མར་ཀུས། 9

1རོ་ཀི་ རོག་ཏེ་བ་ཀ་ གསུངས་མ་ལ་ ཇི་གི་ཐྲང་ཉི་ ན་ཧ་ཡེག་པེ་ ཨོ་ཐ་ཆོ་ཁཱན་ཚེ་བང་གི་ དཀོན་མཆོག་ག་རྒྱལ་སྲིད་ དབང་ཀབ་ཉི་ བྱོན་མ་ག་ མ་ཐོང་མ་སག་པུ་ ཤི་ཝ་ག་མ་སེ་ལ་དག༌ཉི༎

ཡི་ཤུ་ག་སྐུ་གཟུགས་སོར་པ༌ལ།

2ཉི་ནོང་ཁུང་ག་ཚི་ངེ་ ཡི་ཤུ་གི་ རོག་ཀབ་ཉི་ པ་ཏྲུས་དང་ཡ་ཀུབ་ ཉི་ཡུ་ཧན་ན་ རོག་ཏེ་སམ་ རིག་བསྣམས་ཉི་ ཐོ་ལ་ཕུ་ཐུང་ཀ་ བྱོན་མ༌ལ། བཱརའ་ཨི་བི་རང་མ་ཝ་ རོག་ཏེ་བ་ཏེན་ཅ་གི་ཝ༌ལ། རོག་ཏེ་བ་ གོད་ཉི་ཆོ་ལ་རང་ ཡི་ཤུ་སོར་པེ་གོ་ཙུག་པ༌ལ། 3ཉི་རོ་ཀ་ནམ་བཟའ་ཁེ་པ་ ཐམས་ཅན་གེ་ བ་ལིང་མིན་ ཟེང་ཟེང་རི་ཉི་ འོད་ཤོ་ཝ༌ལ། 4ཉི་སློ་མ་སམ་གི་ ཨེ་ལི་ཡ་དང་མོ་ས་ ཡི་ཤུ་ཀབ་ཉི་ གསུང་གྲོས་མཛད་པ་ཨ་ཝ་ མཇལ་བ༌ལ།

5པ་ཏྲུས་གི་ཞུ་ཝ་ལ་ སློབ་དཔོན་ ཨ་ཧ་བ་ ཨོ་ཐ་ཆོ་ཉི་ ཧབ་ཏུར་ལེག་པུ་དི་ཝ་ལ་ཡ། ཨ་ཤི་ཀབ་སམ་ཅོད༌པེ། ཐུར་ཤོ་ ན་ག་དེན་གེ་ ཐུར་ཤོ་ ཨེ་ལི་ཡ་ག་དེན་གེ་ ཉི་ཐུར་ཤོ་ མོ་ས་ག་དེན་གེ་གི་ལ་དག༌ཉི། 6(ཧང་ཡ་དག་ནེ་ལ་ རོག་ཏེ་སམ་ གནམ་མེད་ས་མེད་ ཡོང་ཁེ་ཝ་ཨ་དེན་གེ་ རོ་ཀི་ ཧང་ཞུ་ལེ་གི་ལ་སྨོ་ མ་སེ་ཝ་ཆོ་ཝ༌ལ།)

7ཉི་ངབ་ཀ་མུག་པ་བུག་ཉི་ མུག་པ་གི་ རོག་ཏེ་བ་བུག་ཐཱན་ མུག་པ་ཐུང་ཀེ་ གསུངས་མ་ལ་ རོག་ཁེ་པ་ ཇི་གི་ཕང་ཁཱན་ ཇ་ག་ཟ་གི༌ལ། རོ་ཀི་ཡེག་པ་ཀབ་ཉི་ ཉཱན་ཅོ་ན་དག༌ཉི། 8རེབ་ཀིན་ཐུར་ག་རང་ རོག་ཏེ་བ་ཀི་ ཨོ་ཉ་ཀོ་ལོ་ལོ་ གོད་པ་ཀབ་ཉི་ བཱརའ་ཨི་བི་རང་མ་ཝ་ ཡི་ཤུ་ཐུར་ཤ་ མཇལ་བ༌ལ།

