མར་ཀུས། 10
10
ཡི་ཤུ་གི་ གཉེན་གྲོགས་ག་ཀོར་གེ་ ཡེན་གནང་མ༌ལ།
1ཉི་རོག་ ཨོ་ཉ་གེ་བྱོན་ཉི་ ཡ་ཧུ་དི་ཡ་ག་ ཆ་འོག་གེ་ཨ་ཉི་ཤོ་ཉི་ ཡར་དཱན་རི་དྲང་གེ་ཉི་ བྱོན་མ༌ལ། ཉི་ཨོམ་ཆང་རང་ སོ་ངོ་མང་པུ་ཐུར་ རོ་ཀ་ཀོ་ལོ་ལོ་ ཛོ་མ༌ལ། ཉི་རོ་ཀི་ རོ་ཀ་ལུགས་སྲོལ་དང་ཏུ་ཉི་ རོག་ཏེ་བ་ཀ་ ཡེ་ཉི་གནང་མ༌ལ།
2ཉི་ཕ་རི་སི་པ་ཚེ་བང་ཤེག་ཉི་ རོ་ཀ་ཚེ་གོད་པེ་དེན་གེ་ ཇི་མ་ལ་ ཧང་ཕེ་ཝག་ཙ་གི་ རོ་ཀ་མེ་ཝག་ཙ་ ཐུབ་ཐ་ལེ་ཆོག་པེ་སྨོ་དག༌ཉི།
3རོ་ཀི་ལན་གནང་ཉི་ མོ་ས་གི་ ན་ཧ་བཀའ་ཁྲིམས་ ཧང་ག་ཝ་ཆོ་ཝ་ཡ་དག་ཉི་ གསུངས་མ་ཀབ་ཉི་ 4རོག་ཏེ་བ་ཀི་ཞུ་ཝ་ལ་ མོ་ས་གི་ཏ་ འགན་རྒྱ་ཅོད་ཐཱན་ མེ་ཝག་ཙ་ ཐུབ་ཐ་རིན་ཆོག་པེ་དག་ཉི་ བཀའ་ཁྲིམས་གནང་མ་ཅ་དག༌ཉི།
5དག་པ་ཀབ་ཉི་ ཡི་ཤུ་གི་ རོག་ཏེ་བ་ཀ་ གསུངས་མ་ལ་ ན་ཧ་སེམས་ ལུང་ཏོང་རི་ཉི་ ཉཱན་པེ་མ་ན་ཝ་ཨ་དེན་གེ་ རོ་ཀི་བཀའ་ཁྲིམས་ནང་ཀ་ ཨོ་ཐེན་འབྲི་བ་གི༌ལ། 6མ་པ་གོ་མ་ དཀོན་མཆོག་གི་ བཀོད་པེ་གང་ཀ་ རོ་ཀི་ཕེ་ཝག་ཙ་དང་ མེ་ཝག་ཙ་མཛད༌པ། 7ཨོ་ཉི་ཨ་དེན་གེ་ ཕེ་ཝག་ཙ་གི་ རོ་ཀ་ཨ་པ་དང་ ཨ་མ་ཐུབ་ཐ་ཉི་ རོ་ཀ་མེ་ཝག་ཙ་ཀབ་ཉི་ཆོ༌ལེ། 8ཉི་རོག་ཉིག་ཙིང་ ཐུར་རི༌ལེ། གཉེན་ཕི་དེན་གེ་ལ་ ཉིག་ཙིང་མང་གི་ཝ་ ཐུར་གི༌ལ། 9ཉི་དཀོན་མཆོག་གི་ ཏབ་ཐུར་ཛོམ་ཁཱན་ཁེ་པ་ ཨི་བི་གི་རང་ ཁ་བེརེ་བེ་ མ་ཆོག་པ་དག་ཉི་ གསུངས་མ༌ལ།
