ཡུ་ཧན་ན། 8

བཱརའ་ཀབ་ཉི་ ལུས༌འབྲེལ་ཨ༌ཁཱན་མེ༌ཝག༌ཙ་ ཙུང༌མ༌ལ།

1ཉི་ཡི་ཤུ་ཤོ་ ཨོ་ལིབ་ཤིང་ཕུ་ཐུང་ཀ་ཏཱན་ བྱོན་མ༌ལ། 2དག་པ་ཀབ་ཉི་ ནམ་ནིང་བེད་པུ་རང་ རོག་ལོག་ཉི་ མཆོད་ཁང་ཝུང་ག་ཕེབས་པ༌ལ། ཉི་སོ་ངོ་བ་ དོ་ཟོ་རང་ ཛོམ་ཉི་ཨོ་ཕ༌ལ། ཉི་རོག་ ས་ག་བཞུགས་ཐཱན་ རོག་ཏེ་བ་ཀ་ཡེ་ཉི་གནང་མ༌ལ། 3རོ་ཀི་ཡེན་ཅ་ཨ་ཉི་ བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ཀི་ བཱརའ་ཀབ་ཉི་ ལུས་འབྲེལ་ཨ་ཉི་ཆོ་ཁཱན་ མེ་ཝག་ཙ་ཐུར་ ཙུང་ཉི་ཕ་ཝ༌ལ། ཉི་རོག་ཏེ་བ་ཀི་ རོག་སོ་ངོ་བ་ཀ་གུབ་ཀ་ ཐིང་མེ་བི་ཝ༌ལ། 4ཉི་རོག་ཏེ་བ་ཀི་ ཡི་ཤུ་ག་ཞུ་ཝ་ལ་ སློབ་དཔོན་ ཨ་ཤི་ཨོ་ཐ་མེ་ཝག་ཙ་ བཱརའ་ཀབ་ཉི་ ལུས་འབྲེལ་ཨ་ཉི་ཆོ་ཝ་ཐོང་ཉི་ ཙུང༌མ། 5བཀའ་ཁྲིམས་ནང་ཀ་ མོ་ས་གི་ ཨ་ཧ་ཏཱན་ བཀའ་གནང་མ་ཅ་ ཨུ་ཉུ་ད་བུ་ མེ་ཝག་ཙ་ཁེ་པ་ ལུ་ཤི་དྲོམ་ཉི་ ཤེ་ལེ་ཁེ་ལེ་དག༌ཉི། ཉི་ཨོམ་ ནཱན་གི་ ཧང་གསུངས་མེ་ཡ་དག༌ཉི། 6རོག་ཏེ་བ་ཀི་ རོ་ཀ་ཧེ་ཏ་ལ་མེ་དེན་གེ་ རོ་ཀེ་ཅོན་ལམ་ཉི་ ཨོ་ཐ་དྲི་ཝ་ཇི་མ་གི་ཝ༌ལ།

དག་པ་ཀབ་ཉི་ རོ་ཀི་དོང་ཀུར་ཐཱན་ རོ་ཀ་ག་དང་བུརུ་མ་གི་ཨ་ཉི་ ས་ག་ཏཱན་འབྲི་བེ་ གོ་ཙུག་པ༌ལ། 7རོག་ཏེ་བ་ཀི་ དྲི་ཝ་ཇིམ་ཉི་རང་ ཐ་ཝ་ཨ་དེན་གེ་ རོག་ག་བཞེངས་ཐཱན་ གསུངས་མ་ལ་ ན་ཧ་པོང་ཀེ་ སྡིག་པ་མ་ཨ་ཁཱན་ ཨི་བི་གི་ལ་སྨོ་ ཨོ་ཉ་སོ་ངོ་གི་ གོ་མ་རང་ ཨོ་ཐ་མེ་ཝག་ཙ་ག་ ལུ་ཤི་དྲོམ་ཤོ་དག༌ཉི། 8ཉི་ཨོམ་ཆང་རང་ རོག་དོང་ཀུར་ཐཱན་ ས་ག་འབྲི་ཉི་བཞུགས་པ༌ལ།

