ལུ་ཀ། 1
1
1ཨ་ཧ་པོང་ཀ་ ཇུང་ཁཱན་བ་ཀ་ཀོར་གེ་ སོ་ངོ་མང་པུ་ཐུར་གི་ འབྲི་བེ་གོ་ཙུག༌པ། 2གོ་ཙུག་པེ་གང་ཀེ་རང་ རང་ཏེན་ག་ མིང་གི་ཐོང་ཁཱན་དང་ གསུང་བཤད་ཁཱན་བ་ཀི་ ཨ་ཧ་གསུངས་མ་པུརུས་ཀིན་རང་ རོག་ཏེ་བ་ཀི་ འབྲི་བ༌ལ། 3ཇི་གི་བུ་ ཨོ་ཐ་ཀོར་གེ་ ཐམས་ཅན་རང་ གོ་ཙུག་པ་གེ་ག་ཏཱན་རང་ ལེག་པ་ཨ་ཉི་ བརྟག་དཔྱད་ཕི་ཉི་ གོད་པ་ཨ་དེན་གེ་ དྲག་ཤོས་ཐི་ཡོ་ཕི་ལཱས་ ན་ག་དེན་གེ་ འགོ་རིམ་བཞིན་དུ་ཨ་ཉི་ འབྲི་ནེ་ལ་ ལེག་པུ་ཨོ་ཕེ་ལ་དག་ཉི་ ཇི་གི་མིན༌ཅ། 4ཧང་ཡ་དག་ནེ་ལ་ ན་ག་ཞུ་ཁཱན་ དེན་པ་བ་ཀ་ཀོར་གེ་ ནཱན་གི་ མཁྱེན་ཆེན་དག་པ་གི་གི༌ལ༎
ཁྲུས་གསོར་པ་ཡུ་ཧན་ན་ འཁྲུངས་མེ་གི་ལ་དག་ཉི་ གསུངས་མ༌ལ།
5ཡ་ཧུ་དི་ཡ་ དཔོན་ཧེ་རོད་གི་ དབང་པེ་གང་ཀ་ ཨ་བི་ཡ་ག་ལོ་ཀེ་ཆོ་ཁཱན་ ཇ་ཀ་རི་ཡ་དག་ཁཱན་ བླ་མ་ཐུར་ཆོ་ཝ༌ལ། ཉི་ཧ་རུན་ག་རྒྱུད་པ་ ཨེ་ལི་ཤི་བ་དག་ཁཱན་ཤོ་ རོ་ཀ་མེ་ཝག་ཙ་གི་ཝ་ཆོ་ཝ༌ལ། 6ཉི་དཀོན་མཆོག་ག་ སྐུན་མདུན་ག་ རོག་ཉིག་ཙིང་རང་ སོ་ངོ་དྲང་པུ་ ཉི་ཐིག་ཏི་ངེ་རང་ མ་ཤོར་བ་ཨ་ཉི་ གཙོ་བོ་ག་བཀའ་རྒྱ་དང་ ཁྲིམས་བ་ འགྲུབ་ཅ་གི་ཝ༌ལ། 7ཉི་ཨེ་ལི་ཤི་བ་གི་ ཝག་ཙ་མང་ཕ་ཨ་དེན་གེ་ རོག་ཉིག་ཙིང་རང་ ཝག་ཙ་མ་ཝ་ཨ་ཉི་རང་ ལོ་ན་གཱན་པ༌ལ།
8ཉི་ཤེབ་ཐུར་ ཇ་ཀ་རི་ཡ་ག་ལོ་ཀེ་ ཆོ་ཁཱན་བ་ཀི་ ཕྱག་ཞུ་ལ་ཀབ་ཉི་ ཡ་རུ་ཤ་ལེམ་ག་ཆོ་ཁཱན་ དཀོན་མཆོག་ག་ མཆོད་ཁང་ག་ བླ་མ་ཨ་ཉི་ རོག་ཆོ་ལེ་གང་ཀ་ 9བླ་མ་བ་ཀ་ ལུགས་སྲོལ་དང་ཏུ་ཉི་ ཤུ་གུ་ག་ རོག་ཏེ་ ཐམས་ཅན་ག་ མིང་འབྲི་ཉི་ ཏྲོག་ཐཱན་ ཨི་བི་ཁེ་ན་སྨོ་ གོད་པ་ཀབ་ཉི་ དཀོན་མཆོག་ག་ མཆོད་ཁང་ནང་ཀ་ནུབ་ཉི་ པོས་ཐོག་པེ་ག་ རོག་ཁེ་ཝ༌ལ། 10ཉི་པོས་ཐོག་པེ་གང་ཀ་ ཕིས་ཀ་ཛོམ་ཉི་ཆོ་ཁཱན་ སོ་ངོ་བ་ ཐམས་ཅན་རང་ སྨོན་ལམ་ཏབ་ཉི་ ཆོ་ཝ་ཅ་གི་ཝ༌ལ།
