རོ་མི། 6
6
སྡིག་པ་ག་དབང་ མ་ཝ་ཅོད་པ༌ལ།
1ཉི་ལ་ ཨ་ཤི་ཧང་ཡེག་པེ་ཡ། ཐུགས་རྗེ་མང་པུ་ རིན་ཆེན་དག་པ་གི་ ཨ་ཤི་སྡིག་པ་ཨ་ཉི་རང་ ཆོ་ལེ་སྨོ། 2ཏི་ངེ་རང་མ་ཨ༌ལ། སྡིག་པ་ག་ཤེག་པ་ ཨའི་ཤི་ཝ་ཆོན་ཐཱན་ཨ་ནེ་ལ་ ཨའི་སྡིག་པ་ག་ནང་ཀ་ ཧང་ཏེན་ཨ་ཉི་ཆོ་ལེ་ཡ། 3ཨུ་ཉུ་མ་ནེ་ལ་ ཁིརིས་ཡི་ཤུ་ག་མཚན་ག་ ཨའི་ཁྲུས་གསོར་ཞུ་ཁཱན་བ་ ཐམས་ཅན་རང་ རོག་ཀབ་ཉི་ ཤི་ཝ་གི་ལ་དག་ཉི་ སེ་ལུ་མ་ལ་སྨོ། 4ཨ་ཤི་ཁྲུས་གསོར་ཞུ་ལ་ཀབ་ཉི་ ཨ་ཧ་བ་ ཁིརིས་ཀབ་ཉི་ཤི་ཉི་ ཝང་ཕི་ཝ་གི༌ལ། ཡབ་ག་གཟི་བརྗིད་ག་ཐུང་ཀེ་ཨ་ཉི་ ཁིརིས་གཤགས་པ་གེ་ ལོག་ཉི་བཞེངས་པ་པུརུས་ཀིན་ཨ་ཉི་ ཨ་ཧ་བ་བུ་ ཚེ་སིང་མ་ནང་ཀ་ཆོ་ལེ་ཁེ༌ལེ།
5རོག་གཤགས་པ་པུརུས་ཀིན་ཨ་ཉི་ ཨའི་བུ་ཤི་ཉི་ རོག་ཀབ་ཉི་ཐུར་ རི་ཝ་ཨ་དེན་གེ་ རོག་གསོན་པོ་ཨ་ཉི་ སྐུ་བཞེངས་པ་པུརུས་ཀིན་ཨ་ཉི་ ཨའི་བུ་ གསོན་པོ་ཨ་ཉི་ཝུ་ཉི་ རོག་ཀབ་ཉི་ཐུར་རི༌ལེ། 6སྡིག་པ་གི་ ཨ་ཧ་ཚེ་ དབང་པེ་མར་ཆེན་དག་པ་གི་ ཨ་ཧ་ནང་ཀ་ སོ་ངོ་ཁེ་པ་ ཁིརིས་ཀབ་ཉི་ ཁྲིམས་ཤིང་ཐུང་ཀ་ཇཱན༌མ། ཨོམ་གི་ནེ་ལ་ ཨའི་སྡིག་པ་ག་ཟ་པ་ མང་གི་ཝ་རི་ཝ༌ཅ། 7ཧང་ཡ་དག་ནེ་ལ་ ཨི་བི་ཤི་ཝ་ཐུར་ ཨོ་ཉ་སོ་ངོ་ཁེ་པ་ སྡིག་པ་གེ་ གཱན་ཐར་ཅ་གི༌ལ། 8དག་པ་ཀབ་ཉི་ ཨའི་ཁིརིས་ཀབ་ཉི་ ཤིན་ཐཱན་ཨ་ནེ་ལ་ ཨའི་རོག་ཀབ་ཉི་རང་ གསོན་པོ་ཨ་ཉི་ ཆོ་ལེ་གི་ལ་དག་ཉི་ ཨ་ཤི་དད་པ་ཨན༌ཅ། 9ཧང་ཡ་དག་ནེ་ལ་ ཁིརིས་ཁེ་པ་གཤགས་པ་གེ་ ལོག་ཉི་བཞེངས་པ་ཨ་དེན་གེ་ ལོག་ཉི་ཧ་ལ་རང་ མ་གཤགས་པ་དག་ཉི་ ཨ་ཤི་སེན༌ཅ། ཨོམ་གི་ནེ་ལ་ ཁིརིས་ཤོ་ སྡིག་པ་ག་དབང་ཚད་ ཕརའ་ཁ་མཱན༌ཅ། 10རོག་གཤགས་ཁཱན་ཤོ་ ཐམས་ཅན་ག་ སྡིག་པ་དེན་གེ་ ཤེབ་ཐུར་གཤགས་པ་གི༌ལ། དག་པ་ཀབ་ཉི་ རོག་གསོན་པོ་ཨ་ཉི་ བཞུགས་ཁཱན་ཤོ་ དཀོན་མཆོག་ག་དེན་གེ་ བཞུགས་ཅ་གི༌ལ། 11ཨོ་ཉི་ཨ་དེན་གེ་ ན་ཤི་ ནའི་ཤོ་ སྡིག་པ་ག་ཤེག་པ་ ཤི་ཝ་གི༌ལ། དག་པ་ཀབ་ཉི་ དཀོན་མཆོག་ག་དེན་གེ་ ཁིརིས་ཡི་ཤུ་ག་མཚན་ག་ ཆོན་ཅ་གི་ལ་དག་ཉི་མི།
12ངན་པ་བག་ཆགས་ག་ ཆ་གནས་མ་ཐ་ལེ་དེན་གེ་ ན་ཤི་ན་ཧ་མེ་པ་དི་ཁཱན་ ལུས་པུ་ཁེ་པ་ སྡིག་པ་གི་ དབང་པེ་བི་ལེ་མང་ཕ། 13ན་ཧ་ལུས་པུ་ག་ དབང་པོ་ཐུར་བུ་ ཏེ་ངན་ཨ་ཁཱན་མ་ཅོད༌ཅོ། ལག་ཏང་ ན་ཧ་བ་ཤོ་ ཤི་ཝ་གེ་ ཚེ་སིང་མ་ཉོང་པ་ཨ་དེན་གེ་ ནའི་ནའི་ཏེན་གི་ དཀོན་མཆོག་ག་ཏཱན་ཕུལ༌ཤོ། ན་ཧ་ལུས་པུ་ག་ དབང་པོ་ཐམས་ཅན་རང་ དཀོན་མཆོག་ག་ གཟི་བརྗིད་ག་དེན་གེ་ ལའི་དེན་པ་ཨ་ཁཱན་ཅོད༌ཅོ། 14སྡིག་པ་ཤོ་ ན་ཧ་སྦྱིན་བདག་མང་གི། ཧང་ཡ་དག་ནེ་ལ་ ན་ཧ་བ་ བཀའ་ཁྲིམས་ག་ཕརའ་ཁ་ མང་གི་ཝ་ ཐུགས་རྗེ་ག་ཕརའ་ཁ༌ཅ༎
དྲང་པུ་ག་ཟ་པ་རི།
15ཧང་ཏེན་ཡ། ཧང་ཨ་ཧ་བ་ བཀའ་ཁྲིམས་ག་ཕརའ་ཁ་ མང་གི་ཝ་ ཐུགས་རྗེ་ག་ཕརའ་ཁ་ གི་ཝ་ཨ་དེན་གེ་ ཨ་ཤི་སྡིག་པ་ཨ་ལེ་སྨོ། ཏི་ངེ་རང་མ་ཨ༌ལ། 16ཨི་བི་ག་ཕརའ་ཁེ་ཆོ་ཝ་ཐུར་ ནའི་ཨོ་ཉ་སོ་ངོ་ག་ ཟ་པ་རིན་ཅ་གི་ལ་དག་ཉི་ ན་ཤི་སེ་ལུ་མ་ལ་སྨོ། ཤི་ལེ་རིག་ཁཱན་ སྡིག་པ་ག་གི་ནེ་བུ་ དྲང་པུ་ཅོད་ཁཱན་ག་གི་ནེ་བུ་ ན་ཤི་ཨི་བི་ག་ ཆ་གནས་ཐ་ཝ་ཐུར་ ནའི་ཨོ་ཉ་ག་ ཟ་པ་རིན་ཅ་གི༌ལ། 