9ཡི་ཤུ་གི་གསུངས་ཁཱན་ཁེ་པ་ ན་ཐ་ལ་ཀབ་ཉི་ སོ་ངོ་ལོ་ན་ཆི་ལུ་གེ་ཨན་ གོ་ཙུག་ཉི་ ཐུ་རེ་རེ་ཨ་ཉི་ ཨོ་ཉ་གེ་ ཇོང་མེ་གོ་ཙུག་པ༌ལ། ཡི་ཤུ་ཤ་ལུས་པ༌ལ། ཉི་ཨོ་ཉ་མེ་ཝག་ཙ་ཤོ་ ཐིང་ཉི་ཆོ་ཝ་ཅ་གི་ཝ༌ལ། 10ཡི་ཤུ་ག་བཞེངས་ཐཱན་ མེ་ཝག་ཙ་ག་གསུངས་མ་ལ་ རོག་ཏེ་བ་ཨོ་ཡ། ཐུར་གི་བུ་ ན་ག་ཏཱན་ ཁྲིམས་མ་ཀེ་ཤི་སྨོ་དག་ཉི་ ཇི་མ་ཀབ་ཉི་ 11མེ་ཝག་ཙ་གི་ཞུ་ཝ་ལ་ མ་ལ་ ཐུར་གི་རང་ཁྲིམས་མ་ཀེ་ཤི་ སློབ་དཔོན་དག༌ཉི།

ཉི་ཡི་ཤུ་གི་ རོ་ཀ་གསུངས་མ་ལ་ ཇི་གི་བུ་ ན་ག་ཁྲིམས་མ་ཀེ༌བ། ནཱན་དི་ དག་པ་ཀབ་ཉི་ ཨོ་ཐ་གེ་ག་ཏཱན་ སྡིག་པ་མ་ཨའི་ན་དག༌ཉི༎

ཡི་ཤུ་ཤོ་ འཛམ་གླིང་ག་འོད་ཟེར་གི༌ལ།

12ཡི་ཤུ་གི་གསུངས་མ་ལ་ ཇང་ཤོ་ འཛམ་གླིང་ག་འོད་ཟེར་གི༌ལ། ཉི་ན་ཤི་ ཇ་ག་ཚིང་ཚིང་ཨུ་ནེ་ལ་ ན་ཧ་བ་ མེར་བུ་ནང་ཀ་ ཐ་པ་ཐོ་པོ་མ་ཨ༌ལ། ཧང་ཡ་དག་ནེ་ལ་ ཚེ་ག་ཏཱན་རིག་ཁཱན་ འོད་ཟེར་ཁེ་པ་ ན་ཧ་བ་ཀབ་ཉི་ཨོ་ཕེ་དག༌ཉི།

13ཕ་རི་སི་པ་བ་ཀི་ ཡེག་པ་ལ་ ནཱན་ནཱན་ཏེན་གི་ ནཱན་ཏེན་ག་འཛོམས་དཔང་ཨ་ན། ནཱན་གི་ཡེག་ཁཱན་ཁེ་པ་ མ་དེན་མ་དག༌ཉི།

14ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇི་གི་ ཇང་ཏེན་ག་ འཛོམས་དཔང་ཨ་ནེ་བུ་ ཇི་གི་ཡེག་ཁཱན་ཤོ་ དེན་པ་གི༌ལ། ཧང་ཡ་དག་ནེ་ལ་ ཇང་ཨོ་གེ་ཨོ་ཕ་གི་ལ་སྨོ་ ཉི་ཇང་ཨོ་ག་ཏཱན་དི་ལེ་གི་ལ་སྨོ་ ཇི་གི་སེན༌ཅ། དག་པ་ཀབ་ཉི་ ཇང་ཨོ་གེ་ཨོ་ཕ་གི་ལ་སྨོ་ ཉི་ཇང་ཨོ་ག་ཏཱན་དི་ལེ་གི་ལ་སྨོ་ ན་ཤི་མ་སེ༌ལ། 15ན་ཤི་སོ་ངོ་ག་མི་ཐང་དང་ཏུ་ཉི་ ཁྲིམས་ཅཱད༌ལ། དག་པ་ཀབ་ཉི་ ཇི་གི་ཨི་བི་ག་རང་ ཁྲིམས་ཅཱད་པུ་མཱན༌ཅ། 16དག་པ་ཀབ་ཉི་ ཇི་གི་ཁྲིམས་ཅཱད་ནེ་ལ་ ཇི་གི་ཁྲིམས་ཅཱད་ཁཱན་ཤོ་ དེན་པ་གི༌ལ། ཧང་ཡ་དག་ནེ་ལ་ ཇང་ཐུར་ཏེན་མང་གི་ཝ་ ཇང་ཀུན་ཏི་ཁཱན་ཨ་པ་ ཇང་ཀབ་ཉི༌ཅ། 17ནའི་ཏེན་ག་ བཀའ་ཁྲིམས་ནང་ཀ་རང་ འབྲི་བ་ཅ་ སོ་ངོ་ཉིག་ཙིང་གི་ འཛོམས་དཔང་དཔང་བཞག་ཨ་ཁཱན་ཤོ་ དེན་པ་གི་ལ་དག༌ཉི། 18ཇ་ག་ཀོར་གེ་ ཇང་ཇང་ཏེན་གི་ འཛོམས་དཔང་ཨན༌ཅ། དག་པ་ཀབ་ཉི་ ཇ་ག་ཀོར་གེ་ བཱརའ་འཛོམས་དཔང་ཨ་ཁཱན་ཤོ་ ཇང་ཀུན་ཏི་ཁཱན་ ཨ་པ་གི་ལ་དག༌ཉི།

19ཉི་རོག་ཏེ་བ་ཀི་ རོ་ཀ་ཇི་མ་ལ་ ན་ག་ཨ་པ་ཤོ་ ཨོ་ག་ཅ་ཡ་དག༌ཉི།

ཡི་ཤུ་གི་ ལན་གནང་ཉི་གསུངས་མ་ལ་ ན་ཤི་ཇང་གུམ་ཡེ་ལུ་མཱན༌ཅ། ཉི་ཇ་ག་ཨ་པ་བུ་ གུམ་ཡེ་ལུ་མཱན༌ཅ། ཧང་ཡ་དག་ནེ་ལ་ ན་ཤི་ཇང་གུམ་ཡེ་ནེ་ལ་ ཇ་ག་ཨ་པ་བུ་ གུམ་ཡེ་ལེ་ཆོ་ཝ་དག༌ཉི། 20ཡི་ཤུ་གི་མཆོད་ཁང་ནང་ཀ་ སྙན་དར་ཕུལ་ས་ག་ སྒྲོམ་ར་ག་བཞུགས་ཉི་ ཨོ་ཐ་བ་ ཐམས་ཅན་རང་ གསུངས་མ་གི་ཝ༌ལ། ཉི་ཨི་བི་གི་རང་ རོག་མ་ཙུང་མ༌ལ། ཧང་ཡ་དག་ནེ་ལ་ རོ་ཀ་དུས་ཙུན་ མ་རེན་པ་ཆོ་ཝ༌ལ༎

ཇང་དི་ས་ག་ ན་ཤི་དི་ལེ་མར༌བ།

21ཡི་ཤུ་གི་ ཨོམ་ཆང་རང་ གསུངས་མ་ལ་ ཇང་དིན༌ཅ། ཉི་ན་ཤི་ཇང་ལ༌མེ། ཉི་ན་ཤི་ཇང་མ་ཐོང༌མ། དག་པ་ཀབ་ཉི་ ན་ཧ་བ་ ན་ཧ་སྡིག་པ་ནང་ཀ་རང་ཤི༌ལེ། ཉི་ཇང་དི་ས་ག་ ན་ཤི་དི་ལེ་མར་བ་དག༌ཉི།

22ཉི་ཡ་ཧུ་དི་པ་ འགོ་དཔོན་བ་ཀི་ཡེག་པ་ལ་ རོག་དི་ས་ག་ ཨ་ཤི་དི་ལེ་མར་བ་དག་ཉི་ གི་ཝ༌ལ། ཧང་རོ་ཀི་ རོག་ཏེན་ཤེ་ལེ་ཨ་ཉི་ ཡེག་པ་ཙ་རྩིས་གི་ལ་སྨོ་དག༌ཉི།