11ཉི་གཙོ་བོ་ག་ ཞིང་ཁམས་ག་འཐེན་པ་བྱོན་ཉི་ པོས་ཐོག་ས་ག་ མཆོད་གཤམ་ལ་ཉོང་ལོ་ཀ་ཐིང་ཉི་ བཞུགས་པ༌ལ། 12ཞིང་ཁམས་ག་འཐེན་པ་ མཇལ་བ་ཀབ་ཉི་ རོ་ཀ་སེམས་ ཙཝ་ཙཝ་ཨ་ཉི་ ཡོང་ཁེ་ཝ༌ལ། 13དག་པ་ཀབ་ཉི་ ཞིང་ཁམས་ག་འཐེན་པ་གི་ རོ་ཀ་གསུངས་མ་ལ་ ཡོང་མ་ཁེ་ ཇ་ཀ་རི་ཡ་ ན་ག་སྨོན་ལམ་ དཀོན་མཆོག་གི་ སྙན་གསེང་པ་ཨ་དེན་གེ་ ན་ག་མེ་ཝག་ཙ་ ཨེ་ལི་ཤི་བ་གི་ ཝག་ཙ་ ཟ་ཐུར་སིང༌མེ། ཉི་ནཱན་གི་ རོ་ཀ་མིང་ ཡུ་ཧན་ན་ཨ་ཉི་ ཏག༌ཅོ། 14ནཱན་གནམ་མེད་ས་མེད་ ཤོ་ནང་ཕེ་ཉི་ ངལ་རངས༌པེ། ཉི་བཱརའ་མང་པུ་ཐུར་བུ་ རོག་སིང་མ་ཀབ་ཉི་ ཤོ་ནང་ཕེ༌ལེ། 15ཧང་ཡ་དག་ནེ་ལ་ རོག་ཁེ་པ་ གཙོ་བོ་ག་སྤྱན་ག་ ཆི་ལུ་རི༌ལེ། ཉི་རོ་ཀི་ ཞུ་ཏ་ཉ་རང་ཐའི་ ངར་མུ་ཆོ་ཁཱན་ཟེ་ ཏི་ངེ་རང་ མ་རེག༌པ། ཉི་རོག་ ཨ་མ་ག་ངེ་ཀ་ ཆོ་ལེ་གང་ཀེ་རང་ དམ་པའི་ཐུགས་ཉིད་གི་ ཕུང༌མེ། 16ཉི་རོ་ཀི་ ཨིས་རེལ་ག་ སོ་ངོ་མང་པུ་ཐུར་ལོག་ཉི་ རོག་ཏེ་བ་ཀ་ གཙོ་བོ་དཀོན་མཆོག་ག་ དད་པ་ཨ་ཁཱན་ཅོད༌པེ། 17ཉི་རོག་ རྣམ་ཤེས་དང་ དབང་ག་ ལུང་བསྟན་པ་ ཨེ་ལི་ཡ་ད་བུ་རི་ཉི་ གཙོ་བོ་ག་ གུམ་གུམ་དི༌ལེ། ཉི་རོ་ཀི་ ཕ་མ་བ་དང་ ཝག་ཙ་བ་དྲིག་ཉི་ དཀོན་མཆོག་ག་ བཀའ་མ་འགྲུབ་ཁཱན་ སོ་ངོ་བ་ བཀའ་འགྲུབ་ཁཱན་ཅོད་ཉི་ གཙོ་བོ་ག་ སོ་ངོ་བ་ གཙོ་བོ་ རོག་ཏེན་ག་དེན་གེ་ ཕྲིག་ཀིན་ཅོད་པེ་དག༌ཉི།
18ཉི་ཇ་ཀ་རི་ཡ་གི་ ཞིང་ཁམས་ག་འཐེན་པ་ག་ ཞུ་ཝ་ལ་ ནཱན་གི་ གསུངས་ཁཱན་ཁེ་པ་ ཏེན་ཏེན་རང་ ཇུང་མེ་དག་ཉི་ ཇི་གི་ ཧང་ཏེན་སེ་ལེ་ཡ། ཧང་ཡ་དག་ནེ་ལ་ ཇང་དང་ ཇ་ག་མེ་ཝག་ཙ་ ཨ་ཆིང་ཉིག་ཙིང་རང་ གཱན་པ་ཅ་དག༌ཉི།
