ལུ་ཀ། 20

ཡི་ཤུ་ག་དབང་ཚད་ཀོར་གེ་ ཇི་མ༌ལ།

1ནོང་ཐུར་ ཡི་ཤུ་མཆོད་ཁང་ནང་ཀ་ སོ་ངོ་བ་ཀ་ཡེ་ཉི་ ཉི་འཐེན་ལེག་པུ་བཤད་ཉི་ བཞུགས་པེ་གང་ཀ་ བླ་མ་ཆི་ལུ་དང་ བཀའ་ཁྲིམས་ག་ སློབ་དཔོན་བ་ སོ་ངོ་ཆི་ལུ་བ་ཀབ་ཉི་ ག་ཤེག་པ༌ལ། 2ནཱན་གི་ ཨོ་ཐ་བ་ ཧང་ག་དབང་ཚད་གི་ ཨན་ཅ་ཡ། ཉི་ན་ག་ ཨོ་ཐ་དབང་ཚད་བི་ཁཱན་ ཨི་བི་གི་ལ་ཡ་ ཨ་ཧ་ཡེག་ཅོ་དག་ཉི་ ཇི་མ༌ལ།

3རོ་ཀི་ རོག་ཏེ་བ་ཀ་ གསུངས་མ་ལ་ ཇི་གི་བུ་ ན་ཧ་དྲི་ཝ་ཐུར་ཇི༌མེ། ཇ་ག་ཡེག༌ཅོ། 4ཡུ་ཧན་ན་གི་ ཁྲུས་གསོར་བི་ལེ་ག་ དབང་ཚད་ དཀོན་མཆོག་གེ་ ཉོང་པ་སྨོ་ སོ་ངོ་གེ་ ཉོང་པ་ཡ་དག༌ཉི།

5ཉི་རོག་ཏེ་བ་ ཐུར་གི་ཐུར་ཀབ་ ཏུན་ཆ་ཨ་ཉི་ ཡེག་པ་ལ་ ཨ་ཤི་དཀོན་མཆོག་གེ་ གི་ལ་དག་ནེ་ལ་ རོ་ཀི་གསུངས་མེ་ ཉི་ཡུ་ཧན་ན་ག་ ཧང་ཨ་ཉི་ དད་པ་ མ་ཨན་ཤི་ཡ་དག༌ཉི། 6ཉི་ཨ་ཤི་ སོ་ངོ་གེ་ གི་ལ་དག་ནེ་ལ་ ཨོ་ཐ་ཆོ་ཁཱན་ སོ་ངོ་མང་ ཐམས་ཅན་གི་ ཨ་ཧ་བ་ ལུ་ཤི་དྲོ༌མེ། ཧང་ཡ་དག་ནེ་ལ་ རོག་ཏེ་ཐམས་ཅན་གི་ ཡུ་ཧན་ན་ཁེ་པ་ ལུང་བསྟན་པ་ཨ་ཉི་ ཙིན་ཅ་དག༌ཉི། 7ཉི་རོག་ཏེ་བ་ཀི་ ཞུ་ཝ་ལ་ ཨོ་གེ་གི་ལ་སྨོ་ ཨ་ཤི་མ་སེ་ལ་དག༌ཉི།

8ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཉི་ལ་ ཇི་གི་བུ་ ཨོ་ཐ་བ་ ཧང་ག་ དབང་ཚད་གི་ཨ་ཉི་ ཨན་ཅ་གི་ལ་སྨོ་ ན་ཧ་མ་ཡེག་པ་དག༌ཉི༎