23དག་པ་ཀབ་ཉི་ ཡི་ཤུ་གི་ གསུངས་ཉི་རང་བཞུགས་པ༌ལ། ན་ཧ་བ་ཤོ་ ཕརའ་ཁེ་གི༌ལ། ཉི་ཇང་ཤོ་ ཐུང་ཀེ་གི༌ལ། ཉི་ན་ཧ་བ་ཤོ་ འཛམ་གླིང་ག་གི་ལ་ ཉི་ཇང་ཤོ་ འཛམ་གླིང་ག་མང་གི། 24ཇི་གི་ཇང་ཤོ་ རོག་གི་ལ་དག་ཉི་ ཡེག་ཁཱན་ག་ ན་ཤི་དད་པ་མ་ཨ་ནེ་ལ་ ཇི་གི་ ན་ཧ་ཡེག་པ་ཅ་ ན་ཧ་བ་ ན་ཧ་སྡིག་པ་ནང་ཀ་རང་ཤི༌ལེ། ཉི་ན་ཧ་བ་དེན་པ་རང་ ན་ཧ་སྡིག་པ་ནང་ཀ་རང་ཤི་ལེ་དག༌ཉི།

25ནཱན་ཨི་བི་གི་ལ་ཡ་དག་ཉི་ རོག་ཏེ་བ་ཀི་ཇི་མ་ཀབ་ཉི་ ཇི་གི་གོ་མ་གེ་རང་ ཡེག་ཁཱན་ཁེ་པ་གི་ལ་དག་ཉི་ ཡི་ཤུ་གི་ རོག་ཏེ་བ་ཀ་ལན་གནང་མ༌ལ། 26ན་ཧ་ཁྲིམས་ཅཱད་ཉི་ ཇི་གི་ན་ཧ་ཀོར་གེ་ མང་པུ་ཐུར་ཡེག་པེ༌ཅ། དག་པ་ཀབ་ཉི་ ཇང་ཀུན་ཏི་ཁཱན་ཤོ་ དེན་པ་གི༌ལ། ཉི་ཇི་གི་ རོ་ཀེ་ན་ཐ་ཁཱན་བ་ཤོ་ ཇི་གི་འཛམ་གླིང་ག་ སོ་ངོ་བ་ཀ་ཡེག་ཅ་དག༌ཉི།

27རོ་ཀི་ རོ་ཀ་ཨ་པ་ག་ཀོར་གེ་ གསུངས་མ་གི་ལ་དག་ཉི་ རོག་ཏེ་བ་ཀི་ ཧ་མ་གོ་ཝ༌ལ། 28ཉི་ཡི་ཤུ་གི་ རོག་ཏེ་བ་ཀ་གསུངས་མ་ལ་ ན་ཤི་སོ་ངོ་ག་ཟ་ ག་དུང་ཉི་ཆུམ་དེན་གེ་ཤ་ ཇི་གི་ ཇང་ཤོ་ རོག་གི་ལ་དག་ཉི་ ཡེག་ཁཱན་རང་གི་ཝ༌ལ། ཉི་ཇི་གི་ ཇང་ཏེན་ག་ སེམས་ཀི་མི་ཝ་དང་ཏུ་ཉི་ ཧང་རང་མ་ཨ་ལཱན་ ཨ་པ་གི་གསུངས་མ་དང་ཏུ་ཉི་ཤ་ ཨ་ན་དག་ཉི་ ཧ་གོ༌ལེ། 29ཇང་ཀུན་ཏི་ཁཱན་ཁེ་པ་ ཇང་ཀབ་ཉི་རང་བཞུགས་པ༌ཅ། རོ་ཀི་ཇང་ཐུར་ཏེན་ ཐུབ་ཐ་ཝ་མཱན༌ཅ། ཧང་ཡ་དག་ནེ་ལ་ ཇི་གི་ཧ་ལ་ཨ་ནེ་བུ་ རོག་ཐུགས་བཞེས་ཝ་ག་ ལའི་བ་ཤ་ཨན་ཅ་དག༌ཉི། 30ཡི་ཤུ་གི་གསུངས་མ་ག་ ན་ཐ་ཁཱན་མང་པུ་ཐུར་གི་ རོ་ཀ་དད་པ་ཨ་ཝ༌ལ༎

