ཡུ་ཧན་ན། 9
9
ཀེ་ལེ་གང་ཀེ་རང་ མིང་ཀ་ན་ཆོ་ཁཱན་སོ་ངོ་ དྲག་པ༌ལ།
1ཉི་ཡི་ཤུ་བྱོན་ཅ་ཨ་ཉི་ ཀེ་དེན་ཐུར་གེ་ག་ཏཱན་ མིང་ཀ་ན་ཆོ་ཁཱན་སོ་ངོ་ཐུར་ གཟིགས་པ༌ལ། 2རོ་ཀ་སློ་མ་བ་ཀི་ཞུ་ཝ་ལ་ སློབ་དཔོན་ ཨོ་ཐ་སོ་ངོ་ མིང་ཀ་ན་ཨ་ཉི་ཀེ་ཁཱན་ཤོ་ རོ་ཀ་སྡིག་པ་གི་ཨ་ཉི་སྨོ་ རོ་ཀ་ཕ་མ་ག་ སྡིག་པ་གི་ཨ་ཉི་ཡ་དག༌ཉི།
3ཡི་ཤུ་གི་གསུངས་མ་ལ་ རོ་ཀི་སྡིག་པ་ཨ་ཝ་གེ་མང་གི། ཉི་རོ་ཀ་ཕ་མ་གི་ སྡིག་པ་ཨ་ཝ་ཨ་དེན་གེ་བུ་མང་གི། དག་པ་ཀབ་ཉི་ རོ་ཀ་ཚེ་ག་ དཀོན་མཆོག་གི་ མཛད་ཁཱན་ཕྱག་ལཱ་ཁེ་པ་ ཐོང་ཆེན་དག་པ་གི་ རོག་མིང་ཀ་ན་ཨ་ཉི་ ཀེ་ཝ་གི་ལ་དག༌ཉི། 4ངམ་ཨ་ཉི་རང་ཆོ་ལེ་གང་ཀ་ ཨ་ཤི་ ཇང་ཀུན་ཏི་ཁཱན་ག་ ལའི་ཨ་ལེ་ཁེ༌ལེ། ཉི་མིང་མེར་བེ་ཅམ་པ༌ཅ། བི་ནང་རི་དེན་གེ་ལ་ ཨི་བི་གི་རང་ ལའི་ཨ་ལེ་མར་བ་རི༌ལེ། 5ཇང་འཛམ་གླིང་ག་ཆོ་ལེ་གང་ཀ་ ཇང་ཤོ་ འཛམ་གླིང་ག་ འོད་ཟེར་གི་ལ་དག་ཉི་ གསུངས་མ༌ལ།
6ཨོ་ཐེན་གསུངས་ཐཱན་ ཡི་ཤུ་གི་ ས་ག་ཏཱན་ཐོབ་ཏང་ཚེ་ཝ༌ལ། ཉི་ཐོབ་ཏང་ག་ས་ཉེན་ཐཱན་ མིང་ཀ་ན་ག་མིང་ག་སོག་ཉི་ 7གསུངས་མ་ལ་ དིན་ཐཱན་ སི་ལོ་ཨམ་ག་རི་ཙང་ག་ ན་ག་གུམ་ཟིག་ཅོ་དག༌ཉི། (སི་ལོ་ཨམ་དག་པེ་དེན་ཐ་ཤོ་ ཀུན་ཏི་ཝ་གི་ཝ༌ལ།) ཉི་རོག་དིན་ཐཱན་ཟིག་ཉི་ ཕའི་ག་ཏཱན་ལོག་ཅ་ཨ་ཉི་ ཐོང་མེ་རེ་བ་རི་ཝ༌ལ།
8གོ་མ་ རོག་ཕུན་ཉི་ཆོ་ལེ་གང་ཀ་ཐོང་ཁཱན་ རོ་ཀ་ནོག་མིན་བ་ཀི་ ཇི་མ་ལ་ ཨོ་ཐ་སོ་ངོ་ཤོ་ ལང་ཉི་ཕུན་ཁཱན་མང་གི་སྨོ་དག༌ཉི། 9ཚེ་བང་གི་ཡེག་པ་ལ་ རོག་རང་གི་ལ་དག༌ཉི། ཉི་ཚེ་བང་གི་ཨ་ནེ་ལ་མང་གི། ཨོ་ཐ་སོ་ངོ་ཤོ་ རོ་ཀེ་ཤེ་རི་རིག་ལ་དག༌ཉི།
