རོ་མི། 7
7
བཀའ་ཁྲིམས་ག་ཕརའ་ཁེ་མཱན༌ཅ།
1ཉི་ཨོམ་ ཇ་ག་ཡུང་ཟི་བ་ ན་ཧ་བ་ཤོ་ བཀའ་ཁྲིམས་ག་ཀོར་གེ་ སེ་ཁཱན་བ་གི༌ལ། སོ་ངོ་མ་ཤི་ཝ་སག་པུ་ཤ་ བཀའ་ཁྲིམས་གི་དབང༌ཅ། 2དཔེ་ཨ་ནེ་ལ་ གཉེན་ཕི་ཁཱན་མེ་ཝག་ཙ་གི་ རོ་ཀ་ཕེ་ཝག་ཙ་ མ་ཤི་ཝ་སག་པུ་ཤ་ གཉེན་ག་བཀའ་ཁྲིམས་དང་ཏུ་ཉི་ ཆོ་ལེ་ཁེ༌ལེ། དག་པ་ཀབ་ཉི་ རོ་ཀ་ཕེ་ཝག་ཙ་ ཤི་ཝ་ད་བུ་ཨ་ནེ་ལ་ རོག་ཁེ་པ་ ཨོ་ཉ་བཀའ་ཁྲིམས་ག་ ཕརའ་ཁ་མཱན༌ཅ། 3ཨོ་ཐེན་ཨ་ཉི་ རོ་ཀ་ཕེ་ཝག་ཙ་ ཆོ་ལེ་ནང་ཀེ་རང་ བཱརའ་ཕེ་ཝག་ཙ་ཀབ་ཉི་ གཉེན་ཕི་ནེ་ལ་ རོ་ཀི་གཉེན་གྲོགས་གེ་ཕིས་ཀ་ ལུས་འབྲེལ་ཨ་ཝ་ཨ་ཉི་ཆིན༌མེ། དག་པ་ཀབ་ཉི་ རོ་ཀ་ཕེ་ཝག་ཙ་ཤི་ནེ་ལ་ རོག་བཀའ་ཁྲིམས་ག་ཕརའ་ཁ་ ཆོ་ལེ་ཁེ་ལུ་མཱན༌ཅ། ཨོ་ཉི་ཨ་དེན་གེ་ རོ་ཀི་བཱརའ་ཕེ་ཝག་ཙ་ཀབ་ཉི་ གཉེན་ཕི་ནེ་ལ་ བཱརའ་ཀབ་ཉི་ ལུས་འབྲེལ་ཨ་ཝ་མ་ཆིན༌མ།
4ཨོ་ཐེན་ཨ་ཉི་ ཇ་ག་ཡུང་ཟི་བ་ ཁིརིས་ག་སྐུ་གཟུགས་ག་ ན་ཧ་བ་བུ་ བཀའ་ཁྲིམས་ག་དེན་གེ་ ཤི་ཝ་གི༌ལ། དཀོན་མཆོག་ག་དེན་གེ་ ན་ཤི་སེ་སེན་ཆེན་དག་པ་གི་ ན་ཧ་བ་ཤོ་ བཱརའ་ག་རི་ཝ་གི་ལ་ ཉི་ཨུ་ཉུ་བཱརའ་ཤོ་ ལོག་ཉི་བཞེངས་ཁཱན་ཁིརིས་གི༌ལ། 5ཨ་ཧ་བ་ ཨ་ཧ་འབད་བཞག་མཱན་མ་གི་ དབང་པེ་གང་ཀ་ ཨ་ཧ་ཀོ་ལོ་ལོ་ སྡིག་པ་ག་བག་ཆགས་ ཨུན་ཆོ༌ཝ། ཉི་བཀའ་ཁྲིམས་གི་ ཨ་ཧ་ལུས་པུ་ག་ སྡིག་པ་ག་བག་ཆགས་ ཨོ་ཕེ་བིན་ཆོ༌ཝ། ཉི་ཨོ་ཉེ་གི་ ཤི་སྲོག་ག་སེ་སེན་ཆོ༌ཝ། 6དག་པ་ཀབ་ཉི་ ཨོམ་ཨའི་བཀའ་ཁྲིམས་གེ་ ཐར་བ༌ཅ། ཨའི་ཁིརིས་ཀབ་ཉི་ ཤི་ཝ་ཨ་དེན་གེ་ ཨའི་ཨོམ་ བཀའ་ཁྲིམས་ག་ དབང་ཚད་ཕརའ་ཁ་མཱན༌ཅ། ཉི་ཨོམ་ ཨ་ཤི་ དཀོན་མཆོག་ག་ ཕྱག་ཞུན་ཅ་ཨ་ཉི་ གོ་མ་ག་ལུགས་སྲོལ་དང་ཏུ་ཉི་ ཁྲིམས་གེ་ཤོ་ཝ་དང་ཏུ་ཉི་ མང་གི་ཝ་ ཐུགས་ཉིད་ག་ལམ་ སིང་མ་གེ་དང༌ཅ༎
བཀའ་ཁྲིམས་དང་སྡིག༌པ།
