རོ་མི། 3
3
དཀོན་མཆོག་ཤོ་ དམ་ཚིག་ཙུང་ཁཱན་གི༌ལ།
1ཉི་ལ་ ཡ་ཧུ་དི་པ་གི་ཝ་ཨ་དེན་གེ་ ཧང་ཕཱན་མ་ཅ་ཡ། ཡ་ཧུ་དི་པ་བ་ཀ་ ཤ་ཅཱད་པེ་ག་ལུགས་སྲོལ་ག་ ཁེབ་སང་ཧང་ཅ་ཡ། 2མ་པ་ ཡ་ཧུ་དི་པ་གི་ཝ་ཨ་དེན་གེ་ ཕན་པ་མང་པུ་ཐུར༌ཅ། དང་པ་དག་པ་ལ་ དཀོན་མཆོག་ག་གསུང་ ཡ་ཧུ་དི་པ་བ་ཀ་གནང་མ༌ཅ།
3ཡ་ཧུ་དི་པ་ཚེ་བང་གི་ དད་པ་མ་ཨ་ནེ་ལ་ ཧང་ཏེན་ཡ། ཧང་རོག་ཏེ་བ་ཀི་ དད་པ་མ་ཨ་ལ་ཀབ་ཉི་ དཀོན་མཆོག་གི་བུ་ དམ་ཚིག་ཙུང་མེ་ག་ ཐུབ་ཐ་ལེ་སྨོ། 4ཏི་ངེ་རང་མང་གི། སོ་ངོ་ཐམས་ཅན་གི་ སོ་ད་ཕི་ནེ་བུ་ དཀོན་མཆོག་ཤོ་ དེན་པ་གི༌ལ།
ནཱན་གི་གསུངས་མ་ཀབ་ཉི་ ནཱན་རང་དེན་ཅ་ཨ་ཉི་ ཁུངས་ཀེ༌བེ། ཉི་རྩིས་ཞུ་ཕིད་པ་ཀབ་ཉི་ ནཱན་རང་ཟག་པ་#3:4 མགུར་མ་ག་དཔེ་ཆ་ 51:4 དག་ཉི་
གསུང་རབ་གེ་ཤོན༌ཅ།
5དག་པ་ཀབ་ཉི་ ཨ་ཤི་དྲང་པུ་མ་ཨ་ལ་ཀབ་ཉི་ དཀོན་མཆོག་གི་ དྲང་པུ་ཨ་ཉི་གནང་ཁཱན་ཁེ་པ་ ལག་ཏང་ དང་སང་ཀིན་ཨ་ཉི་ ཐོང་མེ་རེ་ནེ་ཏ་ ཨ་ཤི་ཧང་ཡེག་པེ་ཡ། ཨ་ཤི་དྲང་པུ་མ་ཨ་ལཱན་ དཀོན་མཆོག་གི་ ཨ་ཧ་ཁྲིམས་ཀེ་བ་ཀབ་ཉི་ དཀོན་མཆོག་གི་ ཁྲིམས་མ་ཐྲང་ཅི་དག་ཉི་ ཡེག་པེ་སྨོ། (ཇི་གི་སོ་ངོ་ག་ལུགས་སྲོལ་དང་ཏུ་ཉི་ ཆཱས་ཨན༌ཅ།) 6ཏི་ངེ་རང་མང་གི། དཀོན་མཆོག་རང་ དྲང་པུ་མ་ནེ་ལ་ དཀོན་མཆོག་གི་ འཛམ་གླིང་ཧང་ཏེན་ཨ་ཉི་ ཁྲིམས་ཅཱད་པེ་རེ་བེ་ཡ། 7ཨོ་ཉེ་རང་གི་ནེ་བུ་ སོ་ངོ་ཚེ་བང་གི་ཡེག་ཏུ་ ཇི་གི་ལའི་དྲང་པུ་ མ་ཨ་ལ་ཀབ་ཉི་ དཀོན་མཆོག་དེན་པ་ཅ་དག་གེན་ཉི་ ཉི་རོ་ཀ་གཟི་བརྗིད་མང་པུ་ཅོད་ནེ་ལ་ རོ་ཀི་ ཇང་སྡིག་ཅན་གི་ཝ་ཨ་དེན་གེ་ ཧང་ཏེན་ཨ་ཉི་ ཁྲིམས་ཅཱད་པེ་ཡ་དག༌ཉི། 8ཨོ་ཉེན་རང་གི་ནེ་ཏ་ ན་ཤི་ཨོ་ཐེན་ཡེག་ཅོ་ ལེག་པུ་ཇུང་མེ་དེན་གེ་ ཨ་ཤི་ངན་པ་ཨ་ཁེ་དག༌ཉི། ཇི་གི་ཨོ་ཐེན་ཡེག་ལ་ཨ་ཉི་ སོ་ངོ་ཚེ་བང་གི་ཁ་ཏང་ཉི་ མེམ་ཅོར་ལ་དང་། ཨུ་ཉུ་ད་བུ་ཡེག་ཁཱན་ སོ་ངོ་བ་ཀ་ ཁྲིམས་ཀེ་བེ་ཁེ༌ལེ༎
