ལུ་ཀ། 14
14
ཡི་ཤུ་ཕ་རི་སི་པ་ཕའི་ག།
1དུས་བཟང་ག་ནོང་ཀ་ ཡི་ཤུ་ ཕ་རི་སི་པ་ག་ འགོ་དཔོན་ཐུར་ག་ཕའི་ག་ གསོལཝ་བཞེས་ལེ་ག་ བྱོན་མེ་གང་ཀ་ རོག་ཏེ་བ་ཀི་ རོ་ཀི་ ཧང་མཛད་ལ་སྨོ་ ན་ཐེན་གོད་ཅ་གི་ཝ༌ལ། 2ཉི་ཨོ་ཉ་ རོ་ཀ་སྐུན་མདུན་ག་ ལུས་པུ་ཕུང་མ་ཨ་ཝ་ སོ་ངོ་ཐུར་ཅ་གི་ཝ༌ལ། 3ཉི་ཡི་ཤུ་གི་ བཀའ་ཁྲིམས་ག་ སློབ་དཔོན་དང་ ཕ་རི་སི་པ་བ་ཀ་ དུས་བཟང་ག་ནོང་ཀ་ ན་ཚ་དྲག་རིན་ཆོག་པེ་སྨོ་ མ་ཆོག་པ་ཡ་དག་ཉི་ ཇི་མ༌ལ། 4དག་པ་ཀབ་ཉི་ རོག་ཏེ་བ་ ཙང་ཀེན་ཨ་ཉི་ ཆོ་ཝ༌ལ། ཉི་རོ་ཀི་ ཨོ་ཉ་སོ་ངོ་བསྣམས་ཐཱན་ དྲག་ཉི་ཀུན་ཏི་ཝ༌ལ། 5ཉི་རོ་ཀི་ རོག་ཏེ་བ་ཀ་ གསུངས་མ་ལ་ ན་ཧ་ཝག་ཙ་ ཡང་ན་ལ་ཏོ་ཀ་ཐུར་ རོ་ཁེ་ཁེ་ཉི་ ཧོང་ཀང་ནང་ཀ་ ནུ་ཕ་ཆོ་ནེ་ལ་ ཨོ་ཉ་ཐྲེ་ཀེ་རང་ ག་ཤོ་ལེ་མང་གི་ཝ་ དུས་བཟང་ག་ནོང་གི་ལ་ཨ་ཉི་ ཐུབ་ཐ་ལེ་སྨོ་དག༌ཉི། 6རོག་ཏེ་བ་ཀི་ ཨོ་ཐ་ག་ལན་ ཞུ་ལེ་མར་བ༌ལ༎
ཉམ་ཆུང་ཨ་ཉི་ཆོ་ཉི་ བཱརའ་ག་ ལེག་པུ་ཨའི།
7ཉི་ཨོམ་ ཨོ་ཉ་ག་བཞུགས་ཁཱན་ ཤི་མིན་བ་ཀི་ རྐང་ཁྲི་ལེག་པུ་ཨ་ཝ་བ་ སི་ཝ་ག་མཁྱེན་ཉི་ ཡི་ཤུ་གི་ རོག་ཏེ་བ་ཀ་ དཔེ་གཏམ་ག་ཐུང་ཀེ་ཨ་ཉི་ གསུངས་མ༌ལ། 8གཉེན་ཕི་ས་ག་ ནའི་ཤི་མིན་ཨ་ཉི་ ར་ནེ་ལ་ རྐང་ཁྲི་ལེག་པུ་ག་ ལང་མེ་མ་གོད༌ཅོ། ནཱན་གེ་ཆི་ལུ་ཆོ་ཁཱན་ སོ་ངོ་ཐུར་ར་ཝ་ཏེ་ཆོ་དུ། 9ཉི་ཨོ་མེ་ ན་ཆིང་ར་ཁཱན་ སྦྱིན་བདག་ཨུན་ཐཱན་ རོ་ཀི་ན་ག་ཨོ་ཐ་རྐང་ཁྲི་ རོ་ཀ་བི་དག་ཉི་ ཡེག་པ་ཀབ་ཉི་ ནཱན་ས་ག་ལང་མེ་ཁེ་ཉི་ ངི་ནང་ཁུ་དུ་ན།