17དག་པ་ཀབ་ཉི་ དཀོན་མཆོག་ག་ བཀའ་དྲིན་བསམ་ཁེ། ཧང་ཡ་དག་ནེ་ལ་ ན་ཧ་བ་ སྡིག་པ་ག་ཟ་པ་ གི་ཝ་ཆོན་ཐཱན་རང་གི་ནེ་བུ་ ཉི་ཨོམ་ཤོ་ ན་ཧ་ཏཱན་ཡེ་ཁཱན་ཁེ་པ་ ན་ཤི་སེམས་ནང་ཀེ་ཨ་ཉི་རང་ ཆ་གནས་ཐ༌ཝ། 18ན་ཧ་བ་ སྡིག་པ་གེ་ཐར་ཉི་ དྲང་པུ་ག་ ཟ་པ་རི་ཝ༌ཅ།
19ན་ཧ་བ་ རང་བཞིན་གེ་ སྒྲིང་སྒྲིང་མ་ཝ་ཨ་དེན་གེ་ ན་ཤི་ཧ་གོ་ལེ་རེ་ཆེན་དག་པ་གི་ ཇི་གི་ན་ཧ་ ཨོ་ཐ་དཔེ་ག་ཐུང་ཀེ་ཨ་ཉི་ཡེག་ཅ་ གོ་མ་ ན་ཧ་ལུས་པུ་ཚེ་བང་གི་ མ་ཙང་ཁཱན་ག་ཟ་པ་ཨ་ཉི་ ལག་ཏང་ལག་ཏང་ ངན་པ་རིན་ཆོ༌ཝ། དག་པ་ཀབ་ཉི་ ཨོམ་ཤོ་ ནའི་དམ་པ་རི་ལེ་དེན་གེ་ ན་ཤི་ན་ཧ་ལུས་པུ་ དྲང་པུ་ག་ཟ་པ་རི་ལེ་གོད༌ཅོ།
20གོ་མ་ ན་ཧ་བ་ སྡིག་པ་ག་ ཟ་པ་ཨ་ཉི་ཆོ་ལེ་གང་ཀ་ ན་ཤི་དྲང་པུ་ཨ་ལེ་ཁེ་ཝ་ཀོར་གེ་ མ་སེ་ཝ་ཆོ༌ཝ། 21ན་ཤི་ཨུ་ཉུ་ད་བུ་ཨ་ཉི་ ཧང་ཕཱན་ཏོག་པ་ཡ། ཨོ་ཉ་ཀོར་གེ་མི་ལ་ཀབ་ཉི་ ན་ཧ་བ་ ཨོ་མ་ངི་ནང་ཁུ་ན། ཨུ་ཉུ་ད་བུ་ ཨ་ཁཱན་ག་ཐཱན་ཇུ་ཤོ་ ཤི་སྲོག་གི༌ལ། 22དག་པ་ཀབ་ཉི་ ཨོམ་ ན་ཧ་བ་ སྡིག་པ་གེ་ ཐར་བ་ཨ་དེན་གེ་ དཀོན་མཆོག་ག་ ཟ་པ་རི་ཝ༌ཅ། ཨོ་ཐེ་གི་ ན་ཧ་ཧང་ཕཱན་མེ་ཡ་དག་ནེ་ལ་ ན་ཧ་བ་ དམ་པ་རི་ཉི་ ཚེ་མ་འགྱུར་བརྟན་པ་ཉོང་པེ་གི༌ལ། 23སྡིག་པ་ག་ངེ་ལོང་ཤོ་ ཤི་སྲོག་གི༌ལ། དག་པ་ཀབ་ཉི་ དཀོན་མཆོག་གི་ ཏོང་པ་གེ་གནང་ཁཱན་ སེ་རབ་ཤོ་ ཨ་ཧ་གཙོ་བོ་ ཁིརིས་ཡི་ཤུ་ག་ཐུང་ཀེ་ཨ་ཉི་ ཚེ་མ་འགྱུར་བརྟན་པ་ཉོང་པེ་གི༌ལ༎
Currently Selected:
རོ་མི། 6: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
