མར་ཀུས། 15

ཡི་ཤུ་ པི་ལ་ཏཱས་ག་ སྐུན་མདུན་ག་ཀེ་བ༌ལ།

1ཉི་ཝུན་བེད་པེ་རང་ བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ ཉི་སོ་ངོ་ཆི་ལུ་བ་དང་ བཱརའ་ཚོགས་པ་ཆི་ལུ་བ་ ཐམས་ཅན་རང་ ཏབ་ཐུར་ཛོམ་ཉི་ ཏུན་ཆ་ཨན་ཐཱན་ ཡི་ཤུ་ཐིག་ཉི་ སྲུང་རྒྱབ་པ་ཙུག་ཉི་ དཔོན་སློབ་པི་ལ་ཏཱས་ག་ སྐུན་མདུན་ག་བུ་ཝ༌ལ།

2པི་ལ་ཏཱས་གི་ རོ་ཀ་ཇི་མ་ལ་ ནཱན་ཡ་ཧུ་དི་པ་ག་ དཔོན་གི་ལ་སྨོ་དག༌ཉི།

ནཱན་ཏེན་གི་རང་ཡེག་ལ་དག་ཉི་ ཡི་ཤུ་གི་ལན་གསུངས་མ༌ལ།

3ཡི་ཤུ་གི་ ལའི་མ་ལེག་པ་ཨ་ཝ་དག་ཉི་ ཨོ་ཉ་ཀོར་གེ་ མང་པུ་ཐུར་ བླ་མ་ཆི་ལུ་བ་ཀི་ ཆུ་མེ་མ་ཝ་ཞུ་ཝ༌ལ། 4ཉི་པི་ལ་ཏཱས་གི་ ཨོམ་ཆང་རང་ ཇི་མ་ལ་ གོད་ཅོ་ལེ་ རོག་ཏེ་བ་ཀི་ ན་ག་ཀོར་གེ་ ཧང་ད་བུ་ཡེག་ལ་ཡ། ནཱན་གི་ ཨོ་ཐ་ག་ལན་ ཡེག་པེ་ ཧང་རང་མཱན་ཅ་སྨོ་དག༌ཉི། 5དག་པ་ཀབ་ཉི་ ཡི་ཤུ་གི་ལན་ ཧང་རང་མ་གནང་མ་ཀབ་ཉི་ པི་ལ་ཏཱས་ ཡིད་ཆི་ཝ༌ལ༎

ཡི་ཤུ་བཀྲོངས་མེ་དེན་གེ་ ཀུན་ཏི་ཝ༌ལ།

6ཉི་རོག་ཏེ་བ་ཀི་ དུས་ཆེན་ག་ནོང་ཀ་ སོ་ངོ་བ་ཀི་ ཨི་བི་ཐར་ཤོ་དག་ཉི་ ཡེག་པ་ཐུར་ དཔོན་སློབ་པི་ལ་ཏཱས་གི་ བཙོན་པ་ཐུར་ བཙོན་གེ་ཐར་ཅ་གི་ཝ༌ལ། 7ཨུ་ཉུ་གང་ཀ་ ངོ་ལོག་ཨ་ཉི་ ཕྱད་མདའ་ཕི་ལ་ཀབ་ཉི་ སོ་ངོ་ཤེ་ཉི་ བཙོན་ག་ཙུག་ཁཱན་བ་ཀ་པོང་ཀེ་ སོ་ངོ་ག་མིང་ བ་རབ་བ་དག་ཁཱན་ཐུར་ བཙོན་ག་ཅ་གི་ཝ༌ལ། 8ཉི་གོ་མ་ག་ ལུགས་སྲོལ་དང་ཏུ་ཉི་ ཨ་ལེ་དེན་གེ་ སོ་ངོ་བ་ཀ་ ཇི་མ་ཀབ་ཉི་ 9པི་ལ་ཏཱས་གི་ གསུངས་མ་ལ་ ཡ་ཧུ་དི་པ་ག་ དཔོན་གི་ལ་དག་ཁཱན་ཁེ་པ་ ཇི་གི་ ན་ཧ་དེན་གེ་ བཙོན་གེ་ཐར་ཤོ་སྨོ་དག༌ཉི། 10བླ་མ་ཆི་ལུ་བ་ཀི་ ཕྲག་དོག་ཨ་ཉི་ ཙུང་མེ་བི་ཝ་གི་ལ་དག་ཉི་ པི་ལ་ཏཱས་གི་ གོ་མ་གེ་རང་ མཁྱེན་མ་ཆོ་ཝ༌ལ། 11དག་པ་ཀབ་ཉི་ བླ་མ་ཆི་ལུ་བ་ཀི་ སོ་ངོ་བ་ཀ་ཏྲོག་ཉི་ པི་ལ་ཏཱས་ག་ བ་རབ་བ་ཁེ་པ་ བཙོན་གེ་ཐར་ཤོ་དག་ཉི་ ཞུ་ལེ་བི་ཝ༌ལ།

