ཡུ་ཧན་ན། 11

ལ་ཇ་རཱས་ཤི་ཝ༌ལ།

1སོ་ངོ་ག་མིང་ ལ་ཇ་རཱས་དག་ཁཱན་ཐུར་ མར་བ་ཅ་གི་ཝ༌ལ། ཉི་རོག་ཤོ་ བེ་ཐ་ནི་ཡ་དག་ས་ག་ རོ་ཀ་ཨ་ན་མ་རི་ཡམ་དང་ མར་ཐ་ཀབ་ཉི་ཆོན་ཅ་གི་ཝ༌ལ། 2(ཤེར་སུང་སུང་ནམ་ཁཱན་སི་ཁེ་པ་ གཙོ་བོ་ག་ཞབས་ག་སོག་ཐཱན་ རོ་ཀ་ཚམ་གི་ཨ་ཉི་ཕག་ཁཱན་ མ་རི་ཡམ་ག་ཀོ་ཏ་ ལ་ཇ་རཱས་མར་བ་ཅ་གི་ཝ༌ལ།) 3ཨོ་ཉི་ཨ་དེན་གེ་ རོག་ན་ཉིང་ཉིག་ཙིང་གི་ ཡི་ཤུ་ག་འཐེན་ཀེ་ཉི་ཞུ་ཝ་ལ་ གཙོ་བོ་ ནཱན་གི་ཕང་ཁཱན་ཁེ་པ་ མར་བ་ཅ་དག༌ཉི།

4ཡི་ཤུ་གི་ ཨོ་ཉ་ཀོར་གེ་མཁྱེན་ཉི་ གསུངས་མ་ལ་ ཨོ་ཐ་ན་ཚ་གི་ ཤི་ལེ་མ་རིག༌པ། དག་པ་ཀབ་ཉི་ ཨོ་ཐ་ན་ཚ་ཤོ་ དཀོན་མཆོག་ག་ གཟི་བརྗིད་ག་དེན་གེ་གི༌ལ། ཉི་ཤ་ ཨོ་ཐ་ན་ཚ་ག་ཐུང་ཀེ་ཨ་ཉི་ དཀོན་མཆོག་ག་ཟ་གི་བུ་ གཟི་བརྗིད་ཉོང་པེ་དག༌ཉི། 5ཡི་ཤུ་གི་ མར་ཐ་དང་ རོ་ཀ་ཨུ་ས་ ཉི་ལ་ཇ་རཱས་ཕང་ཅ་གི་ཝ༌ལ། 6ཨོ་ཉེ་རང་གི་ནེ་བུ་ ཡི་ཤུ་གི་ ལ་ཇ་རཱས་མར་བ་ཅ་དག་ཉི་ མཁྱེན་དེན་གེ་ རོག་བཞུགས་ས་ག་ ཨོམ་ཆང་རང་ ནོང་ཉིག་ཙིང་བཞུགས་པ༌ལ།

7ཉི་གེ་ རོ་ཀི་ རོ་ཀ་སློ་མ་བ་ཀ་ གསུངས་མ་ལ་ ཨ་ཧ་བ་ལོག་ཉི་རང་ ཡ་ཧུ་དི་ཡ་ག་ཏཱན་དི་ཁེ་དག༌ཉི།

8སློ་མ་བ་ཀི་ཞུ་ཝ་ལ་ སློབ་དཔོན་ ནོང་ཉིག་ཙིང་སམ་ཕང་གེ་གོ་མ་ཤ་ ཡ་ཧུ་དི་ཡ་ག་ ཡ་ཧུ་དི་པ་བ་ཀི་ ན་ག་ལུ་ཤི་དྲོ་མེ་མིག་པ་ཕི༌ཝ། ཨོ་ཉེ་རང་གི་ནེ་བུ་ ནཱན་ལོག་ཉི་ཡ་ཧུ་དི་ཡ་ག་ བྱོན་མེ་སྨོ་དག༌ཉི།

