Dioni 11

Lasarasi komisaya ei

1Bedani ree anda para aisaya ali Lasarasi yainya komisaya. Mo Bedani ree andare Mada Meari nipu akiaya ao-aisipiya anda. 2Mo Mearimi ande Realina angena roropo waru pi wambala koyaomare nipuna irimi gole kunaisaya wenana bali Lasarasi, yainya komisaya. 3Go eina mo akiayame Yesu para angele Ia moyada ara lalore, Realio, nena amesiri yainya koma pa wia, loma angele rapaisipiya.

4Yesumi go angele pangoma lalore, Go yainyamere nipu na-komelea. Go yainya epa aya auri Godena bi, pange Godena Nakina bi pange ma-minyasiainyaya epa yainya aoma pea, lisaya.

5Yesumi mo Mada pange Madana aki pange Lasarasi nimu repo parare kone waru suma nipuna pumi raname komoaisaya. 6Gupuma ande Lasarasi yainya koma pa wia lea ei pangomare naare laapo go para pa aisaya. 7Go para naare laapo aoma Yesumi nipuna kou nane raluaisimiya alinu para lalore, Diudia andasu nane wala perekeya bainya, lisaya.

8Go lisayapare nipuna kou nane raluaisimiya alinumi nipu para lalore, Waloale alio, ambala ririna ambalande mo Isaraelimi mandu rangala pae alinumi kaname nee duame rapamendepare go para wala bainya lalepae, lisimiya.

9Yesumi lalore, Naare komeana naare rea eiri ki laapo pereyoma angena laapopu naarele rupa diayapae. Ee. Ali mendare go naare rala-ainya pamiliandare go suna paa pea ei ande eimi nipuri lopolameya rapa eiri na-pelea. 10Gupiliapare gupula pea eiri rimbalala-ainya pamiliandare nipu para paa na-pea eimi nipuri lopolameya rapa eiri pelea, lisaya. 11Yesumi go ei loma angele menda lala ara lalore, Naana ame Lasarasi ambala u paliapare nipu ma-rekala puluae, lisaya.

12Go lisayanda mo kou nane raluaisimiya alinumi lalore, Realio, nipu u paliala ara gole wala rekelea, lisimiya.

13Go lisimiyapare Yesumi mo Lasarasi ora kome eina lisayapare mo alinumi kone sialore, Pa u paleanda da, kone wisimiya. 14Go eina Yesu nimu para penameyao lalore, Lasarasi ora komea lalo, lisaya. 15Go peapare nimimi kone rulaoma aliminyaya nimi para kone siala ara nipu lapo na-aripu eimi raname komala ara lalore, Nipu para bainyae, lisaya.

16Go eina Domasiri (nipuna bi menda Didimasi) nipumi Yesuna kou nane raluaisimiya alinu nipuna amenu para lalore, Naana Waloale Ali rapu naa raayo mendaa balepa pange nipu rapu komaminya, lisaya.

Yesumi wala ma-rekada eina pange endoaya eina ayo lea ei

17Yesu opapala pumare Lasarasi dapa puma ainya naare rongopu wisaya ei pangisaya. 18Mo Bedani ree andare Diurusaleme ree anda reparale aisaya.

19Gupuma Isaraelimi mandu rangala pae wenaali andapumi Mada Meari laapo niipuna ainya komea eina koma anda pula ara angele angele doameya paisimiya.

20Madame Yesu ipulae, lisimiya ei pangomare mandala paisayapare Meariri anda para pa pirinya paisaya. 21-22Madame Yesu mandaoma nipu para Ialore, Realio, neere go para ala paeyalore na ainya na-komola pae. Gupula papare ambia go gole neeme Gode para alenda menda konge dea lere Godeme ora gilia kone sialo, lisaya.

23Yesumi Mada para lalore, Nena ainyare wala rekelea, lisaya.

24Madame nipuna angele yango liada ara Ialore, Monde pereda pea naarena, wenaali raayo wala ma-rekaliandare Godeme na bali pange wala ma-rekala pea eiri kone sialoae, lisaya.

25Go lisayapare Yesumi Mada para lalore, Niri wala ma-rekada eina pange endo eina pange ayoae. Ali apimi ni para kone rulaoma aliandare gore go ali komeleanda pange endo alia, lisaya. 26Gupuma ali apimi endoma ara ni para kone rulaoma aliandare gore go ali ora na-komelea. Neme go lalo angelere neemere kone waru suma mealepae, lisaya.

27Madame Yesuna angele yango liada ara lalore, Realio, e ae. Nena angele pangala ara neere ande Keriso pange Godena Naki ale ei go suna epelea loarimi ali loma kone sialoae, lisaya.

Yesumi ree lisaya ei

28Madame go angele loma pua, nipuna aki Meari para pawasi puma pini pini angele loma lalore, Realimi go para ara nee wi dae, lisaya. 29Mearimi go angele pangoma Yesu mandaluame rekoma wangepu paisaya.

30Yesuri anda ambe na-pope pora runa ainya Madame mandaisaya lena pa aisaya. 31Isaraelimi mandu rangala pae wenaalinu Mearina anda rupara pambo piri, Meari para yarame komoma komanda pirisimiya. Gupisimiyapare Meari wangepu rekoma kama nane popisaya ei andoma nimu pange raluma paisimiya. Nimuna konemere Meari ali dapa nane ree doame pula, kone wisimiya.

32Mearimi puma Yesuna ange para panda punyada ara lalore, Realio, nee go para pa ala paeyalore na ainya na-komola pae, lisaya.