12ཉི་ལ་ ན་ཤི་ཡ་ཧུ་དི་པ་ག་ དཔོན་དག་ཉི་ར་ཁཱན་ག་ ཇི་གི་ ཧང་ཨ་ལེ་ཁེ་ལེ་ཡ་དག་ཉི་ པི་ལ་ཏཱས་གི་ ཇི་མ༌ལ།

13རོག་ཏེ་བ་ཀི་ ཤ་དར་ཕི་ཉི་ རོག་ཁྲིམས་ཤིང་ཐུང་ཀ་ ཇཱན་ཤོ་དག་ཉི་ ཞུ་ཝ༌ལ།

14ཧང་ རོ་ཀི་ ཤི་ལེ་ཁེ་ཝ་དང་ཏུན་མ་ག་ ཁྲིམས་གེ་གེ་བ་ལའི་ ཧང་ཨ་ཝ་ལ་ཡ་དག་ཉི་ པི་ལ་ཏཱས་གི་ གསུངས་མ་ཀབ་ཉི་ དཱན་ཁྲིམས་ཤིང་ག་ཇཱན་ཤོ་དག་ཉི་ སོ་ངོ་བ་ཀི་ ལག་ཏང་ ལག་ཏང་ ཤ་དར་ཤུག་ཨན་ཕི་ཉི་ ཡེག་པ༌ལ།

15ཉི་པི་ལ་ཏཱས་གི་ སོ་ངོ་བ་ ཤོ་ནང་ཕེ་ལེ་བི་ལེ་དེན་གེ་ བ་རབ་བ་ བཙོན་གེ་ཐར་ཐཱན་ ཉི་ཡི་ཤུ་ཤོ་ ཏེ་ཐ་གི་ལ་ཕེ་བི་ཉི་ ཁྲིམས་ཤིང་གེ་ཇཱན་ཉི་ བཀྲོངས་མེ་དེན་གེ་ རྩིས་སྤྲོད་པ༌ལ༎