7ཉི་ལ་ ཨ་ཤི་ཧང་ཡེག་པེ་ཡ། ཧང་བཀའ་ཁྲིམས་ཤོ་ སྡིག་པ་གི་ལ་སྨོ། ཏི་ངེ་རང་མང་གི། བཀའ་ཁྲིམས་རང་མ་ནེ་ཏ་ སྡིག་པ་ཧང་གི་ལ་སྨོ་ ཇི་གི་མ་སེ་ལེ་ཆོ༌ཝ། བཀའ་ཁྲིམས་གེ་ སེར་སྣ་མ་ཨའི་#7:7 ཤོན་དི་ཝ་ག་དཔེ་ཆ་ 20:17; ཁྲིམས་ལུགས་ག་དཔེ་ཆ 5:21དག་ཉི་ མ་ཤོན་ཐཱན་ཨ་ནེ་ཏ་ སེར་སྣ་ཨ་ནེ་ལ་ ལེག་པུ་མང་གི་དག་ཉི་ ཇི་གི་མ་སེ་ལེ་ཆོ༌ཝ། 8དག་པ་ཀབ་ཉི་ སྡིག་པ་གི་ བཀའ་ཁྲིམས་གེ་ཤོ་ཁཱན་ག་ ཁེབ་སང་ཤོ་ལེ་གོད་ཉི་ ཇ་ག་ནང་ཀ་ སེར་སྣ་ཙང་པུ་རང་ ཨ་ལེ་ཨུ་ན། ཧང་ཡ་དག་ནེ་ལ་ བཀའ་ཁྲིམས་མ་ནེ་ལ་ སྡིག་པ་ཤི་ཝ་ཨོ་ཕེ། 9བཀའ་ཁྲིམས་མ་ལཱན་ ཆོ་ལ་ཀབ་ཉི་ ཇང་ཤེབ་ཐུར་ གསོན་པོ་ཨ་ཉི་ཆོ༌ཝ། དག་པ་ཀབ་ཉི་ བཀའ་རྒྱ་ཉོང་ཏེན་གེ་ སྡིག་པ་ཤུག་ཅཱན་རི་ཉི་ ཇང་ཤི༌ཝ། 10ཚེ་ཉོང་པེ་དེན་གེ་ ཤོ་ཁཱན་བཀའ་རྒྱ་གི་ཆང་ ཤི་སྲོག་ཕ་ན་དག་ཉི་ ཇི་གི་ཧ་གོ་ལེ་རེ༌བ། 11ཧང་ཡ་དག་ནེ་ལ་ སྡིག་པ་གི་ བཀའ་རྒྱ་ག་ཐུང་ཀེ་ཨ་ཉི་ གོ་སྐབས་ཉོང་ཉི་ ཇ་ག་མགུ་སྐོར་ཕི་ཉི་ ཇང་ཤེ༌ཝ། 12དག་པ་ཀབ་ཉི་ བཀའ་ཁྲིམས་ཤོ་ དམ་པ༌ཅ། ཉི་བཀའ་རྒྱ་བུ་ དམ་པ་དང་དྲང་པུ་ ཉི་ལེག་པུ༌ཅ།
13ཧང་ལེག་པུ་ཆོ་ཁཱན་གི་ ཇང་ཤི་ལེ་རིག་ཅ་གི་ལ་སྨོ། ཏི་ངེ་རང་མང་གི། ལེག་པུ་ག་ཐུང་ཀེ་ཨ་ཉི་ སྡིག་པ་གི་ ཇང་ཤི་ལེ་རིག་ཅ་གི༌ལ། ཧང་ཡ་དག་ནེ་ལ་ སྡིག་པ་གི་ དཀོན་མཆོག་ག་བཀའ་རྒྱ་ ལེག་པུ་ཁེ་པ་ རོག་ཏེན་ག་ངན་པ་ཨ་ལེ་གོད་ཉི་ སྡིག་པ་ཁེ་པ་ གནམ་མེད་ས་མེད་རང་ སྡིག་པ་གི་ཕུང་མ་ཅ་དག་ཉི་ ཁུངས་ཀེ༌ཅ།
14ཨ་ཤི་སེན་ཅ་ བཀའ་ཁྲིམས་ཤོ་ ཐུགས་ཉིད་གི་ལ་དག༌ཉི། དག་པ་ཀབ་ཉི་ ཇང་ཤོ་ ཐུགས་ཉིད་ག་མཱན༌ཅ། ཉི་སྡིག་པ་ག་ཟ་པ་ཨ་ཉི་ ཙོང་ཉི་ཆུ་མ༌ཅ། 15ཇི་གི་ཨ་ཁཱན་བ་ ཇང་ཏེན་གི་རང་ ཧ་གོ་ལུ་མ༌ལ། ཧང་ཡ་དག་ནེ་ལ་ ཇི་གི་ཨ་ལེ་ལམ་ཁཱན་བ་ ཇི་གི་ཨ་ལུ་མ༌ལ། དག་པ་ཀབ་ཉི་ ཇི་གི་ཨ་ལེ་མ་ལམ་ཁཱན་བ་ ཇི་གི་ཨ་ན། 16ཇི་གི་ཨ་ལེ་མ་ལམ་ཁཱན་བ་ ཇི་གི་ཨ་ནེ་ལ་ བཀའ་ཁྲིམས་ཤོ་ ལེག་པུ་ཅ་དག་ཉི་ ཇི་གི་ཁ་དོག༌ཅ། 17ཨོ་ཉི་ཨ་དེན་གེ་ ཨུ་ཉུ་ཨ་ཁཱན་ཁེ་པ་ ཇང་མང་གི་ཝ་ ཇ་ག་ནང་ཀ་ཆོ་ཁཱན་ སྡིག་པ་གི་ཨན་ཅ་གི༌ལ།