དག་པ་ཀབ་ཉི་ རོ་ཀི་ཡེག་པུ་ཡེག་ས་རང་ཆོ་ཝ་ལ་ ཇང་ཤོ་ ཨོ་ཉ་མིང་ཀ་ན་གི་ལ་དག༌ཉི།
10ཉི་ལ་ ན་ག་མིང་ཧང་ཏེན་ཨ་ཉི་ ཆོག་པ་ཡ་དག་ཉི་ རོག་ཏེ་བ་ཀི་ ཇི་མ་ཀབ་ཉི་ 11ན་ཤི་ཡི་ཤུ་དག་ཉི་ར་ཁཱན་ སོ་ངོ་གི་ ཞིང་ཅོད་ཐཱན་ ཇ་ག་མིང་ག་སོག་ཉི་གནང༌མ། ཉི་རོ་ཀི་ ཇང་སི་ལོ་ཨམ་ག་ དིན་ཐཱན་ཟིག་ཅོ་དག་ཉི་ གསུངས་ཆོ༌ཝ། ཉི་ཇང་དིན་ཐཱན་ཟིག་པ་ཀབ་ཉི་ ཇི་གི་ཐོང་མེ་རེ་བ་རི་ཝ་དག༌ཉི།
12ཨོ་ཉ་སོ་ངོ་ ཨོ་ག་ཅ་ཡ་དག་ཉི་ རོག་ཏེ་བ་ཀི་ ཇི་མ་ཀབ་ཉི་ རོ་ཀི་ཡེག་པ་ལ་ ཇི་གི་མ་སེ་ལ་དག༌ཉི༎
ཕ་རི་སི༌པ༌བ༌ཀི་དྲག༌ཁཱན༌ག་ཀོར༌གེ་ ཞིབ༌དཔྱད་ཕི༌ཝ༌ལ།
13གོ་མ་མིང་ཀ་ན་ཆོ་ཁཱན་ཁེ་པ་ རོག་ཏེ་བ་ཀི་ ཕ་རི་སི་པ་བ་ཀ་བཱརང་ཀ་ ཕ་ཝ༌ལ། 14ཉི་ཡི་ཤུ་གི་ཞིང་ཅོད་ཉི་ མིང་ཀ་ན་དྲག་ཉི་གནང་ཁཱན་ནོང་ཤོ་ དུས་བཟང་གི་ཝ་ཆོ་ཝ༌ལ། 15ཨོ་ཉི་ཨ་དེན་གེ་ ཕ་རི་སི་པ་བ་ཀི་བུ་ ནཱན་གི་ ཧང་ཏེན་ཐོང་མེ་རེ་བ་ཡ་དག་ཉི་ ཇི་མ་ཀབ་ཉི་ རོ་ཀི་ ཇ་ག་མིང་ག་ ཞིང་སོག་ཉི་གནང༌མ། ཉི་ཇི་གི་ཟིག་པ་ཀབ་ཉི་ ཐོང་མེ་རེ་བ་དག་ཉི་ ཡེག་པ༌ལ།
16ཕ་རི་སི་པ་ཚེ་བང་གི་ཡེག་པ་ལ་ ཨོ་ཐ་སོ་ངོ་གི་ དུས་བཟང་མ་ཙི་ཝ་ཨ་དེན་གེ་ རོག་ཤོ་ དཀོན་མཆོག་གེ་ མང་གི་དག༌ཉི།
དག་པ་ཀབ་ཉི་ ཚེ་བང་གི་ཨ་ནེ་ལ་ སྡིག་ཅན་གི་ཤོ་ ཧང་ཏེན་ཨ་ཉི་ ཨུ་ཉུ་ད་བུ་ རྫུ་འཕྲུལ་ག་རྟགས་མཚན་བ་ གེན་མེ་རེ་བེ་ཡ་དག་ཉི་ཡེག་ཉི་ རོག་ཏེ་བ་ནང་དོ་ མ་ཆ་མ་རི་ཝ༌ལ།
17ཇུ་ཀ་དག་པ་ཀབ་ཉི་ རོག་ཏེ་བ་ཀི་ མིང་ཀ་ན་ཆོ་ཁཱན་ག་ཏཱན་གིར་ཐཱན་ རོ་ཀི་ན་ག་མིང་ཆོག་པ་གི་ཝ༌ལ། ཉི་ནཱན་གི་ཨ་ནེ་ལ་ རོ་ཀ་ཀོར་གེ་ ཧང་ཡེག་པེ་དག་ཉི་ ཇི་མ་ཀབ་ཉི་ རོག་ཤོ་ ལུང་བསྟན་པ་གི་ལ་དག་ཉི་ རོ་ཀི་ཡེག་པ༌ལ།
