ཡུ་ཧན་ན། 13

ཡི་ཤུ་གི་ རོ་ཀ་སློ་མ་བ་ཀ་བི་ ཟིག་ཉི་གནང་མ༌ལ།

1གོག་ཉི་དི་ཝ་ག་དུས་ཆེན་གེ་ གོ་མ་གི་ཝ༌ལ། རོག་ཤོ་ འཛམ་གླིང་ཐུབ་ཐ་ཉི་ ཨ་པ་བཞུགས་ས་ག་ཏཱན་བྱོན་མེ་ག་ དུས་ཙུན་རེན་པ་དག་ཉི་ ཡི་ཤུ་གི་ མཁྱེན་མ་ཆོ་ཝ༌ལ། ཉི་འཛམ་གླིང་ག་ཆོ་ཁཱན་ རོག་ཏེན་ག་གི་ཁཱན་བ་ རོ་ཀི་གནམ་མེད་ས་མེད་ ཕང་པ༌ལ། ཉི་རོ་ཀི་ ཇུ་ཀ་སག་པུ་རང་ཕང་པ༌ལ། 2ངེ་རི་ག་ཚོགས་དྲང་ཅ་གི་ཝ༌ལ། ཡི་ཤུ་ག་མགུ་སྐོར་ཕི་ལེ་དེན་གེ་ སི་མོན་ག་ཟ་ ཡ་ཧུ་ད་ ཨིས་ཀ་རི་ཡོད་ག་སེམས་ནང་ཀ་ བདུད་ཀི་ ལའི་ཨ་ཝ་ཅ་གི་ཝ༌ལ། 3ཨ་པ་གི་ ཐམས་ཅན་རང་ རོ་ཀ་དབང་ཚད་ཕརའ་ཁ་ ཙུག་ཉི་གནང་མ༌ཅ། ཉི་རོག་ཤོ་ དཀོན་མཆོག་ག་ སྐུན་མདུན་གེ་ ཨོ་ཕ་ཨ་དེན་གེ་ ལོག་ཉི་རང་ དཀོན་མཆོག་ག་ སྐུན་མདུན་ག་ཏཱན་ བྱོན་ཅ་གི་ལ་དག་ཉི་ ཡི་ཤུ་གི་མཁྱེན་མ་ཆོ་ཝ༌ལ། 4ཨོ་ཉི་ཨ་དེན་གེ་ རོག་ཚོགས་བཞེས་ཝ་གེ་ བཞེངས་པ༌ལ། ཉི་རོ་ཀ་ ཕིས་ཀ་ནམ་བཟའ་ཁེ་པ་ཕེག་ཐཱན་ ཨ་ཅོ་ལྟོ་རས་གི་ རོ་ཀ་ཤ་ཅི་ནང་ དམ་པ༌ལ། 5ཨོ་ཉ་ཚི་ངེ་ རོ་ཀི་ཟང་ཡོང་ག་རི་ལུག་ཐཱན་ སློ་མ་བ་ཀ་བི་ ཟིག་པེ་གོ་ཙུག་པ༌ལ། ཉི་རོ་ཀ་ཤ་ཅི་ནང་གེ་དམ་ཁཱན་ ཨ་ཅོ་ལྟོ་རས་གི་ རོག་ཏེ་བ་ཀ་ བི་ཕག་པ༌ལ།

6རོག་སི་མོན་པ་ཏྲུས་ག་བཱརང་ཀ་ བྱོན་མ་ཀབ་ཉི་ པ་ཏྲུས་གི་ཞུ་ཝ་ལ་ གཙོ་བོ་ ནཱན་གི་ ཇ་ག་བི་ ཟིག་ཉི་གནང་མེ་སྨོ་དག༌ཉི།

7ཡི་ཤུ་གི་གསུངས་མ་ལ་ ཇི་གི་ཨ་ཁཱན་ཁེ་པ་ ནཱན་གི་ ཨོ་མ་ཧ་མ་གོ༌ལ། དག་པ་ཀབ་ཉི་ ཇུ་ཀེ་ ནཱན་གི་ ཧ་གོ་ལེ་རེ་བེ་དག༌ཉི།

