མར་ཀུས། 16

ཡི་ཤུ་གཤགས་པ་གེ་ ལོག་ཉི་བཞེངས་པ༌ལ།

1དུས་བཟང་ག་ནོང་ཆུམ་དེན་གེ་ ཡི་ཤུ་ག་དད་པ་ཨ་ཁཱན་ མེ་ཝག་ཙ་པོང་ཀེ་ མ་རི་ཡམ་མག་ད་ལི་ནི་དག་ཁཱན་དང་ ཡ་ཀུབ་ག་ཨ་མ་ མ་རི་ཡམ་ ཉི་ས་ལོ་མི་དག་ཁཱན་ རོག་ཏེ་སམ་གི་ དྲི་བཟང་ག་བུར་ ཡི་ཤུ་ག་སྐུ་ཕུང་ག་ སོག་པེ་དེན་གེ་ ངོ་ཝ༌ལ། 2ཉི་རོག་ཏེ་བ་ གཟའ་ད་ཝ་ནོང་ཀ་ ཝུན་བེད་པེ་རང་ དུར་ག་དི་ཝ༌ལ། 3ལམ་ཁོན་ རོག་ཏེ་བ་ ཐུར་གི་ཐུར་ག་ཡེག་པ་ལ་ ཨོ་ཉ་དུར་ག་ ཀོ་ག་ཐ་ཁཱན་ལུང་ཁེ་པ་ ཨ་ཧ་དེན་གེ་ ཨི་བི་གི་ བེརེག་ཉི་ག་ལེ་ཡ་དག༌ཉི། 4(ཨོ་ཉ་ལུང་ཁེ་པ་ གནམ་མེད་ས་མེད་ ཆི་ལུ་ཅ་གི་ཝ༌ལ།) ཉི་རོག་ཏེ་སམ་ དུར་ག་ཤེག་ཉི་ གོད་པ་ཀབ་ཉི་ ཨོ་ཉ་ལུང་ཁེ་པ་ གོ་མ་གེ་རང་ གིར་ཉི་བུན་ཐ་ཝ་ ཐོང་མ༌ལ།

5ཉི་རོག་ཏེ་བ་ དུར་ནང་ཀ་ནུབ་ཉི་ གོད་པ་ཀབ་ཉི་ སོ་ངོ་ཡམ་ལང་ ཁ་མུང་ བ་ལིང་མིན་ཨ་ཝ་ཡེ་ཝ་ཐུར་ ལ་ཉོང་ལོ་ཀ་ལང་ཉི་ ཆོ་ཝ་ཐོང་མ་ཀབ་ཉི་ ཡོང་ཁེ་ཝ༌ལ། 6ཨོ་ཉ་ཡམ་ལང་གི་ཡེག་པ་ལ་ ཡོང་མ་ཁེ་ ཇི་གི་སེན་ཅ་ ན་ཧ་བ་ ཁྲིམས་ཤིང་ཐུང་ཀ་བཀྲོངས་ཁཱན་ ནཱས་རཱད་ག་ཡི་ཤུ་ ལམ་ཅ་གི༌ལ། རོག་ཐ་ག་མཱན༌ཅ། ཨོམ་དེན་གེ་རང་ ལོག་ཉི་སྐུ་བཞེངས་ཐཱན་ བྱོན༌མ། གོད་ཅོ་ལེ་ རོག་ཏེ་བ་ཀི་ རོ་ཀ་སྐུ་ཕུང་ཐ་ས་བཱརང་ ཨུ་ཐུ་གི༌ལ། 7ཉི་ཨོམ་ ན་ཧ་བ་ དི་ཉི་ རོ་ཀ་སློ་མ་ པ་ཏྲུས་ཙི་ཉི་ བཱརའ་བ་ཀ་བུ་ཡེག༌ཅོ། རོག་ཨོམ་ ན་ཧ་བ་ཀེ་གུམ་གུམ་ ག་ལིལ་ག་ཏཱན་བྱོན༌ལ། ཉི་རོ་ཀི་ གོ་མ་གསུངས་མ་དང་ཏུ་ཉི་ ན་ཤི་ རོག་ལེ་ལ་ མཇལ་བེ་རེ་བེ་དག༌ཉི།

8ཉི་རོག་ཏེ་སམ་ དུར་གེ་ཕིས་ཀ་ཤོན་ཐཱན་ ཡོང་ཁེ་ཉི་ ཉི་ཐུར་གེ་ཨ་ནེ་ལ་ ཡིད་ཏེ་བུ་ཆི་ཉི་ གཱན་ཇོང་མ༌ལ། ཉི་རོག་ཏེ་བ་ ཡོང་ཁེ་ཝ་ཨ་དེན་གེ་ ཨི་བི་ག་རང་ མ་ཡེག་པ༌ལ༎#16:8 མར་ཀུས་ 16༔9–20 གེ་ཤོ་ཁཱན་ཁེ་པ་ ཐམས་ཅན་གེ་ མཱན་མ་ཆོ་ཁཱན་ པར་གཞི་ཡི་གུ་ག་ནང་ཀ་ (manuscript) མཱན་ཅ་གི་ཝ༌ལ།

9ཉི་གཟའ་ད་ཝ་ནོང་ཀ་ ཡི་ཤུ་བཞེངས་ཐཱན་ གོ་མ་ རོ་ཀི་ དོན་ཟུམ་ཤོན་གེམ་ཁཱན་ མ་རི་ཡམ་མག་ད་ལི་ནི་ག་ མཇལ་ཁ་གནང་མ༌ལ། 10-11ཉི་ཡི་ཤུ་ཀབ་ཉི་ཆོ་ཁཱན་བ་ སེམས་ཤི་ཝ་ཨ་དེན་གེ་ གེབ་ཉི་ཆོ་ལ་ཀབ་ཉི་ རོག་དིན་ཐཱན་ ཡི་ཤུ་ལོག་ཉི་བཞེངས་ཏེན་གེ་ ཇི་གི་མཇལ་བ་དག་ཉི་ རོ་ཀི་ རོག་ཏེ་བ་ཀ་ ཡེག་པ་ཀབ་ཉི་ རོག་ཏེ་བ་ཀི་ ལོ་མ་དི་ཝ༌ལ༎

