ལུ་ཀ། 19

ཡི་ཤུ་དང་ ཁྲལ་དུས་ཁཱན་ཇ་ཁ་ཡཱས།

1ཉི་རོག་ ཡ་རི་ཧོ་ག་ ཁྲོམ་ཆེན་ནང་ཀ་ནུབ་ཉི་ ཉ་གེ་ཨ་ཉི་ བྱོན་ཅ་གི་ཝ༌ལ། 2ཉི་ཨོ་ཉ་ཁྲོམ་ཆེན་ག་ ཁྲལ་དུས་ཁཱན་ག་ གཙོ་འཛིན་ ཇ་ཁ་ཡཱས་དག་ཁཱན་ སོ་ངོ་བེ་དིང་ཐུར་ ཅ་གི་ཝ༌ལ། 3ཉི་རོག་ ཡི་ཤུ་ ཨི་བི་གི་ཝ་ལ་སྨོ་ མཇལ་བེ་ན་ཐེན་ ལ་མ་ཅ་གི་ཝ༌ལ། དག་པ་ཀབ་ཉི་ རོག་ཡང་ཐུ་མུ་ཨ་དེན་གེ་ སོ་ངོ་ཛོམ་དང་ཟག་པ་གི་ མཇལ་བེ་མར་བ༌ལ། 4ཉི་རོག་ཇུག་ཉི་རང་ གུབ་ཀ་དིན་ཐཱན་ ཡི་ཤུ་མཇལ་བེ་དེན་གེ་ ནུ་ཤིང་ཐུང་ཀ་ གོང་མ༌ལ། ཧང་ཡ་དག་ནེ་ལ་ ཡི་ཤུ་ཨོ་ཉ་ལམ་གེ་ཨ་ཉི་ བྱོན་ཅ་གི་ཝ༌ལ།

5ཉི་ཡི་ཤུ་ རོག་ཆོ་ས་བཱརང་ཀ་ ཕེབས་ཏེན་གེ་ ག་ཏཱན་གཟིགས་ཐཱན་ རོ་ཀ་གསུངས་མ་ལ་ ཇ་ཁ་ཡཱས་ དོ་ཟོ་དོང་ཞུའི། ཧང་ཡ་དག་ནེ་ལ་ ཐི་ནོང་ ཇང་ན་ག་ཕའི་ག་ ཆོ་ལེ་གི་ལ་དག༌ཉི།

6ཉི་རོག་དོ་ཟོ་དོ་ཟོ་ དོང་ཞུན་ཐཱན་ གནམ་མེད་ས་མེད་ ཤོ་ནང་ཕེ་ཉི་ ཡི་ཤུ་ རོ་ཀ་ཕའི་ག་ཞུ་ཝ༌ལ། 7ཉི་ཡི་ཤུ་ བྱོན་མ་མཇལ་བ་ཀབ་ཉི་ རོག་སྡིག་ཅན་ག་ཕའི་ག་ ཤི་མིན་ཨ་ཉི་ བྱོན་མ་དག་ཉི་ཡེག་ཉི་ སོ་ངོ་བ་ཀི་ ཁ་ཏང་མ༌ལ།

8ཉི་ཇ་ཁ་ཡཱས་ཐིང་ཐཱན་ ཡི་ཤུ་ག་ཞུ་ཝ་ལ་ གཟིགས་ཅོ་ གཙོ་བོ་ ཇི་གི་ ཇ་ག་རྒྱུ་ཚེ་བང་ཐུར་ ཨོ་མ་རང་ ཨོ་ཐ་ག་ དུག་པུ་བ་ཀ་བི༌ལེ། ཉི་ཇི་གི་མགུ་སྐོར་ཕི་ཉི་ ཨི་བི་གེ་རང་གི་ནེ་བུ་ ཐུར་བུ་ཝ་ཆོ་ནེ་ལ་ ལོག་ཉི་ཚ་མང་ ཕིཤི་བི་ལེ་དག༌ཉི།