སོ་ངོ་ཐམས་ཅན་རང་ སྡིག་ཅན་གི༌ལ།
9ཉི་ཨ་ཤི་ ཨོ་ཐ་ཆཱས་ ཧང་ཏེན་ཇུག་དུང་མེ་ཡ། ཧང་ཨའི་ཡ་ཧུ་དི་པ་བ་ བཱརའ་སོ་ངོ་བ་ཀེ་དྲག་ཅ་སྨོ། ཏི་ངེ་རང་ དྲག་པུ་མཱན༌ཅ། ཡ་ཧུ་དི་པ་གི་ཁཱན་དང་ གིརིག་ཐམས་ཅན་རང་ སྡིག་ཅན་གི་ལ་དག་ཉི་ ཨ་ཤི་ ན་ཧ་ཡེག་ཉི་ཆུ་མ༌ཅ། 10གསུང་རབ་ནང་ཀེ་ཤོན་ཅ་
སོ་ངོ་དྲང་པུ་ ཐུར་རང་མ༌ལ། མ་ལེ་ནང་ཀེ་ ཐུར་བུ་མ༌ལ། 11ཧ་གོ་ཁཱན་ ཐུར་རང་མ༌ལ། དཀོན་མཆོག་ལམ་ཁཱན་བུ་ ཐུར་རང་མ༌ལ། 12ཐམས་ཅན་གི་ དཀོན་མཆོག་གེ་ གིར་ཉི་དི་ཝ༌ཅ། ཐམས་ཅན་གི་ མང་གི་ཝ་ཨ་ཝ༌ཅ། ཉི་ཐུར་གི་རང་ ལེག་པུ་ཨ་ལུ་མ༌ལ། མ་ལེ་ནང་ཀེ་ ཐུར་རང་མ༌ལ།#3:12 མགུར་མ་ག་དཔེ་ཆ་ 14:1–3; མགུར་མ་ག་དཔེ་ཆ་ 53:1–3; དཔེ་གཏམ་རིག་པ་ག་དཔེ་ཆ་ 7:20 13རོག་ཏེ་བ་ཀ་ནོ་ཝང་ཁེ་པ་ དུར་ག་ནོ་ཝང་ཏི་ཁཱན་ད་བུ་གི༌ལ། རོག་ཏེ་བ་ཀ་ལེ་གི་ སོ་ད་ཕིན༌ཅ།#3:13 མགུར་མ་ག་དཔེ་ཆ་ 5:9 རུ་གེ་ནང་ག་དུག་ རོག་ཏེ་བ་ཀ་ ནོ་ཝང་ལེབ་ཅི་ག༌ཅ།#3:13 མགུར་མ་ག་དཔེ་ཆ་ 140:3 14རོག་ཏེ་བ་ཀ་ནོ་ཝང་ ཁ་རབ་དང་ ཁ་ལུ་བ་ཀི་ཕུང་མ༌ལ།#3:14 མགུར་མ་ག་དཔེ་ཆ་ 10:7 15ཤེ་ལེ་དག་པ་ཀབ་ཉི་ རོག་ཏེ་བ་ ཇོག་པུ༌ཅ། 16རོག་ཏེ་བ་ ཨོ་ག་དི་ཝ་ཐུར་ རོག་ཏེ་བ་ཀི་ བཱརའ་ག་མེ་པ་ཕི་ཉི་ གནམ་མེད་ས་མེད་ ནང་དོག་པེ་རིག༌ཅ། 17ཉི་སྐྱིད་པུ་ག་ལམ་ཤོ་ རོག་ཏེ་བ་ཀི་ སེ་ལུ་མཱན༌ཅ།#3:17 ཡ་ཤའི་ཡ་ག་དཔེ་ཆ་ 59:7, 8 18ཉི་རོག་ཏེ་བ་ཀི་ དཀོན་མཆོག་གེ་ ཡོང་ཁེ་ལེ་ག་ མ་ལམ་པ་ཅ་#3:18 མགུར་མ་ག་དཔེ་ཆ་ 36:1 དག༌ཉི།