19ཉི་ཞིང་ཁམས་ག་འཐེན་པ་གི་ ལན་གནང་མ་ལ་ ཇང་ དཀོན་མཆོག་ག་ སྐུན་མདུན་ག་ཆོ་ཁཱན་ གབ་རིལ་གི༌ལ། ཉི་ཇང་ཤོ་ རོ་ཀི་ཨ་ཉི་ ཨོ་ཐ་འཐེན་ལེག་པུ་ ན་ག་ཡེག་པེ་དེན་གེ་ ན་ག་བཱརང་ཀ་ ཀུན་ཏི་ཝ་གི༌ལ། 20གོད་ཅོ་ ཇི་གི་ ཇུང་མེ་དག་ཉི་ཡེག་ཁཱན་ དུས་ཙུན་ག་ ཐེ་རི་བ་རི་རང་ ཇུང་ཁཱན་ཆཱས་ག་ ནཱན་གི་ ལོ་མ་དི་ཝ་ཨ་དེན་གེ་ ཨོ་ཐ་བ་ མ་ཇུང་མ་སག་པུ་ ནཱན་ཁ་ནོབ་ཉི་ ཆཱས་ཨ་ལེ་ མ་ཝ་རི་ལེ་དག༌ཉི།
21ཉི་སོ་ངོ་བ་ ཇ་ཀ་རི་ཡ་ག་ ནོང་ཅ་གི་ཝ༌ལ། ཉི་རོག་ མཆོད་ཁང་གེ་ ཤོ་ལེ་ག་ཕིད་པ་ཨ་དེན་གེ་ རོག་ཏེ་བ་ ངང་པ༌ལ། 22ཉི་རོག་ ཕིས་ཀ་ཤོ་དེན་གེ་ རོ་ཀི་ སོ་ངོ་བ་ཀ་ཡེག་པེ་ གོད་པ་ཀབ་ཉི་ ལེ་གི་མ་ན་ཝ༌ལ། ཉི་རོ་ཀི་ མཆོད་ཁང་ནང་ཀ་ ཧང་ཐུར་ མཇལ་ཁ་ཉོང་པ་ གི་ཝ་ཨོ་ཕེ་ལ་དག་ཉི་ རོག་ཏེ་བ་ཀི་ སེ་ཝ༌ལ། རོ་ཀི་ ག་དང་གི་ཨ་ཉི་ དཱད་ཨ་ཉི་ སོ་ངོ་བ་ཀ་ ཡེག་ཐཱན་ ཁ་ནོབ་ཉི་ ལུས་པ༌ལ།
23ཉི་རོ་ཀི་ ཕྱག་ཞུ་ཉི་ཆུམ་དེན་གེ་ རོག་ཕའི་ག་ དི་ཝ༌ལ། 24ཨོ་ཉ་ཚི་ངེ་ རོ་ཀ་མེ་ཝག་ཙ་ ཨེ་ལི་ཤི་བ་ག་ལུས་པུ་ མ་ཉམ་པ་རི་ཉི་ ལ་ཉི་ལྔ་སག་པུ་ ཕའི་གེ་ཕིས་ཀ་ མ་ཤོ་ཝ༌ལ། 25ཇུ་ཀ་དག་པ་ཀབ་ཉི་ གཙོ་བོ་གི་ ཇ་ག་སྐྱབས་གཟིགས་ཉི་ ཇང་སོ་ངོ་བ་ཀ་གུབ་ཀ་ ངི་ནང་མ་ཁུ་ཝ་ཅོད་ཉི་ གནང་མ་དག་ཉི་ ཨེ་ལི་ཤི་བ་གི་ ཡེག་པ༌ལ༎
ཡི་ཤུ་སྐུ་འཁྲུངས་མེ་དག་ཉི་ གསུངས་མ༌ལ།
26-27ཨེ་ལི་ཤི་བ་ ལུས་པུ་མ་ཉམ་པ་རི་ཉི་ ལ་ཉི་ཁུང་ དི་ལ་ཀབ་ཉི་ དཀོན་མཆོག་གི་ རོ་ཀ་ ཞིང་ཁམས་ག་འཐེན་པ་ གབ་རིལ་དག་ཁཱན་ཁེ་པ་ ག་ལིལ་ག་ཁྲོམ་ ནཱས་རཱད་དག་ས་ག་ཆོ་ཁཱན་ དཔོན་ད་ཝུད་ག་རྒྱུད་པ་ ཡོ་སེཕ་དག་ཁཱན་ཀབ་ཉི་ གཉེན་ཕི་ལེ་དེན་གེ་ ཆི་མིན་ཨ་ཉི་ ཕུན་ཉི་ཆུམ་ཁཱན་ ངེ་ཅོན་མ་ཁཱན་ཟ་མིན་ མ་རི་ཡམ་དག་ཁཱན་ག་བཱརང་ཀ་ ཀུན་ཏི་ཝ༌ལ། 28ཉི་གབ་རིལ་ རོག་ཆོ་ས་ག་ཕེབས་ཉི་ གསུངས་མ་ལ་ དཀོན་མཆོག་ག་ ཐུགས་ག་ཚུད་ཁཱན་ མ་རི་ཡམ་ ན་ག་ཐུང་ཀ་ སྐྱིད་པུ་ཨུན་ཆེན། གཙོ་བོ་ ནཱན་ཀབ་ཉི་ བཞུགས་པ་ཅ་དག༌ཉི།