ཡི་ཤུ་དང་ཨ་བཱརའ་ཧམ།

31ཡི་ཤུ་གི་ རོ་ཀ་དད་པ་ཨ་ཁཱན་ ཨོ་ཉ་ཡ་ཧུ་དི་པ་བ་ཀ་གསུངས་མ་ལ་ ན་ཤི་ ཇི་གི་ཡེ་ཝ་དང་ཏུ་ཉི་ཆོ་ནེ་ལ་ ན་ཧ་བ་ཤོ་ ཏེན་ཏེན་རང་ ཇ་ག་སློ་མ་བ་གི༌ལ། 32ཉི་ན་ཤི་དེན་པ་སེ་ལེ་རེ༌བེ། ཉི་དེན་པ་གི་ ན་ཧ་བ་ ཚེ་ཐར་ཐར་བེ་དག༌ཉི།

33རོག་ཏེ་བ་ཀི་ཞུ་ཝ་ལ་ ཨའི་ཤོ་ ཨ་བཱརའ་ཧམ་ག་རྒྱུད་པ་གི༌ལ། ཉི་ཨའི་ཧ་ལ་རང་ ཟ་པ་རི་ཝ་མཱན༌ཅ། ཨོ་ཉི་ཨ་དེན་གེ་ ཨའི་ཚེ་ཐར་ཐར་བེ་དག་ཉི་ ནཱན་གི་ ཧང་ཏེན་གསུངས་མེ་ རེ་ཅ་ཡ་དག༌ཉི།

34ཡི་ཤུ་གི་ ལན་གནང་ཉི་གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ཨི་བི་གི་སྡིག་པ་ཨ་ཝ་ཐུར་ ཨོ་ཉ་སོ་ངོ་ཤོ་ སྡིག་པ་ག་ཟ་པ་གི༌ལ། 35ཉི་ཨོམ་ ཟ་པ་ཤོ་ ཏ་བུ་ག་དེན་གེ་ ཨོ་ཉ་ཕའི་ནང་ཀ་ སོ་ངོ་མང་གི་ དག་པ་ཀབ་ཉི་ ཟ་ཤོ་ ཏ་བུ་ག་དེན་གེ་ ཨོ་ཉ་ཕའི་ག་སོ་ངོ་གི༌ལ། 36ཨོ་ཉི་ཨ་དེན་གེ་ ཟ་གི་ ན་ཧ་བ་ཚེ་ཐར་ཐར་ནེ་ལ་ ན་ཧ་བ་ཤོ་དེན་པ་རང་ ཚེ་ཐར་ཐར་ཅ་གི༌ལ། 37ན་ཧ་བ་ཤོ་ ཨ་བཱརའ་ཧམ་ག་ རྒྱུད་པ་གི་ལ་དག་ཉི་ ཇི་གི་སེན༌ཅ། ཨོ་ཉེ་རང་གི་ནེ་བུ་ ན་ཤི་ཇང་ཤེ་ལེ་གོད༌ལ། ཧང་ཡ་དག་ནེ་ལ་ ཇི་གི་ཡེ་ཁཱན་ཁེ་པ་ ན་ཤི་ཆ་ཐ་ལུ་མ༌ལ། 38ཇ་ག་ཨ་པ་གི་ ཇ་ག་ཏཱན་ གེན་ཉི་གནང་ཁཱན་ཁེ་པ་ ཇི་གི་ན་ཧ་ཡེག༌ཅ། དག་པ་ཀབ་ཉི་ ན་ཤི་ཤོ་ ན་ཧ་ཨ་པ་གེ་ ན་ཐ་ཁཱན་ཁེ་པ་ཨ་ན་དག་ཉི་ གསུངས་མ༌ལ།