19སོ་ངོ་བ་ཀི་ དོས་ཏག་པེ་ མར་བེ་དེན་གེ་དང་ འཛམ་གླིང་ཐམས་ཅན་གི་ དཀོན་མཆོག་ག་ རྩིས་ཕུལ་བེ་ཁེ་ལེ་དག་ཉི་ གེན་མེ་དེན་གེ་ བཀའ་ཁྲིམས་ཤོ་ ཨི་བི་ག་ཏཱན་གནང་མ་གི་ལ་སྨོ་ ཨོ་ཉ་སོ་ངོ་བ་ཀ་དེན་གེ་གི༌ལ། 20ཉི་ཨོམ་ ན་ཤི་སེ་ཝ་ཅ་ སོ་ངོ་གི་བཀའ་ཁྲིམས་གེ་ ཤོ་ཝ་དང་ཏུ་ཉི་ ཨ་ལ་ཀབ་ཉི་ དཀོན་མཆོག་ག་སྤྱན་ག་ ཏི་ངེ་རང་ དྲང་པུ་མ་རི༌ལ། དག་པ་ཀབ་ཉི་ བཀའ་ཁྲིམས་གེ་ཨ་ཉི་ཏ་ ཨ་ཤི་སྡིག་པ་ག་ཡོན་ཏན་ ཉོང་ཅ་གི༌ལ༎
དད་པ་ག་ཐུང་ཀེ་ཨ་ཉི་ དྲང་པུ་རིན༌ཅ།
21ཉི་ཨོམ་ བཀའ་ཁྲིམས་གེ་ཨ་ཉི་མང་གི་ཝ་ ཨའི་དཀོན་མཆོག་ག་སྤྱན་ག་ དྲང་པུ་རི་ལེ་ག་ལམ་ རོ་ཀི་ཨ་ཧ་གེན་ཉི་གནང་མ༌ཅ། ཉི་ཨོ་ཉ་ཀོར་གེ་ཤོ་ བཀའ་ཁྲིམས་དང་ ལུང་བསྟན་པ་བ་ཀ་ དཔེ་ཆ་ནང་ཀེ་བུ་ཤོན༌ཅ། 22ཡི་ཤུ་ཁིརིས་ག་ དད་པ་ཨ་ཁཱན་ ཐམས་ཅན་རང་ དད་པ་ག་ཐུང་ཀེ་ཨ་ཉི་ དཀོན་མཆོག་གི་ དྲང་པུ་ཅོད་ཉི་གནང༌ཅ། སོ་ངོ་ཨི་བི་གི་ནེ་བུ་ ཁྱད་པར་ཧང་རང་མཱན༌ཅ།
23ཧང་ཡ་དག་ནེ་ལ་ ཐམས་ཅན་གི་ སྡིག་པ་ཨ་ཝ་ཨ་དེན་གེ་ དཀོན་མཆོག་ག་ གཟི་བརྗིད་གེ་ ཇང་ཀིན་རི་ཝ༌ཅ། 24ཨོ་ཉེ་རང་གི་ནེ་བུ་ དཀོན་མཆོག་གི་ ཐུགས་རྗེ་གཟིགས་ཉི་ ཡི་ཤུ་ཁིརིས་གི་གནང་ཁཱན་ ཐར་པ་ག་ཐུང་ཀེ་ཨ་ཉི་ ཨ་ཧ་བ་ཏོང་པ་གེ་ དྲང་པུ་ཅོད་ཉི་གནང་མ༌ཅ། 25-26ཡི་ཤུ་ག་དད་པ་ཨ་ཁཱན་ སོ་ངོ་བ་ཀི་ རོ་ཀ་སྐུ་ཁྲག་གེ་ཨ་ཉི་ རོག་ཏེ་བ་ཀ་ སྡིག་པ་ག་ བཤགས་པ་ཉོང་ཅེན་དག་པ་གི་ དཀོན་མཆོག་གི་ རོག་ཨ་ཧ་དེན་གེ་ གཤགས་པེ་ག་ ཀུན་ཏི་ཝ་གི༌ལ། དཀོན་མཆོག་གི་ ཨོ་ཐེན་མཛད་པེ་དེན་ཐ་ཤོ་ རོག་ཤོ་ ཐྲང་ཉི་གནང་ཁཱན་ དཀོན་མཆོག་གི་ལ་དག་ཉི་ གེན་མེ་དེན་གེ་གི༌ལ། དང་པོ་ག་དུས་ག་ དཀོན་མཆོག་བཟོད་པར་སྒོམ་ཉི་ བཞུགས་པ་ཨ་དེན་གེ་ སོ་ངོ་བ་ཀི་ སྡིག་པ་ཨ་ལ་ཀབ་ཉི་ ཁྲིམས་མ་གནང་མ༌ལ། དག་པ་ཀབ་ཉི་ ཨོ་མ་ག་དུས་ག་ཤོ་ རོག་དྲང་པུ་ཅ་དག་ཉི་ གེན་མེ་དེན་གེ་དང་ ཨི་བི་གི་ ཡི་ཤུ་ག་དད་པ་ཨ་ཝ་ཐུར་ ཨོ་ཉ་སོ་ངོ་ཁེ་པ་ རོ་ཀི་དྲང་པུ་ཅོད་གནང་ཅ་དག་ཉི་ ཁུངས་ཀེ་བེ་དེན་གེ་གི༌ལ།
27ཉི་ལ་ ཧང་ག་ཀོར་གེ་ ཁམ་ཙོང་མེ་ཡ། མ་པ་ ཁམ་ཙོང་མེ་ག་ བཱརང་རང་མཱན༌ཅ། དེན་ཐ་ཧང་ག་ཡོར་ཀེ་ཡ། ཧང་ཨ་ཤི་ བཀའ་ཁྲིམས་ག་ ཆ་གནས་ཐ་ཝ་ཨ་དེན་གེ་སྨོ། མང་གི་ དག་པ་ཀབ་ཉི་ ཨ་ཤི་དད་པ་ཨ་ཝ་ཨ་དེན་གེ་གི༌ལ། 28ཧང་ཡ་དག་ནེ་ལ་ བཀའ་ཁྲིམས་ག་ ཆ་གནས་ཐ་ཝ་ཐུར་གི་ མང་གི་ཝ་ དད་པ་ག་ཐུང་ཀེ་ཨ་ཉི་བུ་ སོ་ངོ་དྲང་པུ་ཅོད་ཉི་གནང་ཅ་དག་ཉི་ ཨ་ཤི་སེན༌ཅ།
29ཧང་དཀོན་མཆོག་ཤོ་ ཡ་ཧུ་དི་པ་བ་ཀ་ དཀོན་མཆོག་ཤ་གི་ལ་སྨོ། ཧང་རོག་ ཡ་ཧུ་དི་པ་མང་གི་ཁཱན་བ་ཀ་ དཀོན་མཆོག་བུ་མང་གི་སྨོ། གི་ལ་ རོག་ཤོ་ ཡ་ཧུ་དི་པ་མང་གི་ཁཱན་བ་ཀ་ དཀོན་མཆོག་བུ་གི༌ལ། 30དཀོན་མཆོག་ཤོ་ ཐུར་ཤ་གི་ཝ་ཨ་དེན་གེ་ ཤ་ཅཱད་ཁཱན་བ་ རོག་ཏེ་བ་ཀ་ དད་པ་ག་ཐུང་ཀེ་ཨ་ཉི་ རོ་ཀི་དྲང་པུ་ཙིན༌ཅ། ཉི་ཤ་མ་ཅཱད་ཁཱན་བ་བུ་ རོ་ཀི་ རོག་ཏེ་བ་ཀ་ དད་པ་ག་ཐུང་ཀེ་ཨ་ཉི་ དྲང་པུ་ཙིན༌ཅ། 31ཨ་ཤི་དད་པ་ག་ཀོར་གེ་ གནམ་མེད་ས་མེད་ གཙོ་ཤོན་ཅ་ཨ་ཉི་ ཧང་ཨ་ཤི་ བཀའ་ཁྲིམས་ཤོ་ ཡིད་ཀ་མི་ལེ་གི་ལ་སྨོ། ཏི་ངེ་རང་མང་གི། ལག་ཏང་ ཨ་ཤི་བཀའ་ཁྲིམས་གེ་ ཤོ་ཝ་དང་ཏུ་ཉི་ཨན༌ཅ༎
Currently Selected:
རོ་མི། 3: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
