ཡུ་ཧན་ན། 12

བེ་ཐ་ནི་ཡ་ག།

1གོག་ཉི་དི་ཝ་ག་དུས་ཆེན་ཙི་ལེ་ག་ ནོང་ཁུང་ཅ་དག་པ་ཀབ་ཉི་ ཡི་ཤུ་བེ་ཐ་ནི་ཡ་ག་ཕེབས་པ༌ལ། ཉི་ཡི་ཤུ་གི་ཤི་ཝ་གེ་ ལོག་ཉི་ཝུན་གནང་ཁཱན་ ལ་ཇ་རཱས་ བེ་ཐ་ནི་ཡ་ག་ཆོན་ཅ་གི་ཝ༌ལ། 2ཉི་ཡི་ཤུ་ག་གུས་ཞབས་ཨ་ཉི་ ངེ་རི་ག་ཚོགས་ ཅམ་པ་ཅ་གི་ཝ༌ལ། མར་ཐ་གི་དྲང་མ༌ལ། ཉི་ལ་ཇ་རཱས་ཤོ་ བཱརའ་ཤི་མིན་བ་ཀབ་ཉི་ དོང་ཏཱན་གུབ་ཀ་ ལང་མ་ཅ་གི་ཝ༌ལ། 3ཉི་མ་རི་ཡམ་གི་ ཤེར་སུང་སུང་ནམ་ཁཱན་ སི་པ་ལང་ཐུར་ཤོན་ཐཱན་ ཡི་ཤུ་ག་ཞབས་ག་སོག་པ༌ལ། ཉི་རོ་ཀ་ཚམ་གི་ཨ་ཉི་ཕག་པ༌ལ། ཨོ་ཉ་སི་ཤོ་ གནམ་མེད་ས་མེད་ གོང་ཆི་ལུ་ཨ་ཁཱན་གི་ཝ་ཆོ་ཝ༌ལ། ཉི་ཕའི་ནང་ ཐམས་ཅན་རང་ ཨོ་ཉ་སི་གེ་ཤོ་ཁཱན་ ཤེར་སུང་སུང་གི་ཕུང་མ༌ལ།

4དག་པ་ཀབ་ཉི་ ཡི་ཤུ་ག་སློ་མ་བ་ཀ་པོང་ཀེ་ ཇུ་ཀེ་ རོ་ཀ་མགུ་སྐོར་ཕི་ཁཱན་ ཡ་ཧུ་ད་ ཨིས་ཀ་རི་ཡོད་དག་ཁཱན་གི་ ཁ་ཏང་ཉི་ཡེག་པ་ལ་ 5ཨོ་ཐ་སི་ཁེ་པ་ཙོང་ཐཱན་ ཨོ་ཉ་གེ་ཉོང་ཁཱན་ཏི་རུ་ཁེ་པ་ དུག་པུ་སོ་ངོ་བ་ཀ་ ཧང་ཨ་ཉི་མ་བིན་ཅ་ཡ། ཨོ་ཐ་སི་གི་ ཉིང་ཐུར་ག་ཏོ་ལོབ་ ཉོང་པེ་དག༌ཉི། 6ཉི་དུག་པུ་སོ་ངོ་བ་ ཕང་པ་ཨ་དེན་གེ་ ཨོ་ཐ་ཆཱས་ཡེག་པ་མང་གི་ཝ་ རོག་ཤོ་ དྲོ་ཝཱན་པ་གི་ཝ་ཨ་དེན་གེ་ ཨོ་ཐེན་ཡེག་པ་གི་ཝ༌ལ། ཧང་ཡ་དག་ནེ་ལ་ ཏི་རུ་ རོག་ཀབ་ཉི་ཐ་ཝ་ཨ་དེན་གེ་ རོག་ཏེན་ག་དེན་གེ་བུ་ ཨོ་ཉ་གེ་ ཁར་ཙ་ཕིན་ཅ་གི་ཝ༌ལ།

