མར་ཀུས། 14

ཡི་ཤུ་ཙུང་མེ་ག་ གནས་སྐབས་ཙ་མ༌ལ།

1ཉི་ནམ་ནིང་ཞིམ་རོང་ དག་པ་ཀབ་ཉི་ གོག་ཉི་དི་ཁཱན་དང་ བི་ཏོ་མ་ཁཱན་ཀེབ་ཏང་#14:1 བི་ཏོ་མ་ཁཱན་ ཀེབ་ཏང་ག་ དུས་ཆེན་ཤོ་ གོག་ཉི་དི་ཝ་ག་དུས་ཆེན་གེ་ཏུ་ཉི་རང་ ངམ་ཟུམ་སག་པུ་ ཙིན་ཅ་གི༌ལ། གོག་ཉི་དི་ཝ་ག་དུས་ཆེན་གི་ དད་པ་ཨ་ཁཱན་བ་ སྡིག་པ་གེ་ཐར་ཉི་ ཐར་པ་ཉོང་པ་ཀོར་གེ་གེན༌ཅ། ཉི་བི་ཏོ་མ་ཁཱན་ ཀེབ་ཏང་ག་དུས་ཆེན་གི་ ཨ་ཧ་ཚེ་ཁེ་པ་ སྡིག་པ་དང་ ངན་པ་ཀབ་ཉི་ མ་ཡ་ལཱན་ ཡི་ཤུ་ཁིརིས་ག་ནང་ཀ་ སིང་མ་རི་ཝ་ཀོར་གེ་ གེན་ཅ་གི༌ལ།ག་ དུས་ཆེན་ཅ་གི་ཝ༌ལ། ཉི་བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ཀི་ ཡི་ཤུ་ཙང་ཀེན་ཨ་ཉི་ཙུང་ཐཱན་ བཀྲོངས་མེ་ག་གནས་སྐབས་ ཙམ་ཉི་རང་ཅ་གི་ཝ༌ལ། 2ཉི་དུས་ཆེན་ག་ནོང་ཀ་ ཨ་ཤི་ རོག་ཙུང་མེ་མང་ཕ། ཧང་ཡ་དག་ནེ་ལ་ སོ་ངོ་བ་ཟིང་ཏུ་དག་ཉི་ རོག་ཏེ་བ་ཀི་ ཡེག་ཅ་གི་ཝ༌ལ༎

བེ་ཐ་ནི་ཡ་ག།

3ཉི་ཡི་ཤུ་ བེ་ཐ་ནི་ཡ་དག་ས་ག་ ཀླུ་ནད་པ་སི་མོན་ག་ཕའི་ག་ གསོལཝ་བཞེས་ཉི་ བཞུགས་པེ་གང་ཀ་ མེ་ཝག་ཙ་ཐུར་ ལུང་གི་ཅོད་པ་ག་ ཁོ་ནང་ཀ་ སི་གནམ་མེད་ས་མེད་ གོང་ཆི་ལུ་ཆོ་ཁཱན་ཁེ་པ་ ཕ་ཉི་ཤེག་པ༌ལ། རོ་ཀི་ ཨོ་ཉ་ཁོ་ཕོད་ཐཱན་ ཡི་ཤུ་ག་ དབུ་གེ་དོང་ལུག་པ༌ལ།

4ཉི་ཨོ་ཉ་ཆོ་ཁཱན་ ཚེ་བང་རོ་ཙིག་ཉི་ རོག་ཏེ་བ་ནང་དོ་ཆཱས་ཨ་ཉི་ ཡེག་པ་ལ་ སི་གནམ་མེད་ས་མེད་ གོང་ཆི་ལུ་ཆོ་ཁཱན་རང་ ཨོ་ཐ་མེ་ཝག་ཙ་གི་ ཁུངས་ཧང་རང་མ་ཝ་ ཧང་ཨ་ཉི་ མོ་ནང་ཨན་ཅ་གི་ས། 5ཨོ་ཐ་སི་ཁེ་པ་ ད་ཡང་ 300 གེ་ལག་ཉི་ཙོང་ཐཱན་ དུག་པུ་སོ་ངོ་བ་ཀ་ བི་ལེ་ཁེ་ལེ་ཆོ་ཝ་དག་ཉི་ རོག་ཏེ་བ་ རོ་ཙིག་ཉི་ རོ་ཀ་ཁ་ཏང་མ༌ལ།