8མང་གི་གཙོ་བོ་ ནཱན་གི་ ཇ་ག་བི་ ཏི་ངེ་རང་ཟིག་པེ་ག་ མ་རུང་པ་དག་ཉི་ པ་ཏྲུས་གི་ཞུ་ལ་ཀབ་ཉི་ ཡི་ཤུ་གི་གསུངས་མ་ལ་ ཇི་གི་ ན་ག་བི་མ་ཟིག་པ་སག་པུ་ ནཱན་ཇ་ག་རི་ལེ་མར་བ་དག༌ཉི།

9སི་མོན་པ་ཏྲུས་གི་ཞུ་ཝ་ལ་ ཉི་ལ་གཙོ་བོ་ ཇ་ག་བི་ཤ་མང་གི་ཝ་ ཇ་ག་ཤ་རང་དང་ ག་དང་བུ་ ཟིག་ཉི་གནང་ཤོ་དག༌ཉི།

10ཡི་ཤུ་གི་གསུངས་མ་ལ་ ལུས་པུ་ཟིག་ཉི་ཆུམ་ཁཱན་ སོ་ངོ་ཤོ་ ཐམས་ཅན་རང་ ཙང་མ་རི་ཝ་ཨ་དེན་གེ་ བི་ཐུར་ཤ་མ་ཏོག་པ་ ལུས་པུ་ལོག་ཉི་རང་ ཟིག་པེ་མ་ཁེ༌ལ། ན་ཧ་བ་ཤོ་ ཙང་མ་རི་ཝ༌ཅ། དག་པ་ཀབ་ཉི་ ནའི་ཐམས་ཅན་རང་ ཙང་མ་མ་ལ་དག༌ཉི། 11ཨི་བི་གི་ རོ་ཀ་མགུ་སྐོར་ཕི་ལེ་གི་ལ་སྨོ་ རོ་ཀི་མཁྱེན་མ་ཆོ་ཝ༌ལ། ཨོ་ཉི་ཨ་དེན་གེ་ རོ་ཀི་གསུངས་མ་ལ་ ནའི་ཐམས་ཅན་རང་ཏ་ ཙང་མུ་མ་ལ་དག༌ཉི།

12རོ་ཀི་ རོ་ཀ་སློ་མ་བ་ཀ་བི་ ཟིག་ཉི་ཆུམ་དེན་གེ་ ནམ་བཟའ་བཞེན་ཐཱན་ རོག་བཞུགས་ས་ག་ཏཱན་ བྱོན་མ༌ལ། ཇི་གི་ ན་ཧ་དེན་གེ་ ཨ་ཁཱན་ཁེ་པ་ ན་ཤི་ཧ་གོ་ཝ་སྨོ་དག་ཉི་ རོ་ཀི་རོག་ཏེ་བ་ཀ་ ཇི་མ༌ལ། 13ན་ཤི་ ཇ་ག་གཙོ་བོ་དང་ སློབ་དཔོན་ཨ་ཉི་རཱན༌ཅ། ཉི་ན་ཤི་ ཨོ་ཉེན་ར་ལེ་ག་དེན༌མེ། ཧང་ཡ་དག་ནེ་ལ་ ཇང་ཤོ་ ན་ཤི་ར་ཁཱན་རང་གི༌ལ། 14ཉི་ཨོམ་ ཇང་ན་ཧ་གཙོ་བོ་དང་ སློབ་དཔོན་གི་ནེ་བུ་ ཇི་གི་ ན་ཧ་བི་ཟིག༌པ། ཉི་ན་ཤི་བུ་ ནའི་ནང་དོ་ག་བི་ ཟིག་པེ་ཁེ༌ལེ། 15ཇི་གི་ན་ཧ་དེན་གེ་ ཨ་ཝ་པུརུས་ཀིན་ཨ་ཉི་ ན་ཤི་བུ་ ཨ་ལེ་ཁེ་ལེ་དག་ཉི་ ཇི་གི་དཔེ་གེན་མ༌ཅ། 16ཇི་གི་ ན་ཧ་དེན་པ་ཡེག་ཅ་ གཡོག་པ་ཤོ་ ཡོན་ད་གེ་ཆི་ལུ་མང་གི། ཉི་འཐེན་བུ་ཁཱན་བུ་ འཐེན་ཡེག་པེ་ཀུན་ཏི་ཁཱན་གེ་ ཆི་ལུ་མང་གི། 17ཉི་ཨོམ་ ན་ཤི་ཨོ་ཐ་བ་ སེ་ཝ་ཨ་དེན་གེ་ ན་ཤི་ཨོ་ཐ་བ་དང་ཏུ་ཉི་ཨ་ནེ་ལ་ བྱིན་རླབས་ཉོང༌པེ༎