དམག་མི་བ་ཀི་ ཡི་ཤུ་ག་མེམ་ཅོར་བ༌ལ།

16ཉི་དམག་མི་བ་ཀི་ དཔོན་སློབ་ག་ གཟིམ་ཅུང་ནང་ཀ་བུན་ཐཱན་ ཉི་ཨོ་ཉ་ཆོ་ཁཱན་ བཱརའ་དམག་མི་བ་ ཐམས་ཅན་རང་ ར་ཝ༌ལ། 17ཉི་རོག་ རོག་ཏེ་བ་ཀི་ ཁ་རྒྱ་སྨུག་ཨ་ཝ་ཆོ་ཁཱན་ ནམ་བཟའ་བཞེས་ལེ་བིན་ཐཱན་ ཉི་ཟུ་གི་ཨ་ཉི་ རྒྱལ་ཞྭ་ཅོད་ཉི་ རོ་ཀ་དབུ་ག་མུག་ཉི་ བི་ཝ༌ལ། 18ཉི་རོག་ཏེ་བ་ཀི་ མེམ་ཅོར་ཉི་ ཡ་ཧུ་དི་པ་ག་དཔོན་ སྐུ་ཚེ་རིང་ཤོ་དག་ཉི་ ཞུ་ཝ༌ལ། 19ཉི་རོག་ཏེ་བ་ཀི་ དབུ་ཐུང་ཀ་ ཏོ་ཀང་གི་ཀོང་ཉི་ ཐོབ་ཏང་ཚེན་ཐཱན་ ཕྱག་ཕུལ་བ་ཅོད་ཉི་ 20མེམ་ཅོར་ཉི་ཆུམ་དེན་གེ་ ཨོ་ཉ་ནམ་བཟའ་རྒྱ་སྨུག་ཁེ་པ་ ལོག་ཉི་ཕེག་ཐཱན་ རོག་ཏེན་ག་ནམ་བཟའ་ བཞེས་ལེ་བི་ཉི་ ཉི་སྲུང་རྒྱབ་ཨ་ཉི་ ཁྲིམས་ཤིང་ག་ཇཱན་ཉི་ བཀྲོངས་མེ་དེན་གེ་བུ་ཝ༌ལ༎

ཡི་ཤུ་ཁྲིམས་ཤིང་ག་ཇཱན་མ༌ལ།

21ཉི་ཀུ་རེ་ནི་དག་ས་གེ་ ཨ་ལེག་ཇེན་དར་དང་ རུ་ཕཱས་ག་ཨ་པ་ སི་མོན་དག་ཁཱན་ ཨོ་ཉ་ལམ་གེ་ཨ་ཉི་ ཁྲོམ་ག་དི་ལ་ཀབ་ཉི་ རོག་ཏེ་བ་ཀི་བང་ཙོང་ཉི་ ཡི་ཤུ་ག་ཁྲིམས་ཤིང་ཁེ་པ་ རོ་ཀ་ཐུང་ཀ་ཀེ་བ༌ལ། 22ཉི་རོག་ཏེ་བ་ཀི་ ཡི་ཤུ་ གལ་ག་ཐ་དག་ས་ག་ཏཱན་ བུ་ཝ༌ལ། གལ་ག་ཐ་དག་པེ་ དེན་ཐ་ཤོ་ ཐོད་པ་གི་ཝ༌ལ། 23ཉི་རོག་ཏེ་བ་ཀི་ སེ་ག་རི་དང་ རོ་ཇུ་གི་ཅོད་ཁཱན་ མཱན་ཡ་ཉི་ ཇམ་ཤོ་དག་ཉི་ ཡི་ཤུ་ག་ཕུལ་བ་ཀབ་ཉི་ རོ་ཀི་མ་བཞེས་ཝ༌ལ།

24ཉི་རོག་ རོག་ཏེ་བ་ཀི་ ཁྲིམས་ཤིང་ཐུང་ཀ་ཇཱན་ཐཱན་ ཤོ་ཕི་ཉི་ ཨི་བི་གི་ ཧང་ཉོང་པེ་གི་ལ་སྨོ་ གོད་ཐཱན་ རོ་ཀ་ནམ་བཟའ་རེད་ཉི་ རོག་ཏེ་བ་ནང་དོ་ བོང་མ༌ལ། 25ཝུན་ཆུ་ཚོད་དགུ་ག་ རོག་ཏེ་བ་ཀི་ ཡི་ཤུ་ཁྲིམས་ཤིང་ཐུང་ཀ་ ཇཱན་མ༌ལ། 26རོག་ཏེ་བ་ཀི་ ཁྲིམས་ཁེ་ཝ་ག་དེན་ཐ་ཤོ་ ཡ་ཧུ་དི་པ་ག་དཔོན་ཨ་ཉི་ འབྲི་ཐཱན་ ཁྲིམས་ཤིང་ཐུང་ཀ་ ཆེ་ཕ༌ལ། 27ཉི་རོག་ཀབ་ཉི་ ཅོམ་ཁཱན་ཉིག་ཙིང་བུ་ ལ་ཉོང་མི་ཉོང་ཨ་ཉི་ ཁྲིམས་ཤིང་ག་ཇཱན་མ༌ལ།

