རོ་མི། 4
4
ཨ་བཱརའ་ཧམ་ག་དད༌པ།
1ཉི་ལ་ ཨ་ཤི་ཨ་བཱརའ་ཧམ་ག་ཀོར་གེ་ ཧང་ཡེག་པེ་ཡ། རོག་ཤོ་ ལུས་པུ་ག་ ཨ་ཧ་ཕ་མ་གི༌ལ། དད་པ་ག་ཐུང་ཀེ་ཨ་ཉི་ ཐར་པ་ཉོང་པ་ཀོར་གེ་ རོ་ཀ་ཉམས་མྱོང་ ཧང་ཆོ་ཝ་ཡ། 2ཧང་ཡ་དག་ནེ་ལ་ ཨ་བཱརའ་ཧམ་ ལའི་གི་ཨ་ཉི་ དྲང་པུ་རི་ཝ་ཆོ་ནེ་ལ་ རོ་ཀི་ཁམ་ཙོང་མེ་རེ་བེ་ཆོ༌ཝ། དག་པ་ཀབ་ཉི་ དཀོན་མཆོག་ག་སྤྱན་ག་ རོ་ཀི་ཁམ་ཙོང་མེ་ཁེ་ཝ་ག་ལའི་ ཧང་རང་ཨ་ཝ་མཱན་ཆི། 3ཧང་ཡ་དག་ནེ་ལ་ གསུང་རབ་གེ་ཤོན་ཅ་ ཨ་བཱརའ་ཧམ་གི་ དཀོན་མཆོག་ག་ དད་པ་ཨ་ཝ་ཨ་དེན་གེ་ དཀོན་མཆོག་གི་ རོག་དྲང་པུ་ཨ་ཉི་ ཙིན་གནང་མ་#4:3 ཇུན་པ་ག་དཔེ་ཆ་ 15:6དག༌ཉི།
4སོ་ངོ་གི་ ལའི་ཨ་ལ་ཀབ་ཉི་ རོ་ཀ་ཉི་ཁེ་པ་ སེ་རབ་མང་གི། དག་པ་ཀབ་ཉི་ ལའི་པ་བ་ཀི་ ལའི་ཨ་ཝ་དང་ཏུ་ཉི་ ཉོང་ཅ་གི༌ལ། 5དག་པ་ཀབ་ཉི་ སོ་ངོ་བ་ཀི་ ལའི་ཨ་ཝ་ཨ་དེན་གེ་ མང་གི་ཝ་ དད་པ་ཨ་ཝ་ཨ་དེན་གེ་ རོག་ཏེ་བ་ དྲང་པུ་ཙིན་ཅ་གི༌ལ། 6མ་རུང་ཐཱན་རང་གི་ནེ་བུ་ དྲང་པུ་ཙི་ཉི་གནང་མ་ཨ་དེན་གེ་ སྡིག་ཅན་སོ་ངོ་ཁེ་པ་ ཧབ་ཏུར་ ཤོ་ནང་ཕེ་ཝ་གི་ལ་སྨོ་ ཨོ་ཉ་ཀོར་གེ་ དཔོན་ད་ཝུད་གི་ གསུངས་ཉི་གནང་མ༌ཅ།
7ལའི་ངཱད་པ་ཀབ་ཉི་ བཤགས་པ་ཉོང་ཁཱན་བ་ ཧབ་ཏུར་ཤོ་ནང་ཕེ་ལེ་ཡ། རོག་ཏེ་བ་ཀ་ སྡིག་པ་བ་ མིང་གི་མ་ཐོང་མ་ ཅོད་ཉི་གནང་མ༌ཅ། 8གཙོ་བོ་གི་ ལོག་ཉི་ཧ་ལ་རང་ སྡིག་པ་དྲང་མ་ཨ་ཁཱན་ སོ་ངོ་ཁེ་པ་ ཧབ་ཏུར་ཤོ་ནང་ཕེ་ལེ་ཡ་#4:8 མགུར་མ་ག་དཔེ་ཆ་ 32:1, 2 དག༌ཉི།
9ཨོ་ཐ་བྱིན་རླབས་ཁེ་པ་ ཤ་ཅཱད་ཁཱན་བ་ཀ་དེན་གེ་ཤ་ གི་ལ་སྨོ། ཤ་མ་ཅཱད་ཁཱན་བ་ཀ་དེན་གེ་བུ་ གི་ལ་ཡ། ཨ་ཤི་ཡེག་པ་ཆོ་ཝ་ ཨ་བཱརའ་ཧམ་ཤོ་ དད་པ་ག་ཐུང་ཀེ་ཨ་ཉི་ དྲང་པུ་ཙི་ཝ་གི་ལ་དག༌ཉི། 10ཧང་ཏེན་ཨ་ཉི་ རོག་དྲང་པུ་ཙི་ཝ་གི་ལ་ཡ། ཧང་རོ་ཀ་ཤ་ཅཱད་ཏེན་གེ་སྨོ་ ཤ་མ་ཅཱད་པེ་ གོ་མ་རང་གི་ལ་ཡ། རོ་ཀ་ཤ་ཅཱད་ཏེན་གེ་མང་གི་ཝ་ རོ་ཀ་ཤ་མ་ཅཱད་པེ་ གོ་མ་གེ་རང་ རོག་དྲང་པུ་ཨ་ཉི་ ཙི་ཝ་ཆོ༌ཝ།
