ལུ་ཀ། 8

མེ་ཝག་ཙ་མང་པུ་ཐུར་གི་ ཡི་ཤུ་ག་ཕྱག་ཞུ་ཝ༌ལ།

1ཉི་རེབ་ཀིན་ཐུར་ག་ཚི་ངེ་ ཡི་ཤུ་ ཁྲོམ་དང་དུང་ཁོན་བྱོན་ཉི་ དཀོན་མཆོག་ག་རྒྱལ་སྲིད་ག་ འཐེན་ལེག་པུ་ཀོར་གེ་ ཡེ་ཉི་གནང་མ༌ལ། ཉི་རོ་ཀ་ སྐུ་ཚབ་སོང་ཉིག་ཙིང་བུ་ རོག་ཀབ་ཉི་ ཅ་གི་ཝ༌ལ། 2ཉི་མེ་ཝག་ཙ་ཚེ་བང་ རྣམ་ཤེས་མ་ལེག་པ་དང་ ན་ཚ་གི་ཙུང་ཉི་ མར་ཁཱན་བ་དྲག་ཉི་ གནང་ཁཱན་བ་ཀ་པོང་ཀེ་ ཡི་ཤུ་གི་ མེ་ཝག་ཙ་ཐུར་གེ་ དོན་ཟུམ་ཤོ་ཉི་གེམ་ཁཱན་ མག་ད་ལི་ནི་དག་ཁཱན་ མ་རི་ཡམ་དང་ 3ཧེ་རོད་ག་གཉེར་པ་ ཁུ་ཇཱས་ག་མེ་ཝག་ཙ་ ཡོ་ཨན་ན་ ཉི་སུ་སན་ན་དག་ཁཱན་དང་ བཱརའ་མེ་ཝག་ཙ་ མང་པུ་ཐུར་ཅ་གི་ཝ༌ལ། ཉི་རོག་ཏེ་བ་ཀི་ རང་རང་ས་ འབབ་ཁུངས་དང་ཏུ་ཉི་ ཡི་ཤུ་དང་ རོ་ཀ་སློ་མ་བ་ཀ་ ཇ་རོ་ཨན་ཅ་གི་ཝ༌ལ༎

ལི་ཡབ་ཁཱན་ག་དཔེ་གཏམ།

4ཉི་ནོང་ཐུར་ ཁྲོམ་ཐམས་ཅན་ག་ སོ་ངོ་བ་ཨུ་ཉི་ སོ་ངོ་མང་པུ་ཐུར་ རོ་ཀ་སྐུན་མདུན་ག་ ཛོམ་ཉི་ཕ་ཝ༌ལ། ཉི་རོ་ཀི་ དཔེ་གཏམ་ག་ཐུང་ཀེ་ཨ་ཉི་ གསུངས་མེ་གོ་ཙུག་པ་ལ་ 5ལའི་པ་ཐུར་ རོ་ཀ་ལི་ཡ་ཕེ་ག་ དི་ཝ༌ལ། རོ་ཀི་ལི་ཡ་ཕ་ཀབ་ཉི་ ལི་ཚེ་བང་ ལམ་བར་ཀ་ཁེ་ཝ་ཨ་དེན་གེ་ སོ་ངོ་བ་ཀི་ བི་ཏབ་ཉི་རང་ བུ་ཝ༌ལ། ཉི་ངབ་ཀེ་ཕེན་ཁཱན་ ཁ་བ་ཀི་དུང་ཉི་ ཟཱན་ཐ་ཝ༌ལ། 6ཉི་ལི་ཚེ་བང་ ལུང་ཐུང་ཀ་ ས་ད་ཟེ་རེ་ཆོ་ས་ག་ཁེ་ཉི་ ག་ཟོག་ཉི་ཆོ་ལ་རང་ རི་མ་ཝ་ཨ་དེན་གེ་ ཤི་ཝ༌ལ། 7ཉི་ལི་ཚེ་བང་ ཟུ་ག་པོང་ཀ་ཁེ་ཉི་ ཟུ་བུ་ཏབ་ཐུར་ལིག་པ་ཨ་དེན་གེ་ ཟུ་གི་ཨ་ཉི་ སེ་སེ་ལེ་མ་བི་ཝ༌ལ། 8ཉི་ལི་ཚེ་བང་ ས་ལེག་པུ་ག་ ཁེ་ཝ་ཨ་དེན་གེ་ ཟོག་ཉི་ཐམས་ཅན་གི་ སེ་ 100 རེ་ 100 རེ་སེ་ཝ༌ལ། ཉི་ཨོ་ཐེན་གསུངས་ཉི་ ཆུ་མ་ཐུར་ག་རང་ ཉཱན་པེ་ག་ན་ཆོ་ཁཱན་བ་ ཉཱན་ཅོ་དག་ཉི་ གསུང་སྐད་ཆི་ལུ་ཨ་ཉི་ གསུངས་མ༌ལ༎