18ཡ་ཧུ་དི་པ་འགོ་དཔོན་བ་ཀི་ རོག་ཤོ་ མིང་ཀ་ན་ཆོ༌ཝ། ཉི་ཨོ་མ་ཤ་ ཐོང་མེ་རེ་བ་རི་ཝ་གི་ལ་དག་ཉི་ ལོ་མ་དི་ཝ་ཨ་དེན་གེ་ རོ་ཀ་ཨ་པ་དང་ ཨ་མ་ར་ལེ་ཀུན་ཏི་ཝ༌ལ། 19ཉི་རོག་ཏེ་བ་ཀི་ རོ་ཀ་ཕ་མ་ག་ཇི་མ་ལ་ ཨོ་ཐ་སོ་ངོ་ ན་ཆིང་ག་ཟ་གི་ལ་སྨོ། ན་ཤི་ཡེག་ལ་ རོག་ཤོ་ ཀེ་ལ་ཀབ་ཉི་རང་ མིང་ཀ་ན་ཆོ་ཝ་དག༌ཉི། དག་པ་ཀབ་ཉི་ ཨོམ་ཤོ་ ཧང་ཏེན་ཨ་ཉི་ ཐོང་མེ་རེ་བ་རི་ཝ་ཡ་དག༌ཉི།
20རོ་ཀ་ཕ་མ་གི་ཡེག་པ་ལ་ ཨ་ཤི་སེན་ཅ་ རོག་ཤོ་ ཨ་ཧ་ཟ་གི༌ལ། ཉི་རོག་ཀེ་ལེ་གང་ཀེ་རང་ མིང་ཀ་ན་ཆོ་ཝ་དག་ཉི་བུ་ ཨ་ཤི་སེན༌ཅ། 21དག་པ་ཀབ་ཉི་ ཨོམ་ཧང་ཏེན་ཨ་ཉི་ ཐོང་མེ་རེ་ཅ་གི་ལ་སྨོ་ ཉི་ཨི་བི་གི་ རོ་ཀ་མིང་ཆོག་པ་གི་ལ་སྨོ་ ཨ་ཤི་མ་སེ༌ལ། རོ་ཀ་ཏཱན་ཇིམ་ཤོ་ ཧང་ཡ་དག་ནེ་ལ་ རོག་ནམ་སུ་ཏག་ཉི་ རོག་རོག་ཏེན་གི་ ཡེག་པེ་རེ་བ་རི་ཝ་ཅ་དག༌ཉི། 22རོག་ཉིག་ཙིང་ རོག་ཏེ་བ་ཀེ་ ཡོང་ཁེ་ཝ་ཨ་དེན་གེ་ ཨོ་ཐེན་ཡེག་པ་ཆོ་ཝ༌ལ། ཧང་ཡ་དག་ནེ་ལ་ ཨི་བི་གི་ ཡི་ཤུ་ཤོ་ ཁིརིས་གི་ལ་དག་ཉི་ དད་པ་ཨ་ཝ་ཐུར་ ཨོ་ཉ་སོ་ངོ་ཁེ་པ་ ཆོས་འཛོམས་གེ་ ཤོ་ཉི་གེ་མེ་དག་ཉི་ ཡ་ཧུ་དི་པ་འགོ་དཔོན་བ་ཀི་ ཏུན་ཆ་ཨ་ཝ་ཅ་གི་ཝ༌ལ། 23ཨོ་ཉི་ཨ་དེན་གེ་ རོ་ཀ་ཕ་མ་གི་ཡེག་པ་ལ་ རོག་ནམ་སུ་ཏག་པ་རི་ཝ༌ཅ། རོ་ཀ་ཇིམ་ཤོ་དག༌ཉི།
24རོག་ཏེ་བ་ཀི་ མིང་ཀ་ན་ཆོ་ཁཱན་ཁེ་པ་ ཨོམ་ཆང་རང་རཱན་ཐཱན་ ཡེག་པ་ལ་ ནཱན་གི་ཆཱས་དེན་པ་ཡེག་ཉི་ དཀོན་མཆོག་ག་བསྟོད་པ་ཕུལ༌ཤོ། ཨ་ཤི་སེན་ཅ་ ཡི་ཤུ་ཤོ་ སྡིག་ཅན་གི་ལ་དག༌ཉི།
