མར་ཀུས། 13
13
ཡི་ཤུ་གི་ ཡ་རུ་ཤ་ལེམ་ག་མཆོད་ཁང་ ཆེད་ཇོང་མེ་དག་ཉི་གསུངས་མ༌ལ།
1ཉི་རོག་མཆོད་ཁང་གེ་ ཕིས་ཀ་བྱོན་མེ་གང་ཀ་ རོ་ཀ་སློ་མ་ཐུར་གི་ཞུ་ཝ་ལ་ སློབ་དཔོན་ ལུང་ཅེམ་པུ་ཅེམ་པུ་ཨ་ཝ་གི་ ཙིག་པ་གབ་ཉི་ མཆོད་ཁང་ ཧང་ག་ཅེམ་པུ་ཨ་ཉི་ ཅོད་པ་ལ་ཡ་ གཟིགས་ཅོ་ལེ་དག༌ཉི།
2ཡི་ཤུ་གི་ རོ་ཀ་གསུངས་མ་ལ་ ནཱན་གི་ ཨོ་ཐ་ཕའི་ཆི་ལུ་ཆི་ལུ་ཨ་ཝ་ ཐོང་ལ་སྨོ། ཨོ་ཐ་ཕའི་ག་བ་ཆེད་དི་ཉི་ ཐུར་གི་ཐུར་ག་ཐུང་ཀ་ ལུང་ཐུར་རང་མ་ལུས་པཱན་ རཝ་རི་ལེ་དག༌ཉི༎
ནང་དོག་ཉི་ དཀའ་ཝ་ཅཱད་པེ་ཁེ༌ལེ།
3ཉི་རོག་ མཆོད་ཁང་ཉ་ལོ་ཀ་ཆོ་ཁཱན་ ཨོ་ལིབ་ཤིང་ག་ ཕུ་ཐུང་ཀ་ལང་ཉི་ བཞུགས་པེ་གང་ཀ་ པ་ཏྲུས་དང་ཡ་ཀུབ་ ཉི་ཡུ་ཧན་ན་དང་ ཨན་དྲི་ཡཱས་ རོག་ཏེ་ཕིཤི་གི་ ཙང་ཀེན་ཨ་ཉི་ ཡི་ཤུ་ག་ཇི་མ༌ལ། 4ཨོ་ཐ་བ་ ཧ་ལ་ཇུང་མེ་གི་ལ་སྨོ་ ཨ་ཧ་གསུངས༌ཤོ། ཉི་ཨོ་ཐ་བ་ ཇུང་མེ་གི་ལ་ དག་པ་ཀབ་ཉི་ རྟགས་ཧང་ད་བུ་ཐུར་ ཨོ་ཕེ་ཡ་དག༌ཉི།
5ཉི་ཡི་ཤུ་གི་ རོག་ཏེ་བ་ཀ་ གསུངས་མེ་གོ་ཙུག་པ་ལ་ ན་ཧ་བ་ ཨི་བི་གི་རང་ མགུ་སྐོར་ཕི་ལེ་མར་བེ་དེན་གེ་ རིག་པ་སྒྲིམ༌ཅོ། 6ཧང་ཡ་དག་ནེ་ལ་ མང་པུ་ཐུར་གི་ ཇ་ག་མིང་ག་ཨུ་ཉི་ཡེག་པེ་ ཇང་རོག་གི་ལ་དག༌ཉི། ཉི་རོག་ཏེ་བ་ཀི་ མང་པུ་ཐུར་ ལམ་མང་གི་ཝ་གེ་ རིག༌པེ། 7ཉི་ཕྱད་མདའ་ཕི་ཝ་ག་ ན་ཐ་ཉི་ ཉི་ཨོམ་ཆང་རང་ ཕྱད་མདའ་ཕི་ན་དག་ཉི་ ཚང་ན་ཐ་ལ་ཀབ་ཉི་ ཡོང་མ་ཁེ། ཨུ་ཉུ་ད་བུ་ཤོ་ ཇུང་མེ་ཁེ༌ལེ། དག་པ་ཀབ་ཉི་ ཨོ་ཉ་ཐྲེ་ཀེ་རང་ བརྟན་པ་ལུ་ཕེ་མང་གི། 8མི་རིགས་ཐུར་གི་ཐུར་ཀབ་ཉི་ མ་ཆ་མཱན་ ཕྱད་མདའ་ཕི༌ལེ། ཉི་རྒྱལ་སྲིད་ཐུར་གི་ཐུར་ཀབ་ཉི་ ཕྱད་མདའ་ཕི༌ལེ། ཉི་ས་ཆ་མང་པུ་ཐུར་ག་ ན་ཀ་ཨོ་ཕེ། ཉི་ཟ་ལེ་ག་བུ་བེས༌པེ། ཨུ་ཐུ་ཤོ་ ཝག་ཙ་མ་སིང་མེ་གོ་མ་ དཀའ་ཝ་ཅཱད་པ་ད་བུ་ གོ་ཙུག་པ་ཐུར་ཤ་གི༌ལ།
9ན་ཧ་བ་ རང་ཏེན་རིག་པ་སྒྲིམ་པེ་ཁེ༌ལེ། ཧང་ཡ་དག་ནེ་ལ་ རོག་ཏེ་བ་ཀི་ ན་ཧ་བ་ ཚོགས་པ་བ་ཀ་གུབ་ཀ་ཀེ༌བེ། ཉི་ཆོས་འཛོམས་ནང་ཀ་ ཨ་ནེ་ལ་ལ་ཕེ། ཉི་ཇ་ག་ཡོར་ཀེ་ ན་ཧ་བ་ དཔོན་སློབ་དང་ དཔོན་བ་ཀ་གུབ་ཀ་བུ་ ཐིང་མེ་ཁེ༌ལེ། ཨུ་ཉུ་གང་ཀ་ ན་ཤི་ ཇ་ག་འཛོམས་དཔང་ ཨ་ལེ་ཁེ་ལེ་ན། 10ཉི་གོ་མ་རང་ འཐེན་ལེག་པུ་ཀོར་གེ་ རྒྱལ་ཁབ་ཐམས་ཅན་ག་ སོ་ངོ་བ་ཀ་བཤད་པེ་ཁེ༌ལེ། 11ཉི་ན་ཧ་བ་ཙུང་ཐཱན་ ཇི་མ་ཀབ་ཉི་ ཨ་ཤི་ ཧང་ཡེག་པེ་ཁེ་ལེ་གི་ས་དག་ཉི་ ཚ་གྱང་མ་ལང༌ཅོ། དག་པ་ཀབ་ཉི་ ཇི་མེ་གང་ཀ་ ཧང་གནང་མ་ཐུར་ཡེག༌ཅོ། ཧང་ཡ་དག་ནེ་ལ་ ཨུ་ཉུ་ཆཱས་ཨ་ཁཱན་ ནའི་མང་གི་ཝ་ དམ་པའི་ཐུགས་ཉིད་གི༌ལ།
12ཨ་ཏ་གི་བོ་ཉིང་ ཉི་བོ་ཉིང་གི་ཨ་ཏ་ ཤེ་ལེ་ག་ཙུག༌པེ། ཉི་ཨུ་ཉུ་པུརུས་ཀིན་ཨ་ཉི་ ཨ་པ་གི་ཝག་ཙ་བ་ ཤེ་ལེ་ག་ཙུག༌པེ། ཉི་ཝག་ཙ་གི་ ཕ་མ་ག་ངོ་ལོག་ཉི་ མ་ཟེས་པཱན་ ཤེ་ལེ་ག་ཙུག༌པེ། 13ན་ཧ་བ་ ཇ་ག་ཡོར་ཀེ་ ཐམས་ཅན་གི་ མ་ཟེས༌པ། དག་པ་ཀབ་ཉི་ ཨི་བི་རང་གི་ནེ་བུ་ ཇུ་ཀ་སག་པུ་ ཐེས་པེ་རེ་ཁཱན་གི་ ཐར་པ་ཉོང༌པེ༎