9ཡི་ཤུ་གི་ རོག་ཏེ་བ་ཀ་ལན་གནང་ཉི་ གསུངས་མ་ལ་ ངབ་ཀ་ཆུ་ཚོད་ སོང་ཉིག་ཙིང་ཅ་མང་གི་སྨོ། ཉི་ངབ་ཀ་དང་ཁཱན་བ་ ཐ་པ་ཐོ་པོ་ཨ་ལུ་མཱན༌ཅ། ཧང་ཡ་དག་ནེ་ལ་ རོག་ཏེ་བ་ཀབ་ཉི་ འཛམ་གླིང་ག་འོད་ཟེར༌ཅ། 10དག་པ་ཀབ་ཉི་ བི་ནང་ག་དང་ཁཱན་བ་ ཐ་པ་ཐོ་པོ་ཨན༌ཅ། ཧང་ཡ་དག་ནེ་ལ་ རོག་ཏེ་བ་ཀབ་ཉི་ འོད་ཟེར་ཨོ་ཕུ་མཱན་ཅ་དག༌ཉི།

11ཨོ་ཐེན་གསུངས་ཉི་ཆུམ་དེན་གེ་ རོ་ཀི་ རོག་ཏེ་བ་ཀ་གསུངས་མ་ལ་ ཨ་ཧ་ཇ་རོ་ ལ་ཇ་རཱས་མི་ནང་དི་ཝ༌ལ། དག་པ་ཀབ་ཉི་ ཇང་རོག་ཚོར་བེ་ག་དི་ལེ་དག༌ཉི།

12གཙོ་བོ་ རོག་མི་ནང་དི་ནེ་ཏ་ དྲག་པེ་དག་ཉི་ རོ་ཀ་སློ་མ་བ་ཀི་ རོ་ཀ་ཞུ་ཝ༌ལ། 13ཡི་ཤུ་གི་ ལ་ཇ་རཱས་ཤི་ཝ་ཀོར་གེ་ གསུངས་མ་ཆོ་ཝ༌ལ། དག་པ་ཀབ་ཉི་ རོག་ཏེ་བ་ཀི་མི་ཝ་ལ་ ལ་ཇ་རཱས་ཡིབ་ཉི་ མི་ནང་དི་ཝ་ཨོ་ཕེ་ལ་དག༌ཉི།

14ཨོ་ཉི་ཨ་དེན་གེ་ རོ་ཀི་ རོག་ཏེ་བ་ཀ་ཐྲང་ཉི་རང་ གསུངས་མ་ལ་ ལ་ཇ་རཱས་ཤི༌ཝ། 15ཇང་རོག་ཀབ་ཉི་ མ་ཆོ་ཝ་ཨ་དེན་གེ་ ན་ཧ་ཡོར་ཀེ་ ཇང་ཤོ་ནང་ཕེ་ཝ༌ཅ། ཧང་ཡ་དག་ནེ་ལ་ ན་ཤི་ ཇ་ག་ཏཱན་དད་པ་ཨ༌ལེ། དག་པ་ཀབ་ཉི་ ཨ་ཧ་བ་ རོ་ཀ་བཱརང་ཀ་ དི་ཁེ་དག༌ཉི།

16ཙེ་མ་དག་ཉི་ར་ཁཱན་ ཐོ་མ་གི་ བཱརའ་སློ་མ་བ་ཀ་ཡེག་པ་ལ་ རོག་ཀབ་ཉི་ཤི་ལེ་དེན་གེ་ ཨ་ཧ་བ་བུ་དི་ཁེ་དག༌ཉི༎

