ལུ་ཀ། 7
7
ཡི་ཤུ་གི་ རོ་མི་དམག་དཔོན་ག་གཡོག་པ་ དྲག་ཉི་གནང་མ༌ལ།
1ཡི་ཤུ་གི་ སོ་ངོ་བ་ཀ་ ཨོ་ཐ་བ་ ཡེ་ཉི་ཆུམ་དེན་གེ་ རོག་ལོག་ཉི་ ཀ་ཕར་ན་ཧུམ་ག་ཏཱན་ བྱོན་མ༌ལ། 2ཉི་ཨོམ་ རོ་མི་ག་དམག་དཔོན་ཐུར་ག་ རོ་ཀི་ཕང་ཁཱན་ གཡོག་པ་ཁེན་རང་ མར་ཉི་ཀ་ལུ་རང་ ཅ་གི་ཝ༌ལ། 3ཉི་རོ་ཀི་ ཡི་ཤུ་ག་ཀོར་གེ་ ན་ཐ་ཉི་ རོ་ཀ་གཡོག་པ་དྲག་ཉི་ གནང་མེ་དེན་གེ་ བྱོན་ཤོ་དག་ཉི་ ཞུ་ལེ་ག་ རོ་ཀི་ཡ་ཧུ་དི་པ་ སོ་ངོ་ཆི་ལུ་ཚེ་བང་ ཀུན་ཏི་ཝ༌ལ། 4རོག་ཏེ་བ་ ཡི་ཤུ་ག་ སྐུན་མདུན་ག་བཅག་ཉི་ ནཱན་ཨིན་ཅི་མིན་ཅི་རང་ བྱོན་མེ་ཁེ༌ལེ། ཉི་རོག་ཤོ་ ནཱན་གི་ རོ་ཀ་དེན་གེ་ ཐུགས་རྗེ་གཟིགས་པེ་ རུང་པ་ག་ སོ་ངོ་ཐུར་གི༌ལ། 5ཧང་ཡ་དག་ནེ་ལ་ རོ་ཀི་ ཨ་ཧ་སོ་ངོ་བ་ ཕང༌ཅ། ཉི་རོ་ཀི་ ཨ་ཧ་དེན་གེ་ ཆོས་འཛོམས་བུ་བཞེངས་ཉི་ གནང་མ་ཅ་དག་ཉི་ ཞུ་ཝ༌ལ།
6ཉི་ཡི་ཤུ་ རོག་ཏེ་བ་ཀབ་ཉི་ བྱོན་མ༌ལ། ཉི་ཡི་ཤུ་ རོ་ཀ་ཕའི་ག་ ད་སུར་མ་ཕེབས་པེ་གོ་མ་ དམག་དཔོན་གི་ རོ་ཀ་ཇ་རོ་བ་ཀ་ ཨོ་ཐེན་ཡེག་པེ་ག་ ཀུན་ཏི་ཝ་ལ་ གཙོ་བོ་ ནཱན་ནཱན་ཏེན་ འོ་མ་བརྒྱལ༌ཤོ། ཧང་ཡ་དག་ནེ་ལ་ ཇང་ཤོ་ ཇི་གི་ ནཱན་ཇ་ག་ཕའི་ནང་ཀ་ ཞུ་ལེ་མ་རུང་ཁཱན་ སོ་ངོ་ཐུར་གི༌ལ། 7ཨོ་ཉི་ཨ་དེན་གེ་ ཇང་ཇང་ཏེན་གི་ ན་ག་སྐུན་མདུན་ག་ བཅག་པེ་མར་ཤི། ཉི་ནཱན་གི་ཚིག་ཐུར་ཤ་ གསུངས་ཤོ་ ཉི་ཇ་ག་གཡོག་པ་ དྲག་པེ་གི༌ལ། 8ཧང་ཡ་དག་ནེ་ལ་ ཇང་བུ་ དབང་ཚད་ག་ ཕརའ་ཁ་ཐ་ཁཱན་ སོ་ངོ་ཐུར་གི༌ལ། ཇ་ག་དབང་ཚད་ག་ཕརའ་ཁེ་ དམག་མི་བ༌ཅ། ཇི་གི་ཐུར་ག་ཏཱན་ དི་དག་ཉི་ ཡེག་པ་ཀབ་ཉི་ དིན༌ཅ། ཉི་ཨོམ་ཐུར་ག་ ཨོ་དོ་དག་ཉི་ ཡེག་པ་ཀབ་ཉི་ ཨུན༌ཅ། ཉི་ཇ་ག་གཡོག་པ་ག་ ཨའི་དག་ཉི་ཡེག་པ་ཀབ་ཉི་ ཨན་ཅ་དག༌ཉི།
9ཡི་ཤུ་གི་ ཨོ་ཐ་བ་ སྙན་གསེང་ཉི་ གནམ་མེད་ས་མེད་ ཡིད་ཆི་ཉི་ གིར་ཐཱན་ སོ་ངོ་མང་ཀེ་ཅཱད་ཉི་ རོ་ཀ་ཞབས་ཏོག་ཞུ་ཁཱན་བ་ཀ་ གསུངས་མ་ལ་ ཇི་གི་ ན་ཧ་ཡེག་པེ་ ཨིས་རེལ་ག་ཆང་ ཨོ་ཐ་དད་པ་ད་བུ་ ཇི་གི་མ་ཐོང་ཤི་དག༌ཉི། 10ཉི་ཡི་ཤུ་ག་སྐུན་མདུན་ག་ བཅག་ཁཱན་བ་ ཕའི་ག་དི་ཉི་ གོད་པ་ཀབ་ཉི་ གཡོག་པ་དྲག་པ་ཆོ་ཝ༌ལ༎
ཡི་ཤུ་གི་ མོ་རེན་མ་ག་ཟ་ ཤི་ཝ་གེ་ཝུ་ཉི་གནང་མ༌ལ།
11ཉི་ཚི་ངེ་ ཁྲོམ་ནའིན་དག་ཁཱན་ག་ཏཱན་ བྱོན་མ༌ལ། ཉི་རོ་ཀ་སློ་མ་དང་ སོ་ངོ་མང་པུ་ཐུར་ རོ་ཀ་ཞབས་ཏོག་ཞུ་ཉི་ དི་ཝ༌ལ། 12ཉི་རོག་ ཨོ་ཉ་ཁྲོམ་སྒོ་རེ་ཁ་ར་ག་ ཕེབས་པ་ཀབ་ཉི་ ཨ་མ་ཐུར་ག་ ཟ་ཐུར་ཨ་ཝ་ཆོ་ཁཱན་ཁེ་པ་ ཤི་ཉི་ རོ་ཕཱན་ཅ་གི་ཝ༌ལ། ཉི་ཨོ་ཉ་ཨ་མ་ཤོ་ མོ་རེན་མ་གི་ཝ་ཆོ་ཝ༌ལ། ཉི་ཨོ་ཉ་ཁྲོམ་ག་ཆོ་ཁཱན་ སོ་ངོ་བ་མང་པུ་ཐུར་ རོག་ཀབ་ཉི་ཅ་གི་ཝ༌ལ། 13ཉི་གཙོ་བོ་ མོ་རེན་མ་ག་གཟིགས་ཉི་ ཕང་པེ་ཨུ་ཉི་ རོ་ཀི་ རོ་ཀ་མ་གེབ་ཅོ་དག་ཉི་ གསུངས་མ༌ལ། 14ཉི་རོག་བྱོན་ཐཱན་ རོ་སྒྲོམ་ག་ཐོ་ཕ་ཀབ་ཉི་ རོ་བང་ཁཱན་བ་ ནོང་མ༌ལ། ཉི་རོ་ཀི་ དབའི་ ཡམ་ལང་ ཝུའི་དག་ཉི་ གསུངས་མ༌ལ། 15ཤི་ཁཱན་སོ་ངོ་ ལོག་ཉི་དངོས་སུ་ཨ་ཉི་ ཝུ་ཉི་ ནོ་ཝང་ཆོག་པེ་ གོ་ཙུག་པ༌ལ། ཉི་རོ་ཀི་ལོག་ཉི་ རོ་ཀ་ཨ་མ་ག་གནང་མ༌ལ།
