ་ ཇི་གི་ཇ་ག་ག་དང་ ཨི་བི་ག་ཐུང་ཀ་ཀེ་བ་ཐུར་ དམ་པའི་ཐུགས་ཉིད་ ཉོང་པེ་དེན་གེ་ ཇ་ག་བུ་ ཨོ་ཐ་དབང་གནང་ཤོ་དག༌ཉི།
20པ་ཏྲུས་གི་ རོ་ཀ་གསུངས་མ་ལ་ ན་ག་ཏི་རུ་ ནཱན་ཀབ་ཉི་རང་ ཇཝ་ཆུམ་ཆེན། ཧང་ཡ་དག་ནེ་ལ་ ནཱན་གི་ དཀོན་མཆོག་ག་སེ་རབ་ ཏི་རུ་གི་ ངོ་ལེ་རེ་བེ་ད་བུ་ཐོང༌ལ། 21དཀོན་མཆོག་ག་སྤྱན་ག་ ན་ག་སེམས་ ཐྲང་པུ་མ་ཝ་ཨ་དེན་གེ་ ཨ་ཧ་ཨོ་ཐ་ལའི་ག་ ནཱན་ནུ་ཕ་མཱན༌ཅ། ཉི་པི་ག་བུ་ ཨ་ལེ་མ་ཆོག༌པ། 22ཨོ་ཉི་ཨ་དེན་གེ་ ན་ག་ཨོ་ཐ་ངན་པ་མི་ཁཱན་ སྡིག་པ་གེ་ལོག༌ཅོ། ཨུ་ཐུ་ད་བུ་ ངན་པ་མི་ཝ་ཨ་དེན་གེ་ བཤགས་པ་གནང་ཤོ་དག་ཉི་ གཙོ་བོ་ག་ཏཱན་ སྨོན་ལམ་ཞུའི། 23ཧང་ཡ་དག་ནེ་ལ་ ཇི་གི་ནཱན་ ཁ་ལུ་གི་ཕུང་མ་ཐོང༌ལ། ཉི་སྡིག་པ་ག་ ཁ་ཤོང་ག་ཚུད་པ་ལ་དག༌ཉི།
24སི་མོན་གི་ཞུ་ཝ་ལ་ ནཱན་གི་གསུངས་ཁཱན་བ་ ཇ་ག་ཐུང་ཀ་ མ་ཇུང་ཆེན་དག་ཉི་ ཇ་ག་དེན་གེ་ གཙོ་བོ་ག་ཏཱན་ སྨོན་ལམ་ཞུན་གནང་ཤོ་དག༌ཉི།
25པ་ཏྲུས་དང་ཡུ་ཧན་ན་གི་ གཙོ་བོ་ག་ཀོར་གེ་ འཛོམས་དཔང་ཨན་ཐཱན་ གསུང་བཤད་ཏེན་གེ་ རོག་ཉིག་ཙིང་ ཡ་རུ་ཤ་ལེམ་ག་ ལོག་ཉི་བྱོན་མ༌ལ། ལམ་ཁོན་རོག་ཉིག་ཙིང་གི་ ས་མ་རི་ཡ་ག་ དུང་མང་པུ་ཐུར་ག་ འཐེན་ལེག་པུ་བཤད་པ༌ལ༎
ཕི་ལིབ་དང་ ཨི་ཐི་ཡོ་པི་ཡ་ག་འགོ་དཔོན།
26གཙོ་བོ་ག་ཞིང་ཁམས་ག་འཐེན་པ་གི་ ཕི་ལིབ་ག་གསུངས་མ་ལ་ ག་ཐིང་ཐཱན་ ལྷོ་ཆོ་ལོ་ཀ་ཆོ་ཁཱན་ ཡ་རུ་ཤ་ལེམ་གེ་ ག་ཇ་ག་དི་ཁཱན་ ལམ་ག་ཏཱན་དི་ཨ༌ཉི། (ཨུ་ཉུ་ཤོ་ ས་ཏོང་པ་ག་ལམ་གི༌ལ།) 