29དག་པ་ཀབ་ཉི་ ཞིང་ཁམས་ག་འཐེན་པ་གི་ གསུངས་མ་ག་ ན་ཐ་ཉི་ མ་རི་ཡམ་ གནམ་མེད་ས་མེད་ ཡོང་ཁེ་ཝ་ཨ་དེན་གེ་ ཧང་གསུངས་མ་ཙ་རྩིས་གི་ས་དག་ཉི་ རོ་ཀ་སེམས་ཀ་ མི་ཝ༌ལ། 30ཞིང་ཁམས་ག་འཐེན་པ་གི་ རོ་ཀ་གསུངས་མ་ལ་ ཡོང་མ་ཁེ་ མ་རི་ཡམ། ཧང་ཡ་དག་ནེ་ལ་ ནཱན་ དཀོན་མཆོག་ག་ ཐུགས་ག་ཚུད་པ༌ཅ། 31ཉི་ན་ག་ལུས་པུ་ མ་ཉམ་པ་རི་ཉི་ ནཱན་གི་ ཝག་ཙ་ ཟ་ཐུར་སིང༌མེ། ཉི་ནཱན་གི་ རོ་ཀ་མཚན་ ཡི་ཤུ་དག་ཉི་ ཞུའི་ན། 32རོག་གནམ་མེད་ས་མེད་ ཆི་ལུ་ཨོ་ཕེ། ཉི་རོག་ ཞིང་ཁམས་ག་ དཀོན་མཆོག་ག་ སྲས་ཆིན༌མེ། ཉི་གཙོ་བོ་ དཀོན་མཆོག་གི་ རོ་ཀ་མི་རྒྱུད་ ད་ཝུད་ག་གསེར་ཁྲི་ རོ་ཀ་གནང༌མེ། 33ཉི་རོ་ཀི་ ཡ་ཀུབ་ག་རྒྱུད་པ་བ་ དུས་ཏ་བུ་རང་དབང༌པེ། ཉི་རོ་ཀ་རྒྱལ་སྲིད་ཆུ་མེ་ཨ་ཉི་ ཧ་ལ་རང་མཱན་ཅ་དག༌ཉི།
34ཇང་ཕེ་ཝག་ཙ་ཀབ་ཉི་ ཆོ་ཝ་རང་མ་ཝ་ག་ ཨུ་ཐུ་ད་བུ་ ཧང་ཏེན་ཇུང་མེ་ཡ་དག་ཉི་ མ་རི་ཡམ་གི་ ཞིང་ཁམས་ག་འཐེན་པ་ག་ ཞུ་ལ་ཀབ་ཉི་ 35ཞིང་ཁམས་ག་འཐེན་པ་གི་ རོ་ཀ་ལན་གནང་མ་ལ་ དམ་པའི་ཐུགས་ཉིད་ ན་ག་ཐུང་ཀ་བྱོན༌མེ། ཉི་ཞིང་ཁམས་ག་ དཀོན་མཆོག་ག་དབང་གི་ ནཱན་བུག༌པེ། ཨོ་ཉི་ཨ་དེན་གེ་ ཨོ་ཉ་འཁྲུངས་མེ་དག་ཁཱན་ ཝག་ཙ་ཁེ་པ་ དཀོན་མཆོག་ག་ དམ་པའི་སྲས་ཨ་ཉི་ཆིན༌མེ། 36ན་ག་སོ་ངོ་ཁེ་ཁཱན་ ཨེ་ལི་ཤི་བ་ ཝག་ཙ་ ཨོ་ཕུ་མ་ལ་ཨ་ཉི་ ཡེག་ཆོ་ཝ་ རོག་གཱན་པ་ཀབ་ཉི་ཆང་ རོ་ཀ་ལུས་པུ་ མ་ཉམ་པ་རི་ཉི་ ལ་ཉི་ཁུང་དི༌ཝ། ཉི་རོ་ཀི་བུ་ ཟ་ཐུར་སིང༌མེ། 37དཀོན་མཆོག་གི་ མཛད་པེ་མར་ཁཱན་ཤོ་ ཧང་རང་མཱན་ཅ་དག༌ཉི།