9ཉི་ཡི་ཤུ་གི་ རོ་ཀ་གསུངས་མ་ལ་ ཐི་ནོང་ ཨོ་ཐ་ཕའི་ག་ སོ་ངོ་བ་ཀི་ ཐར་པ་ཉོང༌པ། ཧང་ཡ་དག་ནེ་ལ་ རོག་བུ་ ཨ་བཱརའ་ཧམ་ག་ རྒྱུད་པ་གི༌ལ། 10སོ་ངོ་ག་ཟ་ཤོ་ གེམ་ཁཱན་བ་ལམ་ཉི་ ཐར་པ་བི་ལེ་དེན་གེ་ ཨོ་ཕ་གི་ལ་དག༌ཉི༎

ད་ཡང་སེ་ག་དཔེ་གཏམ།

11སོ་ངོ་བ་ཀི་ ཨོ་ཐ་གསུང་ཉཱན་ཏེན་གེ་ རོ་ཀི་ དཔེ་གཏམ་ག་ཐུང་ཀེ་ཨ་ཉི་ གསུངས་མེ་ག་ ར་གེ་ཆེ་ཝ༌ལ། ཧང་ཡ་དག་ནེ་ལ་ རོག་ཡ་རུ་ཤ་ལེམ་ ར་ག་ཕེབས་པ་ཅ་གི་ཝ༌ལ། ཉི་དཀོན་མཆོག་ག་རྒྱལ་སྲིད་ དོ་ཟོ་རང་ཕེབས་པེ་དག་ཉི་ སོ་ངོ་བ་ཀི་ མི་ཝ་ཅ་གི་ཝ༌ལ། 12ཨོ་ཉི་ཨ་དེན་གེ་ རོ་ཀི་གསུངས་མ་ལ་ སོ་ངོ་བཟང་པོ་ཐུར་ ལམ་ཐ་རིང་མུ་ག་ཆོ་ཁཱན་ རྒྱལ་ཁབ་ཐུར་ག་ དཔོན་ག་དབང་ཚད་ ཞུ་ལེ་ག་ དིན་ཅ་གི་ཝ༌ལ། ཉི་རོག་ལོག་ཉི་ ལོག་པེ་གི་ཝ༌ལ། 13རོ་ཀ་གཡོག་པ་སེ་རཱན་ཐཱན་ རོ་ཀི་ད་ཡང་སེ་བིན་ཐཱན་ ཇང་མ་ཤེག་པ་སག་པུ་ ཨུ་ཐུ་གི་ ཚོང་ཕི་ན་དག་ཉི་ ཡེག་པ༌ལ། 14དག་པ་ཀབ་ཉི་ རོ་ཀ་མི་སེར་བ་ཀི་ རོག་མ་ཟེས་པཱན་ ཨོ་ཐ་སོ་ངོ་ ཨ་ཧ་ཐུང་ཀེ་ དབང་ཁཱན་དཔོན་ཨ་ཉི་ མ་ཚཱས་པ་ཨན་ཡེག་ཉི་ རོ་ཀ་ཚིང་ཚིང་ ཁ་འཐེན་པ་ཀུན་ཏི་ཝ༌ལ།

15རོག་དཔོན་ག་དབང་ཚད་ཉོང་ཉི་ ལོག་ཏེན་གེ་ རོ་ཀི་ཏི་རུ་བི་ཁཱན་ རོ་ཀ་གཡོག་བ་རའི་དག་ཉི་ བཀའ་གནང་མ༌ལ། ཧང་ཡ་དག་ནེ་ལ་ རོག་ཏེ་བ་ཀི་ ཚོང་ཕི་ཉི་ འབབ་ཁུངས་ ཧང་ཤོ་ཝ་ལ་སྨོ་ གོད་པེ་གི་ཝ༌ལ། 16གོ་མ་ཁེ་པ་ རོ་ཀ་ར་ག་ཤེག་ཉི་ ཞུ་ཝ་ལ་ སྦྱིན་བདག་ ན་ག་ད་ཡང་གི་ ད་ཡང་སེ་ ཐེབ་ཅོད་པ་ཅ་དག༌ཉི།