39ཨ་བཱརའ་ཧམ་ཤོ་ ཨ་ཧ་ཨ་པ་གི་ལ་དག་ཉི་ རོག་ཏེ་བ་ཀི་ ལན་ཞུ་ལ་ཀབ་ཉི་ ཡི་ཤུ་གི་གསུངས་མ་ལ་ ན་ཧ་བ་ ཨ་བཱརའ་ཧམ་ག་ ཝག་ཙ་བ་གི་ནེ་ལ་ རོ་ཀི་ཨ་ཁཱན་ཁེ་པ་ ན་ཤི་ཨ་ལེ་ཆོ༌ཝ། 40ཇི་གི་དཀོན་མཆོག་གེ་ ན་ཐ་ཁཱན་དེན་པ་ཁེ་པ་ ན་ཧ་ཡེག་པེ་ག་ མིག་པ་ཕིན༌ཅ། དག་པ་ཀབ་ཉི་ ན་ཤི་ཇང་ཤེ་ལེ་གོད༌ལ། ཉི་ཨ་བཱརའ་ཧམ་གི་ ཨུ་ཉུ་ད་བུ་ལའི་ ཧ་ལ་རང་ ཨ་ཝ་མཱན༌ཅ། 41ན་ཧ་ཕ་མ་བ་ཀི་ཨ་ཁཱན་ཁེ་པ་ ན་ཤི་བུ་ཨ་ན་དག་ཉི་ གསུངས་མ་ཀབ་ཉི་ རོག་ཏེ་བ་ཀི་ཞུ་ཝ་ལ་ ཨ་ཧ་ཨ་པ་ཤོ་ དཀོན་མཆོག་ཐུར་ཤ་གི༌ལ། ཉི་ཨ་ཧ་བ་ཤོ་ ཀོག་ཏི་མང་གི་དག༌ཉི།

42ཡི་ཤུ་གི་ རོག་ཏེ་བ་ཀ་གསུངས་མ་ལ་ ན་ཧ་ཨ་པ་ དཀོན་མཆོག་གི་ནེ་ལ་ ན་ཤི་ཇང་ཕང་པེ་ཆོ༌ཝ། ཧང་ཡ་དག་ནེ་ལ་ ཇང་ཤོ་ དཀོན་མཆོག་གེ་ཨུ་ཉི་ ཨོ་མ་ཐ་ཤེག་པ༌ཅ། ཇང་ཏེན་ག་སེམས་དང་ཏུ་ཉི་ ཨོ་ཕ་མང་གི་ཝ་ རོ་ཀི་ཨ་ཉི་ ཇང་ཀུན་ཏི་ཝ་གི༌ལ། 43ཇི་གི་ཡེག་ཁཱན་ཁེ་པ་ ན་ཤི་ཧང་ཨ་ཉི་ ཧ་མ་གོན་ཅ་ཡ། ཨུ་ཉུ་ཤོ་ ཇི་གི་ཡེག་ཁཱན་ཁེ་པ་ ན་ཤི་ཉཱན་པེ་མར་བ་ཨ་དེན་གེ་གི༌ལ། 44ན་ཧ་བ་ཤོ་ ན་ཧ་ཨ་པ་ག་གི༌ལ། ཉི་ན་ཧ་ཨ་པ་ཤོ་ བདུད་གི༌ལ། ཉི་ན་ཧ་ཨ་པ་གི་ བག་ཆགས་ཨ་ཁཱན་ཁེ་པ་ ན་ཤི་ཨ་ན། རོག་ཤོ་ དེན་པ་ཙུང་མེ་མང་གི་ཝ་ གོ་ཙུག་པེ་གང་ཀེ་རང་ སོ་ངོ་ཤེ་ཁཱན་གི་ཝ་ཆོ༌ཝ། ཧང་ཡ་དག་ནེ་ལ་ རོ་ཀ་ནང་ཀ་ དེན་པ་མཱན༌ཅ། རང་བཞིན་གེ་ སོ་ད་ཕི་ཁཱན་གི་ཝ་ཨ་དེན་གེ་ ཧ་ལ་ཨ་ནེ་བུ་ རོ་ཀི་སོ་ད་ཕིན༌ཅ། ཧང་ཡ་དག་ནེ་ལ་ རོག་ཤོ་ སོ་ད་ཁོ་པ་གི༌ལ། ཉི་སོ་ད་བ་ཀ་ ཨ་པ་གི༌ལ། 45དག་པ་ཀབ་ཉི་ ཇི་གི་ ན་ཧ་དེན་པ་ཡེག་པ་ཨ་དེན་གེ་ ཉི་ན་ཤི་ ཇ་ག་དད་པ་ཨ་ལུ་མ༌ལ། 46ཇི་གི་སྡིག་པ་ཨ་ཝ་དག་ཉི་ ནའི་ཨི་བི་གི་ ཡེག་པེ་རེ་བེ་ཡ། ཉི་ཇི་གི་དེན་པ་ཡེག་ཐཱན་ཨ་ནེ་ལ་ ན་ཤི་ཧང་ཨ་ཉི་ ཇ་ག་ཏཱན་ དད་པ་མ་ཨན་ཅ་ཡ། 47ཨི་བི་གི་ནེ་བུ་ རོ་ཀ་ཨ་པ་ དཀོན་མཆོག་གི་ནེ་ལ་ དཀོན་མཆོག་གི་ གསུངས་ཁཱན་ཁེ་པ་ ཉཱན༌ཅ། ཇི་གི་ཡེག་པ་ཀབ་ཉི་ ན་ཤི་མ་ཉཱན་ཁཱན་ཤོ་ ན་ཧ་བ་ དཀོན་མཆོག་ག་ མང་གི་ཝ་ཨ་དེན་གེ་གི་ལ་དག་ཉི་ གསུངས་མ༌ལ།