38མ་རི་ཡམ་གི་ ཞུ་ཝ་ལ་ ཇང་ཏ་ གཙོ་བོ་ག་ གཡོག་མིན་ཐུར་ཤ་གི༌ལ། ཉི་ནཱན་གི་ གསུངས་མ་དང་ཏུ་ཉི་ ཇ་ག་ཐུང་ཀ་ ཇུང་ཆེན་དག༌ཉི། ཉི་ཞིང་ཁམས་ག་འཐེན་པ་ རོག་ཐུབ་ཐ་ཉི་ བྱོན་མ༌ལ༎
མ་རི་ཡམ་ ཨེ་ལི་ཤི་བ་ག་བཱརང༌ཀ་ ཤོན་གོད༌པེ་ དི༌ཝ༌ལ།
39ཉི་ཨུ་ཉུ་གང་ཀ་ མ་རི་ཡམ་ ཐིང་མ་ཐྲེ་ཀེ་རང་ བཱས་ཉི་ ཡ་ཧུ་ད་ཆ་འོག་ག་ ཕུ་ཐུང་ཀ་ཆོ་ཁཱན་ ཁྲོམ་ཐུར་ག་ཏཱན་ དི་ཝ༌ལ། 40ཉི་རོག་ ཇ་ཀ་རི་ཡ་ག་ ཕའི་ནང་ཀ་ནུབ་ཐཱན་ ཨེ་ལི་ཤི་བ་ག་ སྐུ་གཟུགས་བཟང་པོ་དག་ཉི་ ཡེག་པ༌ལ། 41ཉི་ཨེ་ལི་ཤི་བ་གི་ མ་རི་ཡམ་གེ་ སྐུ་གཟུགས་བཟང་པོ་དག་ཉི་ ན་ཐ་ཝ་ཐུར་ག་རང་ རོ་ཀ་ངེ་ཀ་ཆོ་ཁཱན་ཝག་ཙ་ མ་འདྲ་ཝ་ཨ་ཉི་རང་ ལེ་མ༌ལ། ཉི་ཨེ་ལི་ཤི་བ་ དམ་པའི་ཐུགས་ཉིད་གི་ ཕུང་མ༌ལ།
42ཉི་རོ་ཀི་ ཀཱན་ཤུག་ཨ་ཉི་ ཡེག་པ་ལ་ མེ་ཝག་ཙ་བ་ཀ་པོང་ཀེ་ ཐམས་ཅན་གེ་ བྱིན་རླབས་ཅན་ ནཱན་གི༌ལ། ཉི་ན་ག་ངེ་ཀ་བཞུགས་ཁཱན་ ཝག་ཙ་བུ་ བྱིན་རླབས་ཅན་གི༌ལ། 43ཇ་ག་གཙོ་བོ་ག་ཡུམ་ ཇ་ག་བཱརང་ཀ་ ཤོན་གོད་པེ་བྱོན་ཉི་ ཨུ་ཐུ་ད་བུ་ ཇ་ག་ཐུང་ཀ་ཇུང་མེ་ག་ ཧང་ཨ་ཉི་གནང་མ་ཡ། 44ཧང་ཡ་དག་ནེ་ལ་ ནཱན་གི་ སྐུ་གཟུགས་བཟང་པོ་ཨ་ཉི་ གསུངས་མ་ཐུར་ག་རང་ ཇ་ག་ངེ་ཀ་ཆོ་ཁཱན་ཝག་ཙ་ ཤོ་ནང་ཕེ་ཉི་ བོརོ་ཇོང༌མ། 45གཙོ་བོ་གི་ ན་ག་གསུངས་ཁཱན་ཁེ་པ་ ཏེན་ཏེན་རང་ ཇུང་མེ་གི་ལ་དག་ཉི་ ནཱན་གི་ དད་པ་ཨ་ཝ་ཨ་དེན་གེ་ ནཱན་གི་ བྱིན་རླབས་ཆི་ལུ་ ཉོང་པེ་དག༌ཉི༎
མ་རི་ཡམ་གི་ དཀོན༌མཆོག༌ག་ བསྟོད༌པ་ཕུལ་བ༌ག་མགུར༌མ།
46མ་རི་ཡམ་གི་ ཞུ་ཝ་ལ་