7ཡི་ཤུ་གི་གསུངས་མ་ལ་ རོ་ཀི་ཧང་ཨ་ཝ་ཐུར་ ཨ་ལེ་བི། ཇང་དུར་ནང་ཀ་ ཙུག་པེ་ག་ཅམ་པེ་དེན་གེ་ རོ་ཀི་ཨོ་ཐ་སི་ ཇ་ག་ཐུང་ཀ་ལུག་པ་གི༌ལ། 8ན་ཧ་བ་ཀབ་ཉི་ ཧ་ལ་ཨ་ནེ་བུ་ དུག་པུ་སོ་ངོ་ཨོ་ཕེ། དག་པ་ཀབ་ཉི་ ཇང་ཤོ་ ན་ཧ་བ་ཀབ་ཉི་ ཏ་བུ་རང་མ་ཆོ་ལ་དག༌ཉི།

9ཡི་ཤུ་བྱོན་མ་ལ་དག་ཉི་ ན་ཐ་ལ་ཀབ་ཉི་ སོ་ངོ་བ་ ཐམས་ཅན་རང་ ཡི་ཤུ་མཇལ་བེ་དེན་གེ་ ཛོ་མ༌ལ། ཉི་ཨུ་ཉུ་མ་ཚཱད་པ་ ཡི་ཤུ་གི་ ཤི་ཝ་གེ་ ལོག་ཉི་ཝུན་གནང་ཁཱན་ ལ་ཇ་རཱས་གོད་པེ་ག་ སེམས་ཨ་ཝ་ཅ་གི་ཝ༌ལ། 10ཨོ་ཉི་ཨ་དེན་གེ་ བླ་མ་ཆི་ལུ་བ་ཀི་ ལ་ཇ་རཱས་བུ་ཤེ་ལེ་ག་ འཆར་གཞི་ཙ་མ༌ལ། 11ཧང་ཡ་དག་ནེ་ལ་ རོ་ཀ་ཡོར་ཀེ་ ཡ་ཧུ་དི་པ་མང་པུ་ཐུར་གི་ བླ་མ་ཆི་ལུ་བ་ ཐུབ་ཐཱན་ཐཱན་ ཡི་ཤུ་ག་ དད་པ་ཨན་ཅ་གི་ཝ༌ལ༎

ཡི་ཤུ་ཡ་རུ་ཤ་ལེམ་ནང་ཀ་ བྱོན་མ༌ལ།

12ཉི་ནམ་ནིང་ད་བུ་ གོག་ཉི་དི་ཝ་ག་དུས་ཆེན་ ཙི་ལེ་དེན་གེ་ཨུ་ཁཱན་ སོ་ངོ་མང་པུ་ཐུར་གི་ ཡི་ཤུ་ཡ་རུ་ཤ་ལེམ་ག་ཏཱན་ བྱོན་ལ་དག་ཉི་ ན་ཐ་ཝ༌ལ། 13རོག་ཏེ་བ་ཀི་ པམ་ཤིང་ག་ ད་ཀ་བ་ཅཱད་ཉི་བུན་ཐཱན་ རོག་མཇལ་བེ་དེན་གེ་དི་ཝ༌ལ། རོག་ཏེ་བ་ཀི་ ཤ་དར་ཕི་ཉི་ཞུ་ཝ་ལ་

དཀོན་མཆོག་ག་ བསྟོད་པ་ཕུལ༌ཤོ།

ཉི་གཙོ་བོ་ག་མཚན་ག་བྱོན་ཁཱན་ཤོ་ བྱིན་རླབས་ཅན་གི༌ལ།#12:13 མགུར་མ་ག་དཔེ་ཆ་ 118:25,26 ཨིས་རེལ་ག་དཔོན་ཤོ་ བྱིན་རླབས་ཅན་གི་ལ་དག༌ཉི།

14གསུང་རབ་གེ་ཤོ་ཝ་དང་ཏུ་ཉི་ ཡི་ཤུ་གི་ བོང་བ་ཡོན་མ་ཐུར་ཐོང་ཉི་ ཨོ་ཉ་བོང་བ་ཐུང་ཀ་ ཕྱི་པ་བཞེས་ཉི་བྱོན་མ༌ལ།