10ཉི་ཚི་ངེ་ རོག་ཏེ་བ་ཏེན་ ཕའི་ནང་ཀ་ བཞུགས་པེ་གང་ཀ་ རོ་ཀ་སློ་མ་བ་ཀི་ ཨོ་ཉ་ཀོར་གེ་ ལོག་ཉི་ཞུ་ཝ༌ལ། 11ཉི་ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཨི་བི་རང་གི་ནེ་བུ་ རོ་ཀ་མེ་ཝག་ཙ་ཀབ་ཉི་ ཁ་བེརེ་ཐཱན་ བཱརའ་མེ་ཝག་ཙ་ཀབ་ཉི་ གཉེན་ཕི་ནེ་ལ་ ཨོ་ཉ་སོ་ངོ་གི་ རོ་ཀ་གོ་མ་ག་ མེ་ཝག་ཙ་ག་དགྲ་ཨ་ཉི་ གཉེན་གྲོགས་གེ་ཕིས་ཀ་ ལུས་འབྲེལ་ཨ་ཝ་ཆིན༌མེ། 12ཉི་མེ་ཝག་ཙ་གི་ རོ་ཀ་ཕེ་ཝག་ཙ་ཀབ་ཉི་ ཁ་བེརེན་ཐཱན་ བཱརའ་ཀབ་ཉི་ གཉེན་ཕི་ནེ་ལ་ ཨོ་ཉ་མེ་ཝག་ཙ་གི་བུ་ གཉེན་གྲོགས་གེ་ཕིས་ཀ་ ལུས་འབྲེལ་ཨ་ཝ་ ཆིན་མེ་གི་ལ་དག༌ཉི༎
ཡི་ཤུ་གི་ ཝག་ཙ་ཟེ་མུ་བ་ཀ་ དབང་གནང་མ༌ལ།
13ཉི་ཝག་ཙ་བ་ཀ་ཐུང་ཀ་ ཡི་ཤུ་ག་ཕྱག་ཀེ་ཉི་ དབང་གནང་མེ་དེན་གེ་ སོ་ངོ་བ་ཀི་ ཝག་ཙ་བ་ རོ་ཀ་སྐུན་མདུན་ག་ ཕ་ལ་ཀབ་ཉི་ སློ་མ་བ་ཀི་ བཱརག་པ༌ལ།
14ཉི་ཡི་ཤུ་གི་ རོ་ཀ་སློ་མ་བ་ཀི་ ཨུ་ཉུ་ད་བུ་ཨ་ཝ་གཟིགས་ཉི་ རོག་དགོངསམ་ཁྲེལ་ཉི་ རོ་ཀི་ རོག་ཏེ་བ་ཀ་ གསུངས་མ་ལ་ ཝག་ཙ་བ་ ཇང་ཆོ་ས་ཨོ་ཕེ་བི། ཧང་ཡ་དག་ནེ་ལ་ དཀོན་མཆོག་ག་རྒྱལ་སྲིད་ཤོ་ རོག་ཏེ་བ་ད་བུ་ ཆོ་ཁཱན་བ་ཀ་དེན་གེ་གི༌ལ། རོག་ཏེ་བ་ མ་ཁག་ཅོ་དག༌ཉི། 15ཇི་གི་ ན་ཧ་ཐྲང་ཉི་ཡེག་པེ་ དཀོན་མཆོག་ག་རྒྱལ་སྲིད་བུ་ ཨོ་ཐ་ཝག་ཙ་བ་ད་བུ་ཨ་ཉི་ མ་ཞུ་ནེ་ལ་ ཨི་བི་གི་རང་ དཀོན་མཆོག་ག་ རྒྱལ་སྲིད་ནང་ཀ་ ནུ་ཕེ་མར་བ་དག༌ཉི། 16ཉི་རོ་ཀི་ ཝག་ཙ་བ་ རོ་ཀ་ཕྱག་ཀ་བསྣམས་ཐཱན་ རོ་ཀ་ཕྱག་ རོག་ཏེ་བ་ཀ་ཐུང་ཀ་ཀེ་ཉི་ ཐམས་ཅན་ག་ དབང་གནང་མ༌ལ༎
བེ་དིང་ཡམ་ལང་།
17ཉི་བྱོན་མེ་ཨ་ཉི་ ཅམ་པ་ཐུར་ག་རང་ སོ་ངོ་ཐུར་ ཇུག་ཉི་རང་ཨུ་ཉི་ རོ་ཀ་གུབ་ཀ་ ཕྱག་ཕུལ་ཐཱན་ ཞུ་ཝ་ལ་ སློབ་དཔོན་ ནཱན་ལེག་པུ༌ལ། ཚེ་མ་འགྱུར་བརྟན་པ་ ཉོང་པེ་དེན་གེ་ ཇི་གི་ ཧང་ཨ་ལེ་ཁེ་ལེ་ཡ་དག༌ཉི།