6དག་པ་ཀབ་ཉི་ ཡི་ཤུ་གི་གསུངས་མ་ལ་ རོག་ ཧང་ཨ་ལེ་ལ་མ་ཐུར་ ཨ་ལེ་བི། རོ་ཀི་ ཇ་ག་གནམ་མེད་ས་མེད་ ལེག་པུ་ཨ་ལ་ཀབ་ཉི་ ན་ཧ་བ་ རོ་ཀ་ཧང་ཨ་ཉི་ ཁ་ཏང་མེ་ཁེ་ཝ་ཅ་ཡ། 7ཧང་ཡ་དག་ནེ་ལ་ ན་ཧ་བ་ཀབ་ཉི་ ཧ་ལ་རང་གི་ནེ་བུ་ དུག་པུ་ཨོ་ཕུ་རང་ཨོ་ཕེ། ཨོ་ཉི་ཨ་དེན་གེ་ ན་ཤི་ ཧ་ལ་རུམ་པེ་ལ་མ་ཐུར་ རུམ་པེ་རེ༌བེ། དག་པ་ཀབ་ཉི་ ཇང་ཤོ་ ན་ཧ་བ་ཀབ་ཉི་ ཏ་བུ་རང་ཆོ་ལེ་ག་ རང་དབང་མང་ཕ། 8རོ་ཀི་ ཧང་ཨ་ལེ་རེ་བ་ཐུར་ཨ་ཉི་ ཇ་ག་ལུས་པུ་ དུར་ག་མ་ཙུག་པེ་གོ་མ་ སི་སོག་ཉི་ ཤེར་སུང་སུང་ན་མ་ཅོད༌པ། 9ཇི་གི་ ན་ཧ་ཐྲང་ཉི་ཡེག་པེ་ འཛམ་གླིང་ཨོ་ག་རང་གི་ནེ་བུ་ འཐེན་ལེག་པུ་བཤད་པ་ཀབ་ཉི་ རོག་ཡིད་ཀ་ཨ་ལེ་དེན་གེ་ རོ་ཀི་ཨ་ཁཱན་ཀོར་གེ་བུ་ ཡེག་པེ་དག་ཉི་ གསུངས་མ༌ལ༎

ཡ་ཧུ་ད་གི་ ཡི་ཤུ་ རོ་ཀ་དགྲ་བ་ཀ་ག་དང་ག་ སྤྲོད་པེ་དག་ཉི་ ཁ་དོག་པ༌ལ།

10རོག་ཏེ་སོང་ཉིག་ཙིང་ག་པོང་ཀེ་ ཡ་ཧུ་ད་ཨིས་ཀ་རི་ཡོད་དག་ཁཱན་གི་ བླ་མ་ཆི་ལུ་བ་ཀ་བཱརང་ཀ་ ཡི་ཤུ་ རོག་ཏེ་བ་ཀ་ག་དང་ག་ སྤྲོད་པེ་དེན་གེ་ ཏུན་ཆ་ལ་མེ་ག་ དི་ཝ༌ལ། 11ཉི་ཡ་ཧུ་ད་གི་ ཡི་ཤུ་ཙུང་མེ་ག་ གནས་སྐབས་ཀོར་གེ་ ཡེག་པ་ཀབ་ཉི་ བླ་མ་ཆི་ལུ་བ་ གནམ་མེད་ས་མེད་ ཤོ་ནང་ཕེ་ཉི་ རོ་ཀ་ནང་སུབ་བི་ལེ་དག་ཉི་ ཁ་ཙི་ཐ་ཝ༌ལ། ཉི་ཡ་ཧུ་ད་གི་ ཡི་ཤུ་ རོག་ཏེ་བ་ཀ་ ག་དང་ག་སྤྲོད་པེ་དེན་གེ་ གནས་སྐབས་ཙ་མེ་ གོ་ཙུག་པ༌ལ༎

ཡི་ཤུ་གི་ གོག་ཉི་དི་ཝ་ག་དུས་ཆེན་ རོ་ཀ་སློ་མ་བ་ཀབ་ཉི་ ཙི་ཝ༌ལ།

12ཉི་བི་ཏོ་མ་ཁཱན་ དུས་ཆེན་ག་ གོ་མ་ག་ནོང་ཀ་ ཡ་ཧུ་དི་པ་བ་ཀི་ གོག་ཉི་དི་ཝ་ག་དུས་ཆེན་ ཙི་ལེ་དེན་གེ་ ཤི་ཤ་ཀ་ཏོང་ཤེ་ཉི་ མཆོད་པ་ཕུལ་ཅ་གི་ཝ༌ལ། ཉི་ཨོ་ཉ་ནོང་ཀ་ ཡི་ཤུ་ག་སློ་མ་བ་ཀི་ རོ་ཀ་ཞུ་ཝ་ལ་ དུས་ཆེན་ཙི་ལེ་དེན་གེ་ ན་ག་ཚོགས་ཅོད་པེ་ག་ ཨ་ཧ་བ་ ཨོ་ག་དིན་ཐཱན་ ཅམ་པེ་ཡ་དག༌ཉི།