15ཡོང་མ་ཁེ་ སི་ཡོན་ག་ཟ་མིན་བ་ གོད་ཅོ་ ན་ཧ་དཔོན་ བོང་བ་ཡོན་མ་ཐུར་ག་ཐུང་ཀ་ ཕྱི་པ་བཞེས་ཉི་བྱོན་ལ་#12:15 ཇ་ཀ་རི་ཡ་ག་དཔེ་ཆ་ 9:9 དག༌ཉི།

16གོ་མ་ཏ་ སློ་མ་བ་ཀི་ ཨོ་ཐ་ཀོར་གེ་ ཧང་རང་ ཧ་མ་གོ་ཝ་ཆོ་ཝ༌ལ། དག་པ་ཀབ་ཉི་ ཡི་ཤུ་ གཟི་བརྗིད་ནང་ཀ་བྱོན་དེན་གེ་ཤ་ རོག་ཏེ་བ་ཀི་ ཧ་གོ་ཝ༌ལ། གསུང་རབ་གེ་ རོ་ཀ་ཀོར་གེ་ ཨོ་ཐེན་ཤོ་ཝ་ཨ་དེན་གེ་ ཨུ་ཉུ་དང་ཏུ་ཉི་ རོག་ཏེ་བ་ཀི་ རོ་ཀ་དེན་གེ་ ཨ་ཝ་གི་ཝ་ལ་དག༌ཉི།

17ཉི་ཨོམ་ ཡི་ཤུ་གི་ ལ་ཇ་རཱས་ རོ་ཀ་དུར་གེ་ར་ཉི་ ཤི་ཝ་གེ་ལོག་ཉི་ ཝུན་གནང་མ་ག་ ཐོང་ཁཱན་བ་ཀི་ ཨོ་ཉ་ཀོར་གེ་ བཱརའ་སོ་ངོ་བ་ཀ་ ཡེག་ཉི་རང་ཆོན་ཅ་གི་ཝ༌ལ། 18ཨོ་ཉི་ཨ་དེན་གེ་ སོ་ངོ་མང་པུ་ཐུར་ རོག་མཇལ་བེ་ག་ དི་ཝ༌ལ། ཧང་ཡ་དག་ནེ་ལ་ རོ་ཀི་མཛད་ཁཱན་ རྫུ་འཕྲུལ་ཆི་ལུ་ག་ཀོར་གེ་ རོག་ཏེ་བ་ཀི་ ན་ཐ་ཝ་ཆོ་ཝ༌ལ། 19ཉི་ཕ་རི་སི་པ་བ་ཀི་ རོག་ཏེ་བ་ནང་དོ་ཆཱས་ཨ་ཉི་ ཐུར་གི་ཐུར་ག་ ཡེག་པ་ལ་ གོད་ཅོ་ལེ་ ཨ་ཧ་བ་ཕམ༌ལ། འཛམ་གླིང་ཐམས་ཅན་རང་ རོ་ཀ་ཚིང་ཚིང་དང་ལ་དག༌ཉི༎

ཡི་ཤུ་གི་ རོག་གཤགས་པེ་དག་ཉི་ གསུངས་མ༌ལ།

20དུས་ཆེན་ག་གང་ཀ་ ཡ་རུ་ཤ་ལེམ་ག་ གསོལ་ཝ་ཏ་པེ་དི་ཁཱན་བ་ཀ་པོང་ཀེ་ གིརིག་ཚེ་བང་ཅ་གི་ཝ༌ལ། 21ག་ལིལ་ག་ས་ཆ་ བེད་སེ་ད་ག་ ཕི་ལིབ་ག་བཱརང་ཀ་ཤེག་ཐཱན་ ཉི་རོག་ཏེ་བ་ཀི་ ཞུ་ཝ་ལ་ སློབ་དཔོན་ ཨ་ཧ་བ་ ཡི་ཤུ་མཇལ་བེ་ལ་མ་ཅ་དག༌ཉི། 22ཕི་ལིབ་གི་ ཨན་དྲི་ཡཱས་ག་ཡེག་ཉི་ ཉི་རོག་ཉིག་ཙིང་དོབ་ཉི་ ཨོ་ཉ་ཀོར་གེ་ ཡི་ཤུ་ག་ཞུ་ཝ༌ལ།