ཡི་ཤུ་གི་ རོ་ཀ་མགུ་སྐོར་ཕི་ལེ་དག་ཉི་ གསུངས་མ༌ལ།

18ཇི་གི་ ནའི་ཐམས་ཅན་ག་ ཡེག་ཅ་མང་གི། ཇི་གི་སི་ཁཱན་ཁེ་པ་ ཇི་གི་སེན༌ཅ། དག་པ་ཀབ་ཉི་ ཇང་ཀབ་ཉི་ཏབ་ཐུར་ཟ་ཁཱན་ སོ་ངོ་གི་ ཇ་ག་དགྲ་ཨ་ཝ་#13:18 མགུར་མ་ག་དཔེ་ཆ་ 41:9 དག་ཉི་ གསུང་རབ་གེ་ཤོ་ཁཱན་ཁེ་པ་ དེན་ཐ་འགྲུབ་ཕེ་ཁེ༌ལེ། 19ཨུ་ཉུ་ཇུང་མ་ཀབ་ཉི་ ཇང་ཤོ་ རོག་གི་ཝ་ལ་དག་ཉི་ ན་ཤི་དད་པ་ཨན་ཆེན་དག་པ་གི་ ཨུ་ཉུ་མ་ཇུང་མེ་གོ་མ་ ཇི་གི་ན་ཧ་ ཨོ་མ་རང་ཡེག༌ཅ། 20དག་པ་ཀབ་ཉི་ ཇི་གི་ ན་ཧ་དེན་པ་ཡེག་ཅ་ ཇི་གི་ཀུན་ཏི་ཁཱན་ཁེ་པ་ ཨི་བི་གི་ཞུ་ཝ་ཐུར་ ཨོ་ཉ་སོ་ངོ་གི་ ཇང་བུ་ཞུན་ཅ་གི༌ལ། ཉི་ཨི་བི་གི་ ཇང་ཞུ་ཝ་ཐུར་ ཨོ་ཉ་སོ་ངོ་གི་ ཇང་ཀུན་ཏི་ཁཱན་བུ་ ཞུན་ཅ་གི་ལ་དག༌ཉི།

21ཨོ་ཐེན་གསུངས་ཉི་ཆུམ་དེན་གེ་ ཡི་ཤུ་ཐུགས་ཉིད་ག་ མ་ཆག་པ་རི་ཉི་ གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ན་ཧ་པོང་ཀེ་ཐུར་གི་ ཇ་ག་མགུ་སྐོར་ཕི་ལེ་དག༌ཉི།

22ཉི་རོ་ཀ་སློ་མ་བ་ རོ་ཀི་ཨི་བི་ག་ཀོར་གེ་ གསུངས་ཅ་གི་ས་དག་མི་ཉི་ ཐུར་གི་ཐུར་ག་ཏཱན་གོད་ཉི་ ངང་པ༌ལ། 23རོག་ཏེ་བ་ཀ་པོང་ཀེ་ ཡི་ཤུ་གི་ཕང་ཁཱན་ སློ་མ་ཤོ་ ཡི་ཤུ་ག་ར་ག་རང་ ལང་མ་ཆོ༌ཝ། 24སི་མོན་པ་ཏྲུས་གི་ ག་དང་དཱད་ཨ་ཉི་ རོ་ཀ་ཏཱན་ཡེག་པ་ལ་ རོ་ཀི་ཨི་བི་ག་ཀོར་གེ་ གསུངས་མ་གི་ལ་སྨོ་ ཇིམ་ཤོ་དག༌ཉི། 25ཉི་རོ་ཀི་ ཡི་ཤུ་ག་ལོ་ཀ་ཏཱན་ཏེས་ཐཱན་ ཞུ་ཝ་ལ་ གཙོ་བོ་ ཨོ་ཉ་སོ་ངོ་ ཨི་བི་གི་ལ་ཡ་དག༌ཉི།