9ཉི་རོག་ཏེ་བ་ ཐོ་ལ་ཕུ་གེ་དོང་ ལོག་པེ་གང་ཀ་ སོ་ངོ་ག་ཟ་ ཤི་ཝ་གེ་ལོག་ཉི་ མ་ཝུ་ཝ་སག་པུ་ ན་ཤི་ཐོང་ཁཱན་ག་ཀོར་གེ་ ཨི་བི་ག་རང་ མ་ཡེག་ཅོ་ན་དག་ཉི་ ཡི་ཤུ་གི་ རོག་ཏེ་སམ་ག་ བཀའ་ན་སྒྲིང་སྒྲིང་ཨ་ཉི་གནང་མ༌ལ། 10ཡི་ཤུ་གི་གསུངས་ཁཱན་ག་ རོག་ཏེ་བ་ཀི་ ཆ་གནས་ཐ་ཝ༌ལ། དག་པ་ཀབ་ཉི་ དབའི་ ཤི་ཝ་གེ་ མ་ཝུ་ཝ་སག་པུ་དག་ཁཱན་ཤོ་ ཧང་གི་ས་དག་ཉི་ རོག་ཏེ་སམ་ག་བར་ཀ་ ཆཱས་ཨ་ཝ༌ལ།

11ཉི་རོག་ཏེ་བ་ཀི་ ཞུ་ཝ་ལ་ གོ་མ་རང་ ཨེ་ལི་ཡ་ བྱོན་མེ་ཁེ་ལེ་དག་ཉི་ བཀའ་ཁྲིམས་ག་ སློབ་དཔོན་བ་ཀི་ ཧང་ཨ་ཉི་ཡེག་ཅ་ཡ་དག༌ཉི།

12རོ་ཀི་ རོག་ཏེ་སམ་ག་ གསུངས་མ་ལ་ གི་ལ་དེན་མེ་ ཧང་རང་ཕྲིག་ཀིན་ཅོད་པེ་དེན་གེ་ ཨེ་ལི་ཡ་ཨོ་ཕེ་ཁེ༌ལེ། དག་པ་ཀབ་ཉི་ གསུང་རབ་གེ་ སོ་ངོ་ག་ཟ་ག་ཀོར་གེ་ ཧང་ད་བུ་ཤོ་ན་ཡ། རོག་ཤོ་ སོ་ངོ་བ་ཀི་མ་ཟེས་པཱན་ གནམ་མེད་ས་མེད་ དཀའ་ཝ་ཅཱད་པེ་ཁེ་ལེ་དག་ཉི་ ཤོན༌ཅ། 13ཉི་ཨོམ་ ཇི་གི་ཡེག་པེ་ ཨེ་ལི་ཡ་ཤོ་ གི་ཚེ་གེ་ཤ་ཨོ་ཕ། གསུང་རབ་ནང་ཀ་ འབྲི་བ་པུརུས་ཀིན་ཨ་ཉི་ རོག་ཏེ་བ་ཀི་ ཧང་ཨ་ལེ་ལ་མ་ཐུར་ཨ་ཉི་ རོ་ཀ་བུ་ གནམ་མེད་ས་མེད་ མ་ལེག་པ་ཨ་ཝ་དག་ཉི་ གསུངས་མ༌ལ༎