23ཡི་ཤུ་གི་ རོག་ཉིག་ཙིང་ག་ ལན་གནང་ཉི་གསུངས་མ་ལ་ སོ་ངོ་ག་ཟ་གི་ གཟི་བརྗིད་ཆི་ལུ་ཉོང་པེ་ག་ དུས་ཙུན་རེན༌པ། 24ཇི་གི་ ན་ཧ་དེན་པ་ཡེག་ཅ་ བོང་བུ་དང་ ས་ག་ཞུད་ཐཱན་ མ་ཤི་ཝ་སག་པུ་ ཐུར་གེ་ལག་ཉི་ རི་ལེ་རེ་བུ་མཱན༌ཅ། དག་པ་ཀབ་ཉི་ བོང་ག་ཁུ་ཤི་དེན་གེ་ཤ་ ཁུ་མང་པུ་ཐུར་ཤོ་ལེ་རེ༌ཅ། 25ཨོ་ཉི་ཨ་དེན་གེ་ ཨི་བི་གི་ རང་ཏེན་ག་ཚེ་ཕང་པ་ཐུར་ ཨོ་ཉ་སོ་ངོ་གི་ ཚེ་གེམ༌ཅ། ཉི་ཨི་བི་གི་ ཨོ་ཐ་འཛམ་གླིང་ག་ རང་ཏེན་ག་ཚེ་གེ་མ་ཐུར་ ཨོ་ཉ་སོ་ངོ་གི་ རོ་ཀ་ཚེ་ཁེ་པ་ མ་འགྱུར་བརྟན་པ་ག་དེན་གེ་ ཐ་ལེ་ཉོང༌ཅ། 26ཨི་བི་གི་ ཇ་ག་ཕྱག་ཞུ་ཝ་ཐུར་ ཇ་ག་ཚིང་ཚིང་ ཨོ་ཕེ་ཁེ༌ལེ། ཉི་ཇང་ཨོ་ག་ཆོ་ཝ་ཐུར་ ཇ་ག་གཡོག་པ་བུ་ཨོ་ཕེ། ཉི་ཇ་ག་ཨ་པ་གི་ ཇ་ག་ཕྱག་ཞུ་ཁཱན་ག་ བསྟོད་པ་ཕི༌ལེ།

27ཉི་ཨོམ་ ཇ་ག་སེམས་ མ་ཆག་པ་རི་ཝ༌ཅ། ཉི་ཇི་གི་ ཧང་ཞུ་ལེ་ཡ། ཇི་གི་ཨོ་ཐེན་ཞུ་ལེ་ ཨ་པ་ཨོ་ཐ་དུས་ཙུན་གེ་ ཇ་ག་སྐྱབས་ཨ་ཉི་གནང་ཤོ་དག༌ཉི། དག་པ་ཀབ་ཉི་ ཇང་ཤོ་དེན་ཆེན་རང་ ཨོ་ཐ་དུས་ཙུན་ག་དེན་གེ་ ཨོ་ཕ་གི༌ལ། 28ཨ་པ་ན་ག་མཚན་ག་ གཟི་བརྗིད་ཕི་ཉི་གནང་ཤོ་དག༌ཉི།

ཉི་ཞིང་ཁམས་གེ་ གསུང་སྐད་བྱོན་ཉི་ ཇི་གི་གཟི་བརྗིད་གེན་མ༌ཅ། ཉི་ཨོམ་ཆང་རང་ གཟི་བརྗིད་གེན་མེ་དག་ཉི་ གསུངས་མ༌ལ། 29ཨོ་ཉ་ཆོ་ཁཱན་སོ་ངོ་བ་ཀི་ ན་ཐ་ཉི་ཡེག་པ་ལ་ ཨུ་ཉུ་ཤོ་ མུང་ཕོག་པ་གི་ལ་དག༌ཉི། ཉི་ཚེ་བང་གི་ཨ་ནེ་ལ་ ཞིང་ཁམས་ག་འཐེན་པ་གི་ རོག་ཀབ་ཉི་ གསུང་གྲོས་མཛད་པ་གི་ལ་དག་ཉི་ ཡེག་པ༌ལ།