27-28ཉི་རོག་ ག་ཐིང་ཐཱན་ དི་ཝ༌ལ། ཨོམ་ ཨི་ཐི་ཡོ་པི་ཡ་ག་ཨ་ཞེ་ག་ རྒྱུ་ནོར་ལོངས་སྤྱོད་ ཐམས་ཅན་རང་ བདག་འཛིན་ཨ་ཁཱན་ འགོ་དཔོན་ཆི་ལུ་ཐུར་ རོ་ཀ་གཟིམ་ཅུང་ག་ཏཱན་ བྱོན་ཅ་གི་ཝ༌ལ། རོག་ཤོ་ དཀོན་མཆོག་ག་ མགུར་མ་ཞུ་ལེ་དེན་གེ་ ཡ་རུ་ཤ་ལེམ་ག་ བྱོན་མ་ཆོ་ཝ༌ལ། ཉི་རོག་ རོ་ཀ་ཀུར་ཏ་ག་རི་ཐུང་ཀ་བཞུགས་ཉི་ ལོག་ཉི་ རོ་ཀ་གཟིམ་ཅུང་ག་ བྱོན་ཅ་ཨ་ཉི་ ལུང་བསྟན་པ་ ཡ་ཤའི་ཡ་ག་ དཔེ་ཆ་ལྷག་ཉི་རང་ བྱོན་ཅ་གི་ཝ༌ལ།
29དམ་པའི་ཐུགས་ཉིད་གི་ ཕི་ལིབ་ག་ གསུངས་མ་ལ་ ཨོ་ཉ་ཀུར་ཏ་ག་རི་ ར་ག་དི་ཉི་ ཨོ་ཉ་ར་ག་ཨ་ཉི་ཆོའི་ཨ༌ཉི།
30ཉི་ག་ཐིང་ཐཱན་ ཕི་ལིབ་བྱོན་མ༌ལ། ཉི་ཕི་ལིབ་ ཀུར་ཏ་ག་རི་ར་ག་ཏཱན་ ཇུག་ཉི་བྱོན་ཐཱན་ གཟིགས་པ་ཀབ་ཉི་ ཨོ་ཉ་སོ་ངོ་གི་ ལུང་བསྟན་པ་ཡ་ཤའི་ཡ་ག་ དཔེ་ཆ་ལྷག་པ་ག་ ན་ཐ་ཝ༌ལ། ཕི་ལིབ་གི་ རོ་ཀ་ཇི་མ་ལ་ ནཱན་གི་ལྷག་ཁཱན་ཁེ་པ་ ཧ་གོ་ན་སྨོ་ཨ༌ཉི།
31ཨོ་ཉ་འགོ་དཔོན་གི་ ལན་གནང་མ་ལ་ བཱརའ་སོ་ངོ་ཐུར་གི་ དེན་ཐ་ཁྲེ་ཉི་ མ་ག་ཝ་སག་པུ་ ཇི་གི་ཧང་ཏེན་ ཧ་གོ་ལེ་ཡ་དག༌ཉི། ཉི་རོ་ཀི་ཕི་ལིབ་ ག་རཱན་ཐཱན་ རོག་ཀབ་ཉི་ བཞུགས་པེ་བི་ཝ༌ལ།
32རོག་ལྷག་ཁཱན་ རིམ་པང་ཁེ་པ་ ཨུ་ཐུ་གི་ཝ་ལ་
རོག་ཤོ་ ཤེ་ལེ་ག་བུ་ཁཱན་ ཤི་ཤ་ད་བུ་གི་ཝ་ཆོ༌ཝ། ཉི་རོག་ཤོ་ མི་མེག་པ་ཀབ་ཉི་ ཀཱན་མ་ཇིག་ཁཱན་ ཤི་ཤ་ད་བུ་ཆོ༌ཝ། རོ་ཀི་ཚིག་ཐུར་བུ་ ཧང་རང་མ་གསུངས་ཤི། 33རོག་གནམ་མེད་ས་མེད་ ངི་ནང་ཁུ་ལེ་བི༌ཝ། ཉི་རོ་ཀ་ཆཱས་མ་ཐྲང་པ༌ལ། རོ་ཀ་ཚེ་ཁེ་པ་ ཨོ་ཐ་འཛམ་གླིང་གེ་ བུ་ཝ་ཨ་དེན་གེ་ རོ་ཀ་རྒྱུད་པ་ཀོར་གེ་ ཨི་བི་གི་ ཆཱས་ཨ་ལེ་རེ་བེ་ཡ་#8:33 ཡ་ཤའི་ཡ་ག་དཔེ་ཆ་ 53:7, 8 དག༌ཉི།