13ཡི་ཤུ་གི་ ཨོ་ཐེན་གསུངས་ཐཱན་ ཀུན་ཏི་ཝ་ལ་ ཁྲོམ་ཆེན་ ཡ་རུ་ཤ་ལེམ་ག་ཏཱན་དི། ཉི་ན་ཤི་ སོ་ངོ་ཐུར་གི་ ཁོ་ནང་ཀ་རི་བང་མ་ཨ་ཝ་ཁྲ༌པེ། ཉི་རོ་ཀ་ཚིང་ཚིང་དི་ཉི་ 14རོག་ནུབ་ཁཱན་ ཕའི་ནང་ཀ་ནུབ་ཐཱན་ ཕའི་ཡོན་ད་ག་ཡེག་ཅོ་ ཨ་ཧ་སློབ་དཔོན་གི་ རོག་ རོ་ཀ་སློ་མ་བ་ཀབ་ཉི་ དུས་ཆེན་བརྩི་སྲུང་ཨ་ཉི་ བཞེས་ལེ་དེན་གེ་ ཕའི་ནང་ཏོང་པ་ ཨོ་ག་ཅ་ཡ་དག་ཉི་ ནཱན་ག་ཇིམ་ཤོ་ཨ་ཉི་ གསུངས་ཆོ་ཝ་དག༌ཉི། 15ཉི་རོ་ཀི་ ཐོ་ལ་བཅའ་སྒྲིག་ཕི་ཉི་ ཕྲིག་ཀིན་ཅབ་ཉི་ཐ་ཁཱན་ ཕའི་ནང་ཆི་ལུ་ཆོ་ཝ་ ཨ་ཝ་ཐུར་གེན༌མེ། ཉི་ཨོ་ཉ་ག་ ཨ་ཧ་དེན་གེ་ ཅམ་ཅོ་ན་དག་ཉི་ གསུངས་མ༌ལ། 16ཉི་རོ་ཀ་སློ་མ་ཉིག་ཙིང་ ཁྲོམ་ཆེན་ག་ཏཱན་ དི་ཝ༌ལ། ཉི་ཧང་རང་ རོ་ཀི་གསུངས་མ་པུརུས་ཀིན་ཨ་ཉི་ ཁྲབ་ཉི་ དུས་ཆེན་ཙི་ལེ་དེན་གེ་ ཅམ་པ༌ལ།

17ཉི་ངམ་ནུབ་ཏེན་གེ་ ཡི་ཤུ་ རོ་ཀ་སློ་མ་སོང་ཉིག་ཙིང་ཀབ་ཉི་ ཕེབས་པ༌ལ། 18ཉི་རོག་ཏེ་བ་ དོང་ཏཱན་ཀོ་ལོ་ལོ་བཞུགས་ཉི་ ཚོགས་བཞེས་ལེ་གང་ཀ་ ཡི་ཤུ་གི་གསུངས་མ་ལ་ ཇི་གི་ ན་ཧ་ཐྲང་ཉི་ཡེག་པེ་ ཨོ་ཐ་ག་ ཇང་ཀབ་ཉི་ཟ་ཁཱན་ ན་ཧ་པོང་ཀེ་ཐུར་གི་ ཇང་ཤེ་ལེ་ག་ཙུག་པེ་དག༌ཉི།

19ཉི་རོག་ཏེ་བ་ གནམ་མེད་ས་མེད་ ཁོ་དང་ཆཱད་ཉི་ ཇང་ཏ་མང་གི་དུ་དག་ཉི་ ཐུར་ཆུ་མ་རང་ ཐུར་གི་ཞུ་ཝ༌ལ།

20ཉི་ཡི་ཤུ་གི་ རོག་ཏེ་བ་ཀ་ གསུངས་མ་ལ་ ནའི་སོང་ཉིག་ཙིང་ག་པོང་ཀེ་ ཐུར་གི༌ལ། ཇང་ཀབ་ཉི་ དེར་མ་ཐུར་གེ་ ཀེབ་ཏང་ཤུམ་ཁཱན་ཁེ་པ་གི༌ལ། 21སོ་ངོ་ག་ཟ་རང་ཏ་ རོ་ཀ་ཀོར་གེ་ འབྲི་བ་པུརུས་ཀིན་ཨ་ཉི་ དིན༌ཅ། དག་པ་ཀབ་ཉི་ ཇང་ཤེ་ལེ་ཙུག་ཁཱན་ སོ་ངོ་གི་ནེ་ལ་ ཧབ་ཏུར་ནང་དོག་པེ་ཁེ་ལེ་ཡ། ཨའི་ རོག་མ་ཀེ་ཝ་གི་ནེ་ལ་ དྲག་པེ་ཆོ་ཝ་དག་ཉི་ གསུངས་མ༌ལ༎

གཙོ་བོ་ག་ཚོགས།

22ཉི་རོག་ཏེ་བ་བཞེས་ལ་ཀབ་ཉི་ ཀེབ་ཏང་ རོ་ཀ་ཕྱག་ཀ་བསྣམས་ཐཱན་ བཀའ་དྲིན་བསམ་ཉི་ ཉི་བིརིང་ཐཱན་ རོ་ཀ་སློ་མ་བ་ཀ་ བོང་ཉི་གནང་ཐཱན་གསུངས་མ་ལ་ ཟའི་ ཨུ་ཐུ་ཤོ་ ཇ་ག་ལུས་པུ་གི་ལ་ན་དག༌ཉི།