དཔེ་གཏམ་ག་ཇུང་ཚེན།

9ཉི་རོ་ཀ་སློ་མ་བ་ཀི་ ཨོ་ཐ་དཔེ་གཏམ་ག་དེན་ཐ་ ཧང་གི་ལ་ཡ་དག་ཉི་ རོ་ཀ་ཞུ་ལ་ཀབ་ཉི་ 10དཀོན་མཆོག་ག་རྒྱལ་སྲིད་ག་ གུམ་ནང་ཡོན་ཏན་ཁེ་པ་ ན་ཧ་བི་ཝ༌ཅ། ཉི་བཱརའ་ག་གི་ནེ་ལ་ དཔེ་གཏམ་ག་ཐུང་ཀེ་ཨ་ཉི་གི༌ལ། ཧང་ཡ་དག་ནེ་ལ་ རོག་ཏེ་བ་ཀི་ གོད་ནེ་བུ་ མ་ཐོང༌མ། ཉི་ཉཱན་ནེ་བུ་ ཧ་མ་གོ་ལ་#8:10 ཡ་ཤའི་ཡ་ག་དཔེ་ཆ་ 6:9 དག་ཉི་ གསུངས་མ༌ལ༎

དཔེ་གཏམ་ག་དེན་ཐ་ ཁྲེ་ཉི་གནང་མ༌ལ།

11དཔེ་གཏམ་ག་དེན་ཐ་ཤོ་ ཨོ་ཐེན་གི༌ལ། ལི་ཤོ་ དཀོན་མཆོག་ག་ གསུང་གི༌ལ། 12ཉི་ལམ་ག་ཁེ་ཁཱན་ ལི་ག་བ་ཤོ་ ཉཱན་ཁཱན་སོ་ངོ་བ་གི༌ལ། དག་པ་ཀབ་ཉི་ དད་པ་མ་ཨ་ལཱན་ ཐར་པ་མ་ཉོང་ཅེན་དག་པ་གི་ བདུད་ཨུན་ཐཱན་ རོག་ཏེ་བ་ཀ་ ཐིང་ལོམ་ནང་ཀེ་ གསུང་ཤོ་ཉི་བུན༌ཅ། 13ཉི་ལུང་ཐུང་ཀ་ ས་ད་ཟེ་རེ་ཆོ་ཁཱན་ག་ཁེ་ཁཱན་ ལི་ག་བ་ཤོ་ གསུང་ན་ཐ་ལ་ཀབ་ཉི་ གནམ་མེད་ས་མེད་ ཤོ་ནང་ཕེ་ཉི་ ཞུ་ཁཱན་བ་གི༌ལ། རོག་ཏེ་བ་ཀ་ ཙ་མ་དཱན་མ་ཨ་དེན་གེ་ རེབ་ཀིན་ཐུར་ཤ་ དད་པ་ཨ༌ལེ། ཉི་བར་ཆད་ཇུང་མ་ཀབ་ཉི་ རོག་ཏེ་བ་ རོ་ཁེ་ཇོང༌མེ། 14ཟུ་ག་པོང་ཀ་ཁེ་ཁཱན་ ལི་ག་བ་ཤོ་ ཉཱན་ཁཱན་སོ་ངོ་གི༌ལ། དག་པ་ཀབ་ཉི་ བག་ཆགས་དང་ རྒྱུ་ཅ་ལ་ ཉི་དགའ་སྤྲོ་ཨོ་ཉ་བ་ བང་ཆི་ཉི་ རོག་ཏེ་བ་ཀ་སེ་ ཧ་ལ་རང་མ་མིན༌པ། 15ས་ལེག་པུ་ཐུང་ཀ་ཁེ་ཁཱན་ ལི་ག་བ་ཤོ་ གསུང་ན་ཐ་དེན་གེ་ སེམས་ཀ་ཐ་ཉི་ དམ་ཚིག་ཙུང་ཉི་ ཕྱག་ཞུ་ཁཱན་བ་གི༌ལ། སེ་མ་སེ་ཝ་སག་པུ་ ཙ་དྲེག་ཉི་རང་ཆོ༌ལེ༎