18ཡི་ཤུ་གི་ རོ་ཀ་གསུངས་མ་ལ་ ནཱན་གི་ ཇ་ག་ ཧང་ཨ་ཉི་ ལེག་པུ་ཨ་ཉི་རཱན་ཅ་ཡ། དཀོན་མཆོག་ཐུར་ཤ་མ་ཏོག་པ་ བཱརའ་ཨི་བི་རང་ ལེག་པུ་མཱན༌ཅ། 19སོ་ངོ་ཤེ་ལེ་མང་ཕ། གཉེན་གྲོགས་གེ་ཕིས་ཀ་ ལུས་འབྲེལ་ཨ་ལེ་མང་ཕ། དྲོ་ཝཱན་ཨ་ལེ་མང་ཕ། འཛོམས་དཔང་ཨ་ལ་ཀབ་ཉི་ སོ་ད་ཕི་ལེ་མང་ཕ། ཇི་སྐོར་ཕི་ཉི་ ཅོམ་པེ་མང་ཕ། ཉི་ན་ག་ཨ་པ་དང་ ཨ་མ་ག་ ཆ་གནས་ཐ་ལེ་ཁེ་ལེ་དག་ཉི་ བཀའ་རྒྱ་གེ་ཤོ་ཁཱན་ཁེ་པ་ ནཱན་གི་སེན་ཅ་དག༌ཉི།
20ཨོ་ཉ་སོ་ངོ་གི་ཞུ་ཝ་ལ་ སློབ་དཔོན་ ཇང་ཝག་ཙ་ཐུར་ཨན་ ཆོ་ཝ་གེ་ག་ཏཱན་ ཇི་གི་ ཨོ་ཐ་བཀའ་རྒྱ་གེ་ གེ་བ་ལའི་ཐུར་རང་ ཨ་ཝ་མཱན་ཅ་དག༌ཉི།
21ཉི་ཡི་ཤུ་ རོ་ཀ་གཟིགས་ཉི་ ཕང་པེ་ཨུ་ཉི་ ནཱན་ཐུར་ག་ཤེག་པ་ ལུས༌ལ། ཚེ་མ་འགྱུར་བརྟན་པ་ ཉོང་པེ་གི་ལ་དག་ནེ་ལ་ དི་ ན་ག་ཆོ་ཁཱན་ ཐམས་ཅན་རང་ ཙོང་ཐཱན་ དུག་པུ་སོ་ངོ་བ་ཀ་ སྦྱིན་པ་ཕི། ཉི་ན་ག་རྒྱུ་ཅ་ལ་ ཐམས་ཅན་རང་ ཞིང་ཁམས་ག་སག༌པེ། ཉི་ཤ་ ནཱན་ཇ་ག་ ཚིང་ཚིང་ཨོ་དོ་དག་ཉི་ ཡི་ཤུ་གི་གསུངས་མ༌ལ།
22ཨུ་ཉུ་ད་བུ་ ན་ཐ་ལ་ཀབ་ཉི་ རོ་ཀ་ཟུག་རང་འགྱུར་ཉི་ སེམས་ཤི་ཝ༌ལ། ཧང་ཡ་དག་ནེ་ལ་ རོག་གནམ་མེད་ས་མེད་ བེ་དིང་ཆོ་ཝ༌ལ།
23ཉི་ཡི་ཤུ་གི་ ཨོ་ཉ་ཀོ་ལོ་ལོ་ གཟིགས་ཐཱན་ རོ་ཀ་སློ་མ་བ་ཀ་ གསུངས་མ་ལ་ བེ་དིང་སོ་ངོ་བ་ དཀོན་མཆོག་ག་རྒྱལ་སྲིད་ག་ ནུ་ཕེ་དེན་གེ་ ཧབ་ཏུར་ཀ་ལུ་ ཨོ་ཕེ་ལ་ཡ་དག༌ཉི། 24རོ་ཀ་གསུང་ཉཱད་ཉི་ རོ་ཀ་སློ་མ་བ་ ཐམས་ཅན་རང་ ཡིད་ཆི་ཝ༌ལ། དག་པ་ཀབ་ཉི་ ཡི་ཤུ་གི་ ཨོམ་ཆང་རང་ གསུངས་མ་ལ་ ཝག་ཙ་བ་ དཀོན་མཆོག་ག་རྒྱལ་སྲིད་ག་ ནུ་ཕེ་ག་ ཧབ་ཏུར་ཀ་ལུ་ལ་ཡ། 25བེ་དིང་སོ་ངོ་ དཀོན་མཆོག་ག་རྒྱལ་སྲིད་ག་ ནུ་ཕེ་གེ་ཏ་ ང་མོ་ཁམ་ན་ནང་ཀེ་ ནུ་ཕེ་ག་ ཡ་ལུ་ཨོ་ཕེ་དག༌ཉི།
26རོག་ཏེ་བ་ གནམ་མེད་ས་མེད་ ཡིད་ཆི་ཉི་ རོ་ཀ་ཞུ་ཝ་ལ་ ཉི་ཏ་ ཨི་བི་གི་ཤ་ ཐར་པ་ཉོང་པེ་ཡ་དག༌ཉི།
27ཡི་ཤུ་གི་ རོག་ཏེ་བ་ཀ་ གཟིགས་ཐཱན་ གསུངས་མ་ལ་ སོ་ངོ་གི་ཤོ་ མར༌བ། དག་པ་ཀབ་ཉི་ དཀོན་མཆོག་གི་ མཛད་པེ་མར་བེ་ ཧང་རང་མཱན་ཅ་དག༌ཉི།
28ཡ་ ཨ་ཤི་ ཧང་རང་ཐུབ་ཐཱན་ཐཱན་ ན་ག་ཕྱག་ཞུ་ཉི་ ཨོ་ཕ་དག་ཉི་ པ་ཏྲུས་གི་ ཞུ་ལ་ཀབ་ཉི་ 29ཡི་ཤུ་གི་ གསུངས་མ་ལ་ ཇི་གི་ ན་ཧ་ཐྲང་ཉི་ཡེག་པེ་ ཨི་བི་གི་ ཇང་དང་ འཐེན་ལེག་པུ་ག་ཡོར་ཀེ་ ཕའི་ ཨ་ཏ་བོ་ཉིང་ ཨ་ན་དང་ཟི་ ཨ་མ་ ཨ་པ་ ཝག་ཙ་ ཉི་ས་གཞི་སབ་ཏེན་ ཨོ་ཉ་བ་སྤང་ཉི་ ཨོ་ཕ་ཅ་གི་ལ་སྨོ་ 30ཨོ་ཉ་སོ་ངོ་གི་ ཕའི་ ཨ་ཏ་བོ་ཉིང་ ཨ་ན་དང་ཟི་ ཨ་མ་ ཨ་པ་ ཝག་ཙ་ ཉི་ས་གཞི་སབ་ཏེན་ ཧང་རང་གི་ནེ་བུ་ ཨོ་མ་ཚེ་ད་ལྟ་ག་རང་ 100 ཐེབ་ཉོང༌པེ། ཉི་གནམ་མེད་ས་མེད་ དཀའ་ཝ་བུ་ཅཱད་པེ་ཁེ༌ལེ། ཉི་ནམ་ནིང་ཞིམ་རོང་ ཚེ་ཕྱི་མ་ག་ ཚེ་མ་འགྱུར་བརྟན་པ་ཉོང༌པེ། 31དག་པ་ཀབ་ཉི་ གོ་པ་ཆོ་ཁཱན་ མང་པུ་ཐུར་ ཇུ་ཀ་ལུས༌པེ། ཉི་ཇུ་ཀ་ཆོ་ཁཱན་བ་ གུབ་ཀ་ཤེག་པེ་ན་དག་ཉི་ གསུངས་མ༌ལ༎
ཡི་ཤུ་གི་ ཨོམ་ཆང་རང་ རོག་གཤགས་པེ་ཁེ་ཝ་ཀོར་གེ་ གསུངས་མ༌ལ།