23ཉི་བཞེས་ཆ་ རོ་ཀ་ཕྱག་ཀ་བསྣམས་ཐཱན་ བཀའ་དྲིན་བསམ་ཉི་ ཉི་རོ་ཀ་སློ་མ་བ་ཀ་གནང་མ༌ལ། ཉི་རོག་ཏེ་བ་ ཐམས་ཅན་གི་ ཨུ་ཉུ་ཇ་མ༌ལ། 24ཉི་རོ་ཀི་ རོག་ཏེ་བ་ཀ་ གསུངས་མ་ལ་ ཨུ་ཐུ་ཤོ་ མང་པུ་ཐུར་ག་དེན་གེ་ལུག་ཉི་ སོ་ངོ་དང་ དཀོན་མཆོག་ག་བར་ཀ་ འགན་རྒྱ་སིང་མ་ཅོད་ཁཱན་ ཇ་ག་ཞི་གི་ལ་དག༌ཉི། 25ཇི་གི་ ན་ཧ་ཐྲང་ཉི་ཡེག་པེ་ དཀོན་མཆོག་ག་རྒྱལ་སྲིད་ག་ ཨུ་ཐུ་ད་བུ་ སིང་མ་མ་ཇ་མ་སག་པུ་ ཇང་ལོག་ཉི་སེ་ག་རི་ མ་ཇ་མ་ན་དག༌ཉི།

26ཉི་རོག་ཏེ་བ་ཀི་ མགུར་མ་ཞུན་ཐཱན་ ཐོ་ལ་ཨོ་ལིབ་ཤིང་ག་ ཕུ་ཐུང་ཀ་ཏཱན་ བྱོན་མ༌ལ༎

པ་ཏྲུས་གི་ གུམ་མ་ཡེ་ལ་ཨ་ཉི་ ཡེག་པེ་དག་ ཡི་ཤུ་གི་གསུངས་མ༌ལ།

27ཉི་ཡི་ཤུ་གི་ གསུངས་མ་ལ་ ན་ཧ་བ་ ཐམས་ཅན་གི་རང་ ཇང་ཐུབ་ཐ༌ལེ། ཧང་ཡ་དག་ནེ་ལ་

ཇི་གི་ཤི་ཤ་དི་པ་ཤེ༌ལེ། ཉི་ཤི་ཤ་བ་ ཐམས་ཅན་རང་ ཏོར་ཉི་དི་ལེ་#14:27 ཇ་ཀ་རི་ཡ་ག་དཔེ་ཆ་ 13:7 དག༌ཉི་

གསུང་རབ་ནང་ཀ་འབྲི་བ༌ཅ། 28དག་པ་ཀབ་ཉི་ ཇང་ལོག་ཉི་ཝུན་ཐཱན་ ན་ཧ་གུམ་གུམ་ ག་ལིལ་ག་ཏཱན་ དི་ལེ་དག་ཉི་ ཡི་ཤུ་གི་གསུངས་མ༌ལ།

29རོག་ཏེ་ཐམས་ཅན་གི་ ཐུབ་ཐ་ནེ་བུ་ ཇི་གི་ཏ་ ཐེ་རི་བ་རི་རང་ ཐུབ་མ་ཐ་ལ་དག་ཉི་ པ་ཏྲུས་གི་ ཡི་ཤུ་ག་ ཞུ་ཝ༌ལ།

30ཉི་ཡི་ཤུ་གི་ རོ་ཀ་གསུངས་མ་ལ་ ཇི་གི་ ན་ག་ཐྲང་ཉི་ཡེག་པེ་ ཐི་ནོང་བི་ནང་ག་རང་ གོ་ག་ཤོ་ཉིག་ཙིང་ མ་ཇིག་པེ་གོ་མ་ ནཱན་གི་ ཇང་གུམ་མ་ཡེ་ལ་ཨ་ཉི་ ཤེབ་སམ་ཡེག་པེ་དག༌ཉི།

31དག་པ་ཀབ་ཉི་ པ་ཏྲུས་གི་ ཇང་ནཱན་ཀབ་ཉི་ ཤི་ལེ་རང་ཁེ་ནེ་བུ་ ཤི་ལེ་མ་ཏོག་པ་ ཇི་གི་ ནཱན་གུམ་མ་ཡེ་ལ་ཨ་ཉི་ ཡེག་པེ་མར་བ་དག་ཉི་ དོ་རི་རི་ཨ་ཉི་ཞུ་ཝ༌ལ། ཉི་བཱརའ་སློ་མ་བ་ཀི་བུ་ ཨུ་ཉུ་པུརུས་ཀིན་ཨ་ཉི་རང་ ཞུ་ཝ༌ལ༎

ཡི་ཤུ་གི་གེད་ས་མ་ནི་ག་ སྨོན་ལམ་ཏ་པ༌ལ།

32ཉི་རོག་ཏེ་བ་ གེད་ས་མ་ནི་དག་ས་ག་ཏཱན་ བྱོན་མ༌ལ། ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཇང་སྨོན་ལམ་ཏ་པ་ཀབ་ཉི་ ན་ཧ་བ་ ཨོ་ཐ་ག་ལང་ཉི་ ཆོའི་ན་དག༌ཉི། 33ཉི་ཡི་ཤུ་གི་ རོག་ཀབ་ཉི་ པ་ཏྲུས་དང་ཡ་ཀུབ་ ཉི་ཡུ་ཧན་ན་ རོག་ཏེ་སམ་བསྣམས་ཉི་ བྱོན་མ༌ལ། ཉི་རོག་གནམ་མེད་ས་མེད་ ཐུགས་དོགས་པ་ཨ་དེན་གེ་ སྐུ་སྙུང་པ་ད་བུ་ རི་ཝ༌ལ། 34རོ་ཀི་ རོག་ཏེ་སམ་ག་ གསུངས་མ་ལ་ ཇ་ག་ཐིང་ལོམ་ གནམ་མེད་ས་མེད་ངམ་ཉི་ ཤི་ལེ་ད་བུ་རི་ཝ༌ཅ། ན་ཧ་བ་ ཨོ་ཐ་ཆོན་ཐཱན་ རིག་པ་སྒྲིམ་ཉི་ གོད་ཅོ་ན་དག༌ཉི།

