ལུ་ཀ། 15
15
གེམ་ཁཱན་ཤི་ཤ་ག་ དཔེ་གཏམ།
1ཉི་ཨོམ་ ཁྲལ་ཐེབ་དུས་ཁཱན་དང་ སྡིག་ཅན་བ་ ཐམས་ཅན་རང་ རོ་ཀི་གསུངས་ཁཱན་ག་ ཉཱན་པེ་དེན་གེ་ རོ་ཀ་ར་ག་ཏེམ་ཉི་ ཕཱན་ཅ་གི་ཝ༌ལ། 2ཉི་ཕ་རི་སི་པ་དང་ བཀའ་ཁྲིམས་ག་ སློབ་དཔོན་བ་ཀི་ བེརེག་ཏོང་ཇིག་ཉི་ ཡེག་པ་ལ་ ཨོ་ཐ་སོ་ངོ་གི་ སྡིག་ཅན་བ་ ཨོ་ཕེ་བི་ཉི་ སྡིག་ཅན་བ་ཀབ་ཉི་ ཟ་ན་དག༌ཉི།
3ཉི་རོ་ཀི་ རོག་ཏེ་བ་ཀ་ དཔེ་གཏམ་ གསུངས་མ༌ལ། 4ན་ཧ་ཤི་ཤ་ 100 ག་པོང་ཀེ་ ཤི་ཤ་ཐུར་ གེ་མ་ད་བུ་ཨ་ནེ་ལ་ ཧང་ཤི་ཤ་ 99 བོ་རང་ག་ ཐུབ་ཐཱན་ཐཱན་ ཨོ་ཉ་ཤི་ཤ་ གེམ་ཁཱན་ཁེ་པ་ མ་ཐོང་མ་སག་པུ་ མ་ལ་མ་སྨོ། 5ཉི་ཨོ་ཉ་ཤི་ཤ་ཐོང་དེན་གེ་ རོག་ཤོ་ནང་ཕེ་ཉི་ རོ་ཀ་ཕང་མ་ཐུང་ཀ་ཀེ་ཉི་ 6ཉི་རོག་ ཕའི་ག་ཤེག་ཏེན་གེ་ ཇ་རོ་དང་ ནོག་མིན་ཆེ་ནང་བ་ རཱན་ཐཱན་ ཇ་ག་ཤི་ཤ་གེམ་ཁཱན་ཁེ་པ་ ཐོང༌མ། ཨོ་ཉི་ཨ་དེན་གེ་ ཇང་ཀབ་ཉི་ སྤྲོ་བ་ཙི་ཁེ་དག་ཉི་ ཡེག༌པེ། 7ཇི་གི་ ན་ཧ་ཡེག་པེ་ ཨུ་ཉུ་པུརུས་ཀིན་ཨ་ཉི་ སྡིག་པ་གེ་ ལོག་པེ་མ་ཁེ་ཁཱན་ སོ་ངོ་དྲང་པུ་ 99 གེ་ལག་པ་ སྡིག་ཅན་སོ་ངོ་ཐུར་གི་ སྡིག་པ་གེ་ ལོག་པ་ཀབ་ཉི་ ཞིང་ཁམས་ག་ སྤྲོ་བ་ཆི་ལུ་ཙིན་ཅ་དག་ཉི་ གསུངས་མ༌ལ༎
དངུལ་ག་བེ་ཏྲང་ གེ་མ་ག་དཔེ་གཏམ།
8ཉི་དངུལ་ག་བེ་ཏྲང་ སེ་ཆོ་ཁཱན་ མེ་ཝག་ཙ་ཐུར་ག་ བེ་ཏྲང་ཐུར་ གེ་མ་ད་བུ་ཨ་ནེ་ལ་ ཧང་ རོ་ཀི་མི་ཐོག་ཐཱན་ བཱརང་ཕག་ཉི་ མ་ཐོང་མ་སག་པུ་ ལེག་པ་ཨ་ཉི་ མ་ལ་མ་སྨོ། 9ཉི་ཐོང་དེན་གེ་ རོ་ཀི་ རོ་ཀ་ཇ་རོ་དང་ ནོག་མིན་བ་ ཏབ་ཐུར་རཱན་ཐཱན་ ཇ་ག་དངུལ་ག་བེ་ཏྲང་ གེམ་ཁཱན་ཁེ་པ་ ལོག་ཉི་ཐོང༌མ། ཨོ་ཉི་ཨ་དེན་གེ ཇང་ཀབ་ཉི་ སྤྲོ་བ་ཙི་ཉི་ཆོའི་དག་ཉི་ ཡེག༌པེ། 10ཇི་གི་ ན་ཧ་ཡེག་པེ་ ཨུ་ཉུ་པུརུས་ཀིན་ཨ་ཉི་ སྡིག་ཅན་ཐུར་ སྡིག་པ་གེ་ ལོག་པ་ཀབ་ཉི་ དཀོན་མཆོག་ག་ ཞིང་ཁམས་ག་འཐེན་པ་བ་ སྤྲོ་བ་ཙིན་ཅ་དག་ཉི་ གསུངས་མ༌ལ༎
ཟ་གེམ་ཁཱན་ག་དཔེ་གཏམ།
11ཉི་ཡི་ཤུ་གི་གསུངས་མ་ལ་ སོ་ངོ་ཐུར་ག་ ཟ་ཉིག་ཙིང་ཆོ་ཝ༌ལ། 12ཉི་ཟ་ཐུང་སི་ཁེན་གི་ ཨ་པ་ག་ ཨ་པ་ ཇི་གི་ཉོང་པེ་ཁེ་ཁཱན་ ཅ་ལ་བ་ གེ་དག་ཉི་ཡེག་ཉི་ ཨ་པ་གི་ རོག་ཉིག་ཙིང་ག་བར་ཀ་ བོང་ཉི་བི་ཝ༌ལ།
13ཉི་ནོང་ཉིག་ཙིང་སམ་ཕང་ག་ཚི་ངེ་ ཟ་ཐུང་སི་གི་ རོ་ཀ་ནོ་ཙང་ ཐམས་ཅན་རང་དུས་ཐཱན་ ཐ་རིང་ས་ག་ཆོ་ཁཱན་ རྒྱལ་ཁབ་ཐུར་ག་ཏཱན་ དི་ཝ༌ལ། ཉི་ལེ་ལ་ག་ རོ་ཀི་ རོ་ཀ་ཅ་ལ་བ་ ཧང་རང་མང་གི་ཝ་ཨ་ཉི་ ཆུ་མ༌ལ། 14ཉི་རོ་ཀ་ཆོ་ཁཱན་ ཐམས་ཅན་རང་ ཆུམ་དེན་གེ་ ཨོ་ཉ་རྒྱལ་ཁབ་ག་ གནམ་མེད་ས་མེད་ བེས་པེ་གོ་ཙུག་པ༌ལ། རོ་ཀ་ཧང་རང་མ་ཝ་རི་ཉི་ ནང་དོག་པེ་ གོ་ཙུག་པ༌ལ། 15ཨོ་ཉི་ཨ་དེན་གེ་ རོག་ ཨོ་ཉ་རྒྱལ་ཁབ་ག་ མི་ཁུངས་ཆོ་ཁཱན་ སོ་ངོ་ཐུར་ག་ཉ་དི་ཉི་ ཉི་ཨོ་ཉ་སོ་ངོ་གི་ རོ་ཀ་ཨུང་ནང་ཀ་ ཕག་པ་གོད་པེ་ག་ ཀུན་ཏི་ཝ༌ལ། 16ཉི་རོ་ཀ་ ཨི་བི་གི་རང་ ཧང་རང་མ་བི་ཝ་ཨ་དེན་གེ་ ཕག་པ་གི་ཟ་ཁཱན་ ཨོ་ཉ་ཕག་པ་ག་ལྟོ་ཆང་ ཟ་ལེ་ག་ སེམས་ཨ་ཝ༌ལ།