28-29ཉི་ཨོ་ཉ་ལམ་གེ་ དི་ཁཱན་སོ་ངོ་བ་ཀི་ སྐུར་པ་ཞུ་ཉི་ ཤ་རང་ཝག་ཉི་ ཁའི་ཇང་ ནཱན་གི་ཡེག་པ་ མཆོད་ཁང་དེད་ཐཱན་ ངམ་བི་ནང་སམ་ག་ ལོག་ཉི་ཅོད་པེ་དག་ཉི་ ཡེག་ཆོ༌ཝ། ཨོ་ག་ཡ་ཨོམ། 30ནཱན་ཏེན་སྐྱབས་ཨ་ཉི་ ས་ག་ཞུའི་དག་ཉི་ ཞུ་ཝ༌ལ།

31ཨུ་ཉུ་པུརུས་ཀིན་ཨ་ཉི་ བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ཀི་ རོག་ཏེ་བ་ནང་དོ་གསུང་གྲོས་གནང་ཉི་ ཡི་ཤུ་ག་མེམ་ཅོར་ཉི་ ཞུ་ཝ་ལ་ རོ་ཀི་ བཱརའ་ག་ སྲོག་རྒྱབ་ཨ་ལེ་རེ་བ་ཀབ་ཉི་ རོག་ཏེན་ག་ སྲོག་རྒྱབ་ཨ་ལེ་རེ་བུ་མ༌ལ། 32ཨིས་རེལ་ག་དཔོན་ ཁིརིས་ ཁྲིམས་ཤིང་གེ་དོང་ཞུན་ཆེན། ཉི་ཤ་ ཨ་ཤི་ རོ་ཀ་དད་པ་ཨ་ལེ་དག༌ཉི། ཉི་རོག་ཀབ་ཉི་ ཁྲིམས་ཤིང་ག་ཇཱན་ཁཱན་ ཉིག་ཙིང་གི་བུ་ རོ་ཀ་སྐུར་པ་ཞུ་ཝ༌ལ༎

ཡི་ཤུ་གཤགས་པ༌ལ།

33ཉི་ཆུ་ཚོད་སོང་ཉིག་ཙིང་ དི་ལ་ཀབ་ཉི་ ཨུ་ཉུ་ས་ཆ་ ཐམས་ཅན་རང་ མེར་བུ་རི་ཉི་ གཱན་དྲ་སམ་ཆོ་ཝ༌ལ། 34ཆུ་ཚོད་སམ་དི་ལ་ཀབ་ཉི་ ཡི་ཤུ་གི་ གསུང་སྐད་ཤུག་ཨ་ཉི་ གསུངས་མ་ལ་ ཨི་ལོའི་ ཨི་ལོའི་ ལ་མ་ས་བཱག་ཐ་ནི་དག༌ཉི། ཨོ་ཉ་དེན་ཐ་ཤོ་ ཇ་ག་དཀོན་མཆོག་ ཇ་ག་དཀོན་མཆོག་ ཇང་ནཱན་གི་ ཧང་ཨ་ཉི་ ཐུབ་ཐ་ཝ་ཡ།#15:34 མགུར་མ་ 22:1