35ཉི་ད་སུར་ལེང་བྱོན་ཐཱན་ ས་ག་ཀུར་ཉི་ སྨོན་ལམ་ཏ་པ༌ལ། རེན་ཐཱན་ཨ་ནེ་ལ་ ཨུ་ཐུ་ད་བུ་ རོ་ཀ་ཐུང་ཀ་ མ་ཇུང་ཆེན་དག༌ཉི། 36ཉི་རོ་ཀི་ཞུ་ཝ་ལ་ ཡབ་ ནཱན་གི་ མར་བེ་ཧང་རང་མཱན༌ཅ། ཨོ་ཐ་དཀའ་ཝ་ཅཱད་པེ་ཁེ་ཁཱན་ གུར་བུ་ཁེ་པ་ ཇང་གེ་དུང་ཉི་བསྣམས༌ཅོ། དག་པ་ཀབ་ཉི་ ཇི་གི་ཧང་མིན་ཅ་སྨོ་ ཨུ་ཉུ་མང་གི་ཝ་ ན་ག་ཐུགས་དང་ཏུ་ཉི་ ཇུང་ཆེན་དག༌ཉི།

37ཉི་རོག་ རོ་ཀ་སློ་མ་བ་ཆོས་ས་ག་ཏཱན་ བྱོན་མ་ཀབ་ཉི་ རོག་ཏེ་བ་ ཡི་ཕ་ཁྲ་པ༌ལ། རོ་ཀི་པ་ཏྲུས་ག་ གསུངས་མ་ལ་ སི་མོན་ ནཱན་མི་ནང་ཨུ་ན་སྨོ། ནཱན་གི་ ཇང་ཀབ་ཉི་ གཱན་དྲ་ཐུར་བུ་ གོད་ཉི་ཆོ་ལེ་རེ་བུ་མ་ལ་སྨོ། 38ན་ག་ཐུང་ཀ་ བར་ཆད་མང་ཕེ་དེན་གེ་གོད་ཐཱན་ སྨོན་ལམ་ཏབ༌ཅོ། མ་པ་ སེམས་ཀི་ཏ་ ཨ་ལེ་ལ་མ༌ལ། དག་པ་ཀབ་ཉི་ ལུས་པུ་གི་ གོ་ཆོད་པུ་མ་ལ་དག་ཉི་ གསུངས་མ༌ལ།

39ཉི་ཨོམ་ཆང་རང་ རོག་ཨོ་ཉ་གེ་བྱོན་ཐཱན་ གོ་མ་པུརུས་ཀིན་ཨ་ཉི་ སྨོན་ལམ་ཏ་པ༌ལ། 40ཉི་ཨོམ་ཆང་རང་ རོག་ལོག་པ་ཀབ་ཉི་ ཡི་ཕ་ཁྲ་པ༌ལ། ཧང་ཡ་དག་ནེ་ལ་ རོག་ཏེ་བ་ གནམ་མེད་ས་མེད་ ཝུ་དུག་པ་ཆོ་ཝ༌ལ། ཉི་རོག་ཏེ་བ་ཀི་ ཡི་ཤུ་ག་ ཧང་ཞུ་ལེ་གི་ལམ་རང་ མ་སེ་ཝ༌ལ།

41ཉི་རོག་ལོག་ཉི་ཤེབ་སམ་ དི་ལ་ཀབ་ཉི་ རོ་ཀི་ རོག་ཏེ་བ་ཀ་ གསུངས་མ་ལ་ ན་ཧ་བ་ ཨོ་མ་བུ་ ཡིབ་ཉི་ཤོང་ལཱན་ཅ་སྨོ། ཨོམ་གི་ནེ་ལ་དྲིག་པ་ ཧང་ཡ་དག་ནེ་ལ་ ཇང་ཙུང་མེ་ག་རེན༌པ། གོད་ཅོ་ ཉི་ཨོམ་ སོ་ངོ་ག་ཟ་ སྡིག་ཅན་སོ་ངོ་བ་ཀ་ ག་དང་ག་སྤྲོད་པེ་གི༌ལ། 42ཝུའི་ ཨ་ཧ་བ་ དི་ཁེ། གོད་ཅོ་ལེ་ ཇང་ཙུང་ཁཱན་ ར་ག་ཏེམ་པ་ཅ་དག་ཉི་ གསུངས་མ༌ལ༎