16རོག་ཏེ་བ་ ཐམས་ཅན་རང་ ཡོང་ཁེ་ཝ༌ལ། ཉི་དཀོན་མཆོག་ག་ བསྟོད་པ་ཕུལ་ཉི་ ལུང་བསྟན་པ་ཆི་ལུ་ཐུར་ ཨ་ཧ་པོང་ཀ་བྱོན་ཉི་ རོ་ཀ་སོ་ངོ་བ་ཀ་ སྐྱབས་ཨ་ལེ་ག་ དཀོན་མཆོག་བྱོན་མ་དག་ཉི་ ཞུ་ཝ༌ལ། 17ཉི་རོ་ཀི་ ཧང་ད་བུ་མཛད་ཉི་ གནང་མ་གི་ལ་སྨོ་ ཨོ་ཉ་ཀོར་གེ་ ཚང་ཟིང་ཉི་ ས་ཆ་ཡ་ཧུ་དི་ཡ་དང་ ཨོ་ཉ་ཀོ་ལོ་ལོ་ཆོ་ཁཱན་དུང་ ཐམས་ཅན་རང་ ཆ་པ༌ལ༎
ཡི་ཤུ་དང་ ཁྲུས་གསོར་པ་ཡུ་ཧན་ན།
18ཉི་ཁྲུས་གསོར་པ་ ཡུ་ཧན་ན་ག་ སློ་མ་བ་ཀི་ ཨོ་ཐ་ཀོར་གེ་ ཐམས་ཅན་རང་ བཙོན་ཁང་ག་དི་ཉི་ ཡུ་ཧན་ན་ག་ ཞུ་ཝ༌ལ། 19ཉི་ཡུ་ཧན་ན་གི་ རོ་ཀ་སློ་མ་ཉིག་ཙིང་ རཱན་ཐཱན་ བྱོན་མེ་དག་ཁཱན་ ནཱན་རང་གི་ལ་སྨོ་ ཨའི་བཱརའ་ཐུར་ག་ ནོང་མེ་ཡ་དག་ཉི་ ཇི་མེ་དེན་གེ་ གཙོ་བོ་ག་སྐུན་མདུན་ག་ ཀུན་ཏི་ཝ༌ལ།
20ཉི་རོག་ཉིག་ཙིང་ ཡི་ཤུ་ག་སྐུན་མདུན་ག་བཅག་ཉི་ ཞུ་ཝ་ལ་ ཨ་ཆིང་ཁྲུས་གསོར་པ་ ཡུ་ཧན་ན་གི་ བྱོན་མེ་དག་ཁཱན་ ནཱན་རང་གི་ལ་སྨོ། ཨའི་བཱརའ་ཐུར་ག་ ནོང་མེ་ཡ་དག་ཉི་ ཇི་མེ་དེན་གེ་ ན་ག་སྐུན་མདུན་ག་ ཀུན་ཏི་ཝ་གི་ལ་དག༌ཉི།
21ཉི་ཨུ་ཉུ་གང་ཀ་ རོ་ཀི་ ན་ཚ་མང་པུ་ཐུར་དང་ རེམ་པ་དང་ ན་ཚ་ཁེ་ཉི་མར་ཁཱན་བ་ ཉི་རྣམ་ཤེས་མ་ཙང་མ་གི་ ནོད་ཁཱན་བ་དྲག་ཉི་ གནང་མ་མ་ཚཱད་པ་ མིང་ཀ་ན་མང་པུ་ཐུར་ག་ མིང་གནང་མ༌ལ། 22ཉི་ཡི་ཤུ་གི་ རོག་ཉིག་ཙིང་ག་ གསུངས་མ་ལ་ ལོག་ཉི་དིན་ཐཱན་ ན་ཆིང་གི་ཐོང་ཁཱན་དང་ ན་ཐ་ཁཱན་ཀོར་གེ་ ཡུ་ཧན་ན་ག་ཡེག༌ཅོ། མིང་ཀ་ན་བ་ཀི་ ཐོང༌ལ། དང་མེ་མར་ཁཱན་བ་ཀི་ དང༌ལ། ཀླུ་ནད་ཟུན་ཁཱན་བ་དྲག་ཉི་ ཧིང་སང་ཀིན་རི་ན། ན་ཏོ་ར་བ་ཀི་ ན་ཐ་ན། ཤི་ཁཱན་བ་ ལོག་ཉི་ཝུ་ན། ཉི་དུག་པུ་བ་ཀ་ འཐེན་ལེག་པུ་ཀོར་གེ་ བཤད་ལ་དག༌ཉི། 23ཇ་ག་ཐུང་ཀ་ དོགས་པ་མ་སག་ཁཱན་བ་ བྱིན་རླབས་ཆི་ལུ་ཉོང་པེ་དག་ཉི་ གསུངས་མ༌ལ།
24ཉི་རོག་ཉིག་ཙིང་དི་དེན་གེ་ ཡི་ཤུ་གི་ སོ་ངོ་བ་ཀ་ ཡུ་ཧན་ན་ཀོར་གེ་ གསུངས་མེ་གོ་ཙུག་པ༌ལ། ན་ཧ་བ་ ས་ཏོང་པ་ནང་ཀ་ ཧང་ལམ་ཉི་ དི་ཝ་ཆོ་ཝ་ཡ། ཧང་ རི་དི་གི་ཝག་ཁཱན་སེ་ཙམ་ གོད་པེ་དི་ཝ་སྨོ། 25ཉི་ན་ཧ་བ་ ཕིས་ཀ་ཧང་གོད་པེ་ དི་ཝ་ཆོ་ཝ་ཡ། ཧང་ བུ་རེ་ཁ་མུང་ཡེ་ཁཱན་ གོད་པེ་ག་དི་ཝ་སྨོ། མང་གི་ ཨུ་ཉུ་ད་བུ་ཡེ་ཁཱན་དང་ ཧང་གེ་རང་ མ་ཀོན་མ་ཨ་ཉི་ཆོ་ཁཱན་ཤོ་ དཔོན་ག་ཕོ་བྲང་ག་ཤ་ཨུན༌ཅ། 26ཨུ་ཉུ་མང་གི་ནེ་ལ་ ན་ཧ་བ་ ཕིས་ཀ་ ཧང་གོད་པེ་དི་ཝ་ཡ། ལུང་བསྟན་པ་སྨོ། གི་ལ་ དེན་མེ་ ཇི་གི་ ན་ཧ་ཡེག་པེ་ རོག་ཤོ་ ལུང་བསྟན་པ་གེ་བུ་ ཆི་ལུ་གི༌ལ། 27རོག་ཤོ་ ན་ག་ལམ་ཟང་མེ་དེན་གེ་ ཇི་གི་ ཇ་ག་འཐེན་བུ་ཁཱན་ ནཱན་གེ་གུམ་གུམ་ ཀུན་ཏི་ལེ་#7:27 མ་ལ་ཀི་ག་དཔེ་ཆ 3:1 དག་ཉི་ གསུང་རབ་ནང་ཀ་ འབྲི་ཁཱན་ཁེ་པ་གི༌ལ། 28ཇི་གི་ ན་ཧ་ཡེག་པེ་ མེ་ཝག་ཙ་བ་ཀེ་ སིང་ཁཱན་གེ་ ཐམས་ཅན་གེ་ཆི་ལུ་ ཡུ་ཧན་ན་གི༌ལ། དག་པ་ཀབ་ཉི་ དཀོན་མཆོག་ག་ རྒྱལ་སྲིད་ག་ཆོ་ཁཱན་ ཟེ་མུ་ཐུར་བུ་ རོ་ཀེ་ཆི་ལུ་གི་ལ་ན་དག་ཉི་ གསུངས་མ༌ལ།