17ཉི་དཔོན་གི་ རོ་ཀ་ལེག་པུ་གི་ཝ་ལ་ ནཱན་གི་ཉུང་པུ་ཐུར་ག་ དམ་ཚིག་ཙུང་ཉི་ ལའི་ཨ་ཝ་ཨ་དེན་གེ་ ནཱན་ཇི་གི་ ཁྲོམ་ཆེན་སེ་དབང་པེ་ག་ དབང་ཚད་བི་ལེ་དག་ཉི་ གསུངས་མ༌ལ།

18ཉི་ཨོམ་ཐུར་གཡོག་པ་ཤེག་ཉི་ སྦྱིན་བདག་ ན་ག་ད་ཡང་གི་ ད་ཡང་ལྔ་ ཐེབ་ཅོད་པ་ཅ་དག་ཉི་ ཞུ་ལ་ཀབ་ཉི་ 19དཔོན་གི་ རོ་ཀ་གསུངས་མ་ལ་ ནཱན་ཇི་གི་ ཁྲོམ་ཆེན་ལྔ་དབང་ཁཱན་ ཅོད་པེ་ན་དག༌ཉི།

20ཉི་ཨོམ་ཆང་ ཨོམ་ཐུར་གཡོག་པ་ཤེག་ཉི་ སྦྱིན་བདག་ ཨུ་ཐུ་ཤོ་ ན་ག་ད་ཡང་གི༌ལ། ཇི་གི་ ན་ག་ད་ཡང་ ཁ་ཤ་གི་ཆོམ་ཐཱན་ དུང་ཉི་ཐ༌ཝ། 21ནཱན་སོ་ངོ་ ཀག་ཏར་ཆོ་ཝ་ཨ་དེན་གེ་ ཇང་ ནཱན་གེ་ཡོང་ཁེ་ཝ་ཆོ༌ཝ། ཧང་ཡ་དག་ནེ་ལ་ ན་ག་མང་གི་ཁཱན་ཁེ་པ་ ནཱན་གི་བུན༌ཅ། ཉི་ནཱན་གི་ མ་ཡབ་ཁཱན་གེ་ ནཱན་གི་དུང་ཅ་དག་ཉི་ ཞུ་ཝ༌ལ།

22དཔོན་གི་ རོ་ཀ་གསུངས་མ་ལ་ ནཱན་གོ་མ་ཆོད་ཁཱན་གཡོག་པ་ ན་ག་ནོ་ཝང་གེ་ ཤོ་ཝ་དང་ཏུ་ཉི་ ཇི་གི་ ནཱན་ཁྲིམས་ཀེ༌བེ། ནཱན་གི་སེ་ཝ་ལ་ ཇང་སོ་ངོ་ཀག་ཏར་ཅ་དག༌ཉི། ཇ་ག་མང་གི་ཁཱན་ ཇི་གི་བུན་ཅ་ ཉི་ཇི་གི་མ་ཡབ་ཁཱན་ཁེ་པ་ དུང་ཅ་དག༌ཉི། 23ཉི་ལ་ ནཱན་གི་ ཇ་ག་ཏི་རུ་ དངུལ་ཁང་ག་ ཧང་ཨ་ཉི་མ་ཐཱན་ཤི་ཡ། ཉི་ཇང་ལོག་པེ་གང་ཀ་ སྐྱེད་དང་ཏབ་ཐུར་ག་ ལོག་ཉི་ཤོ་ལེ་ཆོ་ཝ་དག༌ཉི།