35སོ་ངོ་ཚེ་བང་གི་ ན་ཐ་ཉི་ ཉཱན་ཅོ་ རོ་ཀི་ དཀོན་མཆོག་ག་ ལུང་བསྟན་པ་ ཨེ་ལི་ཡ་ར་ན་དག་ཉི་ ཡེག་པ༌ལ། 36ཉི་རོག་ཏེ་བ་ཀ་པོང་ཀེ་ སོ་ངོ་ཐུར་གི་ བག་ཏང་ ཞུ་ཅུར་པུ་ནང་ཀ་ ཤུམ་ཐཱན་ ཞུམ་ཅེན་དག་པ་གི་ ཏོ་ཀང་ཐུང་ཅི་གི་ཨ་ཉི་ ཡི་ཤུ་ག་ཞལ་ར་ག་ཐཱན་ཐཱན་ བཱརའ་དམག་མི་བ་ཀ་ ཡེག་པ་ལ་ ནོང་ཤོ་ ཨེ་ལི་ཡ་ཨུན་ཐཱན་ རོག་ཁྲིམས་ཤིང་གེ་དོང་ཕབ་ལ་སྨོ་ ཨ་ཤི་གོད་པེ་དག༌ཉི།

37ཉི་ཨོ་ཉི་ཆོ་ལ་རང་ ཡི་ཤུ་གི་ གནམ་མེད་ས་མེད་ གསུང་སྐད་ཤུག་ཨ་ཉི་གསུངས་ཐཱན་ གཤགས་པ༌ལ། 38ཡི་ཤུ་གཤགས་པ་ཐུར་ག་རང་ ཡ་རུ་ཤ་ལེམ་ག་ མཆོད་ཁང་ནང་ཀ་ བར་ཀེ་དོང་ཅཱད་ཕི་ཉི་ ཞུན་ཐ་ཁཱན་ ཡོ་ལུ་ཁ་ཤ་ ཐེད་པུ་ཁེ་པ་ ཐོ་ལ་ཐུང་ཀེ་དོང་ ཇུ་ཀ་སག་པུ་རེ་པ༌ལ།

39ཉི་ཨོ་ཉ་ར་ག་ཆོ་ཁཱན་ དམག་མི་འགོ་དཔོན་གི་ ཡི་ཤུ་ ཧང་ཏེན་བཤུམས་ཐཱན་ གཤགས་པ་གི་ལ་སྨོ་ མཇལ་ཉི་ཡེག་པ་ལ་ རོག་གི་ནེ་ལ་ ཏེན་ཏེན་རང་ དཀོན་མཆོག་ག་ སྲས་གི་ཝ་ཆོན་དག༌ཉི།

40ཉི་ཇང་ཀིན་གེ་ མེ་ཝག་ཙ་ཚེ་བང་ གོད་ཉི་ཆོ་ཝ་ཅ་གི་ཝ༌ལ། ཨོ་ཉ་པོང་ཀེ་ མ་རི་ཡམ་མག་ད་ལི་ནི་དང་ ཐུང་སི་ཡ་ཀུབ་དང་ ཡོ་སེཕ་ག་ཨ་མ་ མ་རི་ཡམ་ ཉི་ས་ལོ་མི་དག་ཁཱན་ རོག་ཏེ་སམ་བུ་ཆོ་ཝ༌ལ། 41ཉི་ཡི་ཤུ་ ག་ལིལ་ག་ བཞུགས་པེ་གང་ཀ་ རོ་ཀ་ཕྱག་ཞུ་ཁཱན་ རོག་ཏེ་སམ་དང་ བཱརའ་མེ་ཝག་ཙ་མང་པུ་ཐུར་ ཡི་ཤུ་ཀབ་ཉི་ ཡ་རུ་ཤ་ལེམ་ག་ ཨུ་ཁཱན་བ་ཅ་གི་ཝ༌ལ༎