ལ་ཝང་ ག་ཙ་ཐུང་ཀ་ཐཱན༌ཅ།

16ལ་ཝང་ཐོག་ཐཱན་ ཨི་བི་གི་རང་ ཁཝ་གི་བུག་ཉི་ ཐ་ལུ་མཱན༌ཅ། ཉི་པ་ལང་ཕརའ་ཁ་བུ་ ཐ་ལུ་མཱན༌ཅ། ནང་ཀ་ཨུ་ཁཱན་གི་ འོད་ཟེར་ཐོང་མེ་དེན་གེ་ ག་ཙ་ཐུང་ཀ་ཀེ་ཉི་ཐཱན༌ཅ། 17མ་སེ་ཝ་ཨ་ཉི་གུམ་ཉི་ ཐ་ལེ་རེ་ཁཱན་ ཧང་རང་མཱན༌ཅ། ཉི་མ་ཐོང་མ་ཨ་ཉི་བུག་ཉི་ མེར་བུ་ནང་ཀ་ ཐ་ལེ་རེ་ཁཱན་བུ་ ཧང་རང་མཱན༌ཅ།

18ནའི་ ཧང་ཏེན་ཉཱན་ཅ་གི་ལ་སྨོ་ རིག་པ་སྒྲིམ༌ཅོ། ཧང་ཡ་དག་ནེ་ལ་ ཇི་གི་ཡེ་ཁཱན་བ་ ལེག་པཱན་ཉཱན་ཁཱན་བ་ཀ་ ཡོན་ཏན་མང་པུ་བི༌ལེ། ཉི་ལེག་པཱན་ མ་ཉཱན་ཁཱན་བ་ཀེ་ རོག་ཏེ་བ་ཀི་ ཡོན་ཏན་ད་སུར་ཅ་ཨ་ཉི་ མི་ཁཱན་བུ་ བུ་ལེ་གི་ལ་དག་ཉི་ གསུངས་མ༌ལ༎

ཡི་ཤུ་ག་ཡུམ་དང་ བོ་ཉིང༌བ།

19ནོང་ཐུར་ རོ་ཀ་ཡུམ་དང་ བོ་ཉིང་བ་ ཨོ་ཕ་ཀབ་ཉི་ སོ་ངོ་གནམ་མེད་ས་མེད་ ཛོ་མ་ཨ་དེན་གེ་ རོ་ཀ་སྐུན་མདུན་ག་ བཅག་པེ་མར་བ༌ལ། 20ཉི་སོ་ངོ་ཐུར་གི་ ཡི་ཤུ་ག་ སློབ་དཔོན་ ན་ག་ཡུམ་དང་ བོ་ཉིང་བ་ ཕིས་ཀ་ནོང་མ༌ལ། ནཱན་རུ་མེ་དང་དག་ཉི་ ཞུ་ལ་ཀབ་ཉི་ 21དཀོན་མཆོག་ག་ གསུང་ཉཱན་ཐཱན་ ཨུ་ཉུ་དང་ཏུ་ཉི་ ཨ་ཁཱན་བ་བུ་ ཇ་ག་ཨ་མ་དང་ བོ་ཉིང་བ་ ད་བུ་རང་གི་ལ་ན་དག་ཉི་ རོ་ཀི་ རོག་ཏེ་བ་ཀ་གསུངས་མ༌ལ༎