ཡི་ཤུ་གི་ རྣམ་ཤེས་མ་ལེག་པ་གི་ནོད་ཁཱན་ཟ་ དྲག་ཉི་གནང་མ༌ལ།

14ཉི་རོག་ཏེ་བ་ བཱརའ་སློ་མ་བ་ཆོ་ས་ག་ ཕེབས་པ་ཀབ་ཉི་ སོ་ངོ་མང་པུ་ཐུར་ རོག་ཏེ་བ་ཀ་ ཀོ་ལོ་ལོ་ཛོམ་ཉི་ ཉི་བཀའ་ཁྲིམས་ག་ སློབ་དཔོན་ཚེ་བང་ རོག་ཏེ་བ་ཀབ་ཉི་ རྩོད་པ་ཕི་ཉི་ཆོ་ཝ་ག་ ཁྲ་པ༌ལ། 15ཉི་ཡི་ཤུ་ མཇལ་བ་ཐུར་ག་རང་ སོ་ངོ་བ་ གནམ་མེད་ས་མེད་ ཤོ་ནང་ཕེ་ཉི་ ཇུག་ཉི་རང་དིན་ཐཱན་ རོག་ཏེ་བ་ཀི་ ཡི་ཤུ་ག་བྱོན་ཤོ་དག་ཉི་ ཞུ་ཝ༌ལ།

16ཉི་རོ་ཀི་ རོ་ཀ་སློ་མ་བ་ཀ་ ཇི་མ་ལ་ ཨོ་ཉ་སོ་ངོ་བ་ཀབ་ཉི་ ཧང་ག་ཀོར་གེ་ ཤག་ཕིན་ཅ་ཡ་དག༌ཉི།

17སོ་ངོ་མང་ཀ་པོང་ཀེ་ ཐུར་གི་ཞུ་ཝ་ལ་ སློབ་དཔོན་ ཇ་ག་ཟ་ དོན་ཡོང་བ་གི་ ནོད་པ་ཨ་དེན་གེ་ ནོ་ཝང་ཆོག་པེ་མ་ཝ་རི་ཉི་ རོག་ན་ག་སྐུན་མདུན་ག་ ཕ་ཝ༌ཅ། 18ཉི་རོ་ཀ་ནང་ཀ་ དོན་ནུ་ཕ་ཀབ་ཉི་རང་ ས་ག་ཐང་གེམ་ཉི་ ཉི་རོ་ཀ་ནོ་ཝང་གེ་ བོམ་ནང་ཤོ་ཉི་ ཤ་རིག་ཉི་ ཉི་ཀ་རག་པེ་རི་ཉི་ ལུས་པུ་ལེ་མེ་མ་ན་ཝ་རི་ན། ཉི་ཇི་གི་ ན་ག་སློ་མ་བ་ཀ་ ལ་སོ་སྐུ་ཆེ་ཨ་ཉི་ དོན་ཤོ་ཉི་གེམ་ཤོ་དག་ཉི་ ཞུ་ཝ་ དག་པ་ཀབ་ཉི་ རོག་ཏེ་བ་ཀི་ མར་ཤི་དག་ཉི་ ཞུ་ཝ༌ལ།

19ཉི་རོ་ཀི་ རོག་ཏེ་བ་ཀ་ གསུངས་མ་ལ་ དབའི་ དད་པ་མ་ཁཱན་སོ་ངོ་བ་ ཇང་ན་ཧ་བ་ཀབ་ཉི་ ཧབ་ཏུར་ཤ་ཆོ་ལེ་ཡ། ཨོམ་ ཇང་ན་ཧ་བ་ཀེ་ ཧབ་ཏུར་ཤོ་ ཐེས་ཉི་ཆོ་ལེ་ཡ་དག་ཉི་ གསུངས་ཐཱན་ རོག་ཇང་ཆོ་ས་ག་ཕའི་དག་ཉི་ གསུངས་མ༌ལ།

20ཉི་རོག་ཏེ་བ་ཀི་ ཨོ་ཉ་ཟ་ རོ་ཀ་སྐུན་མདུན་ག་ཕ་ཝ༌ལ། ཉི་དོན་གི་ ཡི་ཤུ་མཇལ་བ་ཐུར་ག་རང་ ཝག་ཙ་ཉོས་པེ་ད་བུ་རི་ཉི་ ས་ག་ཐང་ཇོང་ཉི་ ཀ་ལང་ཀ་ལང་ཨ་ཉི་ ཉི་ནོ་ཝང་གེ་ བོམ་ནང་ཤོ་ཝ༌ལ།