18ཇ་ག་ནང་ཀ་ལེག་པུ་ ཧང་རང་མཱན་ཅ་དག་ཉི་ ཇི་གི་སེན༌ཅ། ཨུ་ཉུ་ཤོ་ ཇ་ག་སྡིག་པ་ག་ ལའི་གི༌ལ། ཧང་ཡ་དག་ནེ་ལ་ ལེག་པུ་ཨ་ལེ་ག་ ཇ་ག་སེམས༌ཅ། དག་པ་ཀབ་ཉི་ ཇི་གི་ལེག་པུ་ ཨ་ལེ་རེ་བུ་མ༌ལ། 19ཇི་གི་ཨ་ཁཱན་ཤོ་ ཇི་གི་ཨ་ལེ་ལམ་ཁཱན་ ལའི་ལེག་པུ་མང་གི༌ཝ། ཇི་གི་ཨ་ལེ་མ་ལམ་ཁཱན་ ལའི་ངན་པ་ཁེ་པ་ ཨ་ཉི་རང་ཆོ་ཝ་ཨུ་ན། 20ཉི་ཨོམ་ ཇི་གི་ཨ་ལེ་མ་ལམ་ཁཱན་ཁེ་པ་ ཇི་གི་ཨན་ཐཱན་ཨ་ནེ་ལ་ ཨུ་ཉུ་ཨ་ཁཱན་ཁེ་པ་ ཇང་མང་གི་ཝ་ ཇ་ག་ནང་ཀ་ཆོ་ཁཱན་ སྡིག་པ་གི༌ལ།
21ཨོ་ཐེན་ཨ་ཉི་ ཨོ་ཐ་བཀའ་ཁྲིམས་ཁེ་པ་ ལའི་ཨ་ཉི་ཆོ་ཝ་ག་ ཇི་གི་ཐོང༌ལ། ཇི་གི་ལེག་པུ་ཨ་ལེ་ གོད་པ་ཀབ་ཉི་ ངན་པ་རང་ཨ་ཉི་ཇོང༌ལ། 22ཧང་ཡ་དག་ནེ་ལ་ ཇ་ག་ནང་ཀེ་ཨ་ཉི་ཏ་ དཀོན་མཆོག་ག་ བཀའ་ཁྲིམས་ག་རང་ ཤོ་ནང་ཕེན༌ཅ། 23དག་པ་ཀབ་ཉི་ ཇ་ག་ལུས་པུ་ནང་ཀ་ ལའི་ཨ་ཁཱན་ བཱརའ་བཀའ་ཁྲིམས་ཐུར་བུ༌ཅ། ཉི་ཨོ་ཉ་བཀའ་ཁྲིམས་གི་ ཇ་ག་སེམས་ཀ་ཆོ་ཁཱན་ བཀའ་ཁྲིམས་ཀབ་ཉི་ ཕྱད་མདའ་རུ་མེ་གང༌ཅ། ཨོ་ཐ་བཀའ་ཁྲིམས་ཟག་ཉི་ ཇང་ཁེ་པ་ ཇ་ག་ནང་ཀ་ཆོ་ཁཱན་ སྡིག་པ་ག་ བཙོན་པ་ཅོད་པ༌ཅ། 24ཨའི་ཇང་ ཧང་ག་ལའི་མ་དག་པ་སོ་ངོ་ཡ། ཇང་ཨི་བི་གི་ ཨོ་ཐ་སྡིག་པ་གི་དབང་ཁཱན་ ཚེ་གེ་ཐར་བེ་ཡ། 25ཨ་ཧ་གཙོ་བོ་ ཡི་ཤུ་ཁིརིས་ག་ཐུང་ཀེ་ཨ་ཉི་ ཚེ་ཐར་གནང་མ་ཨ་དེན་གེ་ དཀོན་མཆོག་ག་ བཀའ་དྲིན་བསམ༌ཅ། ཨོ་ཐེན་ཨ་ཉི་ ཇ་ག་སེམས་ཀ་ ཇང་དཀོན་མཆོག་ག་ བཀའ་ཁྲིམས་ག་ ཟ་པ་ཨན༌ཅ། དག་པ་ཀབ་ཉི་ ཇང་རང་བཞིན་གེ་ སོ་ངོ་གི་ཝ་ཨ་དེན་གེ་ ཇང་སྡིག་པ་ག་ བཀའ་ཁྲིམས་ག་ ཟ་པ་ཨན༌ཅ༎
Currently Selected:
རོ་མི། 7: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