ཉི་པ་བ་ཀ་དཔེ་གཏམ།

9ཉི་རོ་ཀི་ ཨོ་ཐ་དཔེ་གཏམ་ གསུངས་མེ་ གོ་ཙུག་པ་ལ་ གོ་མ་ སོ་ངོ་ཐུར་གི་ སེ་ཁ་ཤིང་ཆེན་ཐཱན་ བཱརའ་ས་ཕང་ལ་ཁཱན་ཙུག་ཉི་ ཉི་རོག་ཏེན་ཤོ་ བཱརའ་རྒྱལ་ཁབ་ཐུར་ག་དི་ཉི་ ཤ་མ་ཆོ་ཝ༌ལ། 10ཉི་སེ་ཤེ་ལེ་ རེན་པ་ཀབ་ཉི་ ཡོན་ད་གི་ རོ་ཀ་གཡོག་པ་ཐུར་ རོ་ཀ་ཕང་དོག་པེ་དེན་གེ་ ས་ཕང་ལ་ཁཱན་བ་ཀ་བཱརང་ཀ་ ཀུན་ཏི་ཝ༌ལ། དག་པ་ཀབ་ཉི་ ས་ཕང་ལ་ཁཱན་བ་ཀི་ རོ་ཀ་གཡོག་པ་ཀོང་ཐཱན་ ཧང་རང་མ་བི་ལཱན་ ལོག་ཉི་ཀུན་ཏི་ཝ༌ལ། 11ཉི་རོ་ཀི་ རོ་ཀ་གཡོག་པ་ བཱརའ་ཐུར་ཀུན་ཏི་ཝ༌ལ། ས་ཕང་ལ་ཁཱན་བ་ཀི་ རོག་བུ་ཀོང་ཉི་ ངི་ནང་ཁུ་ཝ་ཅོད་ཐཱན་ ག་དང་ཏོང་པུ་ལོག་ཉི་ ཀུན་ཏི་ཝ༌ལ། 12ཉི་ཡོན་ད་གི་ ཨོམ་ཆང་ཐུར་ ཀུན་ཏི་ཝ༌ལ། ས་ཕང་ལ་ཁཱན་བ་ཀི་ ཀོང་ཉི་ མ་ཁ་ཤོ་ཝ་ཅོད་ཐཱན་ གེམ་ཀུན་ཏི་ཝ༌ལ།

13ཉི་ཨུང་ཡོན་ད་གི་ མི་ཝ་ལ་ ཇི་གི་ ཧང་ཤ་ ཨ་ཝ་དྲག་པེ་ཡ་ཉི་དག༌ཉི། ཇི་གི་ཕང་ཁཱན་ ཇང་ཏེན་ག་ཟ་ ཀུན་ཏི་ལེ་ཁེ་ལེ༌ལ། རོག་ཏེ་བ་ཀི་ ཇ་ག་ཟ་ག་ཏ་ གུས་ཞབས་ཨ་ལེ་དག་ཉི་ མི་ཝ༌ལ།

14དག་པ་ཀབ་ཉི་ ས་ཕང་ལ་ཁཱན་བ་ཀི་ རོག་ ཨོ་ཕ་ཐོང་མ་ཀབ་ཉི་ རོག་ཏེ་བ་ནང་དོ་ ཆཱས་ཨ་ཉི་ཡེག་པ་ལ་ རོག་ཤོ་ ཡོན་ད་ག་ཟ་གི༌ལ། ཨ་ཤི་དཱན་ཤེ་ཁེ་ ཉི་ཨོ་ཐ་ཨུང་ ཨ་ཧ་རི་ལེ་དག༌ཉི། 15ཉི་རོག་ཏེ་བ་ཀི་ རོག་ ཨུང་ཕིས་ཀ་བུན་ཐཱན་ ཤེ་ཝ༌ལ།

ཉི་ཨོམ་ ཨོ་ཉ་ཨུང་ག་ཡོན་ད་གི་ རོག་ཏེ་བ་ཀ་ ཧང་ཨ་ལེ་ཡ། 16རོག་ཨུན་ཐཱན་ ཨོ་ཉ་ས་ཕང་ལ་ཁཱན་ ཐམས་ཅན་རང་ ཤེན་ཐཱན་ རོ་ཀ་ཨུང་ག་ ས་ཕང་ལ་ཁཱན་ བཱརའ་སིང་མ་ཙུག་པེ་དག༌ཉི།