ཇ་ག་སེམས༌ཀི་ གཙོ་བོ༌ག་ བསྟོད༌པ་ཕུལ༌ན། 47ཉི་ཇ་ག་སྐྱབས་མགོན་ དཀོན་མཆོག་གི་ ཇ་ག་རྣམ་ཤེས་ སྐྱིད་པུ་ཅོད་ཉི་གནང༌མ། 48ཧང་ཡ་དག་ནེ་ལ་ རོ་ཀི་ རོ་ཀ་ཉམ་ཆུང་གཡོག་མིན་ག་ ཐུགས་རྗེ་གཟིགས་པ་ཨ་དེན་གེ་ ཨོ་ཐ་གེ་ག་ཏཱན་གི་ནེ་ལ་ མི་རབས་ཐམས་ཅན་གི་ ཇང་བྱིན་རླབས་ཆི་ལུ་ཉོང་ཁཱན་ ཆིན༌མེ། 49ཧང་ཡ་དག་ནེ་ལ་ ཤུགས་སྟོབས་ཆི་ལུ་ཆོ་ཁཱན་ དཀོན་མཆོག་གི་ ཇ་ག་དེན་གེ་ ཕྱག་ལཱ་ཆི་ལུ་མཛད་ཉི་ གནང་མ་ཨ་དེན་གེ་གི༌ལ། ཉི་དམ་པ་ཤོ་ རོ་ཀ་མཚན་གི༌ལ། 50རོ་ཀ་སྙིང་རྗེ་ཁེ་པ་ རོ་ཀེ་ཡོང་ཁེ་ཁཱན་བ་ཀ་ཐུང་ཀ་ མི་རབས་གེ་ མི་རབས་ཅཱད་ཉི༌ཅ། 51དཀོན་མཆོག་གི་ རོ་ཀ་ཕྱག་ཀི་ཨ་ཉི་ ཤུག་གེན་ཉི་གནང༌མ། ཉི་ཇང་རང་གི་ལ་དག་ཉི་མི་ཉི་ ཁམ་ཙོང་ཁཱན་བ་ རོག་ཏེ་བ་ཀ་ འཆར་གཞི་ཀབ་ཉི་ ཏོར་ཉི་གེ༌མ། 52རོ་ཀི་ ཤུགས་སྟོབས་ཆི་ལུ་ཆོ་ཁཱན་བ་ ཁྲི་ཐུང་ཀེ་དོང་ ཕབ་ཉི་གེམ་ཐཱན་ ཉམ་ཆུང་བ་ ག་དུང་ཉི་གནང༌མེ། 53བི་ནང་ཁུ་ཁཱན་བ་ ཟེ་ལེག་པུ་གི་ ཁ་ཝ་ཅོད་ཉི་གནང་ཐཱན་ བེ་དིང་བ་ ག་དང་ཏོང་པུ་ ལོག་ཉི་ཀུན་ཏི༌ཝ། 54རོ་ཀི་སྙིང་རྗེ་ཨ་ལེ་དག་ཉི་ གསུངས་ཁཱན་ཁེ་པ་ ཡིད་ཀ་མ་མི་ལཱན་ རོ་ཀ་གཡོག་པ་ ཨིས་རེལ་ག་ སྐྱབས་གཟིགས་ཉི་གནང༌མ། 55ཧང་ཡ་དག་ནེ་ལ་ དང་པོ་ རོ་ཀི་ ཨ་ཧ་ཕ་མ་ ཨ་བཱརའ་ཧམ་ག་ གསུངས་མ་ཆོ༌ཝ་ ན་ག་རྒྱུད་པ་བ་ཀ་ཐུང་ཀ་ ཇི་གི་ དུས་ཏ་བུ་རང་ སྙིང་རྗེ་ཨ་ལེ་ན་དག༌ཉི།
56ཉི་མ་རི་ཡམ་ ཨེ་ལི་ཤི་བ་ཀབ་ཉི་ ལ་ཉི་སམ་ཕང་ཆོན་ཐཱན་ ལོག་ཉི་ཕའི་ག་ དི་ཝ༌ལ༎
ཁྲུས་གསོར་པ་ཡུ་ཧན་ན་ འཁྲུངས་མ༌ལ།
57ཉི་ཨོམ་ ཨེ་ལི་ཤི་བ་ག་ ལ་ཉི་ཚང་ཉི་ ཟ་ཐུར་སིང་མ༌ལ། 58ཉི་རེབ་ཀིན་ཐུར་ག་རང་ རོ་ཀ་ནོག་མིན་དང་ རོག་ཏེན་ག་ སོ་ངོ་བ་ཀི་ གཙོ་བོ་གི་ རོ་ཀ་ཐུང་ཀ་ སྙིང་རྗེ་ཆི་ལུ་ཀེ་ཉི་ གནང་མ་ལ་དག་ཉི་ ན་ཐ་ཉི་ རོག་ཏེ་བ་ ཐམས་ཅན་རང་ རོག་ཀབ་ཉི་ ཤོ་ནང་ཕེ་ཝ༌ལ།