10ཉི་ཏ་ ནའི་ར་ལ་ཀབ་ཉི་ དོང་ཇུ་ཀ་དི་ཉི་ལང༌ཤོ། ཉི་ནཱན་ར་ཁཱན་ སྦྱིན་བདག་ཨུན་ཐཱན་ རོ་ཀི་ན་ག་ ཇ་རོ་ཐོ་ལ་གུབ་ཀ་ བྱོན་ཤོ་དག་ཉི་ཡེག་ཉི་ ཤི་མིན་ཐམས་ཅན་ག་གུབ་ཀ་ གུས་ཞབས་ཉོང༌པེ། 11ཧང་ཡ་དག་ནེ་ལ་ རོག་ཏེན་ཐོན་པེ་གོད་ཁཱན་ ཨི་བི་རང་གི་ནེ་བུ་ ཉམ་ཆུང་རི༌ལེ། ཉི་རོག་ཏེན་ཉམ་ཆུང་ཨ་ཉི་ ཆོ་ལེ་གོད་ཁཱན་བ་ ཐོན་པེ་དག༌ཉི།
12ཉི་རོག་ཞུ་ཁཱན་ སོ་ངོ་ག་བུ་ ཡི་ཤུ་གི་གསུངས་མ་ལ་ ནཱན་གི་ ངེ་རི་ག་ལྟོ་ ཡང་ན་ལ་ མཛར་ཅུམ་བི་ལ་ཀབ་ཉི་ ན་ག་ཇ་རོ་དང་ ན་ག་ཡུང་ཟི་བ་ ཉི་ན་ག་ཉེ་ཝ་ཐུང་མ་དང་ བེ་དིང་ཆོ་ཁཱན་ ནོག་མིན་བ་མ་རའི། ཧང་ཡ་དག་ནེ་ལ་ རོག་ཏེ་བ་ཀི་བུ་ ནཱན་ར་ཉི་ལོག་ཉི་ ཚ་མང་ཏ༌པེ། 13དག་པ་ཀབ་ཉི་ ནཱན་གི་ མཛར་ཅུམ་བི་ལ་ཀབ་ཉི་ དུག་པུ་དང་ དབང་པོ་མ་ཚང་ཁཱན་ ཉི་ཁོ་ར་དང་ མིང་ཀ་ན་བ་ར་ནེ་ལ་ ནཱན་གི་ བྱིན་རླབས་ཉོང༌པེ། 14ཧང་ཡ་དག་ནེ་ལ་ རོག་ཏེ་བ་ཀི་ ན་ག་ཚ་མང་ཏ་པེ་མར༌བ། ཉི་དྲང་པུ་བ་ལོག་ཉི་ གསོན་པོ་ཨ་ཉི་ ཝུ་ལ་ཀབ་ཉི་ ནཱན་གི་ལོག་ཉི་ཚ་མང་ དཀོན་མཆོག་གེ་ ཉོང་པེ་དག༌ཉི༎
མཛར་ཅུམ་ཆི་ལུ་ག་དཔེ་གཏམ།
15ཉི་རོག་ཀབ་ཉི་ ཟ་ལེ་ག་ ཏབ་ཐུར་ལང་ཁཱན་ཐུར་གི་ ཨོ་ཐ་ཀོར་གེ་ ན་ཐ་ཉི་ ཞུ་ཝ་ལ་ དཀོན་མཆོག་ག་རྒྱལ་སྲིད་ག་ ཟ་ལེ་ཉོང་ཁཱན་བ་ ཧབ་ཏུར་ ཤོ་ནང་ཕེ་ལེ་ཡ་དག༌ཉི།
16དག་པ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ཤེབ་ཐུར་ སོ་ངོ་ཐུར་གི་ མཛར་ཅུམ་ཆི་ལུ་ཐུར་བི་ཉི་ སོ་ངོ་མང་པུ་ཐུར་ ར་ཝ༌ལ། 17ཉི་མཛར་ཅུམ་ཟ་ལེ་ག་ དུས་ཙུན་རེན་ཏེན་གེ་ རོ་ཀི་ར་ཁཱན་ ཤི་མིན་བ་ཀ་ ཡ་ཨོམ་ ཧང་རང་ཚུད་པ་ ཨོ་དོ་དག་ཉི་ཡེག་པེ་ག་ རོ་ཀི་ རོ་ཀ་གཡོག་པ་ ཀུན་ཏི་ཝ༌ལ། 18དག་པ་ཀབ་ཉི་ རོག་ཏེ་ཐམས་ཅན་གི་ པུརུས་ཀིན་ཨ་ཉི་ ཨོ་ཕེ་མ་ཆིན་མ་དག་ཉི་ ཡེག་པེ་གོ་ཙུག་པ༌ལ། གོ་མ་ར་ཁཱན་གི་ རོ་ཀ་ཡེག་པ་ལ་ ཇི་གི་ས་ངོ་ཝ་ཅ་ ཉི་ཇང་དིན་ཐཱན་ གོད་པེ་ཁེ༌ལེ། ཇི་གི་ ན་ག་ལ་སོ་སྐུ་ཆེན་ཨན་ཅ་ ཇང་ཨོ་ཕེ་མ་ཆིན་མ་དག༌ཉི། 19ཉི་ཨོམ་ཐུར་གི་ ཡེག་པ་ལ་ ཇི་གི་ ཏོ་ཀ་དུ་ལྔ་ངོ་ཝ་ཅ་ ཉི་ཇང་ཏོ་ཀ་བ་ ཧང་ད་བུ་ལ་སྨོ་ གོད་པེ་དིན༌ཅ། ཨོ་ཉི་ཨ་དེན་གེ་ ཇི་གི་ ན་ག་ལ་སོ་སྐུ་ཆེན་ཨན་ཅ་ ཇང་ཨོ་ཕེ་མ་ཆིན་མ་དག༌ཉི། 20ཉི་ཨོམ་ཐུར་གི་ ཡེག་པ་ལ་ ཇང་གཉེན་ཕི་ཉི་ ཆུ་མ་ཐུར་ཤ་གི༌ལ། ཨོ་ཉི་ཨ་དེན་གེ་ ཇང་ཨོ་ཕེ་མར་བེ་ལ་དག༌ཉི།
21ཉི་གཡོག་པ་ལོག་ཐཱན་ ཨོ་ཐ་ཀོར་གེ་ རོ་ཀ་སྦྱིན་བདག་ག་ཞུ་ཝ༌ལ། ཉི་སྦྱིན་བདག་ རོ་ཙིག་ཉི་ རོ་ཀ་གཡོག་པ་ག་ཡེག་པ་ལ་ དོ་ཟོ་དོ་ཟོ་དིན་ཐཱན་ གཞུང་ལམ་ཁོན་དང་ ཁྲོམ་ག་ལམ་ཙུ་ཕུ་ཁོན་ཆོ་ཁཱན་ དུག་པུ་དང་ དབང་པོ་མ་ཚང་ཁཱན་ ཉི་ཁོ་ར་དང་ མིང་ཀ་ན་བ་ རིག་ཉི་ཕའི་དག༌ཉི། 22ཉི་གཡོག་པ་གི་ཞུ་ཝ་ལ་ སྦྱིན་བདག་ ནཱན་གི་ བཀའ་གནང་ཁཱན་ཁེ་པ་ཨ༌ཝ། ཨོ་ཉེ་རང་གི་ནེ་བུ་ ཕའི་མ་ཕུང་མ་ཅ་དག༌ཉི། 23ཉི་སྦྱིན་བདག་གི་ གཡོག་པ་ག་ཡེག་པ་ལ་ མ་ལམ་དང་ གུར་ཅི་ནང་ཀ་ནུབ་ཁཱན་ ལམ་ཁོན་དིན་ཐཱན་ ཇ་ག་ཕའི་ཕུང་མེ་དེན་གེ་ སོ་ངོ་བ་ ཐབ་རང་མ་ཝ་ ནང་ཀ་ཨོ་ཕེ་ན་ཝ་ ཅོད་ཅོ་དག༌ཉི། 24ཇི་གི་ ན་ག་ཡེག་པེ་ ར་ཁཱན་སོ་ངོ་ཐུར་གི་བུ་ ཇ་ག་མཛར་ཅུམ་ ཟ་ལེ་མ་ཉོང་པ་དག་ཉི་ གསུངས་མ༌ལ༎
སློ་མ་ཨ་ཝ་ག་ངེ་ལོང་།
25ཉི་ཨོམ་ སོ་ངོ་མང་པུ་ཐུར་ རོ་ཀ་ཞབས་ཏོག་ཞུ་ཉི་ ཨུན་ཅ་གི་ཝ༌ལ། ཉི་རོ་ཀི་གིར་ཐཱན་ སོ་ངོ་བ་ཀ་གསུངས་མ་ལ་ 26ཨི་བི་གི་རང་གི་ནེ་བུ་ ཇང་ཆོ་ས་ཨུ་ཁཱན་གི་ རོག་ཏེན་ག་ ཨ་པ་དང་ཨ་མ་ ཉི་མེ་ཝག་ཙ་དང་ཝག་ཙ་ ཉི་ཡུང་ཟི་བ་ ཨུ་ཉུ་མ་ཚཱད་པ་ རོག་ཏེན་ག་ སྲོག་གེ་བུ་ལག་པ་ ཇང་མ་ཕང་ནེ་ལ་ ཇ་ག་སློ་མ་ཨ་ལེ་མར༌བ། 27ཉི་ཨི་བི་གི་རང་གི་ནེ་བུ་ རོ་ཀ་ཁྲིམས་ཤིང་བང་ཐཱན་ ཇ་ག་ཕྱག་ཞུ་ཉི་ མ་ཨུ་ནེ་ལ་ ཇ་ག་སློ་མ་ཨ་ལེ་མར༌བ།