29ཨོ་ཐེན་ན་ཐ་ལ་ཀབ་ཉི་ ཁྲལ་ཐེབ་དུས་ཁཱན་གེ་ གོ་ཙུག་ཉི་ སོ་ངོ་ཐམས་ཅན་གི་ ཡུ་ཧན་ན་གེ་ ཁྲུས་གསོར་ལ་ཝ་ཨ་དེན་གེ་ དཀོན་མཆོག་གི་ གསུངས་ཁཱན་ཁེ་པ་ དེན་པ་གི་ཝ་ལ་དག་ཉི་ ཧ་གོ་ཝ༌ལ། 30དག་པ་ཀབ་ཉི་ ཕ་རི་སི་པ་བ་དང་ བཀའ་ཁྲིམས་ག་ སློབ་དཔོན་བ་ཀི་ ཡུ་ཧན་ན་གེ་ ཁྲུས་གསོར་མ་ལ་ལཱན་ རོག་ཏེ་བ་ཀ་ཐུང་ཀ་ཆོ་ཁཱན་ དཀོན་མཆོག་ག་ འཆར་གཞི་ཁེ་པ་ མ་ཞུ་ཝ༌ལ།
31ཉི་ཇི་གི་ ཨོ་ཐ་སོ་ངོ་བ་ ཧང་ཀབ་ཉི་རེ་ཉི་ གོད་པེ་ཡ། རོག་ཏེ་བ་ ཧང་ད་བུ་ལ་ཡ། 32རོག་ཏེ་བ་ཤོ་ ཚོང་ཕི་ས་བཱརང་ཀ་ལང་ཉི་ ཐུར་གི་ཐུར་ག་ ར་ཉི་ཆོ་ཁཱན་ ཝག་ཙ་བ་ ད་བུ་ཐུར་གི་ཝ༌ལ། ཨ་ཤི་ ནམ་བུརུང་ཐེད་ནེ་བུ་ ན་ཤི་ ངང་བོརོ་མ་ཇོང་ཤི། ཉི་ཨའི་ སྐྱིད་སྡུག་ཁེ་ཉི་ གེབ་ནེ་བུ་ ན་ཧ་མིང་གེ་ མིང་རི་མ་ཤོན་ཤི། 33ཁྲུས་གསོར་པ་ཡུ་ཧན་ན་ ལྟོ་མ་ཟ་ལཱན་ ཞུ་མ་ཇ་མཱན་ཨོ་ཕ། ཉི་ན་ཤི་ཡེག་པ་ རོ་ཀ་ནང་ཀ་ དོན་ནུ་ཕ་ལ་དག༌ཉི། 34ཉི་སོ་ངོ་ག་ཟ་ ཟ་ཉི་ཇམ་ཉི་ ཨོ་ཕ་ཀབ་ཉི་ ན་ཤི་ ཨོ་ཐ་སོ་ངོ་ ཞུ་ཇམ་ཁཱན་ཏོ་ལི་ ཁྲལ་ཐེབ་དུས་ཁཱན་དང་ བཱརའ་སྡིག་ཅན་བ་ཀ་ ཇ་རོ་དག་ཉི་ཡེག༌ལ། 35ཨོ་ཉེ་རང་གི་ནེ་བུ་ དཀོན་མཆོག་ག་ རིག་པ་ཤོ་ རོག་ཞུ་ཁཱན་བ་ཀི་ དེན་པ་གི་ལ་ཨ་ཉི་ ཁུངས་ཀེ་ཅ་དག་ཉི་ གསུངས་མ༌ལ༎
སྡིག་ཅན་མེ་ཝག་ཙ་ བཀའ་དྲིན་བསྐྱང་མ༌ལ།