ཡི་ཤུ་གི་ཆུར་ཆུར་བ་དང་ མཚོ་རི་ལག་ཁཱན་ཁག་པ༌ལ།

22ནོང་ཐུར་ ཡི་ཤུ་ རོ་ཀ་སློ་མ་བ་ཀབ་ཉི་ གྲུ་ནང་ཀ་བྱོན་ཐཱན་ ཨ་ཧ་བ་ ཨོ་ཐ་མཚོ་གོག་ཉི་ ཉ་ལོ་ཀ་ལོ་ཀ་ཏཱན་ དི་ཁེ་དག་ཉི་གསུངས་ཉི་ བྱོན་མེ་གོ་ཙུག་པ༌ལ། 23ཉི་རོག་ཏེ་བ་ གྲུ་ག་བྱོན་མ་ཀབ་ཉི་ ཡི་ཤུ་གཟིམ་མ༌ལ། ཉི་ཡིད་ཀ་རྣམ་རྟོག་མ་ཝ་ མཚོ་ག་རི་དི་ ཤུག་ཨན་ཨུ་ཉི་ མཚོ་རི་ལག་པ་ཀབ་ཉི་ རི་གི་ རོག་ཏེ་བ་ཀ་ གྲུ་ཕུང་ཉི་རང་ཕ་ཉི་ རོག་ཏེ་བ་ཀ་དེན་གེ་ ཉེན་ཁ་ཆི་ལུ་རི་ཝ༌ལ།

24ཉི་རོག་ཏེ་བ་དི་ཉི་ ཡི་ཤུ་ཚོར་ཐཱན་ སྦྱིན་བདག་ སྦྱིན་བདག་ ཨའི་ཤི་ལེ་ཅམ་ལ་དག་ཉི་ ཞུ་ཝ༌ལ།

ཉི་རོག་བཞེངས་ཐཱན་ རི་དི་དང་ མཚོ་རི་ལག་ཁཱན་ག་ བཀའ་གནང་མ་ཀབ་ཉི་ རི་དི་ཨོ་ཕེ་ནོར་ཉི་ མཚོ་རི་མ་ལག་པཱན་ ཁམས་སངས་ཀིན་ རི་ཝ༌ལ། 25ཉི་རོ་ཀི་ རོག་ཏེ་བ་ཀ་ གསུངས་མ་ལ་ ན་ཧ་དད་པ་ ཨོ་ག་ཡ་དག༌ཉི། དག་པ་ཀབ་ཉི་ རོག་ཏེ་བ་ ཡོང་ཁེ་ཉི་ ཡིད་ཏེ་བུ་ཆི་ཉི་ ཐུར་གི་ཐུར་ག་ཆཱས་ཨ་ཉི་ ཨོ་ཐ་སོ་ངོ་ ཨི་བི་གི་ལ་ཡ། རོ་ཀི་རི་དི་དང་ མཚོ་རི་ག་བུ་ བཀའ་གནང་མེ་རེ༌ལ། ཉི་བཀའ་འགྲུབ་ཕུ་བུ་ འགྲུབ་ལ་དག་ཉི་ ཡེག་པ༌ལ༎

དོན་གི་ནོད་ཁཱན་ སོ་ངོ་དྲག་པ༌ལ།

26ཉི་རོག་ཏེ་བ་ ག་ལིལ་ག་ ལོག་ཐུར་ལོ་ཀ་ཆོ་ཁཱན་ གེ་ར་སེ་ནཱས་དག་ཁཱན་ སོ་ངོ་བ་ཆོ་ས་ག་ དུང་ག་ཕེབས་པ༌ལ། 27ཉི་རོག་ ཕིས་ཀ་ ས་ག་བྱོན་མ་ཐུར་ག་རང་ དོན་བ་ཀི་ནོད་ཁཱན་ སོ་ངོ་ཐུར་ཁྲ་པ༌ལ། ཉི་རོག་ཁ་མུང་མ་ཡེ་ལཱན་ ཤ་མ་དི་ཝ་ཅ་གི་ཝ༌ལ། ཉི་ཆོ་ལུ་བུ་ ཕའི་ག་མང་གི་ཝ་ ས་ཝང་ཕི་ཉི་ཐ་ཁཱན་ དི་ཁྲོ་ཁོན་ཆོན་ཅ་གི་ཝ༌ལ།

