རོ་མི། 5
5
སྐྱིད་པུ་དང་ཤོ་ནང་།
1ཉི་ཨོམ་ དད་པ་ག་ཐུང་ཀེ་ཨ་ཉི་ ཨའི་དྲང་པུ་རི་ཝ་ཨ་དེན་གེ་ གཙོ་བོ་ཡི་ཤུ་ཁིརིས་ག་ ཐུང་ཀེ་ཨ་ཉི་ ཨའི་དཀོན་མཆོག་ཀབ་ཉི་ སྐྱིད་པུ་ཨ་ཉི་ཆོ༌ལེ། 2ཨ་ཧ་དད་པ་ག་ཐུང་ཀེ་ཨ་ཉི་ ཁིརིས་གི་ ཨ་ཧ་བ་ དཀོན་མཆོག་ག་ ཐུགས་རྗེ་ནང་ཀ་ ཕ་ཉི་གནང་མ༌ཅ། ཉི་ཨོ་ཉ་ཐུགས་རྗེ་ནང་ཀ་ ཨའི་ཨོ་མ་ཆོ་ཝ༌ཅ། ཉི་དཀོན་མཆོག་ག་ གཟི་བརྗིད་ག་དེན་གེ་ རེ་ཆ་ཨན་ཅ་ཨ་ཉི་ ཨའི་ཤོ་ནང་ཕེ་ཉི་ཆོ་ཝ༌ཅ།
3ཨོ་ཉ་གེ་བུ་ལག་ཉི་ ཨ་ཤི་ཨའི་དཀའ་ཝ་ཅཱད་པ་ཀབ་ཉི་བུ་ ཤོ་ནང་ཕེན༌ཅ། ཧང་ཡ་དག་ནེ་ལ་ ཨ་ཤི་སེན་ཅ་ དཀའ་ཝ་ཅཱད་པ་ཀབ་ཉི་ ཐེས་པེ་རེ་བ་རིན་ཅ་གི་ལ་དག༌ཉི། 4ཐེས་ཅ་ཨ་ཉི་ འབད་བཞག་ཆོ་ཝ་རིན་ཅ་ ཉི་འབད་བཞག་གི་ རེ་ཆ་ཆོ་ཝ་རིན༌ཅ། 5ཉི་རེ་ཆ་གི་ ཨའི་ཤོ་ནང་མ་ཕེ་ཝ་མ་ཅོད༌པ། ཧང་ཡ་དག་ནེ་ལ་ དམ་པའི་ཐུགས་ཉིད་ག་ ཐུང་ཀེ་ཨ་ཉི་ ཨ་ཧ་སེམས་ནང་ཀ་ དཀོན་མཆོག་ག་སྙིང་རྗེ་ ལུག་ཉི་གནང་མ༌ཅ།
6ཨ་ཧ་བ་ ཤུག་མ་ཝ་ཨ་ཉི་རང་ ཆོ་ལེ་གང་ཀ་ དུས་ཙུན་ཕྲིག་ཀིན་ རེན་པ་ཀབ་ཉི་ ཁིརིས་སྡིག་ཅན་བ་ཀ་དེན་གེ་ གཤགས་ཉི་གནང༌མ། 7ཨི་བི་གི་རང་གི་ནེ་བུ་ སོ་ངོ་དྲང་པུ་ག་དེན་གེ་ ཤི་ལེ་ག་ཀ་ལུ༌ཅ། མ་པ་ སོ་ངོ་ལེག་པུ་ག་དེན་གེ་ ཐུར་ཕང་གི་ ཤི་ལེ་བུ་གོད་ཏུ། 8དག་པ་ཀབ་ཉི་ ཨའི་སྡིག་ཅན་ཨ་ཉི་རང་ ཆོ་ལེ་གང་ཀ་ ཁིརིས་ཨ་ཧ་དེན་གེ་ གཤགས་པ་ཨ་དེན་གེ་ དཀོན་མཆོག་གི་ ཨའི་ཕང་ཅ་གི་ལ་དག་ཉི་ གེན་གནང་ཅ་གི༌ལ། 9ཁིརིས་ག་སྐུ་ཁྲག་ག་ཐུང་ཀེ་ཨ་ཉི་ ཨའི་དཀོན་མཆོག་ག་སྤྱན་ག་ དྲང་པུ་རི་ཝ་ཨ་དེན་གེ་ རོ་ཀི་ཨའི་ དཀོན་མཆོག་ག་ ཁྲིམས་གེ་བུ་ སྐྱབས་གཟིགས་ཉི་གནང༌མེ། 10ཨའི་ཤོ་ དཀོན་མཆོག་ག་ དགྲ་བྱང་ཕིཤི་གི་ཝ་ཆོ༌ཝ། དག་པ་ཀབ་ཉི་ རོ་ཀ་སྲས་ ཨ་ཧ་དེན་གེ་ གཤགས་པ་ཨ་དེན་གེ་ ཨའི་རོ་ཀ་ ཇ་རོ་ཅོད་ཉི་གནང་མ༌ཅ། ཨོ་ཉི་ཨ་དེན་གེ་ རོ་ཀ་ཚེ་ག་ཐུང་ཀེ་ཨ་ཉི་ ཨའི་རོ་ཀི་ མ་འགྱུར་བརྟན་པ་ག་ ཁྲིམས་གེ་ སྐྱབས་ཨ་ཉི་གནང་མེ་དག་ཉི་ ཨ་ཤི་ཏེན་ཏེན་ཨ་ཉི་རང་སེན༌ཅ། 11ཨོབ་ཏུར་ཤ་མང་གི་ཝ་ ཨ་ཧ་གཙོ་བོ་ ཡི་ཤུ་ཁིརིས་ག་ཐུང་ཀེ་ཨ་ཉི་ ཨའི་ལོག་ཉི་རང་ དཀོན་མཆོག་ཀབ་ཉི་ ཆ་མེ་རེ་བ་ཨ་དེན་གེ་ ཨའི་ཤོ་ནང་ཕེ་ཉི་ དཀོན་མཆོག་ག་བསྟོད་པ་ཕུལ༌ཅ༎
ཨ་དམ་དང་ཁིརིས།
12ཨ་དམ་ཐུར་གེ་ཨ་ཉི་ འཛམ་གླིང་ནང་ཀ་ སྡིག་པ་ནུ་ཕ། ཉི་སྡིག་པ་གི་ཨ་ཉི་ ཤི་སྲོག་ཀེ་ཝ༌ལ། ཨོ་ཐེན་ཨ་ཉི་ སོ་ངོ་ཐམས་ཅན་རང་ ཤི་ལེ་ཁེ་ཝ༌ལ། ཧང་ཡ་དག་ནེ་ལ་ སོ་ངོ་ཐམས་ཅན་གི་ སྡིག་པ་ཨ་ཝ༌ལ། 13བཀའ་ཁྲིམས་ མ་གནང་མེ་གོ་མ་གེ་རང་ ཨོ་ཐ་འཛམ་གླིང་ནང་ཀ་ སྡིག་པ་ཆོ་ཝ༌ལ། དག་པ་ཀབ་ཉི་ བཀའ་ཁྲིམས་མ་ཝ་ཨ་དེན་གེ་ སྡིག་པ་ག་རྩིས་ མ་ཐ་ཝ་ཆོ་ཝ༌ལ། 14ཨ་དམ་གི་ དཀོན་མཆོག་ག་ བཀའ་ག་ཆ་གནས་མ་ཐ་ལཱན་ སྡིག་པ་ཨ་ཝ་པུརུས་ཀིན་ཨ་ཉི་ སོ་ངོ་ཚེ་བང་གི་ སྡིག་པ་མ་ཨན་ཐཱན་རང་གི་ནེ་བུ་ ཨ་དམ་གེ་གོ་ཙུག་ཉི་ མོ་ས་ག་གང་ཀ་སག་པུ་རང་ སོ་ངོ་བ་ ཐམས་ཅན་རང་ ཤི་སྲོག་གི་དབང་པ༌ལ། ཨ་དམ་ཤོ་ བྱོན་མེ་ག་གི་ཁཱན་ ཁིརིས་ག་དཔེ་གི༌ལ། 15དག་པ་ཀབ་ཉི་ ཨ་ཧ་སྡིག་པ་དང་ དཀོན་མཆོག་གི་ གནང་ཁཱན་སེ་རབ་ག་ ཁྱད་པར་ཆི་ལུ༌ཅ། སོ་ངོ་ཐུར་གི་ སྡིག་པ་ཨ་ཝ་ཨ་དེན་གེ་ མང་པུ་ཐུར་ ཤི་ལེ་ཁེ་ཝ༌ལ། དག་པ་ཀབ་ཉི་ དཀོན་མཆོག་ག་ཐུགས་རྗེ་ ཨོ་ཉ་གེ་ཆི་ལུ་གི༌ལ། ཡི་ཤུ་ཁིརིས་ག་ཐུང་ཀེ་ཨ་ཉི་ རོ་ཀི་ཐུགས་རྗེ་གཟིགས་ཉི་ སོ་ངོ་མང་པུ་ཐུར་ག་ རོ་ཀི་སེ་རབ་ ཏོང་པ་གེ་གནང་མ༌ཅ། 16ཉི་ཨོམ་ཆང་རང་ དཀོན་མཆོག་ག་སེ་རབ་ཤོ་ སོ་ངོ་ཐུར་གི་ སྡིག་པ་ཨ་ཝ་ག་ ཐཱན་ཇུ་ད་བུ་མང་གི། ཧང་ཡ་དག་ནེ་ལ་ ཐུར་གི་ སྡིག་པ་ཨ་ཝ་ཨ་དེན་གེ་ ཁྲིམས་ཉོང་པ་ཆོ༌ཝ། དག་པ་ཀབ་ཉི་ དཀོན་མཆོག་གི་ གནང་ཁཱན་སེ་རབ་གི་ སྡིག་པ་མང་པུ་ཐུར་ བཀའ་དྲིན་བསྐྱང་ཉི་ དྲང་པུ་ཅོད་ཅ་གི༌ལ། 17སོ་ངོ་ཐུར་གི་ སྡིག་པ་ཨ་ཝ་ཨ་དེན་གེ་ ཤི་སྲོག་གི་དབང་པ་ཆོ༌ཝ། དག་པ་ཀབ་ཉི་ དཀོན་མཆོག་གི་ ཇོབ་ཇོབ་ཨ་ཉི་གནང་ཁཱན་ ཐུགས་རྗེ་དང་ དྲང་པུ་ག་སེ་རབ་ཞུ་ཁཱན་བ་ཀི་ ཨོ་ཉ་གེ་ལག་ཉི་ ཧབ་ཏུར་མང་པུ་ཨ་ཉི་ ཡི་ཤུ་ཁིརིས་ག་ཐུང་ཀེ་ཨ་ཉི་ ཚེ་དབང་པེ་གི༌ལ།
18ཨོ་ཐེན་ཨ་ཉི་ སོ་ངོ་ཐུར་གི་ སྡིག་པ་ཨ་ཝ་ཨ་དེན་གེ་ སོ་ངོ་ཐམས་ཅན་གི་ ཁྲིམས་ཉོང་པེ་ཁེ་ཝ་པུརུས་ཀིན་ཨ་ཉི་ སོ་ངོ་ཐུར་གི་ དྲང་པུ་ཨ་ཝ་ཨ་དེན་གེ་ སོ་ངོ་ཐམས་ཅན་རང་ དྲང་པུ་ཅོད་ཉི་ རོག་ཏེ་བ་ཀ་ ཚེ་གནང་ཅ་གི༌ལ། 19སོ་ངོ་ཐུར་གི་ དཀོན་མཆོག་ག་བཀའ་ག་ ཆ་གནས་མ་ཐ་ཝ་ཨ་དེན་གེ་ མང་པུ་ཐུར་ སྡིག་ཅན་རི་ཝ་པུརུས་ཀིན་ཨ་ཉི་ སོ་ངོ་ཐུར་གི་ དཀོན་མཆོག་ག་བཀའ་ག་ ཆ་གནས་ཐ་ཝ་ཨ་དེན་གེ་ མང་པུ་ཐུར་ དྲང་པུ་ཅོད་ཉི་གནང་ཅ་གི༌ལ།
20སོ་ངོ་བ་ཀི་ རོག་ཏེ་བ་ཀ་སྡིག་པ་ མང་པུ་ཆོ་ཁཱན་ཁེ་པ་ ཐོང་ཆེན་དག་པ་གི་ བཀའ་ཁྲིམས་གནང་མ་གི༌ལ། དག་པ་ཀབ་ཉི་ སོ་ངོ་བ་ཀི་ སྡིག་པ་མང་པུ་མང་པུ་ ཨ་ལ་ཀབ་ཉི་ དཀོན་མཆོག་ག་ཐུགས་རྗེ་བུ་ ལག་ཏང་ མང་པུ་རི་ཉི་རང་ དི་ཝ༌ལ། 21ཧང་ཡ་དག་ནེ་ལ་ སྡིག་པ་གི་དབང་ཉི་ ཤི་ལེ་ཁེ་ཝ་པུརུས་ཀིན་ཨ་ཉི་ ཐུགས་རྗེ་གི་བུ་ དྲང་པུ་ག་ཐུང་ཀེ་ཨ་ཉི་ དབང་ཉི་ ཨ་ཧ་གཙོ་བོ་ ཡི་ཤུ་ཁིརིས་ག་ཐུང་ཀེ་ཨ་ཉི་ ཚེ་མ་འགྱུར་བརྟན་པ་ ཉོང་ཅེན་དག་པ་གི་གི༌ལ༎
Currently Selected:
རོ་མི། 5: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