26ཇི་གི་ཨོ་ཐ་ཀེབ་ཏང་ ཟེ་མུ་ཁེ་པ་ཤུམ་ཐཱན་ ཨི་བི་ག་བི་ཝ་ཐུར་ ཨོ་ཉ་སོ་ངོ་ཁེ་པ་གི་ལ་དག་ཉི་ ཡི་ཤུ་གི་གསུངས་ཐཱན་ ཀེབ་ཏང་ཟེ་མུ་ཐུར་ཤུམ་ཉི་ སི་མོན་ག་ཟ་ ཡ་ཧུ་ད་ ཨིས་ཀ་རི་ཡོད་ག་ཏཱན་ གནང་མ༌ལ། 27ཉི་ཡ་ཧུ་ད་གི་ ཨོ་ཉ་ཀེབ་ཏང་ ཟ་ཝ་ཐུར་ག་རང་ བདུད་སེ་ཏཱན་ རོ་ཀ་ནང་ཀ་ནུ་ཕ༌ལ། ནཱན་གི་ ཧང་ཨ་ལེ་ཅ་གི་ལ་སྨོ་ དོ་ཟོ་ཨ་ཉི་ཨའི་དག་ཉི་ ཡི་ཤུ་གི་ རོ་ཀ་གསུངས་མ༌ལ། 28དག་པ་ཀབ་ཉི་ ཡི་ཤུ་གི་ ཧང་ཨ་ཉི་ རོ་ཀ་ཏཱན་ ཨོ་ཐེན་གསུངས་མ་གི་ལ་སྨོ་ ཨོ་ཉ་ཚོགས་ཞུ་ཁཱན་ ཐུར་གི་བུ་ ཧ་མ་གོ་ཝ༌ལ། 29སློ་མ་ཚེ་བང་གི་ མི་ཝ་ལ་ ཡ་ཧུ་ད་ཤོ་ རོག་ཏེ་བ་ཀ་ཏི་རུ་ བདག་འཛིན་ཨ་ཁཱན་ གི་ཝ་ཨ་དེན་གེ་ དུས་ཆེན་ག་དེན་གེ་ ཚཱས་ཁཱན་བ་ངོའི་ ཡང་ན་ལ་ དུག་པུ་བ་ཀ་ ཧང་ཐུར་བི་ཨ་ཉི་ རོག་ཀི་གསུངས་མ་གི་ཝ་ལ་དག༌ཉི། 30ཀེབ་ཏང་ཟ་ཝ་ཐྲེ་ཀེ་རང་ ཡ་ཧུ་ད་ཕིས་ཀ་ཤོ་ཉི་ དི་ཝ༌ལ། ཉི་བི་ནང་རི་ཝ་ཅ་གི་ཝ༌ལ༎