ཡི་ཤུ་གི་ཨ་ན་ཉིག་ཙིང་ག་ སེམས་གསོ་ཨ་ཉི་གནང་མ༌ལ།

17ཡི་ཤུ་ཕེབས་པ་ཀབ་ཉི་ ལ་ཇ་རཱས་དུར་ནང་ཀ་ཙུག་ཉི་ ངམ་བི་ནང་ ཕིཤི་དི་ཝ་ཅ་གི་ཝ༌ལ། 18ཉི་ཡ་རུ་ཤ་ལེམ་གེ་ བེ་ཐ་ནི་ཡ་ག་ཅམ་ཀ་ ཀི་ལོ་མི་ཊར་སམ་བུ་ མཱན་ཅ་གི་ཝ༌ལ། 19ཉི་ཡ་ཧུ་དི་པ་མང་པུ་ཐུར་ རོག་ཉིག་ཙིང་ག་ཡུང་ ཤི་ཝ་ཨ་དེན་གེ་ མ་རི་ཡམ་དང་མར་ཐ་ག་ སེམས་གསོ་ཨ་ལེ་ག་ ཤེག་པ་ཅ་གི་ཝ༌ལ། 20ཡི་ཤུ་བྱོན་ལ་དག་ཉི་ ན་ཐ་ལ་ཀབ་ཉི་ ཡི་ཤུ་ཞུ་ལེ་དེན་གེ་ མར་ཐ་ཕིས་ཀ་ཏཱན་དི་ཝ༌ལ། དག་པ་ཀབ་ཉི་ མ་རི་ཡམ་ཤོ་ ཕའི་ནང་ཀ་རང་ཆོ་ཝ༌ལ།

21མར་ཐ་གི་ ཡི་ཤུ་ག་ཞུ་ཝ་ལ་ གཙོ་བོ་ ནཱན་ཐ་བཞུགས་པ་ཆོ་ནེ་ལ་ ཇ་ག་ཡུང་མ་ཤི་ལེ་ཆོ༌ཝ། 22དག་པ་ཀབ་ཉི་ ནཱན་གི་ ཧང་ཞུ་ཝ་ཐུར་ དཀོན་མཆོག་གི་གནང་མེ་དག་ཉི་ ཇི་གི་སེན་ཅ་དག༌ཉི།

23ཡི་ཤུ་གི་ རོ་ཀ་གསུངས་མ་ལ་ ན་ག་ཡུང་ལོག་ཉི་རང་ཝུ་ལེ་དག༌ཉི།

24ནོང་མཇུག་དུས་ག་ནོང་ཀ་ ཤི་ཁཱན་བ་གསོན་པོ་ཨ་ཉི་ ཝུ་ལེ་གང་ཀ་ རོག་ལོག་ཉི་ཝུ་ལེ་ཨ་ཉི་ ཇི་གི་སེན་ཅ་དག་ཉི་ ཞུ་ལ་ཀབ་ཉི་ 25ཡི་ཤུ་གི་ རོ་ཀ་ ཇང་ཤོ་ གསོན་པོ་ཨ་ཉི་ཝུ་ཁཱན་དང་ ཚེ་གི༌ལ། ཉི་ཇ་ག་དད་པ་ཨ་ཁཱན་ཁེ་པ་ ཤིན་ཐཱན་རང་གི་ནེ་བུ་ རོག་གསོན་པོ་ཨ་ཉི་ཆོ༌ལེ། 26ཉི་གསོན་པོ་ཨ་ཉི་ཆོ་ཁཱན་གི་ ཇ་ག་དད་པ་ཨ་ནེ་ལ་ ཨོ་ཉ་སོ་ངོ་ཁེ་པ་ ཧ་ལ་རང་མ་ཤི༌ལ། ནཱན་གི་ཨོ་ཐ་ཆཱས་ག་ དད་པ་ཨན་ཅ་སྨོ་དག་ཉི་ གསུངས་མ༌ལ།

27མར་ཐ་གི་ རོ་ཀ་ཞུ་ཝ༌ལ། ཇི་གི་དད་པ་ཨན་ཅ་ གཙོ་བོ། ནཱན་ཤོ་ འཛམ་གླིང་ག་བྱོན་མེ་ཁེ་ཁཱན་ ཁིརིས་ དཀོན་མཆོག་ག་ སྲས་གི་ལ་དག༌ཉི།