59ཉི་ཝག་ཙ་སིང་ཉི་ བི་ནང་ཡེན་དི་དེན་གེ་ རོག་ཏེ་བ་ ཝག་ཙ་ག་ ཤ་ཅཱད་པེ་དེན་གེ་ ཤེག་པ༌ལ། ཉི་རོག་ཏེ་བ་ཀི་ ཝག་ཙ་ག་མིང་ ཇ་ཀ་རི་ཡ་དག་ཉི་ རོ་ཀ་ཨ་པ་ག་མིང་རང་ ཐ་ལེ་ཅམ་པ༌ལ། 60དག་པ་ཀབ་ཉི་ རོ་ཀ་ཨ་མ་གི་ ཡེག་པ་ལ་ མང་གི་ རོ་ཀ་མིང་ ཡུ་ཧན་ན་ཨ་ཉི་ ཏག་པེ་དག༌ཉི།
61རོག་ཏེ་བ་ཀི་ ཡེག་པ་ལ་ ཧང་དང་ ན་ག་ཚཱན་པ་ཐུར་ག་མིང་བུ་ ཨོ་ཐེན་མཱན་ཅ་དག༌ཉི། 62ཉི་རོག་ཏེ་བ་ཀི་ ཝག་ཙ་ག་ ཨ་པ་ག་ཏཱན་ ག་དང་དཱད་ཨ་ཉི་ རོ་ཀ་མིང་ ཧང་ཐ་ལེ་ཡ་དག་ཉི་ ཇི་མ༌ལ། 63རོ་ཀི་དཱད་ཨ་ཉི་ འབྲི་བེ་ག་ པང་ཏཱན་ཐུར་ཕའི་དག་ཉི་ ཕ་ལེ་བིན་ཐཱན་ རོ་ཀ་མིང་ ཡུ་ཧན་ན་ཨ་ཉི་ ཐ་ལེ་དག་ཉི་ འབྲི་བ་ཀབ་ཉི་ རོག་ཏེ་བ་ ཐམས་ཅན་རང་ ཡིད་ཆི་ཝ༌ལ། 64ཉི་ཨོ་ཉ་ཐྲེ་ཀེ་རང་ རོ་ཀ་ནོ་ཝང་ཆོག་ཉི་ ལེ་ལེ་མེ་ན་ཝ་རི་ཉི་ དཀོན་མཆོག་ག་ བསྟོད་པ་ཕུལ་བེ་ གོ་ཙུག་པ༌ལ།
65ཉི་རོག་ཏེ་བ་ཀ་ནོག་མིན་ ཐམས་ཅན་རང་ ཡོང་ཁེ་ཝ༌ལ། ཉི་ས་ཆ་ ཡ་ཧུ་དི་ཡ་ག་ ཕུ་ཐུང་ཐུང་ཆོ་ཁཱན་ ཐམས་ཅན་རང་ ཨོ་ཐ་ཚང་གི་ཆ་པ༌ལ། 66ཉི་ཨོ་ཐ་ཀོར་གེ་ ན་ཐ་ཁཱན་ ཐམས་ཅན་རང་ གནམ་མེད་ས་མེད་ མི་ལེ་ཨུ་ཉི་ ཨོ་ཐ་ཝག་ཙ་ ཧང་རི་དུ་ཡ། གཙོ་བོ་ག་ཕྱག་ ཏེན་ཏེན་རང་ རོ་ཀ་ཐུང་ཀ་ཅ་དག་ཉི་ ཡེག་པ༌ལ༎
ཇ་ཀ་རི་ཡ་གི་ དཀོན༌མཆོག༌ག་ བསྟོད༌པ་ཕུལ་བ་ག་མགུར༌མ།
67ཉི་ཡུ་ཧན་ན་ག་ཨ་པ་ ཇ་ཀ་རི་ཡ་ དམ་པའི་ཐུགས་ཉིད་གི་ཕུང་ཉི་ ལུང་བསྟན་མ༌ལ།
68གཙོ་བོ་ ཨིས་རེལ་ག་ དཀོན་མཆོག་ག་ བསྟོད་པ་ཕུལ༌ཤོ། ཧང་ཡ་དག་ནེ་ལ་ རོག་བྱོན་ཉི་ རོ་ཀ་སོ་ངོ་བ་ ཤོག་ཉི་གནང༌མ། 69ཉི་ཨ་ཧ་སྐྱབས་མགོན་ ཤུགས་སྟོབས་ཆི་ལུ་ཆོ་ཁཱན་ཁེ་པ་ རོ་ཀ་གཡོག་པ་ ད་ཝུད་ག་ རྒྱུད་པ་གེ་ཨ་ཉི་ ཀུན་ཏི་ཝ༌ཅ། 