48ཡ་ཧུ་དི་པ་བ་ཀི་ རོ་ཀ་ཞུ་ཝ་ལ་ ཧང་ཨ་ཉི་ ནཱན་ཤོ་ ས་མ་རི་པ་དང་ དོན་གི་ནོད་ཁཱན་དག་ཉི་ ཡེག་པེ་ག་མ་དེན་མ་སྨོ་དག༌ཉི།

49ཡི་ཤུ་གི་གསུངས་མ་ལ་ ཇང་བདུད་ཀི་ནོད་པ་མཱན༌ཅ། དག་པ་ཀབ་ཉི་ ཇི་གི་ ཇ་ག་ཨ་པ་ག་ གུས་ཞབས་ཨན༌ཅ། ཉི་ན་ཤི་ ཇ་ག་གུས་ཞབས་ཨ་ལུ་མ༌ལ། 50ཇི་གི་ཇང་ཏེན་ག་དེན་གེ་ གཟི་བརྗིད་ལ་མ་མཱན༌ཅ། དག་པ་ཀབ་ཉི་ གཟི་བརྗིད་ལམ་ཁཱན་དང་ ཇ་ག་ཁ་ཨ་ཉི་ ཁྲིམས་ཅཱད་ཁཱན་ཐུར༌ཅ། 51ཇི་གི་ ན་ཧ་དེན་པ་ཡེག་ཅ་ ཨི་བི་གི་ ཇི་གི་ཡེ་ཁཱན་ག་ ཆ་གནས་ཐ་ཝ་ཐུར་ ཨོ་ཉ་སོ་ངོ་ཁེ་པ་ ཧ་ལ་རང་མ་ཤི་ལ་དག་ཉི་ གསུངས་མ༌ལ།