33Mearimi ree lisaya ei pange mo nipusi paisimiya Isaraelimi mandu rangala pae wenaalinu ree lisimiya ei pange andomare Yesumi kendame komala ara nipuna pu para ree lopisaya. 34Yesumi lalore, Nipuri a para dapa pemepae, lisayanda nimumi lalore, Realio, dapa pema para epa andae, lisimiya.

35Gupuma Yesumi ree lisaya. 36Go eina mo Isaraelimi mandu rangala pae wenaalimi angele yokanali pula ara lalore, Andalepa. Go alimi Lasarasi para pumi waru komala ara piae, lisimiya.

37Go angele lisimiyapare mendane wenaali menda parame lalore, Go alimiri monde lee rumbu pi alina lee ma-kiyaripa rupa mo ali koma ei pange sese pulapae, kone sialema, lisimiya.

Yesumi Lasarasi wala ma-rekaisaya ei

38Yesumi wala nipuna pumi yarame komala ara nipu dapa pisimiya lena paisaya. Mo dapa pisimiya apenda para kana andaaimi pora pombaisimiya.

39Yesumi angele lala ara lalore, Mo kana mu mone sialepa, lisaya.

Go lisayapare monde alina ainya Madame lalore, Realio, nipu dapa puma amonore naare malapu pereya. Nipu pungu waru pilia, lisaya.

40Yesumi nipu para lalore, Neme ambalande ne para go angele loma lalore, Neeme kone rulao-aliandare Godena paa pi ei andeleae, lomare, lisaya. 41Gupuma monde kana mu mone ma-wisimiya. Yesumi so yaa nane andala ara lalore, Apao, neemere na angele pangale eina nee para ranae laloae, lisaya. 42Neemere na angele pangoalenda kone suayopare go aema wenaalimi neeme ni rapalenda kone winyaya, nee para go angele laloae, lisaya. 43Yesumi go loma wi andapu lala ara lalore, Lasarasio, kama nane ipuae, loma wi lisaya. 44Ande komisaya aliri nipuna ki ange pange lee angaa akame rongao wisimiya rupa rekoma kama nane ipisaya. Gupuma Yesumi nimu para lalore, Nipuna rongaya aka lasu rumbuma epena rapalepa, lisaya.

Kalu alinumi Yesu duame rapisaya ei

(Madiu 26:1-5; Maka 14:1-2; Luka 22:1-2)

45Meari andola ipisimiya Isaraelimi mandu rangala pae wenaali waru andapumi Yesumi pisaya ei andomare nipu para kone rulaisimiya. 46Gupisimiyapare alinu menda paramere Yesumi pisaya eiri mo Parisi alinu para da paisimiya. 47Go eina mo Parisi alinumi pange mo Gode repara alinau puaisimiya alinuna kalu alinumi pange kalesoro alinu rapu mendaa para mombema lalore, Naamere ake paminyapae, lisimiya. Gonde alimi wele waru pi einu nipumi pia, lisimiya. 48Pa pinya gialimandare wenaali raayome nipu para kone rulalimiae. Gupuma pange mo Romo ree anda nane andere-ao-aya alinumi ipumare naana Gode repara alinau puaisimiya andaa anda pange naana anda ruru pange ralipuna koyalimi, lisimiya.

49Nimu rapu aisaya ali menda Kaiapasiri go kuni gipana Gode repara alinau puaisimiya alinuna kalu alinuna andaa ali arare nipumi lalore, Nimiri ongesi pange kone ora na-wimi, lisaya. 50Wenaali raayo para ali komea komeleandare nimi para pange ora epele ei epeleae. Gupuma naana anda ruru raayo pange koyape-nae-dea. Gupula pea eiri kone na-sialemepae, lisaya.

51Go lisaya eiri nipumi nipuna na-lea. Go kuni gipana Gode repara alinau puaisimiya alinuna kalu alinuna andaa ali ara Yesuri mo Isaraelimi mandu rangala pae wenaali para komolame pisaya ei la alala ara lisaya.

52Gupuma pange mo Isaraelimi mandu rangala pae wenaali para komea na-komea. Godena naki nongonuri pa rera reralo ao-pape puma ainyaya, raayo lamu muma komea anda ruru komea para raminyeke puma ainyaya, Yesu komola pisaya ei la alala ara lisaya.

53Go lisaya eina mo Isaraelimi mandu rangala pae wenaalinuna kalu alinumi go dina ririnare Yesu duame rono pangoma liiape pora aisa pisimiya. 54Go eina mo Diudia andasu nane pamulopala ara Yesuri penameyao na-pamisaya. Diudia andasu nane giaoma mo weambi pia lena repara aisaya ree anda menda Iparaeme lee anda para pumare nipuna kou nane raluaisimiya alinu rapu go para aisimiya.

55Mo Isaraelimi mandu rangala pae wenaalina Pasopa enda pambolame lombae pupa pope di rungulisayanda anda rando rando papare wenaalimi ambe na-pambe-ainya nimuna do wamo pulame so Diurusaleme ree anda nane paisimiya. 56Mo wenaalimi Yesu aisa pula ara mo Gode repara alinau puaisimiya andaa anda para mombea ara nimuna nimunale lora lora pula ara lalore, Ale kone sialemepae. Gonde enda pambola pema lenare Yesuri epeleapae, ale kone sialemepae, lisimiya. 57Mo Gode repara alinau puaisimiya alinuna kalu alinu pange Parisi alinu rapu ara nimumi angele lala ara lalore, Ali apimi Yesu andeleandare Yesu pa ripinyamonoya, naa para epa la giape, lisimiya.

Currently Selected:

Dioni 11: POLENT23

Highlight

Copy