སོ་ངོ་བ་ཀི་ ཨོ་ཐ་གཏམ་ ན་ཐ་ཉི་ ཨུ་ཐུ་ད་བུ་ མ་ཇུང་ཆེན་དག་ཉི་ ཡེག་པ༌ལ།

17དག་པ་ཀབ་ཉི་ རོ་ཀི་ རོག་ཏེ་བ་ཀ་ གཟིགས་ཐཱན་ གསུངས་མ་ལ་ ཉི་ལ་ ཨོ་ཐ་ཀོར་གེ་ གསུང་རབ་ག་འབྲི་ཁཱན་ ཧང་གི་ལ་ཡ།

ལུང་བཟོ་པ་བ་ཀི་ མ་ཚཱས་ཁཱན་ ལུང་ཁེ་པ་ ཐམས་ཅན་གེ་ ཁག་ཆི་ལུ་ཆོ་ཁཱན་ ཟུར་ལུང་ཨ་མ་རི༌ཝ།#20:17 མགུར་མ་ག་དཔེ་ཆ་ 118:22

18ཉི་ལུང་ཐུང་ཀ་ ཕུད་ཉི་ཁེ་ཁཱན་ ཐམས་ཅན་རང་ དྲ་པ་དྲོ་པོ་ ཕོད༌པེ། ཉི་ལུང་ཞུད་ཉི་ ཨི་བི་ག་ཐུང་ཀ་ ཁེ་ཝ་ཐུར་ བོག་པི་དིར་པེ་དག༌ཉི།

19ཉི་བཀའ་ཁྲིམས་ག་ སློབ་དཔོན་དང་ བླ་མ་ཆི་ལུ་བ་ཀི་ ཨོ་ཉ་ག་རང་ རོ་ཀ་ཐུང་ཀ་ ག་དང་ཀེ་བེ་ རྩིས་ཕི་ཝ༌ལ། དག་པ་ཀབ་ཉི་ སོ་ངོ་བ་ཀི་ ཨོ་ཐ་དཔེ་གཏམ་ཁེ་པ་ རོ་ཀི་ ད་ཧ་དམའ་ཕ་ཕི་ཉི་ གསུངས་མ་གི་ལ་དག་ཉི་ ཧ་གོ་ཝ་ཨ་དེན་གེ་ རོག་ཏེ་བ་ སོ་ངོ་བ་ཀེ་ ཡོང་ཁེ་ཝ༌ལ༎

རོ་མི་ག་དཔོན་ཀའི་སར་ག་ ཁྲལ་བི་ལེ་ཁེ་ཝ་ཀོར་གེ།

20ཨོ་ཉི་ཨ་དེན་གེ་ རོག་ཏེ་བ་ཀི་ ཅོན་ལ་མེ་ གོ་ཙུག་པ༌ལ། ཉི་ཡི་ཤུ་གི་ གསུངས་མེ་གང་ཀ་ ཚིག་ཏེ་ཉོང་པ་ད་བུ་ ཨ་ནེ་ལ་ དབང་ཚད་ཙུང་ཁཱན་དང་ རོ་མི་ག་དཔོན་སློབ་ག་ ག་དང་ག་རྩིས་སྤྲོད་པེ་དེན་གེ་ རོག་ཏེ་བ་ཀི་ རོ་ཀ་སྐུན་མདུན་ག་ ཀྲེམ་ཙོང་ཁཱན་བ་ ཀུན་ཏི་ཝ༌ལ། 21རོག་ཏེ་བ་ཀི་ ཞུ་ཝ་ལ་ སློབ་དཔོན་ ནཱན་གི་གསུངས་ཁཱན་དང་ ཡེ་ཁཱན་ ཐམས་ཅན་རང་ དེན་པ་གི༌ལ། ཉི་ནཱན་གི་ ཉེ་རིང་མ་ཆི་ལཱན་ དཀོན་མཆོག་ག་ ཐུགས་དང་ཏུ་ཉི་ ཨ་ལེ་ཁེ་ཝ་ཀོར་གེ་ཤ་ ཡེ་ཉི་གནང་ལ་དག་ཉི་ ཨ་ཤི་སེན༌ཅ། 22ཉི་ཨོམ་ ཨ་ཧ་གསུངས་ཤོ་ ཨ་ཤི་ཀའི་སར་ག་ ཁྲལ་བི་རིན་ཆོག་པེ་སྨོ་ མ་ཆོག་པ་ཡ་དག༌ཉི།