པ་ཏྲུས་གི་ ཡི་ཤུ་གུམ་མ་ཡེ་ལ་ཨ་ཉི་ ཡེག་པེ་དག་ཉི་ གསུངས་མ༌ལ།

31ཡ་ཧུ་ད་ཕིས་ཀ་ཤོ་ཉི་ དི་ཝ་ཐུར་ག་རང་ ཡི་ཤུ་གི་གསུངས་མ་ལ་ ཉི་ཨོམ་ སོ་ངོ་ག་ཟ་ག་ གཟི་བརྗིད་གེན༌ཅ། ཉི་དཀོན་མཆོག་ག་གཟི་བརྗིད་ཁེ་པ་ རོ་ཀ་ཐུང་ཀེ་ཨ་ཉི་གེན༌ཅ། 32ཉི་དཀོན་མཆོག་ག་གཟི་བརྗིད་ཁེ་པ་ ཟ་ག་ཐུང་ཀེ་ཨ་ཉི་ གེན་ཐཱན་ཨ་ནེ་ལ་ དཀོན་མཆོག་གི་ རོག་ཏེན་ག་ནང་ཀ་ སོ་ངོ་ག་ཟ་ག་ གཟི་བརྗིད་གེན་ཉི་གནང༌མེ། ཉི་ཨུ་ཉུ་བུ་ ཤེབ་ཐུར་ག་རང་ གེན་ཉི་གནང༌མེ། 33ཇ་ག་ཝག་ཙ་བ་ ཇང་ན་ཧ་བ་ཀབ་ཉི་ ཨོམ་ཆང་ད་སུར་ཤ་ཆོ༌ལེ། ཇི་གི་ཡ་ཧུ་དི་པ་བ་ཀ་ ཡེག་པ་པུརུས་ཀིན་ཨ་ཉི་ ན་ཧ་བུ་ཡེག་ཅ་ ན་ཤི་ཇང་ལམ་ཉི་གོད༌པེ། ཉི་ཇང་དི་ས་ག་ ན་ཧ་བ་ ཨོ་ཕེ་མར༌བ། 34ཇི་གི་ ན་ཧ་བཀའ་རྒྱ་སིང་མ་བིན༌ཅ། ན་ཧ་བ་ནང་དོ་ཕང༌ཅོ། ཇི་གི་ ན་ཧ་བ་ཕང་པ༌ཅ། ཉི་ན་ཤི་བུ་ ནའི་ནང་དོ་ཕང་པེ་ཁེ༌ལེ། 35ཨོ་ཐེན་ཨ་ཉི་ ན་ཤི་ ནའི་ནང་དོ་ཕང་ནེ་ལ་ ན་ཧ་བ་ཤོ་ ཇ་ག་སློ་མ་གི་ཝ་ལ་དག་ཉི་ སོ་ངོ་ཐམས་ཅན་གི་ སེ་ལེ་རེ་བེ་དག༌ཉི།

36སི་མོན་པ་ཏྲུས་གི་ཞུ་ཝ་ལ་ གཙོ་བོ་ ནཱན་ཨོ་ག་ཏཱན་བྱོན་ཅ་ཡ་དག༌ཉི།

ཡི་ཤུ་གི་ རོ་ཀ་གསུངས་མ་ལ་ ཇང་དིན་ཅ་ ཉི་ནཱན་གི་ ཨོ་མ་ཇ་ག་ཚིང་ཚིང་ ཨོ་ཕེ་མར༌བ། ཚི་ངེ་དག་པ་ཀབ་ཉི་ ནཱན་གི་ ཇ་ག་ཚིང་ཚིང་ཨོ་ཕེ་རེ་བེ་དག༌ཉི།

37གཙོ་བོ་ ཇི་གི་ཨོ་མ་ཤོ་ ཧང་ཨ་ཉི་ ན་ག་ཕྱག་ཞུ་ལེ་མར་བ་ཡ། ཇི་གི་ན་ག་དེན་གེ་ ཇ་ག་ཚེ་བུ་བི་ལེ་རེ་བེ་དག་ཉི་ པ་ཏྲུས་གི་ ཞུ་ལ་ཀབ་ཉི་ 38ཡི་ཤུ་གི་གསུངས་མ་ལ་ ནཱན་གི་ཏེན་ཏེན་རང་ ཇ་ག་དེན་གེ་ ན་ག་ཚེ་ག་ལེ་རེ་བེ་སྨོ། ཇི་གི་ ན་ག་དེན་པ་ཡེག་ཅ་ གོ་ག་མ་ཇིག་པེ་གོ་མ་ ནཱན་གི་ ཇང་གུམ་མ་ཡེ་ལ་དག་ཉི་ ཤེབ་སམ་ཡེག་པེ་དག༌ཉི༎

Currently Selected:

ཡུ་ཧན་ན། 13: TNTB

Highlight

Copy