32ཉི་ཨོམ་ རོག་ཏེ་བ་ ཡ་རུ་ཤ་ལེམ་ག་ཏཱན་ བྱོན་ཅ་གི་ཝ༌ལ། ཉི་ཡི་ཤུ་ཤོ་ སློ་མ་བ་ཀ་ གུམ་གུམ་བྱོན་ཅ་ཨ་ཉི་ རོག་ཏེ་བ་ ཡིད་ཆི་ཝ༌ལ། ཉི་རོ་ཀ་ཚིང་ཚིང་ཆོ་ཁཱན་ བཱརའ་སོ་ངོ་བ་བུ་ ཡོང་ཁེ་ཝ༌ལ། ཉི་རོག་ཏེ་སོང་ཉིག་ཙིང་ ལོག་ཐུར་ལོ་ཀ་བསྣམས་ཐཱན་ རོ་ཀ་ཐུང་ཀ་ ཧང་ད་བུ་ཇུང་མེ་གི་ལ་སྨོ་ ཨོམ་ཆང་རང་ ཨོ་ཉ་ཀོར་གེ་གསུངས་མ༌ལ། 33ཨ་ཧ་བ་ ཡ་རུ་ཤ་ལེམ་ག་ཏཱན་ དིན༌ཅ། ཉི་སོ་ངོ་ག་ཟ་ བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ཀ་ ག་དང་ག་རྩིས་སྤྲོད་ཉི་ ཉི་རོག་ཏེ་བ་ཀི་ རོག་ཁྲིམས་ཀེ་ཉི་ཤེ༌ལེ། ཉི་ཨུ་ཉུ་མ་ཚཱད་པ་ དད་པ་མ་ཨ་ཁཱན་བ་ཀ་ ག་དང་ག་རྩིས་སྤྲོད༌པེ། 34ཉི་རོག་ཏེ་བ་ཀི་ རོ་ཀ་མེམ་ཅོར་ཉི་ ཐོབ་ཏང་ཚེ་ཉི་ ཏེ་ཐ་གི་ལབ་ཉི་ ཉི་ཤ་ཤེ༌ལེ། དག་པ་ཀབ་ཉི་ ནོང་སམ་ག་ཚི་ངེ་ ལོག་ཉི་དངོས་སུ་ཨ་ཉི་ ཝུ་ལེ་ན་དག་ཉི་ གསུངས་མ༌ལ༎
ཡ་ཀུབ་དང་ ཡུ་ཧན་ན་གི་ཞུ་ཝ༌ལ།
35ཉི་ཇབ་དི་ཡ་ག་ཟ་ ཡ་ཀུབ་དང་ ཡུ་ཧན་ན་ རོ་ཀ་སྐུན་མདུན་ག་ཤེག་ཉི་ ཞུ་ཝ་ལ་ སློབ་དཔོན་ ནཱན་གེ་ ཧང་ཞུ་ཝ་ཐུར་ ནཱན་གི་ ཨ་ཆིང་ག་ གནང་ཤོ་དག༌ཉི༎
36ཉི་རོ་ཀི་ རོག་ཉིག་ཙིང་ག་ གསུངས་མ་ལ་ ཇི་གི་ ན་ཆིང་ག་དེན་གེ་ ཧང་ཨ་ལེ་ཁེ་ལེ་ཡ་དག༌ཉི།
37ཉི་རོག་ཉིག་ཙིང་གི་ རོ་ཀ་ཞུ་ཝ་ལ་ ནཱན་གི་དབང་པེ་གང་ཀ་ ཨ་ཆིང་ ན་ག་ལ་ཉོང་མི་ཉོང་ཨ་ཉི་ ལང་མེ་གནང་ཤོ་ན་དག༌ཉི།
38ཡི་ཤུ་གི་གསུངས་མ་ལ་ ན་ཆིང་གི་ ཧང་ཇིམ་ཅ་སྨོ་ ན་ཆིང་གི་མ་སེ་ཝ༌ལ། ཇང་དཀའ་ཝ་ཅཱད་པེ་ཁེ་ཁཱན་ གུར་བུ་གེ་ ཇ་མེ་ཁེ་ཝ༌ཅ། ཧང་ ན་ཆིང་གི་ ཨོ་ཉ་གུར་བུ་གེ་ ཇ་མེ་རེ་བེ་སྨོ། ཇང་ཤི་ལེ་ཁེ་ཁཱན་ ཁྲུས་གསོར་ལ་ལེ་ཁེ་ཝ༌ཅ། ཨོ་ཉ་ཁྲུས་གསོར་ ན་ཆིང་གི་ ལ་ལེ་རེ་བེ་སྨོ་དག༌ཉི།