ཡོང་ཁེ་སི་སི་ཨ༌ཝ།
14ཉི་མེ་པ་ཕི་ཁཱན་ ཡོང་ཁེ་སི་སི་ཨ་ཝ་ ཆོ་ལེ་ག་མ་ཆོག་པ་བཱརང་ཀ་ ཐིང་མ་ཐོང་ནེ་ལ་ (ཨུ་ཐུ་ལྷག་ཁཱན་བ་ཀི་ ཧ་གོ་ལེ་ཁེ༌ལེ།) ཡ་ཧུ་དི་ཡ་ག་ཆོ་ཁཱན་བ་ ཕུ་ག་ཏཱན་གཱན་ཇོང་མེ་ཁེ༌ལེ། 15ཕའི་ཐུང་ཀ་ཆོ་ནེ་ལ་ དོང་ཞུན་ཐཱན་ ཧང་ཐུར་ཕ་ལེ་དེན་གེ་ ཕའི་ནང་ཀ་མ་ནུབ༌ཅོ། 16ཉི་ཨུང་ནང་ཀ་ཆོ་ནེ་ལ་ ཁ་མུང་ཕ་ལེ་དེན་གེ་ ལོག་ཉི་ཕའི་ག་མ་དི། 17ཉི་ཨུ་ཉུ་གང་ཀ་ ལུས་པུ་མ་ཉམ་པ་ཆོ་ཁཱན་ མེ་ཝག་ཙ་དང་ ཨ་མ་བ་ གནམ་མེད་ས་མེད་རང་ དཀའ་ཝ་ཅཱད༌པེ། 18ཨུ་ཉུ་ད་བུ་ ཏོན་ག་མ་ཇུང་ཆེན་ཨ་ཉི་ སྨོན་ལམ་ཞུའི། 19ཧང་ཡ་དག་ནེ་ལ་ ཨུ་ཉུ་གང་ཀ་ གནམ་མེད་ས་མེད་ དཀའ་ཝ་ཅཱད༌པེ། དཀོན་མཆོག་གི་ བཀོད་པ་གེ་ག་ཏཱན་ ཨོ་མ་སག་པུ་ ཨུ་ཉུ་ད་བུ་ ཧ་ལ་རང་ ཇུང་མ་མཱན༌ཅ། ཉི་ཨོ་ཉ་གེ་ག་ཏཱན་བུ་ ཧ་ལ་རང་མ་ཇུང༌མ། 20ཉི་དཀོན་མཆོག་གི་ ཨོ་ཉ་དུས་ཙུན་ཐུ་མུ་ཅོད་ཉི་ མ་གནང་ནེ་ལ་ སོ་ངོ་བ་ཐུར་རང་མ་ཝ་ ཐམས་ཅན་རང་ ཤི་ཉི་ཆུ༌མེ། དག་པ་ཀབ་ཉི་ རོ་ཀི་སི་ཁཱན་བ་ཀ་དེན་གེ་ རོ་ཀི་དུས་ཙུན་ ཐུ་མུ་ཅོད་ཉི་གནང༌མེ།
21ཉི་ཨི་བི་གི་རང་གི་ནེ་བུ་ ན་ག་ཏཱན་གོད་ཅོ་ལེ་ ཁིརིས་ཨོ་ཐ༌ཅ། གོད་ཅོ་ རོག་ཨ་ལེ་ལ་ལ་དག་ཉི་ ཡེག་ནེ་ལ་ ཏི་ངེ་རང་ལོ་མ་དི། 22ཧང་ཡ་དག་ནེ་ལ་ ཁིརིས་རྫུས་མ་བ་དང་ ལུང་བསྟན་པ་རྫུས་མ་བ་ མང་པུ་ཐུར་ཨུ་ཉི་ ཡིད་ཆི་ཝ་ག་ལའི་ཨ་ཉི་ རྟགས་གེན་ཉི་ མང་པུ་ཐུར་ག་ མགུ་སྐོར་ཕི༌ལེ། ཉི་རེན་ཐཱན་ཨ་ནེ་ལ་ སི་ཁཱན་བ་ཀ་བུ་ མགུ་སྐོར་ཕི་ལེ་གོད༌པེ། 23དག་པ་ཀབ་ཉི་ རིག་པ་སྒྲིམ༌ཅོ། ཇི་གི་ ན་ཧ་ཨུ་ཐུ་ད་བུ་ མ་ཇུང་མེ་གོ་མ་རང་ཡེག་པ་ན༎
སོ་ངོ་ག་ཟ་བྱོན་མེ་ཀོར༌གེ།
24ཉི་ཨུ་ཉུ་གང་ཀ་ དཀའ་ཝ་ཅཱད་ཉི་ཆུམ་དེན༌གེ་
ངམ་མེར་བུ་རི༌ལེ། ཉི་ལ་ཉི་ངམ་གེ་བུ་ འོད་ཟེར་མ་ཤོ༌ལ། 25ཉི་ངམ་ཐུང་ཀེ་དོང་ སྐར་མ་སྨིན་དྲུག་ག་བ་ ཞུད་པེ་གོ་ཙུག༌པེ། ཉི་ངམ་ཐུང་ཀ་ དབང་ཚད་ཙུང་ཉི་ ཆོ་ཁཱན་བ་དྲེང༌མེ།#13:24-25 ཡ་ཤའི་ཡ་ག་དཔེ་ཆ་ 13:10, 34:4
26ཉི་ཤ་ རོག་ཏེ་བ་ཀི་ སོ་ངོ་ག་ཟ་ དབང་དང་ གཟི་བརྗིད་ཀབ་ཉི་ མུག་པ་ཐུང་ཀ་ ཨོ་ཕ་ཐོང༌མེ། 27ཉི་འཛམ་གླིང་ ཀོ་ར་དུང་པ་ཨ་ཉི་ འཛམ་གླིང་ནབ་ཀེ་གོ་ཙུག་ཉི་ ཞིང་ཁམས་ནབ་ཀ་སག་པུ་ སི་ཁཱན་བ་དུས་པེ་དེན་གེ་ རོ་ཀི་ཞིང་ཁམས་ག་འཐེན་པ་བ་ ཀུན་ཏི༌ལེ༎
དཔེ་ལྕོག་མ་ཤིང་གེ་ལམ༌ཅོ།
28ཉི་དཔེ་ཨ་ནེ་ལ་ ལྕོག་མ་ཤིང་གེ་ལམ༌ཅོ། རོ་ཀ་ད་ཀ་བ་ཡེང་ལུ་རི་ཉི་ ཤ་བ་བ་ཉོམ་ཐུང་མ་ ཐོང་མ་ཀབ་ཉི་ ན་ཤི་བེར་རེན་པ་ལ་དག་ཉི་ སེན༌ཅ། 29ཉི་ཨོམ་ཆང་རང་ ཨུ་ཐུ་པུརུས་ཀིན་ཨ་ཉི་ ཨོ་ཐ་བ་ ཇུང་མ་ཐོང་མ་ཀབ་ཉི་ རོག་ར་ག་ཏེབ་ཉི་ ཀོ་ར་ག་ཤེག་པ་ལ་དག་ཉི་ སེ་ལེ་ཁེ༌ལེ། 30ཇི་གི་ ན་ཧ་ཐྲང་ཉི་ཡེག་པེ་ ཨུ་ཐུ་ད་བུ་ མ་ཇུང་མ་སག་པུ་ ཨོ་མ་ཆོ་ཁཱན་སོ་ངོ་བ་ མ་མུད༌པ། 31ཞིང་ཁམས་དང་ འཛམ་གླིང་ཡེ་ཉི་ཇོང༌མེ། དག་པ་ཀབ་ཉི་ ཇ་ག་ཆཱས་ག་བ་ ཏི་ངེ་རང་ ཡེ་ཉི་མ་ཇོང༌མ༎