30ཨོ་ཐ་གསུང་སྐད་ཤོ་ ཇ་ག་དེན་གེ་མང་གི་ཝ་ ན་ཧ་ཕཱན་ཏོག་པེ་དེན་གེ་གི་ལ་དག་ཉི་ ཡི་ཤུ་གི་གསུངས་མ༌ལ། 31ཉི་ཨོམ་ཤོ་ ཨོ་ཐ་འཛམ་གླིང་ ཁྲིམས་ཅཱད་པེ་ག་ དུས་ཙུན་གི༌ལ། ཉི་ཨོམ་གི་ནེ་ལ་ ཨོ་ཐ་འཛམ་གླིང་ག་ རྒྱལ་སྲས་ཁོན་མེ་གི༌ལ། 32དག་པ་ཀབ་ཉི་ ཇང་འཛམ་གླིང་གེ་ ག་དུང་མ་ཀབ་ཉི་ ཇི་གི་སོ་ངོ་བ་ ཐམས་ཅན་རང་ ཇང་ཏེན་ག་བཱརང་ཀ་ཏཱན་ ཇང་པེ་དག་ཉི་ གསུངས་མ༌ལ། 33རོག་ཧང་ཏེན་ཨ་ཉི་ གཤགས་པེ་གི་ལ་སྨོ་ གེན་མེ་དེན་གེ་ རོ་ཀི་ཨོ་ཐེན་ གསུངས་མ་གི་ཝ༌ལ།

34སོ་ངོ་བ་ཀི་ཞུ་ཝ་ལ་ ཁིརིས་ཤོ་ དུས་ཏ་བུ་རང་ གསོན་པོ་ཨ་ཉི་ཆོ་ལེ་དག་ཉི་ ཨ་ཤི་བཀའ་ཁྲིམས་གེ་ ཤོ་ཁཱན་ཁེ་པ་ ན་ཐ་ཝ༌ཅ། ཉི་སོ་ངོ་ག་ཟ་ཁེ་པ་ ག་དུང་མེ་གི་ལ་ཨ་ཉི་ ནཱན་གི་ ཧང་ཏེན་གསུངས་མེ་རེ་བེ་ཡ། ཨོ་ཐ་སོ་ངོ་ག་ཟ་ཤོ་ ཨི་བི་གི་ལ་ཡ་དག༌ཉི།

35ཡི་ཤུ་གི་ རོག་ཏེ་བ་ཀ་གསུངས་མ་ལ་ ན་ཤི་འོད་ཟེར་ རེབ་ཀིན་ཐུར་ག་དེན་གེ་ཤ་ཉོང༌པེ། ཉི་ན་ཧ་བ་ འོད་ཟེར་ནང་ཀ་ ཆོ་ལེ་གང་ཀ་ དང་ཉི་རང་ཆོའི། ཧང་ཡ་དག་ནེ་ལ་ མེར་བུ་ ན་ཧ་ཐུང་ཀ་མ་ཨུན་ཆེན་ ཉི་མེར་བུ་ནང་ཀ་དང་ཁཱན་ སོ་ངོ་གི་ རོག་ཨོ་ག་དིན་ཅ་གི་ལ་སྨོ་ སེ་ལུ་མཱན༌ཅ། 36འོད་ཟེར་ ན་ཧ་བ་ཀབ་ཉི་ཆོ་ལ་ཀབ་ཉི་ ན་ཤི་འོད་ཟེར་ག་ཐུང་ཀ་ ལོ་ཏེན༌ཤོ། ཉི་ཤ་ ན་ཧ་བ་ འོད་ཟེར་ག་ཝག་ཙ་བ་ རི་ལེ་རེ་བེ་དག་ཉི་ གསུངས་མ༌ལ།