36ཉི་ཕ་རི་སི་པ་ཐུར་གི་ ཡི་ཤུ་ རོ་ཀ་ཕའི་ག་ རོག་ཀབ་ཉི་ གསོལཝ་བཞེས་ལེ་དེན་གེ་ཞུ་ཉི་ ཕ་རི་སི་པ་ག་ཕའི་ག་ བཞུགས་པེ་གང་ཀ་ 37ཁྲོམ་ག་ སྡིག་པ་ཨ་ཉི་ཆོ་ཁཱན་ མེ་ཝག་ཙ་ཐུར་གི་ ཡི་ཤུ་ ཕ་རི་སི་པ་ག་ཕའི་ག་ བཞུགས་པ་ག་སེ་ཉི་ ལུང་གི་ཅོད་པ་ག་ ཏེ་ཀེ་ལིང་ག་ནང་ཀ་ དྲི་བཟང་ཕ་ཉི་ ཨུན་ཐཱན་ 38རོ་ཀ་སྐུ་རྒྱབ་ཀེ་ཨ་ཉི་ ཞབས་ར་ག་ཐིང་ཐཱན་ གེབ་ཉི་མིང་རི་གི་ཨ་ཉི་ ཡི་ཤུ་ག་ཞབས་ཟིག་ཉི་ རོ་ཀ་ཚམ་གི་ཨ་ཉི་ ཕག་པ༌ལ། ཉི་ཡི་ཤུ་ག་ཞབས་ག་ ཅུབ་ཨན་ཐཱན་ ཉི་ཨོ་ཉ་དྲི་བཟང་སི་གི་ རོ་ཀ་ཞབས་ག་སོག་པ༌ལ།
39ཉི་རོག་ཞུ་ཁཱན་ ཕ་རི་སི་པ་གི་ཐོང་ཉི་ རོག་ རོག་ཏེན་ག་ ཡེག་པ་ལ་ དཱན་ལུང་བསྟན་པ་གི་ནེ་ལ་ རོག་ཐོབ་ཁཱན་ མེ་ཝག་ཙ་ཁེ་པ་ ཨི་བི་གི་ལ་སྨོ་ ཧང་ཨ་ཉི་ཆོན་ཅ་སྨོ་ དཱན་གི་སེ་དུ། ཨོ་ཐ་མེ་ཝག་ཙ་ སྡིག་ཅན་གི་ལ་དག༌ཉི།
40ཡི་ཤུ་གི་ལན་གནང་ཉི་ སི་མོན་ ཇི་གི་ ན་ག་ཧང་ཐུར་ ཡེག་པེ་ཅ་དག་ཉི་ གསུངས་མ༌ལ།
ཉི་རོ་ཀི་ ཧང་གི་ལ་ཡ་ སློབ་དཔོན་དག་ཉི་ ཞུ་ཝ༌ལ།
41སྦྱིན་བདག་ཐུར་ག་ རམ་པ་ཉིག་ཙིང་ཆོ་ཝ༌ལ། ཉི་ཐུར་གི་ཤོ་ ད་ཡང་ 500 ཆི་ཝ༌ལ། ཉི་ཐུར་གི་ཤོ་ 50 ཆི་ཝ༌ལ། 42ཉི་རམ་ཏ་པེ་ མར་བ་ཨ་དེན་གེ་ རོག་ཉིག་ཙིང་རང་ དགོངས་ཡངས་ཉོང་པ༌ལ། ཉི་ཨོམ་ རོག་རམ་པ་ཉིག་ཙིང་གེ་ ཨི་བི་གི་ མང་པུ་ཕང་པེ་ཡ་དག་ཉི་ གསུངས་མ༌ལ།
