Dioni 12

Mearimi epe roropo pi wambala Yesuna angena koyaisaya ei

(Madiu 26:6-13; Maka 14:3-9)

1Monde Pasopa enda pambolame lombae pupa popisaya di pambolame-ainya naare su mindipu pa winyaloma Yesuri mo Bedani ree anda para paisaya. Ande Yesumi wala ma-endaisaya ali Lasarasi nipuna anda. 2Go para Yesuna enda pambaisimiya. Lasarasi Yesu rapu mendaa para pirinya Madame ande pambisaya enda pana puma ale ale pisaya.

3Mearimi epe roropo pi wambala andapu yangi ora andaai pea ei mumare Yesuna ange para koyaomare nipuna irimi kunaisaya. Gupisaya eimi mo wambala roropo pi ei mo anda panda raayo para roropo waru pisaya. 4-5Yesu nipuna kou nane raluaisaya ali komea Diudasi Isakariodi nipuri ande Yesu para yanda rombala pisaya ali, nipumi lalore, Go wambala mendame kambenalomare muni ali ria ki laapo pereyoma mendane ange komeapu mumare narali wenaali para na-rali rali parimi eiri akepeanda pamepae, lisaya. 6Go lisaya angelere mo narali wenaali para yarame komala ara na-le, pa pake nape ali ara, lisaya. Muni mandi nu nipumi siamba ara mea pamisayapare nipuna kone suma yoka meala pisaya.

7Go lisayapare Yesumi lalore, Go wena para angele na-lape, lisaya. Nipuna pa siamba aya eiri nina ro dapa pula peme naarena go lenaya lalo. 8Narali wenaaliri nimi rapu ao-ala pemepare niri nimi rapu na-ao-alua, lisaya.

Isaraelimi mandu rangala pae wenalinuna kalu alinumi Lasarasi ora komena duame rapisimiya ei

9Isaraelimi mandu rangala pae wenaali waru andapumi Yesuri Bedani ree anda para epa aya lisimiya ei pangomare go para paisimiya. Yesu komea andolame na-pe, Yesumi dapa para ma-rekaisaya ali Lasarasi pange andolame paisimiya. 10Go eina mo Gode repara alinau puaisimiya alinuna kalu alinumiri Lasarasi pange duameya, pora aisa pisimiya. 11Isaraelimi mandu rangala pae alinu waru andapumi Lasarasi para kone siala ara monde kalu alinu giaoma Yesu para kone rulaisimiya eina, pisimiya.

Yesu Kini ali mandana Diurusaleme ree anda para kondo pambisaya ei

(Madiu 21:1-11; Maka 1:1-11; Luka 19:28-40)

12Yapi kepelisayandare ande Pasopa lombae pupa popisaya dinare enda pambolame mombema aisimiya wenaali waru andapumi Yesuri Diurusaleme ree anda nane ipula, lisimiya ei pangisimiya. 13Go eina yawimi ande repana palanu rondope mipi puma ma-ripinyuma Yesu mandala polame wi Ia eiri pula ara lalore,

Godena bi minyasiaminya.

Realina bina ipula Aliri Godeme epealiandare

epedea, lisimiya.

Nipuri Isaraelimi mandu rangala pae wenaalina

Kini aliae, loma lisimiya.

14Yesumi dongi mena andoma muma mo mena kou mandaa pirisaya. Gupisaya eiri mo Godena angele wia para wape pea ei gurupa.

15Saioni ree andare, paalame na-komalepape.

Ande nena Kini ali go ipulandae, dongi menasina

kou mandaa piruma go ipulandae, lea.

16Yesumiri go au pisaya dinare nipuna kou nane raluaisimiya alinumi kone na-wisimiyapare werepe nane Yesu wala rekoma so nipuna wele kongapu andaai aya ei wala mula pea dina, Godena angele wia bukana gurupa wape pea eiri Yesu para lea eina, penameyao wada, kone wisimiya.

17Lasarasi dapa para winyaloma Yesumi wi loma wala ma-rekaisaya dinare, Yesu rapu aisimiya wenaalimi go pisaya ei andoma wenaali menda para pua la alisimiya. 18Go au andaai pisaya eina wenaali waru andapumi pangomare Yesu mandala paisimiya.

19Go eina mo Parisi alinumi nimunale gupi lalolo pisimiya. Ande naame pulame pamande aunu pape-na-ayale andalepa. Wenaali raayore nipu raluma pulumi, lisimiya.

Giriki andasu nane aoma epea wenaalimi Yesu andolame aisa pisimiya ei

20Monde Pasopa enda pambisimiya dinare Diurusaleme ree anda para yainya pula paisimiya wenaali rapu, Giriki andasu nane aoma epea wenaali menda para pange paisimiya. 21Ande Galili andasu nane aisayanda Bedesaida ree anda aoma ipisaya ali komea Pilipi, mo wenaalimi nipu para pua lalore, Andaa alio, naana rana pi eiri Yesu andolame pima, lisimiya.

22Pilipimi Anduru para pua loma niipu laapome Yesu para da paisipiya. 23Yesumi niipuna angele yango liada ara lalore, Alina Si Nakimi wele kongapu pi ei andaai mula pea diri, ambia ipulae, lisaya. 24Niipi para ora angele lalo. Laisi kili komeare suna pelepa lopoma na-komeleandare gore nipuri pa wilia. Gupiliapare komeleandare gore opoma kili waru andapu edea. 25Ali apimi nipuna suna endoaya eiri kone waru wiliandare nipuri nipuna Kerisona endoaya eiri alu pilia. Ali apimi go suna ara nipuna suna endoaya ei para kone waru na-wiliandare nipuna Kerisona endoaya ei ma-siamba ara endoma ao-alape ei komeana ao-alia, lisaya. 26Ali apimi na pupudengi naluame kone piliandare nipumi na kou nane raluma epenae. Na pupudengi nada aliri ni ayo lena, saana mendaa para ao-ala pepa eina, lawa. Na pupudengi nada aliri, na Apame go alina bi andaai winya deae, lisaya.