24ཉི་རོ་ཀི་ ཨོ་ཉ་ཨོམ་ཐུར་ ཐིང་ཁཱན་བ་ཀ་ཏཱན་ ཨོ་ཉ་སོ་ངོ་གེ་ ད་ཡང་བུན་ཐཱན་ ད་ཡང་སེ་ཆོ་ཁཱན་ག་བི་དག་ཉི་ གསུངས་མ་ཀབ་ཉི་ 25རོག་ཏེ་བ་ཀི་ རོ་ཀ་ཞུ་ཝ་ལ་ སྦྱིན་བདག་ རོ་ཀ་ད་ཡང་སེ་ཅ་དག༌ཉི།

26རོ་ཀི་ལན་གནང་ཉི་ ཇི་གི་ ན་ཧ་ཡེག་པེ་ ཨི་བི་ག་ཆོ་ཝ་ཐུར་ མང་པུ་བི༌ལེ། ཉི་མ་ཁཱན་བ་ཀེ་ ཆོ་ཁཱན་བུ་བུ༌ལེ། 27དག་པ་ཀབ་ཉི་ ཇང་ རོག་ཏེ་བ་ཀ་ཐུང་ཀ་ དཔོན་ཨ་ཉི་དབང་པེ་ག་ མ་ཚཱས་ཁཱན་ ཇ་ག་ཨོ་ཉ་དགྲ་བྱང་ཕིཤི་བ་ ཐ་ཕཱན་ཐཱན་ ཇ་ག་གུབ་ཀ་རང་ཤེ་དག་ཉི་ བཀའ་གནང་མ༌ལ༎

ཡི་ཤུ་ཡ་རུ་ཤ་ལེམ་ག་ ཕེབས་པ༌ལ།

28ཉི་ཡི་ཤུ་གི་ ཨུ་ཐུ་ད་བུ་ གསུངས་ཉི་ཆུམ་དེན་གེ་ རོག་ཡ་རུ་ཤ་ལེམ་ག་ཏཱན་ གུམ་གུམ་བྱོན་མ༌ལ། 29ཉི་རོག་ ཨོ་ལིབ་ཤིང་ཕུ་ར་ག་ཆོ་ཁཱན་ དུང་བེད་ཕ་གེ་དང་ བེ་ཐ་ནི་ཡ་དག་ཁཱན་ ར་ག་ཕེབས་ཏེན་གེ་ རོ་ཀ་སློ་མ་ཉིག་ཙིང་ག་ ཨོ་ཐེན་གསུངས་ཐཱན་ ཀུན་ཏི་ཝ༌ལ། 30ཨོ་ཐ་གུབ་ཀ་ཆོ་ཁཱན་ དུང་ག་དི་ཉི་ ནང་ཀ་ནུབ་ཅ་ཨ་ཉི་ ཨི་བི་གི་རང་ ཕྱི་པ་མ་ཨ་ཁཱན་ བོང་བ་ཐུར་ ཆེང་ཉི་ཐ་ཝ་ཐོང༌མེ། ཉི་ལཱན་ཕེག་ཐཱན་ ཐ་ཕའི། 31ཉི་ཨི་བི་གི་རང་གི་ནེ་བུ་ བོང་བ་ག་ལཱན་ ཧང་ཨ་ཉི་ ཕེག་ཅ་ཡ་དག་ཉི་ ཇིམ་ནེ་ལ་ ཨ་ཧ་གཙོ་བོ་ག་དེན་གེ་ ཨོ་ཐ་བོང་བ་ ཚཱས་པ་ཅ་ཨ་ཉི་ ཡེག་ཅོ་ན་དག༌ཉི།

32ཉི་རོག་ཉིག་ཙིང་དི་ཉི་ ཡི་ཤུ་གི་གསུངས་མ་ ད་བུ་རང་ཁྲ་པ༌ལ། 33ཉི་རོག་ཉིག་ཙིང་གི་ བོང་བ་ག་ལཱན་ཕེག་ཅ་ཨ་ཉི་ ཡོན་ད་གི་ ཇི་མ་ལ་ ན་ཆིང་བོང་བ་ག་ལཱན་ ཧང་ཨ་ཉི་ཕེག་ཅ་ཡ་དག༌ཉི།