ཡི་ཤུ་ག་སྐུ་ཕུང་ དུར་ནང་ཀ་ཙུག་པ༌ལ།

42ཉི་ས་གནས་ ཨ་རི་མ་ཐི་ཡ་དག་ས་གེ་ ཡོ་སེཕ་དག་ཁཱན་ཐུར་ཆོ་ཝ༌ལ། རོག་ཁེ་པ་སོ་ངོ་བ་ཀི་ ཆ་གནས་ཐ་ཁཱན་ བཀའ་ཁྲིམས་ག་ཚོགས་པ་ ཆི་ལུ་ཐུར་གི་ཝ་ཆོ་ཝ༌ལ། ཉི་ཨུ་ཉུ་མ་ཚཱད་པ་ དཀོན་མཆོག་ག་ རྒྱལ་སྲིད་ག་ནོང་ཉི་ཆོ་ཁཱན་ སོ་ངོ་ཐུར་གི་ཝ་ཆོ་ཝ༌ལ། ཡ་ཧུ་དི་པ་བ་ཀ་ དུས་བཟང་ནམ་ནིང་གི་ལ་ དག་པ་ཀབ་ཉི་ ཐི་ནོང་ད་བུ་ ཡི་ཤུ་གཤགས་པ༌ལ། ཉི་ཨོ་ཉ་གཤགས་པེ་ནོང་ཀ་རང་ ངམ་ཡོར་སེ་ཨ་ལ་ཀབ་ཉི་ 43ཡོ་སེཕ་གི་ ཡོང་ད་སུ་རང་ མ་ཁེ་ཝ་ད་བུ་ཨ་ཉི་ པི་ལ་ཏཱས་ག་སྐུན་མདུན་ག་དི་ཉི་ ཡི་ཤུ་ག་སྐུ་ཕུང་གནང་ཤོ་དག་ཉི་ ཞུ་ཝ༌ལ། 44ཡི་ཤུ་གཤགས་པ་དག་ཉི་ མཁྱེན་མ་ཀབ་ཉི་ པི་ལ་ཏཱས་ཡིད་ཆི་ཉི་ དམག་མི་འགོ་དཔོན་བ་ རཱན་ཐཱན་ཇི་མ་ལ་ རོག་ཤི་ཝ་ ཏེན་ཏེན་རང་གི་ལ་སྨོ་དག༌ཉི། 45ཡི་ཤུ་གཤགས་པ་ ཏེན་ཏེན་རང་གི་ལ་ ཨ་ཉི་སེ་དེན་གེ་ ཡོ་སེཕ་ག་ ནཱན་གི་ ཡི་ཤུ་ག་སྐུ་ཕུང་ བུ་རིན་ཆོག་པེ་དག་ཉི་ བཀའ་དྲེ་པ༌ལ། 46ཡོ་སེཕ་གི་ ཁ་ཤ་བ་ལིང་མིན་ ཇམ་པུ་ཨ་ཝ་ཐུར་ཕཱན་ཐཱན་ ཁྲིམས་ཤིང་གེ་དོང་ སྐུ་ཕུང་ཕབ་ཉི་ ཉི་ཨོ་ཉ་ཁ་ཤ་གི་ཨ་ཉི་ཆོམ་ཐཱན་ གོ་མ་གེ་རང་ གང་ཆི་ཉི་ཐ་ཁཱན་ ལུང་ག་དུར་ནང་ཀ་ཙུག་པ༌ལ། ཉི་རོ་ཀི་ལུང་ཆི་ལུ་ཐུར་ གིར་ཉི་བུན་ཐཱན་ དུར་ག་ཀོ་བུག་ཉི་ཐ་ཝ༌ལ། 47མ་རི་ཡམ་མག་ད་ལི་ནི་དང་ ཡོ་སེཕ་ག་ཨ་མ་ མ་རི་ཡམ་ རོག་ཉིག་ཙིང་གི་ ཡི་ཤུ་ག་སྐུ་ཕུང་ ཐ་ཝ་ག་བཱརང་ ཐོང་མ༌ལ༎

Currently Selected:

མར་ཀུས། 15: TNTB

Highlight

Copy