28མར་ཐ་གི་ ཨོ་ཐེན་ཞུ་དེན་གེ་ ལོག་ཉི་ནང་ཀ་དིན་ཐཱན་ རོ་ཀ་ན་ཉིང་མ་རི་ཡམ་ རཱན་ཐཱན་ཡེག་པ་ལ་ སློབ་དཔོན་ ཐ་བྱོན་མ༌ཅ། ཉི་རོ་ཀི་ནཱན་ར་ན་དག༌ཉི། 29ཉི་མ་རི་ཡམ་གི་ ཨོ་ཐེན་ན་ཐ་ལ་ཀབ་ཉི་ ཐིང་མ་ཐྲེ་ཀེ་རང་ རོ་ཀ་ཕྱག་དབང་བཅག་པེ་དེན་གེ་ དི་ཝ༌ལ། 30ཉི་ཡི་ཤུ་དུང་ནང་ཀ་མ་བྱོན་མཱན་ མར་ཐ་གི་མཇལ་ས་ག་རང་ བཞུགས་པ་ཅ་གི་ཝ༌ལ། 31ཉི་མ་རི་ཡམ་ག་ སེམས་གསོ་ཨ་ཉི་ ནང་ཀ་ཆོ་ཁཱན་ ཡ་ཧུ་དི་པ་བ་ཀི་ རོག་ཐིང་མ་ཐྲེ་ཀེ་རང་ དོ་ཟོ་དོ་ཟོ་ དི་ཝ་ཐོང་མ་ཀབ་ཉི་ རོག་དུར་ག་ཏཱན་ གེ་ཕེ་དེན་གེ་ དི་ཝ་ད་བུ་ཐོང་ཉི་ རོག་ཏེ་བ་བུ་ རོ་ཀ་ཚིང་ཁོན་ཉི་དི་ཝ༌ལ།

32ཉི་མ་རི་ཡམ་ ཡི་ཤུ་བཞུགས་ས་ག་ཤེག་ཏེན་གེ་ ཡི་ཤུ་མཇལ་བ༌ལ། ཉི་རོ་ཀི་ ཡི་ཤུ་ག་ཞབས་ཀ་ ཕྱག་འཚལ་ཐཱན་ཞུ་ཝ་ལ་ གཙོ་བོ་ ནཱན་ཐ་ག་བཞུགས་པ་ཆོ་ནེ་ལ་ ཇ་ག་ཡུང་ མ་ཤི་ལེ་ཆོ་ཝ་དག༌ཉི།

33ཡི་ཤུ་གི་གཟིགས་པ་ཀབ་ཉི་ མ་རི་ཡམ་དང་ རོག་ཀབ་ཉི་ཨུ་ཁཱན་ ཡ་ཧུ་དི་པ་བ་ གེ་ཕ་ཐོང་ཉི་ རོག་གནམ་མེད་ས་མེད་ དགོངསམ་ཁྲེལ་ཉི་ ཐུགས་དོག་པ༌ལ། རོ་ཀ་རོ་ ཨོ་ག་ཐ་ཝ་ཅ་ཡ་དག་ཉི་ རོ་ཀི་ཇི་མ་ཀབ་ཉི་ 34ནཱན་བྱོན་ཐཱན་ གཟིགས་ཅོ་གཙོ་བོ་དག་ཉི་ རོག་ཉིག་ཙིང་གི་ཞུ་ཝ༌ལ།