39ཨ་ཆིང་གི་རེ་བེ་དག་ཉི་ རོག་བོ་ཉིང་ཉིག་ཙིང་གི་ ཞུ་ཝ༌ལ།
ཡི་ཤུ་གི་གསུངས་མ་ལ་ ཇང་ཇམ་ཁཱན་གུར་བུ་གེ་ ན་ཆིང་གི་ཇ༌མེ། ཉི་ཇང་ལ་ཁཱན་ཁྲུས་གསོར་བུ་ ན་ཆིང་གི་ཏེན་ཏེན་རང་ལ༌ལེ། 40དག་པ་ཀབ་ཉི་ ན་ཆིང་ཉིག་ཙིང་ ཇ་ག་ལ་ཉོང་མི་ཉོང་ཨ་ཉི་ ཐ་ལེ་ག་ ཇ་ག་ག་དང་ག་མཱན༌ཅ། ཧང་ཡ་དག་ནེ་ལ་ ཨོ་ཉ་ཀོར་གེ་ཤོ་ གི་ཚེ་གེ་ཤ་ ཅབ་ཉི་ཆུ་མ་ཅ་དག༌ཉི།
41ཨོ་ཐ་ཀོར་གེ་ ཨོམ་ཐུར་སེ་གི་ ན་ཐ་ལ་ཀབ་ཉི་ རོག་ཏེ་ཐམས་ཅན་རང་ ཡ་ཀུབ་དང་ ཡུ་ཧན་ན་ཀབ་ཉི་ རོ་ཙིག་པ༌ལ། 42ཡི་ཤུ་གི་ རོག་ཏེ་བ་ རོ་ཀ་སྐུན་མདུན་ག་རཱན་ཐཱན་ གསུངས་མ་ལ་ ན་ཤི་སེན་ཅ་ དད་པ་མ་ཨ་ཁཱན་བ་ཀ་ ཐུང་ཀེ་ཆོ་ཁཱན་བ་ཀི་ ཨོ་ཐེན་ དབང་པེ་གོད༌ཅ། ཉི་རོག་ཏེ་བ་ཀ་ འགོ་དཔོན་བ་ཀི་ རོག་ཏེ་བ་ཀ་ཐུང་ཀེ་ དབང་ཚད་ཙུང༌ཅ། 43ཉི་ན་ཧ་བ་ཏ་ གནམ་མེད་ས་མེད་ མ་འདྲ་ཝ་སོ་སུ་ཐུར་གི༌ལ། ན་ཧ་པོང་ཀེ་ ཨི་བི་གི་ ཆི་ལུ་ཨ་ཉི་ ཆོ་ལེ་གོད་ཅ་གི་ལ་སྨོ་ ཨོ་ཉ་སོ་ངོ་ཁེ་པ་ ན་ཧ་གཡོག་པ་ཨ་ཉི་ ཆོ་ལེ་ཁེ༌ལེ། 44ཉི་ན་ཧ་པོང་ཀེ་ ཨི་བི་གི་ དང་པ་ ཤོ་ལེ་གོད་ཅ་གི་ལ་སྨོ་ ཨོ་ཉ་སོ་ངོ་ཁེ་པ་ ནའི་ཐམས་ཅན་ག་ ཟ་པ་ཨ་ལེ་ཁེ༌ལེ། 45སོ་ངོ་ག་ཟ་ཆང་ བཱརའ་སོ་ངོ་བ་ཀ་གཡོག་ཨ་ཉི་ རོ་ཀ་ཚེ་བི་ཉི་ སོ་ངོ་མང་པུ་ཐུར་ཤོག་ཐཱན་ ཚེ་ཐར་ཐར་བེ་དེན་གེ་ ཨོ་ཕ་མ་ཏོག་པ་ རོ་ཀ་ཕརའ་ཁེ་ གཡོག་པ་ཙུག་པེ་དེན་གེ་ ཨོ་ཕ་མང་གི་ན་དག་ཉི་ གསུངས་མ༌ལ༎