17ཉི་ཇུ་ཀ་དག་པ་ཀབ་ཉི་ རོག་དྲཱན་མ་ཏག་ཉི་ རོ་ཀི་ རོག་ཏེན་ག་ ཡེག་པ་ལ་ ཇ་ག་ཨ་པ་ག་ཕའི་ག་ གཡོག་ཨ་ཁཱན་ཉི་པ་ མང་པུ་ཐུར་ཆོ་ནེ་ཆང་ ཇོབ་ཇོབ་ཨ་ཉི་ ཟ་ལེ་ལང་པ་ག་ ཟཱན་ཇམ་བ་ཅ་ ཉི་ལཱན་ཇུ་བུ་ལུས༌ཅ། དག་པ་ཀབ་ཉི་ ཇང་ཐ་ག་བི་ནང་ཁུ་ཉི་ ཇཝ་ཆུམ་ལ་ཨོམ། 18ཇང་ཐ་གེ་ཐིང་ཐཱན་ ཇ་ག་ཨ་པ་ག་བཱརང་ཀ་དི་ཉི་ ཨ་པ་ག་ ཇི་གི་ཞིང་ཁམས་ག་ དཀོན་མཆོག་དང་ ན་ག་ཏཱན་མ་ལེག་པ་ཨ་ཉི་ སྡིག་པ་ཨ་ཝ༌ལ། 19ཉི་ཨོམ་ ཇང་ ན་ག་ཟ་ཨ་ཉི་ ར་ལེ་ག་མ་རུང་པ་རི་ཉི་ ཆུ་མ་ཨ་དེན་གེ་ ཇང་ན་ག་གཡོག་ཨ་ཁཱན་ ཉི་པ་ད་བུ་ཐུར་ཨ་ཉི་ཙི་དག་ཉི་ ཡེག་པེ་ཁེ་ལེ་ལ་ཨ༌ཉི།
20ཉི་རོག་ཝུན་ཐཱན་ ཨ་པ་ག་བཱརང་ཀ་ཏཱན་ ལོག་པ༌ལ། ཉི་རོག་ ཨ་པ་ག་ཕའི་གེ་ ལམ་ཐ་ཇང་ཀིན་ག་ ཆོ་ལེ་གང་ཀ་རང་ ཨ་པ་གི་ རོག་ཐོང་ཉི་ སྙིང་རྗེ་ཨ་ལེ་ཨུ་ཉི་ ཇུག་ཉི་རང་དིན་ཐཱན་ ཕང་མ་གེ་ཀོམ་ཉི་ ཅུབ་ཨ་ཝ༌ལ། 21ཉི་ཟ་གི་ ཨ་པ་ག་ཡེག་པ་ལ་ ཨ་པ་ ཇི་གི་ ཞིང་ཁམས་ག་ དཀོན་མཆོག་དང་ ན་ག་ཏཱན་མ་ལེག་པ་ཨ་ཉི་ སྡིག་པ་ཨ༌ཝ། ཨོ་ཉི་ཨ་དེན་གེ་ ཇང་ ན་ག་ཟ་ཨ་ཉི་ ར་ལེ་ག་ མ་རུང་པ་རི་ཉི་ ཆུ་མ་དག༌ཉི།
22དག་པ་ཀབ་ཉི་ ཨ་པ་གི་ རོ་ཀ་གཡོག་པ་བ་ཀ་ ཡེག་པ་ལ་ དོ་ཟོ་ཨ་ཉི་ གོས་ཆེན་ཁ་མུང་ཁེ་པ་ ཕཱན་ཐཱན་ རོ་ཀ་ཡེ་ཉི་བི། ཉི་རོ་ཀ་ག་དང་བུརུ་མ་ག་ ཚེ་དུམ་ཚོ་ཉི་བི་ ཉི་རོ་ཀ་བི་ག་ བི་དར་ཙུག་ཉི་བི། 23ཉམ་ཆོ་ཁཱན་ཏོ་ཀ་ཁེ་པ་ ཕཱན་ཐཱན་ཤེ། ཉི་ཨ་ཧ་བ་ ཨོ་ཉ་ཏོ་ཀ་ག་ཤ་ངམ་ཉི་ དགའ་སྤྲོ་ཙི་ཁེ། 24ཧང་ཡ་དག་ནེ་ལ་ ཇ་ག་ ཨོ་ཐ་ཟ་ ཤི་ཝ་ཆོ་ཝ་ ཉི་ལོག་ཉི་ཝུ༌ཝ། རོག་གེ་མ་ཆོ་ཝ་ ལོག་ཉི་ཐོང་མ་དག་ཉི་ ཡེག་པ༌ལ། ཉི་རོག་ཏེ་བ་ དགའ་སྤྲོ་ཙི་ལེ་ གོ་ཙུག་པ༌ལ།