70དང་པོ་ རོ་ཀི་ རོ་ཀ་དམ་པའི་ ལུང་བསྟན་པ་བ་ཀ་ ཐུང་ཀེ་ཨ་ཉི་ གསུངས་མ་ཆོ༌ཝ། 71ཨའི་ཨ་ཧ་ དགྲ་བྱང་ཕིཤི་བ་དང་ ཨའི་མ་ཟེས་ཁཱན་བ་ཀ་ ག་དང་གེ་ རོ་ཀི་ ཨ་ཧ་སྐྱབས་ཨ་ལེ་དག༌ཉི། 72དང་པོ་ རོ་ཀི་ ཨ་ཧ་ཕ་མ་བ་ཀ་ སྙིང་རྗེ་ཨ་ལེ་དག་ཉི་ གསུངས་མ་ཆོ༌ཝ། ཉི་རོ་ཀི་ཅོད་ཉི་གནང་ཁཱན་ དམ་པའི་འགན་རྒྱ་ཁེ་པ་ ཡིད་ཀ་མ་མིན་ཤི། 73རོ་ཀི་ ཨ་ཧ་ཕ་མ་ ཨ་བཱརའ་ཧམ་ཀབ་ཉི་ ཏེན་ཏེན་ཨ་ཉི་ དབུ་མནའ་བཞེས་ཉི་ གསུངས་མ་ཆོ་ཝ་ 74ཨའི་ཨ་ཧ་ དགྲ་བ་ཀ་ ག་དང་གེ་ཐར་ཉི་ ཡོང་མ་ཁེ་ཝ་ཨ་ཉི་ དཀོན་མཆོག་ག་ ཕྱག་ཞུ་ལེ་ག་ གོ་སྐབས་གནང༌མེ། 75ཧང་ཡ་དག་ནེ་ལ་ ཨ་ཧ་མི་ཚེ་ཐུར་ག་ ཧ་ལ་རང་གི་ནེ་བུ་ ཨའི་དམ་པ་དང་ དྲང་པུ་རི་ཉི་ རོ་ཀ་སྐུན་མདུན་ག་ ཕྱག་ཞུ་ལེ་དེན་གེ་གི༌ལ།
76ཉི་ནཱན་ ཇ་ག་ཟ་ཤོ་ ཐམས་ཅན་གེ་ཆི་ལུ་ ལུང་བསྟན་པ་ཨ་ཉི་ ཆིན༌མེ། ཧང་ཡ་དག་ནེ་ལ་ ནཱན་གི་ གཙོ་བོ་ག་ གུམ་གུམ་དི་ཉི་ རོག་བྱོན་མེ་དེན་གེ་ རོ་ཀ་ལམ་བ་ཟང༌མེ། 77སྡིག་པ་བཤགས་པ་ཉོང་ཉི་ ཐར་པ་ཉོང་པེ་ གི་ཝ་ཀོར་གེ་ ནཱན་གི་ རོ་ཀ་སོ་ངོ་བ་ཀ་ ཡེ་ཉི་བི༌ལེ། 78ཨ་ཧ་དཀོན་མཆོག་ག་ བྱམས་པར་སྙིང་རྗེ་ གནམ་མེད་ས་མེད་ ཆི་ལུ་ཆོ་ཝ་ཨ་དེན་གེ་ ཞིང་ཁམས་ག་འོད་ཟེར་ དོང་ཨ་ཧ་པོང་ཀ་བྱོན་ཉི་ 79མེར་བུ་དང་ ཤི་སྲོག་ག་ཡོང་གི་ བུག་ཁཱན་བ་ཀ་ཐུང་ཀ་ འོད་ཆར་ཉི་ ཨ་ཧ་བ་ སྐྱིད་པུ་ག་ལམ་གེ་ རིག་པེ་གི་ལ་དག༌ཉི།
80ཉི་ཝག་ཙ་སྐུ་བྲོང་ཉི་ ཐུགས་ཉིད་ག་ དབང་ཅན་རི་ཝ༌ལ། ཉི་ ཨིས་རེལ་ག་ སོ་ངོ་བ་ཀ་པོང་ཀ་ སེ་ཝ་ཨ་ཉི་ མ་བྱོན་མ་སག་པུ་ རོག་ ས་ཏོང་པ་ནང་ཀ་རང་ བཞུགས་པ༌ལ༎
Currently Selected:
ལུ་ཀ། 1: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