43ཇི་གི་ གོད་པ་ཀབ་ཉི་ མང་པུ་ཏ་པེ་ཆོ་ཁཱན་གི་ མང་པུ་ཕང་པེ་དག་ཉི་ སི་མོན་གི་ ཞུ་ལ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ནཱན་གི་ཕྲིག་ཀིན་ཡེག་པ་དག༌ཉི། 44ཉི་མེ་ཝག་ཙ་ལོ་ཀ་ཏཱན་ གིར་ཐཱན་ རོ་ཀི་སི་མོན་ག་ གསུངས་མ་ལ་ ནཱན་གི་ ཨོ་ཐ་མེ་ཝག་ཙ་ ཐོང་ལ་སྨོ། ཇང་ན་ག་ཕའི་ནང་ཀ་ཨོ་ཕ། ནཱན་གི་ ཇ་ག་བི་ཟིག་པེ་ག་ རི་ཐུར་རང་མ་གཱན་ཤི། དག་པ་ཀབ་ཉི་ རོ་ཀི་ རོ་ཀ་མིང་རི་གི་ཨ་ཉི་ ཇ་ག་བི་ཟིག་ཐཱན་ རོ་ཀ་ཚམ་གི་ཨ་ཉི་ཕག༌པ། 45ནཱན་གི་ ཇང་ཅུབ་མ་ཨན་ཤི་ དག་པ་ཀབ་ཉི་ རོ་ཀི་ ཇང་ཤེག་ཏེན་ཐུར་གེ་ག་ཏཱན་ ཇ་ག་བི་ག་ ཅུབ་ཨ་ལེ་མ་ནོར་ཤི། 46ནཱན་གི་ ཇ་ག་ཤ་རང་ག་ སི་མ་སོག་ཅི། དག་པ་ཀབ་ཉི་ རོ་ཀི་དྲི་བཟང་སི་གི་ཨ་ཉི་ ཇ་ག་བི་ག་སོག༌པ།
47ཨོ་ཉི་ཨ་དེན་གེ་ ཇི་གི་ ན་ག་ཡེག་པེ་ རོ་ཀ་སྡིག་པ་ མང་པུ་ཆོ་ཁཱན་བ་ མང་པུ་ཕང་པ་ཨ་དེན་གེ་ བཀའ་དྲིན་བསྐྱང༌མ། ཉི་ད་སུར་ བཀའ་དྲིན་བསྐྱང་ཁཱན་བ་ ད་སུར་ཤ་ ཕང་ཅ་གི་ལ་ཨ་ཉི་ གེན་ཅ་དག་ཉི་ གསུངས་མ༌ལ། 48ཉི་རོ་ཀི་ ཨོ་ཉ་མེ་ཝག་ཙ་ག་ ན་ག་སྡིག་པ་བ་ བཀའ་དྲིན་བསྐྱང་མ་དག་ཉི་ གསུངས་མ༌ལ།
49ཉི་ཨོ་ཉ་ལང་ཁཱན་བ་ཀི་ རོག་ཏེ་བ་ནང་དོ་ ཆཱས་ཨ་ཉི་ སྡིག་པ་བུ་ བཀའ་དྲིན་བསྐྱང་མེ་རེ་ཁཱན་ ཨུ་ཐུ་ ཨི་བི་གི་ལ་ཡ་དག་ཉི་ ཡེག་པ༌ལ།
50ཉི་རོ་ཀི་ ཨོ་ཉ་མེ་ཝག་ཙ་ག་ ན་ག་དད་པ་གི་ ནཱན་ཐར་པ་ཉོང་པ་ན། སྐྱིད་པུ་ཨ་ཉི་ ཤོ་ནང་ཕེ་ཉི་ ཇོང་ཤོ་དག་ཉི་ གསུངས་མ༌ལ༎
Currently Selected:
ལུ་ཀ། 7: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