ཡི་ཤུ་ཙུང་མ༌ལ།

43རེབ་ཀིན་ཐུར་ག་རང་ རོ་ཀི་གསུངས་ཉི་མ་ཆུ་མེ་གོ་མ་ རོག་ཏེ་སོང་ཉིག་ཙིང་ག་པོང་ཀེ་ ཡ་ཧུ་ད་དག་ཁཱན་ ཆོ་ཝང་དང་ ཏོ་ཀང་བ་མེན་ཁཱན་ སོ་ངོ་མང་པུ་ཐུར་ཀབ་ཉི་ ཤེག་པ༌ལ། ཉི་རོག་ཏེ་བ་ཤོ་ བླ་མ་ཆི་ལུ་བ་དང་ བཀའ་ཁྲིམས་ག་སློབ་དཔོན་བ་ ཉི་སོ་ངོ་ཆི་ལུ་བ་ཀི་ ཀུན་ཏི་ཁཱན་བ་གི་ཝ་ཆོ་ཝ༌ལ། 44ཉི་ཡ་ཧུ་ད་གི་ སོ་ངོ་བ་ཀ་ད་ལེན་བི་ཉི་ ཡེག་པ་ཆོ་ཝ་ལ་ ཇི་གི་ཅུབ་ཨ་ཁཱན་ཁེ་པ་ ན་ཤི་ཚཱས་ཁཱན་གི༌ལ། ཉི་རོག་ཙུང་ཐཱན་ སྲུང་རྒྱབ་པ་ཙུག་ཉི་བུའི་ན་དག༌ཉི། 45ཉི་ཡ་ཧུ་ད་ ཤེག་པ་ཐུར་ག་རང་ རོ་ཀི་ ཡི་ཤུ་ག་སྐུན་མདུན་ག་དི་ཉི་ སློབ་དཔོན་དག་ཉི་ ཞུན་ཐཱན་ ཅུབ་ཨ་ཝ༌ལ།

46ཨོ་ཉ་སོ་ངོ་བ་ཀི་ ཡི་ཤུ་ཙུང་ཉི་ཐིག་ཐཱན་ བུ་ཝ༌ལ། 47ཉི་ཨོ་ཉ་ཐིང་ཉི་ ཆོ་ཁཱན་བ་ཀ་པོང་ཀེ་ ཐུར་གི་ གི་རིང་ཤོ་ཝ་ཐྲེ་ཀེ་རང་ བླ་མ་གོང་མ་ག་ གཡོག་པ་ཐུར་ག་ ན་ཅཱད་ཉི་གེ་མ༌ལ།

48ཉི་ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཧང་ཇང་ཤོ་ ངོ་ལོག་པ་རིག་ཁཱན་བ་གི་ལ་སྨོ། ཇང་ཙུང་མེ་དེན་གེ་ ཨོ་ཐ་མཚོན་ཆ་བ་ཕ་ཉི་རང་ ཨོ་ཕེ་ཁེ་ཝ་སྨོ། 49ཇང་ནོང་དྲང་རང་ ཡེན་བི་ཉི་ མཆོད་ཁང་ག་ ན་ཧ་བ་ཀབ་ཉི་རང་ཆོ༌ཝ། ཉི་ཨུ་ཉུ་གང་ཀ་ ན་ཤི་ཇང་མ་ཙུང་ཤི། མ་པ་ གསུང་རབ་ནང་ཀེ་ཤོ་ཁཱན་ཁེ་པ་ ཇུང་མེ་ཁེ་ལེ་དག་ཉི་ གསུངས་མ༌ལ།

50ཉི་སློ་མ་བ་ ཐམས་ཅན་རང་ རོག་ཐུབ་ཐ་ཉི་ ཇུག་ཉི་ཇོང་མ༌ལ། 51ཉི་བཱརའ་ཧང་རང་མ་ཝ་ ཁ་ཤ་བ་ལུ་ཨ་ཝ་གི་ཏྲི་ཁཱན་ ཡམ་ལང་ཐུར་གི་ རོ་ཀ་ཚིང་ཚིང་དི་ཝ༌ལ། ཉི་ཨོ་ཉ་སོ་ངོ་བ་ཀི་ རོག་བུ་ ཙུང་མེ་མིག་པ་ཕི་ལ་ཀབ་ཉི་ 52ཨོ་ཉ་ཁ་ཤ་ རོག་ཏེ་བ་ཀ་ ག་དང་ག་ཤོན་ལུས་ཉི་ རོག་ཤོ་ ཙ་ཏི་ལིང་པ་རི་ཉི་ གཱན་ཇོང་མ༌ལ༎

ཡི་ཤུ་ཚོགས་པ་ཆི་ལུ་བ་ཀ་གུབ་ཀ་ ཀེ་བ༌ལ།

53ཉི་རོག་ཏེ་བ་ཀི་ ཡི་ཤུ་ བླ་མ་གོང་མ་ག་ བཱརང་ཀ་བུ་ཝ༌ལ། ཉི་བཱརའ་བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ ཉི་སོ་ངོ་ཆི་ལུ་ ཐམས་ཅན་རང་ ཛོ་མ༌ལ། 54ཉི་པ་ཏྲུས་གི་ ཇང་ཀིན་གེ་ཨ་ཉི་ ཡི་ཤུ་ག་ཚིང་ཚིང་དི་ཉི་ བླ་མ་གོང་མ་ག་ཕའི་གུབ་ཀ་ ཝུང་ག་སག་པུ་ཤེག་ཉི་ ཉི་སྲུང་རྒྱབ་ཨ་ཉི་ཆོ་ཁཱན་ དམག་མི་བ་ཀབ་ཉི་ མི་གོམ་ཉི་ཆོ་ཝ༌ལ།