34ཉི་རོག་ཉིག་ཙིང་གི་ ལན་བི་ཉི་ཡེག་པ་ལ་ ཨ་ཧ་གཙོ་བོ་ག་དེན་གེ་ ཚཱས་པ་ཅ་དག༌ཉི། 35ཉི་རོག་ཉིག་ཙིང་གི་ ཨོ་ཉ་བོང་བ་ ཡི་ཤུ་ག་ སྐུན་མདུན་ག་བུན་ཐཱན་ རོག་ཏེ་བ་ཀ་ཁ་མུང་བ་ བོང་བ་ཐུང་ཀ་ཁེམ་ཉི་ ཉི་རོག་ཏེ་བ་ཀི་ བོང་བ་ཐུང་ཀ་ ཡི་ཤུ་བཞུགས་པེ་ག་ ཕུལ་བ༌ལ།

36ཉི་རོག་བཞུགས་ཉི་ བྱོན་ཅ་ཨ་ཉི་ སོ་ངོ་བ་ཀི་ རོག་ཏེ་བ་ཀ་ ཁ་མུང་ས་རི་བ་ ལམ་ཁོན་ཁེ་མ༌ལ། 37ཉི་ཡི་ཤུ་ ཡ་རུ་ཤ་ལེམ་ར་ག་ ཕེབས་པ་ཀབ་ཉི་ ཨོ་ལིབ་ཤིང་ཕུ་གེ་དོང་ཏ་ ཞུ་ལེ་ཁེ་ས་ག་ རོ་ཀ་སློ་མ་ མང་པུ་ཐུར་ཛོམ་ཁཱན་ ཐམས་ཅན་རང་ ཤོ་ནང་ཕེ་ཉི་ གཙོ་བོ་གི་མཛད་ཁཱན་ ཡིད་ཆི་ཝ་ག་ཕྱག་ལཱ་ མང་པུ་ཐུར་ རོག་ཏེ་བ་ཀི་ མཇལ་བ་ཨ་དེན་གེ་ ཤ་དར་ཕི་ཉི་ དཀོན་མཆོག་ག་ བསྟོད་པ་ཕུལ་བ༌ལ།

38གཙོ་བོ་ག་མཚན་ག་བྱོན་ཁཱན་ དཔོན་ཁེ་པ་ བྱིན་རླབས་ཅན་གི༌ལ།#19:38 མགུར་མ་ག་དཔེ་ཆ་ 118:26 ཞིང་ཁམས་ག་ སྐྱིད་པུ་ཨུན་ཆེན་ ཉི་དཀོན་མཆོག་ག་མཚན་ག་ བསྟོད་པ་ཕུལ་ཤོ་ དག༌ཉི།

39ཉི་ཨོ་ཉ་སོ་ངོ་མང་ཀ་པོང་ཀེ་ ཕ་རི་སི་པ་ཚེ་བང་གི་ རོ་ཀ་ཞུ་ཝ་ལ་ སློབ་དཔོན་ ན་ག་སློ་མ་བ་ཀ་ ཙང་ཀེན་ཆོའི་ཨ་ཉི་ བཱརག་ཉི་གནང་ཤོ་དག༌ཉི།

40རོ་ཀི་ལན་གནང་མ་ལ་ ཇི་གི་ ན་ཧ་ཡེག་པེ་ རོག་ཏེ་བ་ ཙང་ཀེན་ཆོ་ནེ་ལ་ ཨོ་ཐ་ལུང་ག་བ་ཀི་ ཤ་དར་ཕི་ལེ་ གོ་ཙུག་པེ་དག༌ཉི།