52རོག་ཏེ་བ་ཀི་ཞུ་ཝ་ལ་ ཨོམ་གི་ནེ་ལ་ ན་ག་ནང་ཀ་ བདུད་ནུ་ཕ་ལ་དག་ཉི་ ཨ་ཤི་ཏེན་ཏེན་ཨ་ཉི་རང་སེ༌ཝ། ཧང་ཡ་དག་ནེ་ལ་ ཨ་བཱརའ་ཧམ་གཤགས་པ་ ཉི་ལུང་བསྟན་པ་བ་བུ་གཤགས༌པ། དག་པ་ཀབ་ཉི་ ནཱན་གི་ཡེག་ལ་ ཨི་བི་གི་ ནཱན་གི་ཡེ་ཁཱན་ག་ ཆ་གནས་ཐ་ཝ་ཐུར་ ཧ་ལ་རང་ མ་ཤི་ལ་དག༌ཉི། 53ཨ་ཧ་ཨ་པ་ ཨ་བཱརའ་ཧམ་ཆང་གཤགས༌པ། ཉི་ལུང་བསྟན་པ་བ་བུ་གཤགས༌པ། ཧང་ནཱན་ཤོ་ ཨ་ཧ་ཨ་པ་ ཨ་བཱརའ་ཧམ་གེ་བུ་ ཆི་ལུ་གི་ལ་སྨོ། ནཱན་གི་ཨ་ནེ་ལ་ ནཱན་ཤོ་ ཨི་བི་གི་ལ་ཨ་ཉི་ མིན་ཅ་ཡ་དག༌ཉི།

54ཡི་ཤུ་གི་གསུངས་མ་ལ་ ཇི་གི་ ཇང་ཏེན་ག་བསྟོད་པ་ཕི་ནེ་ལ་ ཨོ་ཉ་བསྟོད་པ་ཁེ་པ་ ཁུངས་ཧང་རང་མཱན༌ཅ། དག་པ་ཀབ་ཉི་ ན་ཤི་ ན་ཧ་དཀོན་མཆོག་གི་ལ་དག་ཉི་ཡེག་ཁཱན་ ཇ་ག་ཨ་པ་གི་ ཇ་ག་བསྟོད་པ་ཕི་ཉི་གནང༌ཅ། 55ན་ཤི་ རོག་གུམ་མ་ཡེན་ཐཱན་རང་གི་ནེ་བུ་ ཇི་གི་རོག་གུམ་ཡེན༌ཅ། ཇི་གི་རོག་གུམ་ཡེ་ལུ་མཱན་ཅ་དག་ཉི་ ཡེག་ནེ་ལ་ ཇང་བུ་ ན་ཧ་བ་པུརུས་ཀིན་ཨ་ཉི་ སོ་ད་ཕི་ཁཱན་རི༌ལེ། དག་པ་ཀབ་ཉི་ ཇི་གི་རོག་གུམ་ཡེན༌ཅ། ཉི་རོ་ཀི་གསུངས་ཁཱན་ག་ ཆ་གནས་ཐཱན༌ཅ། 56ཇང་ཨོ་ཕེ་གི་ལ་དག་སེ་ཉི་ ན་ཧ་ཨ་པ་ ཨ་བཱརའ་ཧམ་ གནམ་མེད་ས་མེད་ ཤོ་ནང་ཕེ་ཝ་ཆོ༌ཝ། རོ་ཀི་ཨོ་ཉ་ནོང་ ཐོང་མ་ཀབ་ཉི་ རོག་གནམ་མེད་ས་མེད་ ངལ་རངས་པ་དག་ཉི་ གསུངས་མ༌ལ།

57ནཱན་ཨོམ་ ཉིང་ 50 མ་དི་ཝ་ག་ ནཱན་གི་ ཨ་བཱརའ་ཧམ་ མཇལ་བ་ཨ་ཉི་སྨོ་དག་ཉི་ ཡ་ཧུ་དི་པ་བ་ཀི་ རོ་ཀ་ཞུ་ལ་ཀབ་ཉི

58ཡི་ཤུ་གི་གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ཨ་བཱརའ་ཧམ་ མ་ཀེ་ལེ་གོ་མ་ ཇང་ཆོ་ཝ་དག༌ཉི། 59ཨུ་ཉུ་ད་བུ་ ན་ཐ་ལ་ཀབ་ཉི་ རོག་ཏེ་བ་ཀི་ ཡི་ཤུ་ག་ ལུ་ཤི་དྲོ་མེ་དེན་གེ་ ལུང་དུང་མ༌ལ། དག་པ་ཀབ་ཉི་ ཡི་ཤུ་རོག་ཏེན་གི་གུམ་ཉི་ མཆོད་ཁང་ཐུབ་ཐ་ཉི་ བྱོན་མ༌ལ༎

Currently Selected:

ཡུ་ཧན་ན། 8: TNTB

Highlight

Copy