28ཉི་རོ་ཀི་ ཡི་ཤུ་མཇལ་བ་ཐུར་ག་རང་ ཤ་དར་ཐར༌བ། རོ་ཀ་ཞབས་ར་ག་ ཕྱག་ཕུལ་ཐཱན་ ཞིང་ཁམས་ག་ དཀོན་མཆོག་ག་སྲས་ཡི་ཤུ་ ནཱན་ཇང་གེ་ ཧང་ཚཱས་པེ་ཡ། ཇང་ཁྲིམས་མ་ཀེ་ཤོ་དག་ཉི་ ཞུ་ཝ༌ལ། 29ཧང་ཡ་དག་ནེ་ལ་ རོ་ཀི་ རྣམ་ཤེས་མ་ཙང་མ་ག་ ཕིས་ཀ་ཤོའི་དག་ཉི་ བཀའ་གནང་མ་ཆོ་ཝ༌ལ། ཉི་ཤེབ་མང་པུ་ཐུར་ དོན་གི་ཙུང་མ༌ལ། ཨོ་ཉི་ཨ་དེན་གེ་ ཨོ་ཉ་སོ་ངོ་ག་ བི་ག་དང་ག་ལྕགས་ཀེ་ཐཱན་ བདག་འཛིན་པ་ ཙུག་ཉི་ཐ་ནེ་བུ་ ལྕགས་ཐག་ བཱརའ་ཏ་བོརོ་ཏོ་ ཕུད་གེམ་ཐཱན་ དོན་གི་ཆོམ་ཐྲི་ཨ་ཉི་ ས་ཏོང་པ་ག་ཏཱན་ ཇོང་ཅ་གི་ཝ༌ལ།

30ཉི་ཡི་ཤུ་གི་ རོ་ཀ་ ན་ག་མིང་ ཧང་གི་ལ་ཡ་དག་ཉི་ ཇི་མ་ཀབ་ཉི་ ཇ་ག་མིང་ ཤ་མ་གི་ལ་དག་ཉི་ ཞུ་ཝ༌ལ། ཧང་ཡ་དག་ནེ་ལ་ རོ་ཀ་ནང་ཀ་ དོན་མང་པུ་ ནུ་ཕ་ཅ་གི་ཝ༌ལ། 31ཉི་རོག་ཏེ་བ་ཀི་ ཨའི་དམྱལ་བ་ག་ཏིང་#8:31 དམྱལ་བ་ག་ཏིང་ཤོ་ དོན་བ་ཆོ་ས་བཱརང་གི༌ལ།ག་ཏཱན་ མ་ཀུན་ཏི་དག་ཉི་ ཡི་ཤུ་ག་ཞུ་ཝ༌ལ།

32ཉི་ཨོམ་ ཕག་པ་ཆུ་ཐུར་ ལྟོ་ལམ་ཉི་ ཕུ་ར་ག་ཅ་གི་ཝ༌ལ། ཉི་རོག་ཏེ་བ་ཀི་ ཨའི་ཨོ་ཉ་ ཕག་པ་བ་ཀ་ནང་ཀ་ ནུ་ཕེ་ག་ བཀའ་གནང་ཤོ་དག་ཉི་ཞུ་ཉི་ ཡི་ཤུ་གི་ བཀའ་དྲེ་པ༌ལ། 33ཉི་དོན་བ་ སོ་ངོ་གེ་ ཕིས་ཀ་ཤོན་ཐཱན་ ཕག་པ་བ་ཀ་ནང་ཀ་ ནུ་ཕ༌ལ། ཉི་ཕག་པ་བ་ ག་པེ་ཀེ་དོང་ཝུར་ཉི་ དི་ལ་ཀབ་ཉི་ མཚོ་ནང་ཀ་ཐི་མ༌ལ།