12ཉི་ཨོ་ཉ་ཚི་ངེ་ རོ་ཀི་ རོ་ཀ་སློ་མ་ཉིག་ཙིང་ དུང་ག་ཏཱན་དི་ལ་ཀབ་ཉི་ སོ་སུ་ཨ་ཉི་སྤྲུལ་ཉི་ མཇལ་ཁ་གནང་མ༌ལ། 13ཉི་རོག་ཉིག་ཙིང་ལོག་ཉི་ དིན་ཐཱན་ བཱརའ་བ་ཀ་ཡེག་པ་ཀབ་ཉི་ རོག་ཏེ་བ་ཀི་ རོག་ཉིག་ཙིང་ག་བུ་ ལོ་མ་དི་ཝ༌ལ༎

ཡི་ཤུ་གི་ རོག་ཏེ་སོང་ཐུར༌ག་ མཇལ་ཁ་གནང་མ༌ལ།

14ཉི་ཨོ་ཉ་ཚི་ངེ་ རོ་ཀ་སློ་མ་སོང་ཐུར་ཏབ་ཐུར་ ལྟོ་ཟ་ཉི་ཆོ་ལ་ཀབ་ཉི་ མཇལ་ཁ་གནང་ཐཱན་ རོག་ཏེ་བ་ཀ་ སེམས་ལུང་ཏོང་ཆོ་ཝ་ མ་ཚཱད་པ་ རོག་གཤགས་པ་གེ་ ལོག་ཉི་བཞེངས་ཏེན་གེ་ མཇལ་ཁཱན་བ་ཀི་ ཡེག་པ་ཀབ་ཉི་ ལོ་མ་དི་ཝ་ཨ་དེན་གེ་ རོ་ཀི་ རོག་ཏེ་བ་ ཇུར་ཇང་ཕི་ཉི་གནང་མ༌ལ།

15འཛམ་གླིང་ ཨོ་ག་རང་དིན་ཐཱན་ བཀོད་ཉི་ཐ་ཁཱན་ ཐམས་ཅན་ག་རང་ འཐེན་ལེག་པུ་ཀོར་གེ་བཤད༌ཅོ། 16ཉི་ཨི་བི་གི་ དད་པ་ཨ་ཉི་ ཁྲུས་གསོར་ལཱན་ཅ་གི་ལ་སྨོ་ ཨོ་ཉ་སོ་ངོ་གི་ ཐར་པ་ཉོང༌པེ། ཉི་ཨི་བི་གི་ དད་པ་མ་ཨན་ཅ་གི་ལ་སྨོ་ ཨོ་ཉ་སོ་ངོ་གི་ ཁྲིམས་ཉོང༌པེ། 17ཉི་དད་པ་ཨ་ཁཱན་བ་ཀ་ཐུང་ཀ་ རྟགས་ཨུ་ཐུ་ད་བུ་ཐུར་ ཇུང༌མེ། ཇ་ག་མིང་ག་ དོན་ཤོ་ཉི་གེ༌མེ། ཉི་བཱརའ་ལོ་སིང་མ་ མང་པུ་ཐུར་ཨ༌ལེ། 18ཉི་རོག་ཏེ་བ་ཀི་ རུ་གེ་ནང་ག་བ་ ག་དང་གི་དུང༌མེ། ཉི་དུག་ ཧང་ད་བུ་རང་ཇམ་ནེ་བུ་ རོག་ཏེ་བ་ མ་ཅོན༌མ། ཉི་ནཱད་པ་ཐུང་ཀ་ ག་དང་ཀེ་ཉི་ ན་ཚ་དྲག་ཉི་བི་ལེ་དག་ཉི་ གསུངས་མ༌ལ།

ཡི་ཤུ་ ཞིང་ཁམས་ག་ཏཱན་བསྣམས་པ༌ལ།

19ཡི་ཤུ་གི་ ཨུ་ཉུ་ད་བུ་ གསུངས་ཉི་ཆུམ་དེན་གེ་ དཀོན་མཆོག་གི་ རོག་ལོག་ཉི་ ག་ཞིང་ཁམས་ག་ བསྣམས་པ༌ལ། ཉི་རོག་ དཀོན་མཆོག་ག་ ལ་ཉོང་ལོ་ཀ་ཁྲི་ག་ བཞུགས་པ༌ཅ། 20ཉི་རོ་ཀ་སློ་མ་བ་ཀི་ ཨོ་ག་རང་དི་ཉི་ དཀོན་མཆོག་ག་ གསུང་བཤད་པ༌ལ། ཉི་དཀོན་མཆོག་ རོག་ཏེན་གི་བུ་ རོ་ཀ་སློ་མ་བ་ཀ་ཐུང་ཀེ་ཨ་ཉི་ ཕྱག་ལཱ་མཛད་པ་ཨ་དེན་གེ་ ཞིང་ཁམས་ག་རྟགས་གེན་ཉི་ རོག་ཏེ་བ་ཀི་ བཤད་ཁཱན་གསུང་ཁེ་པ་ ངོ་མ་གི་ལ་དག་ཉི་ ཁུངས་ཀེ་བ༌ལ༎

Currently Selected:

མར་ཀུས། 16: TNTB

Highlight

Copy