35ཉི་ཡི་ཤུ་བཤུམས་པ༌ལ།

36ཡ་ཧུ་དི་པ་བ་ཀི་ཡེག་པ་ལ་ གོད་ཅོ་ རོ་ཀི་ལ་ཇ་རཱས་ ཧབ་ཏུར་ཕང་པ་ཆོ་ཝ་ལ་ཡ་དག༌ཉི།

37དག་པ་ཀབ་ཉི་ ཚེ་བང་གི་ཡེག་པ་ལ་ རོ་ཀི་མིང་ཀ་ན་ག་ མིང་བི་ལེ་རེ་བ་ཀབ་ཉི་ ཧང་རོ་ཀི་ལ་ཇ་རཱས་དྲག་ཉི་ ཤི་ལེ་མ་བི་ལཱན་ ཐ་ལེ་མར་བེ་ཆོ་ཝ་སྨོ་དག༌ཉི༎

ལ་ཇ་རཱས་ཤི་ཝ་གེ་ལོག་ཉི་ཝུ་ཝ༌ལ།

38ཉི་ཨོམ་ཆང་རང་ ཡི་ཤུ་གནམ་མེད་ས་མེད་ ཐུགས་དོག་པེ་ཨོ་ཕ༌ལ། ཉི་རོག་དུར་ག་ཕེབས་པ་ཀབ་ཉི་ ཕུང་ཀ་པང་ག་ དུར་ཆོ་ཝ་གི་ཝ༌ལ། ཉི་ཨོ་ཉ་ཀོ་ག་ ལུང་ཐུར་ཐ་ཝ་ཅ་གི་ཝ༌ལ། 39ཨོ་ཉ་ལུང་ ཀོ་གེ་སིག་ཅོ་དག་ཉི་ ཡི་ཤུ་གི་གསུངས་མ་ཀབ་ཉི་ ཤི་ཁཱན་ག་ཨ་ན་ མར་ཐ་གི་ཞུ་ཝ་ལ་ གཙོ་བོ་ ཨོམ་ཤོ་ གནམ་མེད་ས་མེད་ ཤེར་ན་མ་རི་ཝ་ཨོ་ཕེ། ཧང་ཡ་དག་ནེ་ལ་ རོག་དུར་ནང་ཀ་ཙུག་ཉི་ ནོང་ཕིཤི་དི་ཝ་དག༌ཉི།

40ཉི་ཡི་ཤུ་གི་གསུངས་མ་ལ་ ནཱན་གི་དད་པ་ཨ་ནེ་ལ་ ནཱན་གི་ དཀོན་མཆོག་ག་གཟི་བརྗིད་ མཇལ་བེ་རེ་བེ་ཨ་ཉི་ ཇི་གི་ ན་ག་མ་ཡེག་ཅི་སྨོ་དག༌ཉི།

41རོག་ཏེ་བ་ཀི་ ཨོ་ཉ་ལུང་སིག་པ༌ལ། ཉི་ཡི་ཤུ་གི་ ག་ཏ་གཟིགས་ཐཱན་ཞུ་ཝ་ལ་ ཨ་པ་ཇི་གི་ཞུ་ཁཱན་ཁེ་པ་ ནཱན་གི་སྙན་གསེང་པ་ཨ་དེན་གེ་ ཇི་གི་ ན་ག་བཀའ་དྲིན་བསམ༌ཅ། 42ནཱན་གི་ཧ་ལ་ཨ་ནེ་བུ་ ཇི་གི་ཞུ་ཁཱན་ཁེ་པ་ སྙན་གསེང་ཅ་དག་ཉི་ ཇི་གི་སེན༌ཅ། དག་པ་ཀབ་ཉི་ ཇི་གི་ཨོ་ཐེན་ཞུ་ཁཱན་ཤོ་ ཇང་ནཱན་གི་ ཀུན་ཏི་ཝ་གི་ཝ་ལ་དག་ཉི་ ཨོ་ཐ་ག་ཐིང་ཉི་ཆོ་ཁཱན་ སོ་ངོ་བ་ཀི་སེན་ཆེན་དག་པ་གི་གི༌ལ།