34ཉི་ཕག་པ་དི་པ་བ་ཀི་ ཨུ་ཉུ་ད་བུ་ ཇུང་མ་ཐོང་ཉི་ གཱན་ཇོང་ཐཱན་ ཁྲོམ་དང་ དུང་ཁོན་དི་ཉི་ ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ ཡེག་པ༌ལ། 35ཉི་སོ་ངོ་མང་པུ་ཐུར་ ཧང་ཇུང་མ་ལ་སྨོ་ གོད་པེ་དེན་གེ་ དི་ཉི་ ཡི་ཤུ་ག་སྐུན་མདུན་ག་ ཤེག་པ་ཀབ་ཉི་ དོན་བ་ཤོན་ཇོང་ཉི་ དྲཱན་མ་ཤེག་པ་ཨ་དེན་གེ་ ཁ་མུང་ཡེ་ཉི་ ཡི་ཤུ་ག་ཞབས་ར་ག་ ལང་མ་ཐོང་མ་ཀབ་ཉི་ རོག་ཏེ་བ་ ཡོང་ཁེ་ཝ༌ལ། 36ཉི་ཐོང་ཁཱན་བ་ཀི་ དོན་གི་ནོད་ཁཱན་ སོ་ངོ་ཁེ་པ་ ཧང་ཏེན་དྲག་པ་ལ་སྨོ་ བཱརའ་སོ་ངོ་བ་ཀ་ ཡེག་པ༌ལ། 37ཉི་ཨོ་ཉ་ས་ཆ་ག་ཆོ་ཁཱན་ སོ་ངོ་ཐམས་ཅན་གི་ ཨའི་ཐུབ་ཐ་ཉི་ བྱོན་ཤོ་དག་ཉི་ ཞུ་ཝ༌ལ། ཧང་ཡ་དག་ནེ་ལ་ རོག་ཏེ་བ་ གནམ་མེད་ས་མེད་ ཡོང་ཁེ་ཝ་གི་ཝ༌ལ།

ཉི་ཡི་ཤུ་ གྲུ་ནང་ཀ་ནུབ་ཐཱན་ བྱོན་མ༌ལ། 38དོན་ཤོན་ཇོང་ཁཱན་ སོ་ངོ་གི་ ཇང་བུ་ ན་ག་ཕྱག་ཞུ་ཉི་ དི་ལེ་དག་ཉི་ ཞུ་ལ་ཀབ་ཉི་ རོ་ཀི་ ཨོ་ཐེན་གསུངས་ཐཱན་ ལོག་ཉི་ཀུན་ཏི་ཝ༌ལ། 39ལོག་ཉི་ན་ག་ཕའི་ག་ དིན་ཐཱན་ དཀོན་མཆོག་གི་ ན་ག་དེན་གེ་ ཧབ་ཏུར་མཛད་ཉི་ གནང་མ་གི་ལ་སྨོ་ ཨོ་ཉ་ཀོར་གེ་ ཡེག་ཅོ་དག༌ཉི། ཉི་རོག་ དིན་ཐཱན་ ཡི་ཤུ་གི་ རོ་ཀ་དེན་གེ་ ཧང་མཛད་ཉི་གནང་མ་གི་ལ་སྨོ་ ཨོ་ཉ་ཀོར་གེ་ ཁྲོམ་ག་ཆོ་ཁཱན་ ཐམས་ཅན་ག་ ཡེག་པ༌ལ༎