21ཉི་ཡི་ཤུ་གི་ རོ་ཀ་ཨ་པ་ག་ ཇི་མ་ལ་ ཨུ་ཐུ་ད་བུ་ ཧ་ལ་གེ་ ཨ་ལེ་གོ་ཙུག་པ་ཡ་དག༌ཉི། རོག་ཟེ་མུ་ཨ་ཉི་ ཆོ་ལེ་གང་ཀེ་རང་ གི་ལ་དག་ཉི་ རོ་ཀ་ཨ་པ་གི་ཞུ་ཝ༌ལ། 22ཉི་དོན་གི་ རོག་ཤེ་ལེ་མིག་པ་ཕི་ཉི་ ཤེབ་མང་པུ་ཐུར་ མི་དང་རི་ནང་ཀ་ ཐུབ་ཉི་གེ༌མ། ནཱན་གི་རེ་བེ་ཆོ་ནེ་ལ་ ཐུགས་རྗེ་གཟིགས་ཉི་ ཨ་ཧ་སྐྱིད་སྡུག་གཟིགས་ཉི་ གནང་ཤོ་དག་ཉི་ ཞུ་ཝ༌ལ།

23ཉི་ཡི་ཤུ་གི་གསུངས་མ་ལ་ ནཱན་གི་ རེ་བེ་ཆོ་ནེ་ལ་དག་ཁཱན་ཤོ་ ཧང་ཡེག་པ་ཙ་རྩིས་ཡ། དད་པ་ཨ་ཁཱན་ག་དེན་གེ་ མར་བེ་ག་ ཧང་རང་མཱན་ཅ་དག༌ཉི།

24ཨོ་ཉ་ཐྲེ་ཀེ་རང་ ཝག་ཙ་ག་ཨ་པ་གི་ ཤུག་ཨ་ཉི་ཞུ་ཝ་ལ་ ཇི་གི་དད་པ་ཨན་ཅ་ གཙོ་བོ་ ཇ་ག་དད་པ་མ་ཁཱན་ག་ སྐྱབས་གཟིགས་གནང་ཤོ་དག༌ཉི།

25ཉི་ཡི་ཤུ་གི་ སོ་ངོ་མང་པུ་ཐུར་ཇུག་ཉི་ ཨོ་ཕ་གཟིགས་པ་ཀབ་ཉི་ རོ་ཀི་ ཨོ་ཉ་རྣམ་ཤེས་མ་ཙང་མ་ག་ བཀའ་གནང་ཉི་ ནཱན་ན་ཏོ་ར་དང་ ཡོང་བ་རྣམ་ཤེས་ ནཱན་རོ་ཀེ་ཕིས་ཀ་ ཤོ་ཉི་ཨོ་དོ་དག་ཉི་ ཇི་གི་ཡེག༌ཅ། ཉི་ལོག་ཉི་ རོ་ཀ་ནང་ཀ་ ཧ་ལ་རང་ ནུ་ཕེ་མཱན་ཅ་ན་དག་ཉི་ གསུངས་མ༌ལ།

26ཉི་དོན་གི་ གནམ་མེད་ས་མེད་ ཤ་དར་ཕི་ཉི་ རོག་ཤུག་ཨ་ཉི་ཁཱན་གེམ་ཐཱན་ ཕིས་ཀ་ཤོ་ཉི་ཨོ་ཕ༌ལ། ཉི་ཨོ་ཉ་ཟ་དྲཱན་མ་ མ་ཝ་རི་ཉི་ སོ་ངོ་ཐམས་ཅན་གི་ ཡེག་པ་ལ་ རོག་ཤི་ཝ་དག༌ཉི། 27དག་པ་ཀབ་ཉི་ ཡི་ཤུ་གི་ རོ་ཀ་ཕྱག་ཀི་ཨ་ཉི་ ཇང་པ་ཀབ་ཉི་ ག་ཐིང་མ༌ལ།