23དག་པ་ཀབ་ཉི་ རོ་ཀི་ རོག་ཏེ་བ་ཀི་ ཅོན་ལ་མ་ག་མཁྱེན་ཉི་ 24ཐ་ལ་ཐུར་ཇ་ག་གེན་ཤོ་ ཨོ་ཐ་ཐ་ལ་ག་ ཨི་བི་ག་པར་དང་ མིང་ལ་ཡ་དག་ཉི་ ཇི་མ་ཀབ་ཉི་ ཀའི་སར་ག་པར་དང་ མིང་ལ་དག་ཉི་ རོག་ཏེ་བ་ཀི་ ཞུ་ཝ༌ལ།

25ཉི་རོ་ཀི་ རོག་ཏེ་བ་ཀ་ གསུངས་མ་ལ་ ཉི་ལ་ ཀའི་སར་ག་ བི་ལེ་ཁེ་ཁཱན་བ་ ཀའི་སར་ག་རང་བི། ཉི་དཀོན་མཆོག་ག་ ཕུལ་བེ་ཁེ་ཁཱན་བ་ དཀོན་མཆོག་ག་རང་ ཕུལ་ཤོ་དག༌ཉི།

26ཉི་རོག་ཏེ་བ་ཀི་ སོ་ངོ་བ་ཀ་པོང་ཀ་ རོ་ཀི་ ཨུ་ཉུ་ད་བུ་གསུངས་མ་ཨ་ཉི་ ཙུང་མེ་མར་བ༌ལ། དག་པ་ཀབ་ཉི་ རོ་ཀ་ལན་གནང་ཐང་ག་ གོད་ཉི་ རོག་ཏེ་བ་ ཡིད་ཆི་ཉི་ ཙང་ཀེན་ཆོ་ཝ༌ལ༎

ལོག་ཉི་དངོས་སུ་ཨ་ཉི་ གསོན་པོ་རི་ཝ་ཀོར་གེ་དང་ གཉེན་ག་ཀོར་གེ།

27ཤི་དེན་གེ་གསོན་པོ་ཨ་ཉི་ ཝུ་ལེ་ག་མཱན་ཅ་དག་ཁཱན་ ས་དུ་ཀི་པ་ཚེ་བང་ ཡི་ཤུ་ག་སྐུན་མདུན་ག་ ཤེག་ཉི་ 28རོ་ཀ་དྲི་ཝ་ཨ་ཉི་ ཞུ་ཝ་ལ་ སློབ་དཔོན་ ཨ་ཏ་ག་ཝག་ཙ་ མང་ཕེ་གོ་མ་ རོག་ཤི་ནེ་ལ་ རོ་ཀ་བོ་ཉིང་གི་ རོ་ཀ་མེ་ཝག་ཙ་ཀབ་ཉི་ གཉེན་ཕི་ཉི་ ཨ་ཏ་ག་མིང་ག་ ཝག་ཙ་སིང་མེ་ཁེ་ལེ་དག་ཉི་ མོ་ས་གི་བཀའ་ཁྲིམས་ དཔེ་ཆ་ནང་ཀ་འབྲི་བ༌ཅ། 29ཨོམ་ རོག་ཏེ་བོ་ཉིང་ཟུམ་ ཆོ་ཝ༌ལ། ཨ་ཏ་ཆི་ལུ་གི་ གཉེན་ཕི་ཉི་ ཝག་ཙ་མང་ཕེ་གོ་མ་ རོག་ཤི་ཝ༌ལ། 30ཉི་རོ་ཀ་ཕརའ་ཁེ་ཆོ་ཁཱན་གི་ གཉེན་ཕི་ཝ༌ལ། དག་པ་ཀབ་ཉི་ ཝག་ཙ་མང་ཕ་ཨ་ཉི་རང་ ཤི་ཝ༌ལ། 31ཉི་ཨོ་ཉ་ཕརའ་ཁེ་ཆོ་ཁཱན་གི་ གཉེན་ཕི་ཝ༌ལ། ཉི་ཨུ་ཉུ་པུརུས་ཀིན་ཨ་ཉི་རང་ རོག་ཏེ་བོ་ཉིང་ཟུམ་རང་ ཝག་ཙ་མང་ཕ་ཨ་ཉི་རང་ ཤི་ཝ༌ལ། 32ཉི་ཚི་ངེ་ དག་པ་ཀབ་ཉི་ ཨོ་ཉ་མེ་ཝག་ཙ་བུ་ ཤི་ཝ༌ལ། 33ཉི་ཨོམ་ གསོན་པོ་ཨ་ཉི་ ཝུ་ལེ་གང་ཀ་ རོག་ ཨི་བི་ག་ མེ་ཝག་ཙ་རི་ལེ་ཡ། ཧང་ཡ་དག་ནེ་ལ་ རོག་ཏེ་ཟུམ་གི་རང་ རོག་མེ་ཝག་ཙ་ཨ་ཉི་ ཐ་ཝ་ལ་དག༌ཉི།

34ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཚེ་ད་ལྟ་ཆོ་ལེ་གང་ཀ་ སོ་ངོ་བ་ཀི་ གཉེན་ཕིན༌ཅ། ཉི་གཉེན་ཕི་ལེ་ག་ཆོག༌ཅ། 35དག་པ་ཀབ་ཉི་ ཚེ་ཕྱི་མ་ག་དེན་གེ་ ཤི་ཝ་གེ་གསོན་པོ་ཨ་ཉི་ ཝུ་ལེ་རུང་ཁཱན་དང་ ཉོང་ཁཱན་བ་ཀི་ གཉེན་མ་ཕི༌ལ། ཉི་གཉེན་ཕི་ལེ་ཨ་ཉི་མཱན༌ཅ། 36རོག་ཏེ་བ་ ཞིང་ཁམས་ག་འཐེན་པ་བ་ད་བུ་ རི་ཝ་ཨ་དེན་གེ་ ལོག་ཉི་ཤི་ལེ་དག་ཉི་ མཱན༌ཅ། རོག་ཏེ་བ་ཤོ་ དཀོན་མཆོག་ག་ སྲས་སྲས་མོ་ག་བ་གི༌ལ། ཧང་ཡ་དག་ནེ་ལ་ རོག་ཏེ་བ་ཤོ་ གསོན་པོ་ཨ་ཉི་ ཝུ་ཁཱན་བ་གི༌ལ།

37ཉི་བེན་ཀོང་གེ་ མི་དིར་ཁཱན་ག་ རིམ་པང་ནང་ཀ་ ཤི་ཁཱན་བ་ཝུ་ཝ་ཀོར་གེ་ མོ་ས་གི་ཆང་གེན་མ༌ཅ། ཨོ་ཉ་ག་ རོ་ཀི་གཙོ་བོ་ག་ ཨ་བཱརའ་ཧམ་ག་ དཀོན་མཆོག་ ཨི་སག་ག་ དཀོན་མཆོག་ ཉི་ཡ་ཀུབ་ག་ དཀོན་མཆོག་#20:37 ཤོན་དི་ཝ་ག་དཔེ་ཆ་ 3:6 དག་ཉི་ ཞུ་ཝ༌ཅ། 38རོག་ཤོ་ ཤི་ཁཱན་བ་ཀ་ དཀོན་མཆོག་མང་གི་ཝ་ གསོན་པོ་བ་ཀ་ དཀོན་མཆོག་གི༌ལ། ཧང་ཡ་དག་ནེ་ལ་ ཐམས་ཅན་རང་ རོ་ཀ་དེན་གེ་ ཆོན་ཅ་གི་ལ་དག༌ཉི།