41ཉི་རོག་ ཁྲོམ་ཆེན་ར་ག་ཕེབས་པ་ཀབ་ཉི་ ཁྲོམ་ཆེན་ག་གཟིགས་ཉི་ རོག་བཤུམས་ཉི་ གསུངས་མ་ལ་ 42ནཱན་གི་ ཐི་ནོང་ག་ནོང་ཀ་ སྐྱིད་པུ་ག་དེན་གེ་ ཧང་ཚཱས་པེ་སྨོ་ སེ་ཝ་གི་ནེ་ལ་ དྲིག་པེ་ཆོ༌ཝ། དག་པ་ཀབ་ཉི་ ཨོམ་ ན་ག་མིང་གེ་ གུམ་ཉི་ཆུ༌མ། 43ན་ག་དགྲ་བྱང་ཕིཤི་བ་ཀི་ ཕྱད་མདའ་ཕི་ལེ་ག་དེན་གེ་ ཙིག་པ་གབ་ཉི་ ནཱན་ཉ་གེ་ཐ་གེ་རང་ པེད་ཉི་ཕ་ལེ་ག་ དུས་ཤར༌བེ། 44ཉི་ནཱན་ ཨོ་ཉ་རེ་དང་ནང་ཀ་རང་ ཏོར་ཉི་གེ༌མེ། ཉི་ནཱན་དང་ ན་ག་ཝག་ཙ་བ་ ཉི་ན་ག་ནང་ཀ་ཆོ་ཁཱན་ ལུང་ག་བ་ ཐུར་གི་ཐུར་ག་ཐུང་ཀ་ཙེག་ཉི་ ཐུར་རང་མ་ལུས༌པ། ཧང་ཡ་དག་ནེ་ལ་ དཀོན་མཆོག་ག་སྐྱབས་མགོན་ ནཱན་གི་ མ་མཇལ་ཤི་དག་ཉི་ གསུངས་མ༌ལ༎

ཡི་ཤུ་མཆོད་ཁང་ནང་ཀ་བྱོན་མ༌ལ།

45ཉི་རོག་ མཆོད་ཁང་ནང་ཀ་བྱོན་ཉི་ ཚོང་པ་བ་ ཕིས་ཀ་ཁོན་མེ་ གོ་ཙུག་པ༌ལ། 46ཇ་ག་ཕའི་ཤོ་ སྨོན་ལམ་ག་ ཕའི་ཆིན་མེ་#19:46 ཡ་ཤའི་ཡ་ག་དཔེ་ཆ་ 56:7 ཨ་ཉི་ གསུང་རབ་ནང་ཀ་ འབྲི་བ༌ཅ། དག་པ་ཀབ་ཉི་ ན་ཤི་ཅོམ་ཁཱན་བ་ཀ་བཱརང་ ཅོད་པ་ལ་#19:46 ཡར་མི་ཡ་ག་དཔེ་ཆ་ 7:11 དག་ཉི་ གསུངས་མ༌ལ།

47ཉི་རོག་ མཆོད་ཁང་ནང་ཀ་ ཏ་བུ་རང་ ཡེན་གནང་ཅ་གི་ཝ༌ལ། ཉི་བླ་མ་ཆི་ལུ་དང་ བཀའ་ཁྲིམས་ག་ སློབ་དཔོན་ ཉི་སོ་ངོ་བ་ཀ་ འགོ་དཔོན་བ་ཀི་ རོག་བཀྲོངས་མེ་མིག་པ་ ཕི་ཝ༌ལ། 48དག་པ་ཀབ་ཉི་ རོག་ཏེ་བ་ཀི་ ཧང་ཐུར་ཨ་ལེ་ག་ ལམ་མ་ཉོང་པ༌ལ། ཧང་ཡ་དག་ནེ་ལ་ སོ་ངོ་བ་ ཐམས་ཅན་གི་ རོ་ཀ་གསུང་ཉཱན་ཉི་རང་ ཆོན་ཅ་གི་ཝ༌ལ༎

Currently Selected:

ལུ་ཀ། 19: TNTB

Highlight

Copy