28ཉི་ཡི་ཤུ་ ཕའི་ནང་ཀ་བྱོན་དེན་གེ་ རོ་ཀ་སློ་མ་བ་ཀི་ ཙང་ཀེན་ཨ་ཉི་ཞུ་ཝ་ལ་ ཨ་ཤི་ཨོ་ཉ་དོན་ཤོན་གེ་མེ་ག་ ཧང་ཨ་ཉི་མར་ཤི་ཡ་དག༌ཉི།

29ཉི་རོ་ཀི་ རོག་ཏེ་བ་ཀ་ གསུངས་མ་ལ་ ཨུ་ཐུ་ད་བུ་ཤོ་ སྨོན་ལམ་ཐུར་གི་ མ་ཏོག་པ་ བཱརའ་ཧང་གི་རང་ མར་བ་ན་དག༌ཉི༎

ཡི་ཤུ་གི་ ཨོམ་ཆང་རང་ རོག་གཤགས་པེ་ཁེ་ཝ་ཀོར་གེ་ གསུངས་མ༌ལ།

30ཉི་རོག་ཏེ་བ་ ཨོ་ཉ་གེ་བྱོན་ཉི་ ལོག་ཉི་རང་ ག་ལིལ་ ཆ་འོག་ག་ནུ་ཕ༌ལ། ཉི་རོག་ཏེ་བ་ ཨོ་ག་ཅ་གི་ལ་སྨོ་ ཨི་བི་གི་རང་མ་སེ་ཝ་ཨ་ཉི་ བཞུགས་པེ་ག་ ཡི་ཤུ་ག་ ཐུགས་བསམ་ཅ་གི་ཝ༌ལ། 31ཧང་ཡ་དག་ནེ་ལ་ རོ་ཀི་ རོ་ཀ་སློ་མ་བ་ཀ་ ཡེན་གནང་མེ་དེན་གེ་གི་ཝ༌ལ། རོ་ཀི་ རོག་ཏེ་བ་ཀ་ གསུངས་མ་ལ་ སོ་ངོ་ག་ཟ་ཤོ་ སོ་ངོ་བ་ཀ་ ག་དང་ག་རྩིས་སྤྲོད་ཉི་ ཉི་རོག་ཏེ་བ་ཀི་ ཇང་ཤེ༌ལེ། ཉི་ཤི་ཉི་ ངམ་བི་ནང་སམ་ག་ཚི་ངེ་ ལོག་ཉི་དངོས་སུ་ཨ་ཉི་ ཝུ་ལེ་ན་དག༌ཉི། 32ཡི་ཤུ་གི་ ཧང་གསུངས་མ་གི་ལ་སྨོ་ རོག་ཏེ་བ་ཀི་ ཧ་མ་གོ་ཝ༌ལ། ཞུ་ལེ་དག་ནེ་ལ་ ཡོང་ཁེ་ཝ༌ལ༎

ཆི་ལུ་རང་ཨི་བི་གི་ལ་ཡ།

33ཉི་རོག་ཏེ་བ་ ཀ་ཕར་ན་ཧུམ་ག་ཕེབས་ཉི་ ཕའི་ནང་ཀ་བཞུགས་པེ་གང་ཀ་ ཡི་ཤུ་གི་ རོག་ཏེ་བ་ཀ་ ཇི་མ་ལ་ ན་ཧ་བ་ ལམ་བར་ཀ་ ཧང་ག་ཀོར་གེ་ ཤག་རུ་མ་ཡ་དག༌ཉི། 34དག་པ་ཀབ་ཉི་ རོག་ཏེ་བ་ ཙང་ཀེན་ཆོ་ཝ༌ལ། ཧང་ཡ་དག་ནེ་ལ་ ལམ་བར་ཀ་ རོག་ཏེ་བ་ཀ་པོང་ཀེ་ ཨི་བི་ཆི་ལུ་གི་ལ་ཡ་དག་ཉི་ ཨོ་ཉ་ཀོར་གེ་ ཤག་ཕི་ཝ་ཆོ་ཝ༌ལ། 35ཉི་རོག་ ས་ག་བཞུགས་ཐཱན་ རོག་ཏེ་སོང་ཉིག་ཙིང་ར་ཉི་ གསུངས་མ་ལ་ ན་ཧ་པོང་ཀེ་ ཨི་བི་གི་ དང་པ་ཤོ་ལེ་གོད་པ་ཐུར་ ཨོ་ཉ་སོ་ངོ་ཁེ་པ་ ཐམས་ཅན་གེ་ ཇུ་ཀ་ཆོ་ལེ་ཁེ༌ལེ། ཉི་ཐམས་ཅན་ག་ གཡོག་པ་ཨ་ལེ་ཁེ་ལེ་དག༌ཉི།