39ཉི་བཀའ་ཁྲིམས་ག་ སློབ་དཔོན་ཚེ་བང་གི་ ཞུ་ཝ་ལ་ སློབ་དཔོན་ ནཱན་གི་ལེག་པུ་ཨ་ཉི་ གསུངས་མ་དག༌ཉི། 40ཧང་ཡ་དག་ནེ་ལ་ རོག་ཏེ་བ་ཀི་ ཡི་ཤུ་ག་ དྲི་ཝ་ཨ་ལེ་ག་ ཕོ་མ་ཐོང་མ༌ལ༎

ཡི་ཤུ་ཨི་བི་ག་སྲས་གི་ལ་ཡ།

41དག་པ་ཀབ་ཉི་ རོ་ཀི་ རོག་ཏེ་བ་ཀ་ གསུངས་མ་ལ་ རོག་ཏེ་བ་ཀི་ ཁིརིས་ ད་ཝུད་ག་རྒྱུད་པ་གི་ལ་དག་ཉི་ ཧང་ཏེན་ཡེག་པེ་རེ་ཅ་གི་ས། 42-43ཧང་ཡ་དག་ནེ་ལ་ ད་ཝུད་ རོག་ཏེན་གི་རང་ མགུར་མ་ག་དཔེ་ཆ་ནང་ཀ་ ཡེག་པ༌ཅ་

གཙོ་བོ་གི་ ཇ་ག་གཙོ་བོ་ག་ གསུངས་མ་ ཇི་གི་ ན་ག་དགྲ་བྱང་ཕིཤི་བ་ ན་ག་བི་ཕརའ་ཁ་ མ་ཙུག་པ་སག་པུ་ ནཱན་ ཇ་ག་ལ་ཉོང་ལོ་ཀ་ ལང་ཤོ་#20:42-43 མགུར་མ་ག་དཔེ་ཆ་ 110:1 དག༌ཉི།

44ད་ཝུད་གི་ རོ་ཀ་གཙོ་བོ་ཨ་ཉི་ཞུ་ན། ཉི་ཧང་ཏེན་ཨ་ཉི་ རོ་ཀ་རྒྱུད་པ་ཨོ་ཕེ་ཡ་དག༌ཉི༎

བཀའ་ཁྲིམས་ག་ སློབ་དཔོན་བ་ཀེ་ རིག་པ་སྒྲིམ༌ཅོ།

45ཉི་སོ་ངོ་ཐམས་ཅན་གི་ ཉཱན་ཅ་ཨ་ཉི་ རོ་ཀི་ རོ་ཀ་སློ་མ་བ་ཀ་ གསུངས་མ་ལ་ 46ཕིས་ཀ་དི་ལ་ཀབ་ཉི་ ཏེ་ཙི་མ་ཡོ་ཡེ་ཉི་ ཚོང་ཕི་ས་ག་ཨ་ནེ་ལ་ སོ་ངོ་བ་ཀི་ རོག་ཏེ་བ་ཀ་ ཕྱག་ཏེ་འཚལ་དུ་དག་ཉི་ རེ་ཆ་ཨ་ཁཱན་ ཉི་ཆོས་འཛོམས་ག་ཨ་ནེ་ལ་ རྐང་ཁྲི་ལེག་པུ་ག་ཤ་ ལང་མེ་ག་གོད་ཁཱན་དང་ སྤྲོ་བ་ཙི་ས་བཱརང་ཀ་ཨ་ནེ་ལ་ གུབ་ཀ་ཤ་ ཆོ་ལེ་གོད་ཁཱན་ བཀའ་ཁྲིམས་ག་ སློབ་དཔོན་བ་ཀེ་ རིག་པ་སྒྲིམ༌ཅོ། 47ཉི་མོ་རེན་མ་བ་ཀ་ ཕའི་ཅོམ་ཐཱན་ རང་ཏེན་ལེག་པུ་ ཅོད་པེ་དེན་གེ་ སྨོན་ལམ་རིང་མུ་ཨ་ཉི་ ཏ་པ་ཅོད༌ཅ། རོག་ཏེ་བ་ཀི་ ཁྲིམས་ཐམས་ཅན་གེ་ ཅིད་པུ་ཉོང་པེ་དག༌ཉི༎

Currently Selected:

ལུ་ཀ། 20: TNTB

Highlight

Copy