ཟ་མིན་ཤི་ཁཱན་དང་ མར་ཁཱན་མེ་ཝག་ཙ།

40ཉི་ཨོམ་ མཚོ་ལོག་ཐུར་ལོ་ཀ་ཏཱན་ ཡི་ཤུ་ལོག་ཉི་ བྱོན་མ་ཀབ་ཉི་ སོ་ངོ་མང་ཀི་ ཞུ་ཝ༌ལ། རོག་ཏེ་བ་ ཐམས་ཅན་རང་ ཡི་ཤུ་བྱོན་མེ་ག་ནོང་ཉི་ ཆོ་ཝ་ཅ་གི་ཝ༌ལ། 41ཉི་ཨོ་ཉ་ག་ ཡའི་རཱས་དག་ཁཱན་ ཡ་ཧུ་དི་པ་ ཆོས་འཛོམས་ག་ འགོ་དཔོན་ཐུར་ཤེག་ཉི་ ཡི་ཤུ་ག་ཞབས་ག་ ཕྱག་ཕུལ་ཐཱན་ རོ་ཀ་ཕའི་ག་སག་པུ་ བྱོན་ཤོ་དག་ཉི་ ཞུ་ཝ༌ལ། 42ཧང་ཡ་དག་ནེ་ལ་ རོ་ཀ་ཟ་མིན་ཐུར་ཨ་ཝ་ ལོ་སྐོར་ག་ཁེ་ཁཱན་ཁེ་པ་ མར་ཉི་ ཤི་ལེ་ཅམ་པ་ཅ་གི་ཝ༌ལ།

རོག་བྱོན་མེ་གང་ཀ་ སོ་ངོ་བ་ཀི་ ཉ་གེ་ཐ་གེ་པེད་ཉི་རང་ ཕ་ཝ༌ལ། 43ཉི་ཞི་ཤོ་ལུ་ཤོ་ས་རང་ ཉིང་སོང་ཉིག་ཙིང་དི་ཁཱན་ མེ་ཝག་ཙ་ཐུར་ཅ་གི་ཝ༌ལ། ཉི་སྨན་བཅོས་ཕིན་ཅ་ཨ་ཉི་ རོ་ཀ་ཆོ་ཁཱན་ཐམས་ཅན་རང་ ཆུམ་ནེ་བུ་ སྨན་པ་ཐུར་གི་རང་ རོ་ཀ་ན་ཚ་ དྲག་པེ་མར་བ༌ལ། 44ཉི་རོག་ ཡི་ཤུ་ག་སྐུ་རྒྱབ་ཀེ་ཨུ་ཉི་ ག་དང་བུརུ་མ་གི་ཨ་ཉི་ རོ་ཀ་ནམ་བཟའ་ཟུར་ཀ་ ཐོ་ཕ༌ལ། ཉི་ཨོ་ཉ་ཐྲེ་ཀེ་རང་ ཞི་ཤོ་ལེ་ནོར་བ༌ལ།

45ཉི་ཡི་ཤུ་གི་ ཇང་ཐོབ་ཁཱན་ ཨི་བི་གི་ལ་ཡ་དག་ཉི་ གསུངས་མ༌ལ།

ཐུར་གི་རང་ ཁ་མ་དོག་པ༌ལ། ཉི་པ་ཏྲུས་གི་ སྦྱིན་བདག་ སོ་ངོ་ཐམས་ཅན་ ན་ག་ཀོ་ལོ་ལོ་ཛོམ་ཉི་ ན་ག་ར་ག་ཏཱན་ པེད་ཉི་རང་ཕ་ན་དག་ཉི་ ཞུ་ཝ༌ལ།

46དག་པ་ཀབ་ཉི་ ཡི་ཤུ་གི་གསུངས་མ་ལ་ ཇང་ཐུར་གི་ཏ་ཐོ་ཕ། ཧང་ཡ་དག་ནེ་ལ་ ཇི་གི་སེ་ལེ་ ཇ་ག་ནང་ཀེ་ དབང་ཤོ་ཉི་དི་ཝ་དག༌ཉི། 47ཉི་མེ་ཝག་ཙ་གི་ ཇང་གུ་མེ་མར་བེ་ལ་དག་ཉི་ དྲཱན་དེན་གེ་ ཁང་ནེང་ནེང་ཨ་ཝ་ཤེག་ཉི་ རོ་ཀ་སྐུན་མདུན་ག་ ཕྱག་ཕུལ་ཐཱན་ སོ་ངོ་ཐམས་ཅན་ག་གུབ་ཀ་ རོ་ཀི་ ཧང་ཨ་ཉི་ ཐོ་ཕ་གི་ལ་སྨོ་ ཉི་ཐོ་ཕ་ཐུར་ག་རང་ རོག་ཧང་ཏེན་ དྲག་པ་གི་ལ་སྨོ་ ཨོ་ཉ་ཀོར་གེ་ དང་སང་ཀིན་ཨ་ཉི་ ཞུ་ཝ༌ལ། 48ཉི་རོ་ཀི་མེ་ཝག་ཙ་ག་ ཟ་མིན་ ན་ག་དད་པ་གི་ ནཱན་དྲག་པ་ན། སྐྱིད་པུ་ཨ་ཉི་དི་དག་ཉི་ གསུངས་མ༌ལ།