རོ་ཀི་གསུངས་ཉི་ཆུམ་དེན་གེ་ རོག་བྱོན་ཐཱན་ སོ་ངོ་བ་ཀེ་གུམ་ཉི་ བཞུགས་པ༌ལ༎

སོ་ངོ་བ་ཀི་ དད་པ་མ་ཨ་ཝ༌ལ།

37ཡི་ཤུ་གི་ རོག་ཏེ་བ་ཀ་གུབ་ཀ་ ཨོ་ཐ་རྫུ་འཕྲུལ་ག་ རྟགས་མཚན་བ་ གེན་ཐཱན་རང་གི་ནེ་བུ་ རོག་ཏེ་བ་ཀི་ རོ་ཀ་དད་པ་མ་ཨ་ཝ༌ལ།

38གཙོ་བོ་ ཨི་བི་གི་ ཨ་ཧ་འཐེན་ག་ དད་པ་ཨ་ཝ་ཡ། ཉི་གཙོ་བོ་གི་ རོ་ཀ་སྟོབས་དབང་ ཨི་བི་ག་ཏཱན་གེན་ཉི་ གནང་མ་ཡ་#12:38 ཡ་ཤའི་ཡ་ག་དཔེ་ཆ་ 53:1

དག་ཉི་ ལུང་བསྟན་པ་ ཡ་ཤའི་ཡ་གི་ ལུང་བསྟན་ཁཱན་ཁེ་པ་ ཨོ་ཐ་ག་དེན་ཐ་འགྲུབ་ཕ༌ལ། 39ཨོ་ཉི་ཨ་དེན་གེ་ རོག་ཏེ་བ་ཀི་ དད་པ་ཨ་ལེ་མར་བ༌ལ། ཧང་ཡ་དག་ནེ་ལ་ ཡ་ཤའི་ཡ་གི་ ཨོ་ཐེན་བུ་གསུངས་མ་ལ་

40དཀོན་མཆོག་གི་ རོག་ཏེ་བ་ མིང་ཀ་ན་ཅོད་ཉི་གནང་ཐཱན་ རོག་ཏེ་བ་ཀ་སེམས་ ཀག་ཏར་ཅོད་ཉི་གནང་མ༌ལ། ཧང་ཡ་དག་ནེ་ལ་ རོག་ཏེ་བ་ཀ་མིང་གི་ མ་ཐོང༌མ། ཉི་རོག་ཏེ་བ་ཀ་སེམས་ཀི་ ཧ་མ་གོ༌ལ། ཉི་རོག་ཏེ་བ་ཀི་ ཇ་ག་ལོ་ཀ་ཏཱན་ གིར་པེ་མར་བཱན་ ཇི་གི་རོག་ཏེ་བ་དྲག་པེ་ག་ མ་གཱན་ཤི་#12:40 ཡ་ཤའི་ཡ་ག་དཔེ་ཆ་ 6:10 དག་ཉི་

དཀོན་མཆོག་གི་གསུངས་མ༌ལ། 41ཡ་ཤའི་ཡ་གི་ ཨོ་ཐེན་གསུངས་མེ་དེན་ཐ་ཤོ་ རོ་ཀི་ཡི་ཤུ་ག་གཟི་བརྗིད་ མཇལ་བ་ཨ་དེན་གེ་ རོ་ཀི་ རོ་ཀ་ཀོར་གེ་ ལུང་བསྟན་མ་གི་ཝ༌ལ། 42ཨོ་ཉེ་རང་གི་ནེ་བུ་ འགོ་དཔོན་བ་ཀ་པོང་ཀེ་བུ་ མང་པུ་ཐུར་གི་ རོ་ཀ་དད་པ་ཨ་ཝ༌ལ། དག་པ་ཀབ་ཉི་ ཕ་རི་སི་པ་བ་ཀི་ རོག་ཏེ་བ་ ཆོས་འཛོམས་གེ་ ཤོ་ཉི་གེམ་དུ་དག་པ་གི་ ཡོང་ཁེ་ཝ་ཨ་དེན་གེ་ རོག་ཏེ་བ་ཀི་ དད་པ་ཨན་ཅ་དག་ཉི་ ཁ་མ་ལཱན་ཅ་གི་ཝ༌ལ། 43ཧང་ཡ་དག་ནེ་ལ་ རོག་ཏེ་བ་ཀི་ དཀོན་མཆོག་གེ་མང་གི་ཝ་ སོ་ངོ་གེ་ བསྟོད་པ་ཉོང་པེ་ག་ ཤོ་ནང་ཕེན་ཆོ༌ཝ།