Yesumi nipuna komape ei angele lisaya ei

27Ambiare na pumi kendame waru komalole akipi lanopae. Go ei lapeya. Apao, ande ni para epola pea ei na-epenalape lanopae. Dia. Go rendaa rendaame komola pea di mulame epawa, lisaya. 28Apao, nena bi andaai winyalape, lisaya. Go loma ainya so yaa naneyame lainyaisaya angele komame lalore, Na biri ambala ririna andaai winya lepare wala menda aperao andaai winya doa, lisaya.

29-30Go para pamboaisimiya wenaalimi ande angele koma pangoma lalore, Kari dia, lisimiya. Mendane wenaalimi lalore, Eindiolome nipu para angele la alisimiyapare Yesumi nimu para lalore, So lainyaripa angelere ni para dia. Nimi para kone siala ara lainyada ara la, lisaya. 31Ambiare go su wenaalina angele yokanali pula pea di ipula. Ambiare go suna kalu aya eiri yoko ma-lopalia, lisaya. 32Gupuma niri suna ano ni ma-minyasialimindare wenaali raayo ni para epena yola mula, lisaya. 33Go lisaya eiri nipu komala pisaya ei la alala ara lisaya.

34Go lisayandare wenaali raayome Yesuna angele yango liada ara lalore, Mo rudule angelenu lalo eiri go ei pangama. Kerisore pa ao-alia lea. Neeme lalore, Alina Si Naki ma-minyasialimi lale eiri akepeanda lalepae. Monde Alina Si Nakiri apiyapae, lisimiya.

35Yesumi nimuna angele yango liada ara lalore, Monde paa pea eiri nimi rapu engepusi alimiae. Rimba lea eimi nimi ma-rambuapana, paa pea para pulupape. Rimba lea para pula alimiri gore a para pulupae dea, lisaya. 36Go pea eina nimiri paa pea dina ara paa pea eina wenaalinu aliminyayanda mo paa pea ei para kone rulada ara alepape, lisaya.

Isaraelimi mandu rangala pae wenaalinumi Yesu para kone na-rulaisimiya ei

Yesumi go angele lomare mo wenaali minyapaoma puma panga ala paisaya. 37Nipumiri wenaalina lee wilina arare puri waru pale einu pisaya ei mo wenaalimi andomare nipu para kone na-rulaisimiya.

38Monde Godena poropedi ali Aisayame wape pisaya einu perelenaya pisaya ei gurupa.

Realio, naame la dama eiri apimi pangapae.

Gupuma Realina puri pale eiri api para walapae,

loma wape pisaya.

39Go eina mo wenaalimi kone rulape-na-ya. Aisayame wape pisaya ei menda gurupa.

40Godeme wenaalimi nimuna leeme

andapanaya nimuna lee rumbu paoma pange

nimuna pumi kone siapanaya

nimuna pu puri paloma arare kana mandana

winya, pawa, loma wape pisaya.

Godeme lalore, Neme nimu wamo panoya

ni para na-perekeyoma ainyaya pawa, loma

wape pisaya.

41Go lisaya angelere Aisaya nipumiri Yesumi nipuna wele kongapu andaai ma-aisaya ei andisaya eina, Yesumi mula pea ei kone siala ara lisaya.

42Gupisimiyapare Isaraelimi mandu rangala pae alinuna kalu alinu andapumi Yesu para kone rulaisimiya. Gupuma aisimiyapare mo Parisi alinu para paalame komala ara Godena angele kuruaeme anda para nimu aisimiya ei yokapanaya, nimuna kone rulaisimiya eiri penameyao na-lisimiya. 43Godeme nimuna angele lainyaya kone na-wi su alinumi komea lainyaya kone waru wisimiya.

Yesu nipuna angeleme wenaali para angele yokanali pisaya ei

44Yesumi angele andapu loma lalore, Ali apimi ni para kone rulaliandare ni para komea kone na-rulale. Ni rapaya Gode para pange kone rulaoma pia, lisaya. 45Ali apimi ni andeleandare gore ni rapaya Gode pange andala. 46Niri go suna paa pi ei mandana epa ayo. Ni para kone rulademe wenaaliri rimbalea para na-ainyaya epawa. 47Ali apimi neme lalo angele pangoma na-piliandare gore go ali raayo neme angele yokanali na-pula. Su wenaaliri nimu para angele yokanali pulame na-epe. Nimu ma-endaluame epawa, lisaya. 48Ali apimi ni giada ara neme lalo angele na-pangeleandare gore mendame nipu lapo angele yokanali pilia. Go neme lalo einuri pereda pea naarena nipu lapo angele yokanali pilia, lisaya. 49Neme na kone suma na-lawa. Ni rapaya Gode na Apame neme da pawa eina raayo nipumi lape landa lawa, lisaya.

50Gupuma na Apame go pape loma lalo angelenu endoma ao-aya ei pada eiri kone sialoae. Go eina neme lalo angelere na Apame ni para lape loma la angelena laloae, lisaya.

Currently Selected:

Dioni 12: POLENT23

Highlight

Copy