28ཕའི་ཆི་ལུ་ཐུར་ཅོད་པེ་ག་ སེམས་ཆོ་ཁཱན་ ནའི་ཨི་བི་གི་ གོ་མ་རང་ལང་ཐཱན་ ཕའི་འགྲུབ་ཕེ་རེ་བེ་ག་ ཏི་རུ་ལ་སྨོ་མ་ལ་སྨོ་ དྲང་ཨ་ཉི་མ་གོད་པ་ཡ། 29ཨུ་ཉུ་མ་ནེ་ལ་ ཕའི་རྨང་ཤོ་ཆེན་ཐཱན་ འགྲུབ་ཕེ་མར་ནེ་ལ་ ཨོ་ཉ་ཕའི་ཐོང་ཁཱན་ ཐམས་ཅན་གི་ རོ་ཀ་གོད་ཉི་ངར༌བེ། 30རོག་ཏེ་བ་ཀི་ཡེག་པེ་ ཨོ་ཐ་སོ་ངོ་གི་ ཕའི་ཅོད་པེ་ག་ གོ་ཙུག༌པ། དག་པ་ཀབ་ཉི་ འགྲུབ་ཕེ་མར་ཤི་དག༌ཉི།
31ཨུ་ཉུ་པུརུས་ཀིན་ཨ་ཉི་ དཔོན་ཐུར་གི་ བཱརའ་ཀབ་ཉི་ ཕྱད་མདའ་མ་ཕི་ལེ་གོ་མ་ གོ་མ་རང་ལང་ཐཱན་ ཉ་ལོ་ཀ་དམག་མི་ 20000 གི་ རོག་ཀབ་ཉི་ ཕྱད་མདའ་ཕི་ལེ་ཕ་ནེ་ལ་ རོ་ཀ་དམག་མི་ 10000 གི་ དགྲ་དོག་པེ་ རེ་བེ་སྨོ་མར་བ་སྨོ་ ཨོ་ཉ་ཀོར་གེ་ སེམས་མི་ཉི་ མ་གོད་པ་སྨོ། 32མར་བེ་ཆོ་ནེ་ལ་ ཨོམ་ཐུར་དཔོན་ག་ དམག་མི་བ་ ལམ་རིང་མུ་ག་ ཆོ་ལེ་གང་ཀ་རང་ ཆམ་ཁེ་དག་ཉི་ ཡེག་པེ་དེན་གེ་ རོ་ཀ་སྐུ་ཚབ་ཀུན་ཏི༌ལེ། 33ཨུ་ཉུ་པུརུས་ཀིན་ཨ་ཉི་ ནའི་ ཨི་བི་རང་གི་ནེ་བུ་ རོ་ཀ་ཆོ་ཁཱན་ཐམས་ཅན་ སྤང་མེ་མར་ནེ་ལ་ ཇ་ག་སློ་མ་ ཨ་ལེ་མར༌བ།
34ཨིན་ཆ་ལེག་པུ་གི༌ལ། དག་པ་ཀབ་ཉི་ ཨིན་ཆ་ག་བོརོ་ མ་ཝ་རི་ནེ་ལ་ ཨིན་ཆ་ག་བོརོ་ཆོ་ཝ་ག་ ཧང་ཏེན་ཅོད་པེ་རེ་བེ་ཡ། 35ཉི་ས་ག་བུ་མ་ཕཱན་མ་ ཉི་ཁི་ཅོད་པེ་བུ་ མ་ན་ཝ་ཨ་དེན་གེ་ སོ་ངོ་བ་ཀི་ གེམ་ཀུན་ཏིན༌ཅ། ཨི་བི་ག་ ཉཱན་པེ་ག་ན་ཅ་གི་ལ་སྨོ་ ཨོ་ཉ་སོ་ངོ་གི་ ཉཱན་ཅེན་དག་ཉི་ གསུངས་མ༌ལ༎
Currently Selected:
ལུ་ཀ། 14: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