25རོ་ཀི་ལན་མཇལ་ཉི་ རོག་སྡིག་ཅན་གི་ལ་སྨོ་མང་གི་སྨོ་ ཇི་གི་མ་སེ༌ལ། དག་པ་ཀབ་ཉི་ ཇི་གི་ཨུ་ཐུ་གི་ནེ་ལ་སེན་ཅ་ ཇང་མིང་ཀ་ན་ཆོ་ཝ་ དག་པ་ཀབ་ཉི་ ཨོམ་ ཇི་གི་ཐོང་མེ་རེ་ཅ་དག་ཉི་ ཡེག་པ༌ལ།
26རོག་ཏེ་བ་ཀི་ རོ་ཀ་ཇི་མ་ལ་ རོ་ཀི་ན་ག་ཏཱན་ ཧང་ཨ་ཝ་ཡ། ཉི་རོ་ཀི་ན་ག་མིང་ ཧང་ཏེན་ཨ་ཉི་ཆོག་པ་ཡ་དག༌ཉི།
27རོ་ཀི་ལན་མཇལ་ཉི་ཡེག་པ་ལ་ ཇི་གི་ ན་ཧ་ཨོམ་དེན་རང་ཡེག་པ་ དག་པ་ཀབ་ཉི་ ན་ཤི་མ་ཉཱན་ཅི། ཉི་ན་ཧ་བ་ ཧང་ཨ་ཉི་ ཨོམ་ཆང་རང་ ཉཱན་པེ་ལམ་ལ་ཡ། ཧང་ན་ཧ་བ་བུ་ རོ་ཀ་སློ་མ་རི་ལེ་ག་ སེམས་ཨ་ན་སྨོ་དག༌ཉི།
28ཉི་རོག་ཏེ་བ་ཀི་ རོ་ཀ་མེམ་ཅོར་ཉི་ཡེག་པ་ལ་ ནཱན་ཤོ་ ཨོ་ཉ་སོ་ངོ་ག་ སློ་མ་གི་ཝ༌ལ། དག་པ་ཀབ་ཉི་ ཨའི་ཤོ་ མོ་ས་ག་སློ་མ་གི༌ལ། 29ཨ་ཤི་སེན་ཅ་ དཀོན་མཆོག་གི་ མོ་ས་ཀབ་ཉི་ གསུང་གྲོས་མཛད་པ་ཨ༌ཉི། དག་པ་ཀབ་ཉི་ ཨོ་ཐ་སོ་ངོ་ ཨོ་གེ་གི་ལ་སྨོ་རང་ ཨ་ཤི་མ་སེ་ལ་དག་ཉི་ ཡེག་པ༌ལ།
30ཨོ་ཉ་སོ་ངོ་གི་ཡེག་པ་ལ་ ན་ཧ་ཨོ་ཉ་ཆཱས་ཏེ་ ཡིད་ཆི་སི་སི་ཨ་ཝ༌ལ། རོག་ཨོ་གེ་གི་ལ་སྨོ་ ན་ཤི་མ་སེ་ཝ༌ལ། དག་པ་ཀབ་ཉི་ རོ་ཀི་མིང་ཆོག་ཉི་གནང༌མ། 31ཨ་ཤི་སེན་ཅ་ དཀོན་མཆོག་གི་ སྡིག་ཅན་ག་སྨོན་ལམ་ སྙན་གསེང་པུ་མཱན༌ཅ། དག་པ་ཀབ་ཉི་ རོ་ཀ་གསོལ་ཝ་ཏབ་ཉི་ རོ་ཀ་ཐུགས་བཞེད་དང་ཏུ་ཉི་ ཕྱག་ཞུ་ཁཱན་ག་སྨོན་ལམ་ རོ་ཀི་སྙན་གསེང༌ཅ། 32ཀེ་ལ་ཀབ་ཉི་རང་ མིང་ཀ་ན་ཨ་ཉི་ཀེ་ཁཱན་ སོ་ངོ་ག་མིང་ཁེ་པ་ དྲག་ཉི་ཐོང་མེ་རེ་བ་ཀོར་གེ་ ཨོ་མ་སག་པུ་ ཨི་བི་གི་རང་ ན་ཐ་ཝ་མཱན༌ཅ། 33ཉི་ཨོ་ཐ་སོ་ངོ་ཁེ་པ་ དཀོན་མཆོག་གེ་མང་གི་ནེ་ལ་ རོ་ཀི་ཧང་རང་ ཨ་ལེ་མར་བ་དག་ཉི་ ཡེག་པ༌ལ།