55ཨོམ་བླ་མ་ཆི་ལུ་བ་དང་ བཱརའ་བཀའ་ཁྲིམས་ག་ ཚོགས་པ་ཆི་ལུ་བ་ཀི་ ཡི་ཤུ་བཀྲོངས་མེ་དེན་གེ་ ཅོན་ལ་མ་ཀབ་ཉི་ ཐུར་གི་བུ་ རོ་ཀི་ཐིག་ཤོར་བ་ག་ ཧང་རང་མ་ཐོང་མ༌ལ། 56མ་པ་ མང་པུ་ཐུར་གི་ རོ་ཀ་ཀོར་གེ་ མང་གི་ཝ་ག་ཆཱས་ག་བ་ དུས་ཉི་ཡེག་ཉི་ ཧང་ད་བུ་རང་ཨ་ཉི་ གོད་ནེ་བུ་ རོག་ཏེ་བ་ཀ་ཆཱས་ དོམ་པེ་མར་བ༌ལ། 57ཉི་ཚེ་བང་གི་ ག་ཐིང་ཐཱན་ སོ་ད་ཕི་ཉི་ མང་གི་ཝ་ག་ཆཱས་ཡེག་པ་ལ་ 58ཇི་གི་ སོ་ངོ་ག་ག་དང་གི་ ཅོད་ཁཱན་ཁེ་པ་ དེད་ཉི་གེམ་ཐཱན་ ག་དང་གི་མ་ཅོད་པ་ག་མཆོད་ཁང་ ངམ་བི་ནང་སམ་ག་བར་ཀ་ ཅོད་པེ་ཨ་ཉི་ རོ་ཀི་ཡེག་པ་ག་ ཨ་ཤི་ན་ཐ་ཝ་དག༌ཉི། 59ཉི་རོག་ཏེ་བ་ཀ་ ཨོ་ཐ་ཆཱས་བུ་ ཇུང་ཁུངས་ཧང་རང་མ་ཝ་ རི་ཝ༌ལ།

60ཉི་ཨོ་ཉ་པོང་ཀེ་ བླ་མ་གོང་མ་ ག་བཞེངས་ཐཱན་ ཡི་ཤུ་ག་ཇི་མ་ལ་ ནཱན་གི་ཡེག་པེ་ག་ལན་ ཧང་རང་མཱན་ཅ་སྨོ། ཨོ་ཐ་སོ་ངོ་བ་ཀི་ ན་ག་ཀོར་གེ་ཡེག་ཁཱན་ ཧང་གི་ལ་ཡ་དག༌ཉི། 61ཨོ་ཉ་ག་ལན་ ཡི་ཤུ་གི་མ་གནང་མ༌ལ། ཉི་བླ་མ་གོང་མ་གི་ ཇི་མ་ལ་ ནཱན་བྱིན་རླབས་ཆི་ལུ་ཆོ་ཁཱན་ དཀོན་མཆོག་ག་སྲས་ ཁིརིས་གི་ལ་སྨོ་དག༌ཉི།

62ཇང་གི༌ལ། ན་ཤི་སོ་ངོ་ག་ཟ་ དཀོན་མཆོག་ག་ ལ་ཉོང་ལོ་ཀ་ཁྲི་ག་ ལང་མ་ཐོང༌མེ། ཉི་ཨུ་ཉུ་མ་ཚཱད་པ་ ཞིང་ཁམས་གེ་དོང་ ལོག་པ་ཀབ་ཉི་ མུག་པ་ཐུང་ཀ་ལང་ཉི་ ཨོ་ཕ་ཐོང་མེ་ན་དག་ཉི་ ཡི་ཤུ་གི་ལན་གསུངས་མ༌ལ།

63ཉི་ཨོ་ཉ་བླ་མ་གོང་མ་དགོངསམ་ཁྲེལ་ཉི་ རོག་རོག་ཏེན་ག་ ནམ་བཟའ་རེད་ཉི་གེམ་ཐཱན་ གསུངས་མ་ལ་ གོད་ཅོ་ ཧང་ཏེན་ཡེག་ལ་ཡ། ཨོམ་ ཨོ་ཐ་སོ་ངོ་ཤེ་ལེ་དེན་གེ་ ཚིག་ཧང་ཤ་ཚཱས་པེ་ཡ། 64ཨོ་ཐ་སོ་ངོ་གི་ སྐུར་པ་ཞུ་ཁཱན་ཁེ་པ་ ན་ཤི་ན་ཐ༌ཝ། ཉི་ན་ཤི་ཨ་ནེ་ལ་ ཧང་ཏེན་ཡ་དག་ཉི་ ཇི་མ་ཀབ་ཉི་ བཱརའ་སོ་ངོ་བ་ཀི་བུ་ རོག་ཤེ་ལེ་རང་ཁེ་ལེ་དག་ཉི་ ཐག་གཅཱད་པ༌ལ།