25ཉི་ཟ་ཆི་ལུ་ཤོ་ ཨུང་ནང་ཀ་ཅ་གི་ཝ༌ལ། ཉི་རོག་ ཕའི་ར་ག་ ཤེག་པ་ཀབ་ཉི་ སྙན་ཆ་ཏྲོག་ཉི་ ངང་བོརོ་ཇོང་མ་ག་ ན་ཐ་ཝ༌ལ། 26ཉི་རོ་ཀི་ གཡོག་པ་ཐུར་ རཱན་ཐཱན་ ཐ་ག་ ཧང་ཨན་ཅ་ཡ་དག་ཉི་ ཇི་མ༌ལ། 27ཉི་གཡོག་པ་གི་ རོ་ཀ་ཡེག་པ་ལ་ ན་ག་བོ་ཉིང་ ལོག་ཉི་ཤེག་པ༌ཅ། ཉི་རོག་ ལེག་པ་ཨ་ཉི་རང་ ཤེག་པ་ཨ་དེན་གེ་ ན་ག་ཨ་པ་གི་ ཉམ་ཆོ་ཁཱན་ ཏོ་ཀ་ཁེ་པ་ཤེ་ཝ་དག༌ཉི།
28ཨུ་ཉུ་ད་བུ་ ན་ཐ་ལ་ཀབ་ཉི་ རོག་ རོ་ཙིག་ཉི་ ནང་ཀ་དི་ལེ་མ་ན་ཝ༌ལ། ཉི་རོ་ཀ་ཨ་པ་ཕིས་ཀ་ཨུ་ཉི་ ནཱན་ནང་ཀ་ཨོ་དོ་དག་ཉི་ ཡེག་པ༌ལ། 29དག་པ་ཀབ་ཉི་ རོ་ཀི་ རོ་ཀ་ཨ་པ་ག་ ཡེག་པ་ལ་ ཡ་ ཉིང་ཨོབ་ཏུར་སག་པུ་ ཇི་གི་ ན་ག་ཕྱག་ཞུ་ཝ་ ཉི་ཇི་གི་ ནཱན་གི་ ཧང་ཡེག་པ་ཐུར་ཨ༌ཝ། ཨོ་ཉེ་རང་གི་ནེ་བུ་ ཇ་ག་ཇ་རོ་བ་ཀབ་ཉི་ སྤྲོ་བ་ཙི་ལེ་དེན་གེ་ ནཱན་གི་ ཇ་ག་ ར་བ་ད་ཟ་ཐུར་རང་མ་གཱན་ཤི། 30དག་པ་ཀབ་ཉི་ ན་ག་ཨོ་ཐ་ཟ་གི་ ན་ག་ནོ་ཙང་བ་ བཀྲ་མ་ཤིག་པ་ཨ་ཉི་རང་ཆུ༌མ། ཉི་ཨོམ་ རོག་ལོག་ཉི་ ཕའི་ག་ཤེག་ཏེན་གེ་ ནཱན་གི་ རོ་ཀ་དེན་གེ་ ཉམ་ཆོ་ཁཱན་ཏོ་ཀ་རང་ཤེ་ཉི་ ང་མེ་རིག་པ་དག༌ཉི།
31ཉི་ཨ་པ་གི་ རོ་ཀ་ཡེག་པ་ལ་ ཟ་ ནཱན་ཤོ་ ཏ་བུ་རང་ ཇང་ཀབ་ཉི་རང༌ཅ། ཉི་ཇ་ག་ཆོ་ཁཱན་ ཐམས་ཅན་རང་ ན་ག་གི༌ལ། 32ཉི་ཤོ་ནང་ཕེ་ཉི་ དགའ་སྤྲོ་ཙི་ལེ་ག་ མ་ལེག་པ་མང་གི། ཧང་ཡ་དག་ནེ་ལ་ ན་ག་ཨོ་ཐ་བོ་ཉིང་ ཤི་ཝ་གེ་ལོག་ཉི་ཝུ༌ཝ། ཉི་རོག་གེ་མ་གེ་ ལོག་ཉི་ཐོང་མ་དག༌ཉི༎
Currently Selected:
ལུ་ཀ། 15: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