43ཉི་ཡི་ཤུ་གི་ གསུང་སྐད་ཆི་ལུ་ཨ་ཉི་ ལ་ཇ་རཱས་ ཕིས་ཀ་ཤོའི་དག་ཉི་ གསུངས་མ༌ལ། 44ཉི་ཤི་ཁཱན་སོ་ངོ་ཝུན་ཐཱན་ ཕིས་ཀ་ཤོ་ཉི་ཨོ་ཕ༌ལ། རོ་ཀ་བི་ ག་དང་དང་ཟུག་ ཐམས་ཅན་རང་ ཁ་ཤ་བ་ལིང་མིན་གི་ ཆོ་མ་ཅ་གི་ཝ༌ལ།

རོ་ཀེ་ཁ་ཤ་བ་ཕེག་ཅོ་ ཉི་རོག་དི་ལེ་བི་དག་ཉི་ ཡི་ཤུ་གི་གསུངས་མ༌ལ༎

ཡི་ཤུ་བཀྲོངས་མེ་ག་འཆར་གཞི།

45ཨོ་ཐ་བ་ཇུང་མ་ཐོང་ཉི་ མ་རི་ཡམ་ཀབ་ཉི་ཆོ་ཁཱན་ ཡ་ཧུ་དི་པ་མང་པུ་ཐུར་གི་ ཡི་ཤུ་ག་དད༌པ་ཨ་ཝ༌ལ། 46དག་པ་ཀབ་ཉི་ རོག་ཏེ་བ་ཀ་པོང་ཀེ་ ཚེ་བང་གི་ ཕ་རི་སི་པ་བ་ཀ་བཱརང་ཀ་ དིན་ཐཱན་ ཡི་ཤུ་གི་མཛད་ཁཱན་ག་ཀོར་གེ་ ཞུ་ལོག་ཕི་ཝ༌ལ། 47ཉི་བླ་མ་ཆི་ལུ་བ་དང་ ཕ་རི་སི་པ་བ་ཀི་ ཚོགས་འདུ་ཆི་ལུ་ག་ ཚོགས་པ་བ་ཛོ་མེ་རིག་པ༌ལ།

ཉི་རོག་ཏེ་ནང་དོ་ཡེག་པ་ལ་ ཨ་ཤི་ཧང་ཨ་ལེ་ཁེ་ལེ་ཡ། ཨོ་ཐ་སོ་ངོ་གི་ རྫུ་འཕྲུལ་ག་རྟགས་མཚན་བ་ མང་པུ་ཐུར་གེན༌ལ། 48ཨ་ཤི་རོག་ ཨོ་ཐེན་རང་ཐུབ་ཐ་ནེ་ལ་ སོ་ངོ་ཐམས་ཅན་གི་ རོ་ཀ་དད་པ་ཨ༌ལེ། ཉི་རོ་མི་ག་དམག་མི་བ་ཀི་ཨུན་ཐཱན་ ཨ་ཧ་མཆོད་ཁང་དང་ རྒྱལ་ཁབ་ཉིག་ཙིང་རང་ མེ་པ་ཕིན་གེ་མེ་དག་ཉི་ ཡེག་པ༌ལ།

49ཉི་རོག་ཏེ་བ་ཀ་པོང་ཀེ་ ཀའི་ཡ་ཕ་དག་ཁཱན་ཤོ་ ཨོ་ཉ་ཉིང་ཀ་དེན་གེ་ བླ་མ་གོང་མ་གི་ཝ་ཆོ་ཝ༌ལ། རོ་ཀི་ རོག་ཏེ་བ་ཀ་ཡེག་པ་ལ་ ན་ཤི་ཧང་རང་སེ་ལུ་མ༌ལ། 50རྒྱལ་ཁབ་ག་ སོ་ངོ་ཐམས་ཅན་རང་ ཤི་ཝ་གེ་ཏ་ སོ་ངོ་ཐུར་ ཤི་ཝ་དྲག་པེ་དག་ཉི་ ན་ཤི་སེ་ལུ་མ་ལ་སྨོ་དག༌ཉི།