ཡི་ཤུ་གི་ བར་ཏི་མའི་དག་ཁཱན་ མིང་ཀ་ན་དྲག་ཉི་གནང་མ༌ལ།
46ཉི་རོག་ཏེ་བ་ ཡ་རི་ཧོ་ག་ཕེབས་ཉི་ ཉི་རོ་ཀ་སློ་མ་བ་དང་ སོ་ངོ་མང་པུ་ཐུར་ཀབ་ཉི་ ཡ་རི་ཧོ་གེ་ བྱོན་མེ་གང་ཀ་ ཏི་མའི་ག་ཟ་ བར་ཏི་མའི་དག་ཁཱན་ མིང་ཀ་ན་ཆོ་ཁཱན་ཁེ་པ་ ལམ་ཟུར་ཀ་ལང་ཉི་ ཏི་རུ་ཕུན་ཉི་ ཆོ་ཝ་ཅ་གི་ཝ༌ལ། 47ཉི་རོ་ཀི་ ནཱས་རཱད་ག་ ཡི་ཤུ་བྱོན་ལ་དག་ཉི་ ན་ཐ་ཝ་ཐུར་ག་རང་ ཤུག་ཨ་ཉི་ཞུ་ཝ་ལ་ ད་ཝུད་ག་སྲས་ཡི་ཤུ་ ཇ་ག་ཐུང་ཀ་སྙིང་རྗེ་ཀེ་ཉི་ གནང་ཤོ་དག༌ཉི།
48སོ་ངོ་མང་པུ་ཐུར་གི་ ཙང་ཀེན་ཆོའི་དག་ཉི་ བཱརག་པ༌ལ།
དག་པ་ཀབ་ཉི་ རོ་ཀི་ལག་ཏང་ ཤ་དར་ཆི་ལུ་ཕི་ཉི་ ཞུ་ཝ་ལ་ ད་ཝུད་ག་སྲས་ ཇ་ག་ཐུང་ཀ་སྙིང་རྗེ་ཀེ་ཉི་ གནང་ཤོ་དག༌ཉི།
49ཡི་ཤུ་གི་ ནོང་ཐཱན་ གསུངས་མ་ལ་ རོག་རའི་དག༌ཉི།
རོག་ཏེ་བ་ཀི་ རཱན་ཐཱན་ཡེག་པ་ལ་ ཤོ་ནང་ཕེ། ཉི་ནཱན་ ག་ཐིང༌ཤོ། ཧང་ཡ་དག་ནེ་ལ་ རོ་ཀི་ནཱན་ ཨོ་དོ་ཨ་ཉི་ གསུངས་ལ་དག༌ཉི།
50ཉི་རོ་ཀི་ རོ་ཀ་ཡོག་ཙམ་ ལོག་ཐུར་ག་ཏཱན་ གེ་མ་ཐྲེ་ཀེ་རང་ ག་ལིན་ཐཱན་ ཡི་ཤུ་ག་སྐུན་མདུན་ག་ ཤེག་པ༌ལ།
51ཡི་ཤུ་གི་ རོ་ཀ་གསུངས་མ་ལ་ ནཱན་ཇང་གེ་ ཧང་ཚཱས་པེ་ཡ་དག༌ཉི།
གཙོ་བོ་ ཇང་གོད་པེ་ལམ་ལ་དག་ཉི་ རོ་ཀི་ཞུ་ཝ༌ལ།
52ཡི་ཤུ་གི་ རོ་ཀ་གསུངས་མ་ལ་ དྲིག་པེ་ ན་ག་དད་པ་གི་ ནཱན་དྲག་པ་ན་དག༌ཉི། རེབ་ཀིན་ཐུར་ག་རང་ རོག་ཐོང་མེ་རེ་བ་རི་ཉི་ ལམ་ཁོན་ ཡི་ཤུ་ག་ཚིང་ཚིང་ དི་ཝ༌ལ༎
Currently Selected:
མར་ཀུས། 10: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