34འགོ་དཔོན་གི་ ཕི་ལིབ་ག་ཇི་མ་ལ་ ཇ་ག་ཡེག་ཅོ་ ལུང་བསྟན་པ་གི་ ཨི་བི་ག་ཀོར་གེ་ གསུངས་ལ་ཡ། རོག་རོག་ཏེན་ག་ཀོར་གེ་སྨོ་ བཱརའ་ག་ཀོར་གེ་ཡ་ཨ༌ཉི། 35ཕི་ལིབ་གི་ གསུངས་མེ་གོ་ཙུག་པ༌ལ། ཨོ་ཐ་གསུང་རབ་གེ་གོ་ཙུག་ཉི་ རོ་ཀི་ཨོ་ཉ་འགོ་དཔོན་ག་ ཡི་ཤུ་ག་ཀོར་གེ་ འཐེན་ལེག་པུ་བཤད་པ༌ལ།
36-37རོག་ཏེ་བ་ ལམ་ཁོན་བྱོན་ཅ་ཨ་ཉི་ རི་ད་སུར་ཆོ་ཁཱན་ ས་ཆ་ཐུར་ག་ཕེབས་པ༌ལ། ཉི་འགོ་དཔོན་གི་ གསུངས་མ་ལ་ གཟིགས་ཅོ་ ཨོ་ཐ་རི༌ལ། ཇང་ཁྲུས་གསོར་ཞུ་ལེ་ག་ ཨི་བི་གི་ ཁག་པེ་རེ་བེ་ཡ་ཨ༌ཉི། 38འགོ་དཔོན་གི་ ཀུར་ཏ་ག་རི་ནོང་ཤོ་དག་ཉི་ བཀའ་གནང་མ༌ལ། ཉི་རོག་དང་ཕི་ལིབ་ དོང་རི་ནང་ཀ་ནུབ་ཏེན་གེ་ ཕི་ལིབ་གི་ རོ་ཀ་ཁྲུས་གསོར་གནང་མ༌ལ།
39རོག་ཉིག་ཙིང་ རི་ནང་ཀེ་ཕིས་ཀ་ཤོ་ལ་ཀབ་ཉི་ གཙོ་བོ་ག་ཐུགས་ཉིད་གི་ ཕི་ལིབ་བསྣམས་པ༌ལ། ཉི་གེ་ འགོ་དཔོན་གི་ ཕི་ལིབ་ལོག་ཉི་ མ་མཇལ་བ༌ལ། ཨོ་ཉེ་རང་གི་ནེ་བུ་ རོག་གནམ་མེད་ས་མེད་ ཤོ་ནང་ཕེ་ཉི་རང་ གཟིམ་ཅུང་ག་ཏཱན་ བྱོན་མ༌ལ། 40ཕི་ལིབ་ ཨཤ་དོ་ད་དག་ས་ག་ཕེབས་པ༌ལ། ཉི་རོག་ཀའི་ས་རི་ཡ་ག་ མ་ཕེབས་པ་སག་པུ་ ཁྲོམ་ཐམས་ཅན་ག་ འཐེན་ལེག་པུ་བཤད་ཉི་རང་ བྱོན་མ༌ལ༎
Currently Selected:
མཛད༌པ། 8: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