36ཉི་རོ་ཀི་ ཝག་ཙ་ཐུར་ཕ་ཉི་ རོག་ཏེ་བ་ཀ་པོང་ཀ་ ཐ་ཝ༌ལ། ཉི་ཝག་ཙ་ རོ་ཀ་ཕྱག་ཀ་ལཱན་ཐཱན་ རོག་ཏེ་བ་ཀ་ གསུངས་མ་ལ་ 37ཨི་བི་གི་ ཨུ་ཐུ་ད་བུ་ཝག་ཙ་ ཇ་ག་མིང་ག་ལཱན་ཅ་གི་ལ་སྨོ་ ཨོ་ཉ་སོ་ངོ་གི་ ཇང་ཞུན་ཅ་གི༌ལ། ཉི་ཇང་ཞུ་ཁཱན་སོ་ངོ་གི་ ཇང་ཐུར་ཤ་ཞུན་ཅ་མང་གི་ཝ་ ཇང་ཀུ་ཏི་ཁཱན་ ཇ་ག་ཡབ་བུ་ ཞུན་ཅ་གི་ལ་དག༌ཉི༎

ཨ་ཧ་ཏཱན་མ་ལེག་པ་མ་ཨ་ཁཱན་ ཐམས་ཅན་རང་ ཨ་ཧ་དེན་གེ་གི༌ལ།

38ཉི་ཡུ་ཧན་ན་གི་ རོ་ཀ་ཞུ་ཝ་ལ་ སློབ་དཔོན་ ཨ་ཤི་ན་ག་མཚན་ག་ སོ་ངོ་ཐུར་གི་ དོན་ཤོ་ཉི་གེ་མ་ཐོང༌མ། ཉི་རོག་ ཨ་ཧ་པོང་ཀེ་ མང་གི་ཝ་ཨ་དེན་གེ་ ནཱན་གི་ ཨུ་ཉུ་ད་བུ་ ཨ་ལེ་མ་ཆོག་པ་དག་ཉི་ཡེག་ཉི་ ཨ་ཤི་རོག་ཁག་པ་དག༌ཉི།

39ཡི་ཤུ་གི་གསུངས་མ་ལ་ རོག་མ་ཁག༌ཅོ། ཇ་ག་མིང་ག་ ཨུ་ཉུ་ད་བུ་ལའི་ཆི་ལུ་ ཨི་བི་གི་ཨན་ཅ་གི་ལ་སྨོ་ ཨོ་ཉ་སོ་ངོ་གི་ དོ་ཟོ་ཨ་ཉི་ ཇ་ག་ཁ་ཏང་མེ་མར༌བ། 40ཨ་ཧ་ཏཱན་ མ་ལེག་པ་མ་ཨ་ཁཱན་ སོ་ངོ་ཐམས་ཅན་རང་ ཨ་ཧ་དེན་གེ་གི༌ལ། 41ཇི་གི་ ན་ཧ་ཐྲང་ཉི་ཡེག་པེ་ ཨི་བི་གི་རང་གི་ནེ་བུ་ ན་ཧ་བ་ ཇ་ག་གི་ཝ་ཨ་དེན་གེ་ རི་གུར་བུ་ཐུར་བུ་ ཇ་མེ་བི་ནེ་ཆང་ ཨོ་ཉ་སོ་ངོ་གི་ ཐེ་རི་བ་རི་རང་ སེ་རབ་ཉོང༌པེ༎