11ཤ་མ་ཅཱད་པེ་གོ་མ་རང་ རོ་ཀི་དད་པ་ཨ་ཝ་ཨ་དེན་གེ་ རོག་དྲང་པུ་རི་ཝ་གི་ལ་དག་ཉི་ གེན་མེ་དེན་གེ་ ཤ་ཅཱད་ཁཱན་ཤོ་ རྟགས་མཚན་གི༌ལ། ཨོ་ཉི་ཨ་དེན་གེ་ ཨ་བཱརའ་ཧམ་ཤོ་ ཤ་ཅཱད་ཁཱན་བ་ཀ་མང་གི་ཝ་ དད་པ་ཨ་ཁཱན་བ་ཀ་ཡབ་གི༌ལ། ཉི་རོག་ཏེ་བ་ཤོ་ དད་པ་ག་ཐུང་ཀེ་ཨ་ཉི་ དཀོན་མཆོག་ཀབ་ཉི་ དྲང་པུ་རིན་ཅ་གི༌ལ། 12ཉི་ཨ་བཱརའ་ཧམ་ཤོ་ ཤ་ཅཱད་ཁཱན་བ་དང་ རོ་ཀ་ཤ་མ་ཅཱད་པེ་གོ་མ་ རོ་ཀི་དད་པ་ག་ལམ་གེ་དང་ཁཱན་ རོ་ཀ་བི་ལམ་ག་ ཚིང་ཚིང་དི་ཁཱན་ སོ་ངོ་བ་ཀ་ ཡབ་གི༌ལ།
13བཀའ་ཁྲིམས་ག་ ཆ་གནས་ཐ་ཝ་ ཨ་དེན་གེ་མང་གི་ཝ་ དད་པ་ག་ཐུང་ཀེ་ཨ་ཉི་ དྲང་པུ་ཅོད་ཉི་ གནང་མ་ཨ་དེན་གེ་ དཀོན་མཆོག་གི་ ཨ་བཱརའ་ཧམ་དང་ རོ་ཀ་མི་རྒྱུད་བ་ཀ་ དབུ་མནའ་བཞེས་ཉི་ གསུངས་མ་ལ་ འཛམ་གླིང་ཐམས་ཅན་རང་ རོག་ཏེ་བ་ཀ་ ཐོབ་ཐང་རི་ལེ་དག༌ཉི། 14ཨོ་ཉི་ཨ་དེན་གེ་ བཀའ་ཁྲིམས་དང་ཏུ་ཉི་ ཆོ་ཁཱན་བ་ཀི་ཉོང་པེ་གི་ནེ་ཏ་ དད་པ་ཨ་ཉི་ ཁུངས་ཧང་རང་མཱན༌ཅ། ཉི་དཀོན་མཆོག་གི་ དབུ་མནའ་བཞེས་ཁཱན་བུ་ ཁུངས་ཧང་རང་མཱན༌ཅ། 15ཧང་ཡ་དག་ནེ་ལ་ བཀའ་ཁྲིམས་གི་ དཀོན་མཆོག་གེ་ ཁྲིམས་ཕཱན༌ཅ། དག་པ་ཀབ་ཉི་ བཀའ་ཁྲིམས་མ་ནེ་ལ་ བཀའ་ཁྲིམས་གེ་ གེ་བ་ཨ་ལེ་ག་ ལའི་རང་མཱན༌ཅ།
16ཨོ་ཉི་ཨ་དེན་གེ་ ཨ་བཱརའ་ཧམ་ག་ མི་རྒྱུད་ཐམས་ཅན་གི་ ཉོང་ཅེན་དག་པ་གི་ ཨོ་ཉ་དབུ་མནའ་ཤོ་ དད་པ་ག་ཐུང་ཀེ་ཨ་ཉི་ ཐུགས་རྗེ་གཟིགས་ཉི་ ཏོང་པ་གེ་གནང་ཅ་གི༌ལ། བཀའ་ཁྲིམས་ག་ ཆ་གནས་ཐ་ཁཱན་བ་ཀི་ཤ་ མང་གི་ཝ་ ཨ་བཱརའ་ཧམ་ད་བུ་དད་པ་ཨ་ནེ་ལ་ བཀའ་ཁྲིམས་ག་ ཆ་གནས་མ་ཐ་ཁཱན་བ་ཀི་བུ་ ཉོང༌པེ། ཧང་ཡ་དག་ནེ་ལ་ དད་པ་ཨ་ཁཱན་ ཐམས་ཅན་ག་ཡབ་ཤོ་ ཨ་བཱརའ་ཧམ་གི༌ལ། 17ཇི་གི་ནཱན་རྒྱལ་ཁབ་ མང་པུ་ཐུར་ག་ ཡབ་ཅོད་པ་ཅ་#4:17 ཇུན་པ་ག་དཔེ་ཆ་ 17:5དག་ཉི་ གསུང་རབ་གེ་ཤོན༌ཅ། རོ་ཀི་དད་པ་ཨ་ཁཱན་ དཀོན་མཆོག་ག་སྤྱན་ག་ རོག་ཤོ་ ཨ་ཧ་ཡབ་གི༌ལ། རོག་ཤོ་ ཤི་ཁཱན་བ་ཀ་ཚེ་གནང་ཁཱན་ དཀོན་མཆོག་གི༌ལ། ཉི་རོ་ཀི་ གོ་མ་མ་ཁཱན་ཁེ་པ་ བཀོད་ཉི་གནང༌ཅ།