34ཉི་རོག་ཏེ་བ་ཀི་ རོ་ཀ་ཏཱན་ ནཱན་ཤོ་ སྡིག་པ་ནང་ཀ་ཀེ་ཉི་ ཟོག་པ་སོ་ངོ་གི༌ལ། ཉི་ནཱན་གི་ ཨ་ཧ་ཡེ་ལེ་ ཙ་རྩིས་ཕིན་ཅ་སྨོ་དག་ཉི་ཡེག་ཉི་ ཆོས་འཛོམས་གེ་ ཤོ་ཉི་གེ་མ༌ལ༎
ཐུགས་ཉིད་ག་མིང་ཀ་ན།
35ཡི་ཤུ་གི་ རོག་ཆོས་འཛོམས་གེ་ ཤོ་ཉི་གེ་མ་དག་ཉི་ ན་ཐ་ཝ༌ལ། ཉི་རོ་ཀི་ རོག་ཁྲབ་ཏེན་གེ་ གསུངས་མ་ལ་ ནཱན་གི་ སོ་ངོ་ག་ཟ་ག་ དད་པ་ཨན་ཅ་སྨོ་དག༌ཉི།
36རོ་ཀི་ཞུ་ཝ་ལ་ སློབ་དཔོན་ སོ་ངོ་ག་ཟ་ཤོ་ ཨི་བི་གི་ལ་སྨོ་ ཇ་ག་གསུངས་གནང་ཤོ་ ཉི་ཇི་གི་ རོ་ཀ་དད་པ་ཨ་ལེ་དག༌ཉི།
37ཡི་ཤུ་གི་རོ་ཀ་ ནཱན་གི་ཐོང་ཉི་ཆུ་མ༌ཅ། ཨོ་མ་ ནཱན་ཀབ་ཉི་ཆཱས་ཨ་ཁཱན་ཤོ་ རོག་གི་ལ་དག་ཉི་ གསུངས་མ་ཀབ་ཉི་ 38གཙོ་བོ་ ཇི་གི་དད་པ་ཨན་ཅ་དག་ཉི་ ཞུན་ཐཱན་ རོ་ཀི་ཡི་ཤུ་ག་ གསོལ་ཝ་ཏ་པ༌ལ།
39ཡི་ཤུ་གི་ རོ་ཀ་གསུངས་མ་ལ་ མིང་ཀ་ན་བ་ཀི་ཐོང་ཆེན། ཉི་ཐོང་ཁཱན་བ་ མིང་ཀ་ན་རི་ཆེན་དག་པ་གི་ ཇང་འཛམ་གླིང་ག་ ཁྲིམས་ཅཱད་པེ་དེན་གེ་ ཨོ་ཕ་གི་ལ་དག༌ཉི།
40རོག་ཀབ་ཉི་ཆོ་ཁཱན་ ཕ་རི་སི་པ་ཚེ་བང་གི་ ཨོ་ཐ་ཆཱས་ ན་ཐ་ཉི་ཡེག་པ་ལ་ ཧང་དང་ ཨ་ཧ་བ་བུ་ མིང་ཀ་ན་གི་ལ་སྨོ་དག༌ཉི།
41ཡི་ཤུ་གི་གསུངས་མ་ལ་ ན་ཧ་བ་ མིང་ཀ་ན་གིན་ཐཱན་ཨ་ནེ་ལ་ ན་ཧ་བ་ཀི་སྡིག་པ་ཨ་ཝ་ཨ་ཉི་ མ་ཆིན་མེ་ཆོ༌ཝ། དག་པ་ཀབ་ཉི་ ན་ཤི་ ན་ཧ་བ་ཤོ་ ཐོང་མེ་རེ་ཁཱན་གི་ལ་དག་ཉི་ ཡེག་པ་ཨ་དེན་གེ་ ན་ཧ་བ་ ངཱད་པ་ཆིན་མེ་དག༌ཉི༎
Currently Selected:
ཡུ་ཧན་ན། 9: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