49ཉི་རོ་ཀི་གསུངས་ཉི་ མ་ཆུ་མེ་གོ་མ་ ཆོས་འཛོམས་ག་ འགོ་དཔོན་ག་ཕའི་གེ་ སོ་ངོ་ཐུར་ཤེག་ཉི་ ཡའི་རཱས་ག་ཞུ་ཝ་ལ་ ན་ག་ཟ་མིན་ཤི༌ཝ། ཉི་ཨོམ་ སློབ་དཔོན་ འོ་བརྒྱལ་བེ་མ་བི་དག༌ཉི།

50དག་པ་ཀབ་ཉི་ ཡི་ཤུ་གི་ ཨོ་ཐ་ཆཱས་ སྙན་གསེང་ཉི་ ཡའི་རཱས་ག་གསུངས་མ་ལ་ ཡོང་མ་ཁེ་ལཱན་ དད་པ་ཐུར་ཤ་ཀེ་ཤོ་ ཉི་རོག་དྲག་པེ་དག༌ཉི།

51ཉི་རོག་ ཕའི་ག་ཕེབས་ཏེན་གེ་ རོ་ཀི་ བཱརའ་ཨི་བི་རང་ནང་ཀ་ མ་ཐོག་པཱན་ པ་ཏྲུས་དང་ ཡུ་ཧན་ན་ ཉི་ཡ་ཀུབ་ རོག་ཏེ་སམ་དང་ ཤི་ཁཱན་ཝག་ཙ་ག་ ཨ་པ་དང་ཨ་མ་ རོག་ཏེ་བ་ཤ་ ཕའི་ནང་ཀ་ ཨོ་ཕེ་བི་ཝ་གི་ཝ༌ལ། 52ཉི་ཐམས་ཅན་རང་ ཝག་ཙ་ཤི་ཝ་ཨ་དེན་གེ་ མརང་མ་གེབ་ཉི་ཅ་གི་ཝ༌ལ། ཉི་ཡི་ཤུ་གི་ མ་གེབ༌ཅོ། རོག་ཤི་ཝ་མང་གི་ཝ་ མི་ནང་དི་ཝ་ལ་དག་ཉི་ གསུངས་མ་ཀབ་ཉི་ 53ཝག་ཙ་ ཤི་ཝ་གི་ལ་དག་ཉི་སེ་ཉི་ རོག་ཏེ་ཐམས་ཅན་གི་ རོ་ཀ་གོད་ཉི་ ངར་བ༌ལ། 54དག་པ་ཀབ་ཉི་ ཟ་མིན་ག་ ག་དང་གེ་ཙུང་ཐཱན་ ཝག་ཙ་ ཝུའི་དག་ཉི་ གསུངས་མ༌ལ། 55ཉི་རྣམ་ཤེས་ལོག་ཉི་ ཤེབ་ཐུར་ག་རང་ ག་ཝུ་ཝ༌ལ། ཝག་ཙ་ག་ ཧང་ཐུར་ཟ་ལེ་ག་བི་དག་ཉི་ ཡི་ཤུ་གི་གསུངས་མ༌ལ། 56ཉི་རོ་ཀ་ཕ་མ་ཉིག་ཙིང་ ཡིད་ཆི་ཝ༌ལ། ཨོ་ཉི་ཨ་དེན་གེ་ ཧང་ཇུང་མ་གི་ལ་སྨོ་ ཨི་བི་ག་རང་ མ་ཡེག་ཅོ་ན་དག་ཉི་ ཡི་ཤུ་གི་ རོག་ཉིག་ཙིང་ག་ བཀའ་ན་སྒྲིང་སྒྲིང་ཨ་ཉི་གནང་མ༌ལ༎

Currently Selected:

ལུ་ཀ། 8: TNTB

Highlight

Copy