18དཀོན་མཆོག་གི་ ཨ་བཱརའ་ཧམ་ག་ ནཱན་རྒྱལ་ཁབ་ མང་པུ་ཐུར་ག་ ཡབ་རི་ལེ་དག་ཉི་ གསུངས་མ་ཀབ་ཉི་ ཨ་བཱརའ་ཧམ་གི་ དཀོན་མཆོག་གི་ གསུངས་ཁཱན་ག་ དད་པ་ཨ༌ཝ། ན་ག་མི་རྒྱུད་ཁེ་པ་ ངབ་ཀ་སྐར་མ་སྨིན་དྲུག་བ་ ད་བུ་རང་ཨོ་ཕེ་ན་#4:18 ཇུན་པ་ག་དཔེ་ཆ་ 15:5དག་ཉི་ གསུང་རབ་ནང་ཀེ་ཤོན༌ཅ། ཨུ་ཉུ་ད་བུ་ཇུང་མེ་ག་ མར་བེ་ད་བུ་ཐོང་ནེ་བུ་ ཨ་བཱརའ་ཧམ་གི་ དད་པ་ཨ༌ཝ། 19ཨ་བཱརའ་ཧམ་ ཉིང་ 100 ཕང་ དི་ཝ་ཆོ༌ཝ། ཨོ་ཉེ་རང་གི་ནེ་བུ་ རོ་ཀ་ལུས་པུ་ག་གོད་ཉི་ རོ་ཀ་དད་པ་ ཟེ་མུ་མ་རིན་ཤི། ཉི་རོ་ཀ་མེ་ཝག་ཙ་ ས་ར་ག་ངེ་ཀ་བུ་ ཝག་ཙ་ཧ་ལ་རང་ཆག་པུ་མཱན་ཆི།
20ཨོ་ཉེ་རང་གི་ནེ་བུ་ དཀོན་མཆོག་གི་ དབུ་མནའ་བཞེས་ཁཱན་ག་ རོ་ཀི་དོགས་པ་མ་སག་ཅི། ལག་ཏང་ རོ་ཀ་དད་པ་སྒྲིང་སྒྲིང་རི་ཉི་ དཀོན་མཆོག་ག་ གཟི་བརྗིད་ཕུལ་བ༌ལ། 21དཀོན་མཆོག་གི་ དབུ་མནའ་བཞེས་ཁཱན་ཁེ་པ་ དཀོན་མཆོག་གི་ མཛད་པེ་རེ་བེ་དག་ཉི་ རོ་ཀི་ཏེན་ཏེན་ཨ་ཉི་རང་ དད་པ་ཨ་ཝ་ཆོ༌ཝ། 22ཨོ་ཉི་ཨ་དེན་གེ་ རོ་ཀ་དད་པ་ག་ཐུང་ཀེ་ཨ་ཉི་ རོག་ཤོ་ དྲང་པུ་ཨ་ཉི་ཆིན་མ་གི༌ལ།#4:22 ཇུན་པ་ག་དཔེ་ཆ་ 15:6 23རོག་དྲང་པུ་ཨ་ཉི་ ཆིན་མ་དག་ཁཱན་ཤོ་ རོག་ཏེན་ག་དེན་གེ་ཤ་ འབྲི་བ་མང་གི་ཝ་ 24ཨ་ཧ་དེན་གེ་བུ་ འབྲི་བ་གི༌ལ། ཨ་ཧ་གཙོ་བོ་ཡི་ཤུ་ གཤགས་པ་གེ་ ལོག་ཉི་བཞེངས་གནང་ཁཱན་ དཀོན་མཆོག་ག་ ཨ་ཤི་དད་པ་ཨ་ཝ་ཨ་དེན་གེ་ ཨའི་བུ་ དྲང་པུ་ཨ་ཉི་ཆིན་མེ་གི༌ལ། 25ཡི་ཤུ་ཤོ་ ཨ་ཧ་སྡིག་པ་དེན་གེ་ གཤགས་པེ་ག་གནང་མ༌ལ། དག་པ་ཀབ་ཉི་ ཨའི་དཀོན་མཆོག་ག་སྤྱན་ག་ དྲང་པུ་ཅོད་པེ་དེན་གེ་ རོག་གཤགས་པ་གེ་ ལོག་ཉི་བཞེངས་པ་གི༌ལ༎
Currently Selected:
རོ་མི། 4: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