51ཨོ་ཐ་ཆཱས་ཁེ་པ་ རོག་ཏེན་གི་ཡེག་པ་མང་གི་ཝ་ རོག་ཤོ་ ཨོ་ཉ་ཉིང་ཀ་དེན་གེ་ བླ་མ་གོང་མ་གི་ཝ་ཨ་དེན་གེ་ ཡ་ཧུ་དི་པ་བ་ཀ་དེན་གེ་ ཡི་ཤུ་གཤགས་པེ་ཁེ་ལེ་དག་ཉི་ ལུང་བསྟན་མ་གི་ཝ་ཆོ་ཝ༌ལ། 52ཉི་ཡ་ཧུ་དི་པ་བ་ཀ་དེན་གེ་ཤ་ མང་གི་ཝ་ ཏོར་ཉི་དི་ཁཱན་ དཀོན་མཆོག་ག་སྲས་སྲས་མོ་བ་བུ་ ཏབ་ཐུར་ཕཱན་ཐཱན་ ཐུར་ཅོད་པེ་གི་ཝ་ཀོར་གེ་ ལུང་བསྟན་མ་ཆོ་ཝ༌ལ། 53ཨོ་ཉི་ཨ་དེན་གེ་ ཨོ་ཉ་ནོང་ཀེ་ག་ཏཱན་ རོག་ཏེ་བ་ཀི་ ཡི་ཤུ་བཀྲོངས་མེ་ག་ འཆར་གཞི་ཙ་མ༌ལ།

54ཨོ་ཉི་ཨ་དེན་གེ་ ས་ཆ་ཡ་ཧུ་དི་ཡ་ག་ ཡི་ཤུ་ ཐམས་ཅན་གི་སེ་ཝ་ཨ་ཉི་ བྱོན་མེ་ནོར་བ༌ལ། ལག་ཏང་ ས་ཏོང་པ་ར་ག་ཆོ་ཁཱན་ ཨེ་ཕརའ་ཨེམ་དག་ཁཱན་ དུང་ག་བྱོན་ཐཱན་ རོ་ཀ་སློ་མ་བ་ཀབ་ཉི་ བཞུགས་པ༌ལ།

55ཉི་གོག་ཉི་དི་ཁཱན་ དུས་ཆེན་རེན་པ་ཀབ་ཉི་ དུས་ཆེན་གེ་གོ་མ་ ཙང་མ་ཅོད་པེ་དེན་གེ་ དུ་ཁ་ཆོ་ཁཱན་སོ་ངོ་མང་པུ་ཐུར་ ཡ་རུ་ཤ་ལེམ་ག་ཤེག་པ༌ལ། 56རོག་ཏེ་བ་ཀི་ ཡི་ཤུ་མཇལ་བེ་ ལ་མ་ཅ་གི་ཝ༌ལ། ཉི་རོག་ཏེ་བ་ མཆོད་ཁང་ནང་ཀ་ཛོམ་ཅ་ཨ་ཉི་ ཐུར་གི་ཐུར་ག་ཇི་མ་ལ་ ནཱན་གི་ཨ་ནེ་ལ་ ཧང་ཏེན་མིན་ཅ་ཡ། རོག་དུས་ཆེན་ཙི་ལེ་ག་ བྱོན་དུ་སྨོ་དག༌ཉི། 57དག་པ་ཀབ་ཉི་ རོག་ཏེ་བ་ཀི་ ཡི་ཤུ་ཙུང་མེ་དེན་གེ་ ཨི་བི་གི་ ཡི་ཤུ་ཐོང་མ་ཐུར་ ཡེག་པེ་ཁེ་ལེ་དག་ཉི་ བླ་མ་ཆི་ལུ་བ་དང་ ཕ་རི་སི་པ་བ་ཀི་ བཀའ་གནང་མ་ཅ་གི་ཝ༌ལ༎

Currently Selected:

ཡུ་ཧན་ན། 11: TNTB

Highlight

Copy