སྡིག་པ་ཨ་ལེ་རིག་ཁཱན་བར་ཆད།

42ཨི་བི་གི་རང་གི་ནེ་བུ་ ཇ་ག་དད་པ་ཨ་ཁཱན་ ཟེ་མུ་ཐུར་ག་ སྡིག་པ་ཨ་ལེ་རིག་ནེ་ལ་ ཨོ་ཉ་སོ་ངོ་ཁེ་པ་ རོ་ཀ་ངང་གེ་ རང་ཐང་ཇཱན་ཐཱན་ རྒྱམ་མཚོ་ནང་ཀ་ ཐུབ་གེམ་ནེ་ལ་དྲག༌པེ། 43ཉི་ན་ཧ་ ག་དང་ལོག་ཐུར་གི་ སྡིག་པ་ཨ་ལེ་རིག་ནེ་ལ་ ཅཱད་ཉི་གེམ་ཀུན་ཏི། ག་དང་ཉིག་ཙིང་ཐ་ཉི་ མི་ཤི་ལེ་མ་ཝ་དིར་ཁཱན་ དམྱལ་བ་ག་དི་ཝ་གེ་ཏ་ ག་དང་ཐུར་ཨ་ཉི་ ཚེ་མ་འགྱུར་བརྟན་པ་ ཉོང་ཉི་ཆོ་ཝ་དྲག༌པེ། 44-45ན་ཧ་ བི་ལོག་ཐུར་གི་ སྡིག་པ་ཨ་ལེ་རིག་ནེ་ལ་ ཅཱད་ཉི་གེམ་ཀུན་ཏི། བི་ཉིག་ཙིང་ཐ་ཉི་ དམྱལ་བ་ག་དི་ལེ་ཁེ་ཝ་གེ་ཏ་ བི་ཐུར་ཨ་ཉི་ ཚེ་མ་འགྱུར་བརྟན་པ་ ཉོང་ཉི་ཆོ་ཝ་དྲག༌པེ། 46-47ཉི་ན་ཧ་ མིང་ལོག་ཐུར་གི་ སྡིག་པ་ཨ་ལེ་རིག་ནེ་ལ་ ཇེག་ཉི་གེམ་ཀུན་ཏི། མིང་ཉིག་ཙིང་ཐ་ཉི་ དམྱལ་བ་ག་དི་ཝ་གེ་ཏ་ མིང་ཐུར་ཨ་ཉི་ དཀོན་མཆོག་ག་རྒྱལ་སྲིད་ག་ ནུབ་ཉི་ཆོ་ཝ་དྲག༌པེ། 48དམྱལ་བ་ག་ལུང་བུ་ ཧ་ལ་རང་མ་ཤི༌ལ། ཉི་མི་བུ་ ཧ་ལ་རང་མ་ཤི༌ལ།

49མཆོད་པ་ཕུལ་ཁཱན་བ་ ཨིན་ཆ་གི་ཨ་ཉི་ ཙང་མ་ཅོད་པ་པུརུས་ཀིན་ཨ་ཉི་ སོ་ངོ་ཐམས་ཅན་རང་ མི་གི་ཨ་ཉི་ ཙང་མ་ཅོད་པེ་གི༌ལ། 50ཨིན་ཆ་ལེག་པུ་གི༌ལ། དག་པ་ཀབ་ཉི་ ཨིན་ཆ་ག་བོརོ་ མ་ཝ་རི་ནེ་ལ་ ན་ཤི་ ཧང་ཏེ་ཉི་ལོག་ཉི་ བོརོ་ཆོ་ཝ་ཅོད་པེ་རེ་བེ་ཡ། ཨོ་ཉི་ཨ་དེན་གེ་ ན་ཧ་བོརོ་ ཡེ་བེ་མ་བི་ལཱན་ ཐུར་གི་ཐུར་ཀབ་ ཆམ་ཉི་ཆོའི་དག་ཉི་ གསུངས་མ༌ལ༎

Currently Selected:

མར་ཀུས། 9: TNTB

Highlight

Copy