44ཉི་ཡི་ཤུ་གི་ གསུང་སྐད་ཆི་ལུ་ཨ་ཉི་ གསུངས་མ་ལ་ ཨི་བི་གི་ ཇ་ག་དད་པ་ཨ་ཝ་ཐུར་ ཇ་ག་ཏཱན་ཤ་ དད་པ་ཨན་ཅ་མང་གི་ཝ་ ཇང་ཀུན་ཏི་ཁཱན་ག་བུ་ དད་པ་ཨན་ཅ་གི༌ལ། 45ཉི་རོ་ཀི་ ཇ་ག་ཏཱན་ གོད་པ་ཀབ་ཉི་ རོ་ཀི་ ཇང་ཀུན་ཏི་ཁཱན་མཇལ༌ཅ། 46ཇ་ག་དད་པ་ཨ་ཁཱན་ཐུར་བུ་ མེར་བུ་ནང་ཀ་ ཆོ་ལེ་མ་ཁེན་ཆེན་དག་པ་གི་ ཇང་ཤོ་ འཛམ་གླིང་ག་འོད་ཟེར་ཨ་ཉི་ ཨོ་ཕ་གི༌ལ། 47ཇ་ག་གསུང་ཉཱན་ཐཱན་ ཨོ་ཉ་གསུང་ག་ ཆ་གནས་མ་ཐ་ཁཱན་སོ་ངོ་ག་ ཇི་གི་ཁྲིམས་ཅཱད་པུ་མཱན༌ཅ། ཧང་ཡ་དག་ནེ་ལ་ ཇང་ཤོ་འཛམ་གླིང་ག་ ཁྲིམས་ཅཱད་པེ་དེན་གེ་ མང་གི་ཝ་ སྐྱབས་ཨ་ལེ་དེན་གེ་ ཨོ་ཕ་གི༌ལ། 48དག་པ་ཀབ་ཉི་ ཇང་མ་ཚཱས་ཁཱན་དང་ ཇ་ག་གསུང་ག་ ཆ་གནས་མ་ཐ་ཁཱན་བ་ཀ་དེན་གེ་ དྲང་དཔོན་ཐུར༌ཅ། ཉི་ནོང་མཇུག་དུས་ག་ནོང་ཀ་ ཇི་གི་ཡེག་ཁཱན་གསུང་ཐམས་ཅན་གི་ རོག་ཏེ་བ་ཀ་ ཁྲིམས་ཅཱད༌པེ། 49ཇི་གི་ ཇང་ཏེན་ག་ཐུང་ཀེ་ཨ་ཉི་ ཡེག་ཅ་མང་གི། དག་པ་ཀབ་ཉི་ ཧང་ཡེག་པེ་ཁེ་ལེ་གི་ལ་སྨོ་ ཉི་ཧང་ཏེན་ཡེག་པེ་ཁེ་ལེ་གི་ལ་སྨོ་ ཨོ་ཉ་ཀོར་གེ་ ཇང་ཀུན་ཏི་ཁཱན་ཨ་པ་གི་ ཇ་ག་བཀའ་གནང་མ་དང་ཏུ་ཉི་ ཇི་གི་ཡེག་ཅ་གི༌ལ། 50རོ་ཀ་ཨོ་ཐ་བཀའ་རྒྱ་གི་ ཚེ་མ་འགྱུར་བརྟན་པ་ ཉོང་པེ་རིག་ཅ་དག་ཉི་ ཇི་གི་སེན༌ཅ། ཨོ་ཉི་ཨ་དེན་གེ་ ཇི་གི་ཧང་ཡེག་པ་ཐུར་ ཇ་ག་ཨ་པ་གི་ གསུངས་མ་དང་ཏུ་ཉི་ ཇི་གི་ཡེག་ཅ་གི༌ལ༎

Currently Selected:

ཡུ་ཧན་ན། 12: TNTB

Highlight

Copy