ནོང་དང་དུས་ཙུན་ ཨི་བི་གི་རང་མ་སེ༌ལ།
32དག་པ་ཀབ་ཉི་ ཨོ་ཉ་ནོང་དང་ ཆུ་ཚོད་ཁེ་པ་ ཨི་བི་གི་རང་ མ་སེ༌ལ། ཞིང་ཁམས་ག་འཐེན་པ་གི་བུ་ མ་སེ༌ལ། ཟ་གི་བུ་ མ་སེ༌ལ། དག་པ་ཀབ་ཉི་ ཡབ་ཐུར་གི་ཤ་མཁྱེན༌མེ། 33རིག་པ་སྒྲིམ་ཉི་ ལེག་པ་ཨ་ཉི་གོད༌ཅོ། ཧང་ཡ་དག་ནེ་ལ་ ཨོ་ཉ་དུས་ ཧ་ལ་ཤེག་པེ་གི་ལ་སྨོ་ ཨོ་ཉ་ཀོར་གེ་ ན་ཤི་མ་སེ༌ལ།
34ཇང་ལོག་པ་ཀབ་ཉི་ དཔེ་ཨ་ནེ་ལ་ སོ་ངོ་ཐུར་གི་ རོ་ཀ་གཡོག་པ་བ་ཀ་ རང་རང་ས་ལའི་བི་ཉི་ རྩིས་སྤྲོད་ཐཱན་ མ་ཀོ་ཁུང་ཁཱན་ག་ ལེག་པ་ཨ་ཉི་ གོད་ཅོ་ན་དག་ཉི་ ཡེག་ཐཱན་ རོ་ཀ་ཕའི་ཐུབ་ཐ་ཉི་ ས་ལོག་ཐུར་ག་ དི་ཝ་ད་བུ་ཐུར་གི༌ལ། 35ལེག་པ་ཨ་ཉི་གོད༌ཅོ། ཧང་ཡ་དག་ནེ་ལ་ ཡོན་ད་ ཧ་ལ་ལོག་པེ་གི་ལ་སྨོ་ ན་ཤི་མ་སེ༌ལ། ཡང་ན་ལ་ ངེ་རི་ལོག་ཏུ་ ཡང་ན་ལ་ བི་ནང་དོ་ག་ལོག་ཏུ་ ཡང་ན་ལ་ གོ་ག་ཇིག་པ་ཀབ་ཉི་ལོག་ཏུ། ཉི་ཨུ་ཉུ་མ་ནེ་ལ་ ཝུན་བེད་པེ་ཏེ་ལོག་ཏུ། 36རོག་ ཡིད་ཀ་རྣམ་ཏོག་མ་ཝ་ ཤོ་ཉི་ཨོ་ཕ་ཀབ་ཉི་ ན་ཧ་བ་ ཡིབ་ཉི་ཆོ་ཝ་ཏེ་བུ་ཁྲབ་ཏུ། 37ཉི་ཇི་གི་ ན་ཧ་ཧང་ཡེག་པ་སྨོ་ ཇི་གི་བཱརའ་ ཐམས་ཅན་ག་དེན་གེ་བུ་ ཨོ་ཉེ་རང་ཡེག༌ཅ། རིག་པ་སྒྲིམ་ཉི་གོད་ཅོ་དག་ཉི་ གསུངས་མ༌ལ༎
Currently Selected:
མར་ཀུས། 13: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