65ཉི་སོ་ངོ་ཚེ་བང་གི་ ཐོབ་ཏང་ཚེ་ཉི་ ཉི་ཁ་ཤ་གི་ རོ་ཀ་སྤྱན་བུག་ཐཱན་ ཀོང་ཉི་ཡེག་པ་ལ་ ཨ་ཧ་ཡེག་ཅོ་ ནཱན་ཨི་བི་གི་ ཀོང་མ་ཡ་དག༌ཉི། ཉི་དམག་མི་བ་ཀི་ རོག་དེན་ཇ་ཀི་ཕི་ཝ༌ལ༎

པ་ཏྲུས་གི་ ཡི་ཤུ་གུམ་མ་ཡེ་ལ་དག་ཉི་ཡེག་པ༌ལ།

66ཉི་པ་ཏྲུས་ དོང་ཕའི་གུབ་ཀ་ ཝུང་ག་ལང་ཉི་ཆོ་ལ་ཀབ་ཉི་ བླ་མ་གོང་མ་ག་ གཡོག་ཨ་ཁཱན་ མེ་ཝག་ཙ་ཐུར་ཤེག་ཉི་ 67རོ་ཀི་པ་ཏྲུས་ མི་གོམ་ཉི་ ཆོ་ཝ་ཐོང་མ་ཀབ་ཉི་ པ་ཏྲུས་ག་གོད་ཐཱན་ ཡེག་པ་ལ་ ནཱན་བུ་ ནཱས་རི་པ་ ཡི་ཤུ་ཀབ་ཉི་ཆོ་ཝ་དག༌ཉི།

68དག་པ་ཀབ་ཉི་ རོ་ཀི་ཁ་མ་དོག་པཱན་ ཇི་གི་ རོག་གུམ་བུ་མ་ཡེ༌ལ། ཉི་ནཱན་གི་ ཧང་ཡེག་ཅ་གི་ལ་སྨོ་ ཧ་གོ་ལུ་མ་ལ་དག་ཉི་ ཡེག་ཐཱན་ ཕིས་ཀ་མ་ཀོ་ག་ ལམ་ག་ཏཱན་དི་ཝ༌ལ། ཨོ་ཉི་ཆོ་ལ་རང་ གོ་ག་ཇིག་པ༌ལ།

69ཉི་ཨོ་ཉ་བླ་མ་གོང་མ་ག་ གཡོག་ཨ་ཁཱན་མེ་ཝག་ཙ་གི་ པ་ཏྲུས་ཐོང་ཉི་ རོ་ཀ་ར་ག་ཐིང་ཁཱན་བ་ཀ་ ཡེག་པ་ལ་ ཨོ་ཐ་སོ་ངོ་བུ་ རོག་ཏེ་བ་ཀ་པོང་ཀེ་ ཐུར་གི་ལ་དག༌ཉི། 70ཉི་ཨོམ་ཆང་རང་ རོ་ཀི་ ཇང་གི་ལུ་རང་མང་གི་དག་ཉི་ ཡེག་པ༌ལ།

ཉི་རེབ་ཀིན་ཐུར་ག་ཚི་ངེ་ ཨོ་ཉ་ག་ཐིང་ཉི་ཆོ་ཁཱན་བ་ཀི་ པ་ཏྲུས་ག་ཡེག་པ་ལ་ ནཱན་ཐེ་རི་བ་རི་རང་ རོག་ཏེ་བ་ཀ་པོང་ཀེ་ ཐུར་གི༌ལ། ཧང་ཡ་དག་ནེ་ལ་ ནཱན་བུ་ ག་ལིལ་གེ་གི་ལ་དག༌ཉི།

71དག་པ་ཀབ་ཉི་ རོ་ཀི་ རོག་ཏེན་ག་ཐུང་ཀ་ན་ཟ་ཉི་ ཇང་གིན་ཐཱན་ཨ་ནེ་ལ་ ཁྲིམས་ཧང་ད་བུ་རང་ཉོང་ནེ་བུ་ ཏ་ཀ་མང་ཕ། ན་ཤི་ཡེག་ཁཱན་ སོ་ངོ་ཁེ་པ་ ཇི་གི་གུམ་རང་མ་ཡེ་ལ་དག་ཉི་ ཡེག་པ༌ལ། 72ཨོ་ཉི་ཆོ་ལ་རང་ གོ་ག་ཤོ་ཉིག་ཙིང་ ཇིག་པ༌ལ།

ཉི་ཡི་ཤུ་གི་ རོ་ཀ་ ནཱན་གི་ གོ་ག་ཤོ་ཉིག་ཙིང་ མ་ཇིག་པེ་གོ་མ་ ཇང་གུམ་མ་ཡེ་ལ་ཨ་ཉི་ ཤེབ་སམ་ཡེག་པེ་དག་ཉི་ གསུངས་མ་ག་ཡིད་ཀ་ཨ་ཉི་ གནམ་མེད་ས་མེད་ ཁོ་དང་ཆཱད་ཉི་གེ་ཕ༌ལ༎

Currently Selected:

མར་ཀུས། 14: TNTB

Highlight

Copy