Dioni 18

Yesu epa ripinyisimiya ei

(Madiu 26:47-56; Maka 14:43-50; Luka 22:47-53)

1Yesumi go angele lo pereyaomare nipuna kou nane raluaisimiya alinu rapu puma mo Kidoroni onge ipa anguloma mone reena paisimiya. Go parare Yesu nipuna kou nane raluaisimiya alinu rapu mo e mapu para opapala paisimiya. 2Yesumi go para nipuna kou nane raluaisimiya alinu rapu naare komea komealo angele doame mandala pisimiya. Gupisaya eiri ande Yesu yanda rombisaya ali Diudasimi go mandala pisimiya lena kone wisaya. 3Go eina Diudasimiri Romo andasuna endali ripinyi alinu mendaa para pange mo Gode repara alinau puaisimiya alinuna kalu alinumi pange mo Parisi alinu raayome rapaisimiya endali ripinyi alinu pange mo e para karu paisaya. Mo alinumi wedambi olopake endalinu ma-ripinya pupu paisimiya.

4Yesumiri nipu para epola pi au raayo kone suma mo alinu para pua angaa meala ara lalore, Api aisa pimipae, lisaya.

5Go lisayanda mo alinumi nipuna angele yango liada ara lalore, Monde Nasarere ree anda ali Yesu aisa puma epama, lisimiya. Yesu nipumi lalore, Go aliri ni gonda, lisaya. Ande Yesu yanda rombisaya ali Diudasi mo alinu rapu mendaa para aisaya.

6Yesumiri Go aliri ni gonda, lisaya dinare mo alinuri yola pamboma suna lopa gaisimiya.

7Yesumi wala angaa meala ara lalore, Api aisa pimipae, lisaya. Mo alinumi lalore, Monde Nasarere ali Yesu aisa pima, lisimiya.

8Yesumi lalore, Niae loma nimi para ambala la giawande. Ni aisa pula ara pimindare gore go alinu pena dapa, lisaya. 9Nipumi gupi angele lisaya eiri ambala angele la wi ei penameyainyaya lisaya. Go angelere gurupa. Apao, neeme ni para giae alinu raayo mendanda na-ma-alu paripu, lisaya.

10Saimono Pidamere kepere andalu ei pangoma aisaya ei yola muma pumare mo Gode repara alinau puaisimiya alinuna kalu alinuna andaa alina pupudengi naisaya ali poaisayapare nipuna popeke ki nane kale rungula poaisaya. Mo pupudengi naisaya alina biri Malikasi. 11Gupisayandare Yesumi Pida para lalore, Nena kepere nipuna anda para pamba. Gupumare na Apame ni para gea rendaare na-nanoya damepae, lisaya.

Yesu Anasi para ma-paisimiya ei

12-13Mo Romo andasuna endali ripinyi alinu nimuna kalu ali rapu mo Isaraelimi mandu rangala pae alinuna endali ripinyi alinu pange nimumi Yesu pa ripinyuma kopeme rongaoma Anasi para ambala karu paisimiya. Gupuma nipuri go kuni gipana Gode repara alinau puaisimiya alinuna kalu alinuna andaa ali Kaiapasi, nipuna kasua aisaya. 14Kaiapasi nipumi ande Isaraelimi mandu rangala pae alinu para gurupa angele lisaya wenaali raayo komapana, ali komea komeleandare epedea, loma lisayande.

Pidame Yesu ni na-ande, lisaya ei

(Madiu 26:69-70; Maka 14:66-68; Luka 22:55-57)

15Saimono Pida pange Yesuna kou nane ralu aisaya ali menda pange Yesu raluma paisipiya. Monde kou nane raluaisaya ali mendare mo Gode repara alinau puaisimiya alinuna kalu alinuna andaa alimi andala pisayanda nipuri mo kalu alina anda kama nane Yesu rapu paisaya. 16Pidare mo pora gape kama nane pa aisaya. Monde kou nane raluaisaya ali mendare ande andaa alimi andala puaisaya alimi wala perekeya pumare mo pora gape para aisaya nongo para angele lomare Pida anda rupara karu ipisaya. 17Mo pora gape para aisaya nongome Pida para Ialore, Neere gonde alina kou nane raluale ali menda paleya, loma lisaya. Go lisayapare Pidame lalore, Ni dia, lisaya.

18Kupa pisayanda mo pupudengi naisimiya alinumi pange mo endali ripinyi alinu pange raayome repana puna lenganu mombema reenalomare riripuna pamboaisimiya. Pida pange nipuna do riripu pinyaya mo alinu aisimiya para pua aisaya.

Mo Gode repara alinau puaisimiya alinuna kalu alinuna andaa alimi Yesu para lora pisaya ei

(Madiu 26:59-66; Maka 14:55-64; Luka 22:66-71)

19Mo Gode repara alinau puaisimiya alinuna kalu alinuna andaa alimiri Yesu nipuna kou nane raluaisimiya alinu aisimiya ei pange nipuna walala pisaya ei pange Yesu para lora pisaya. 20Yesumi nipuna angele yango liada ara lalore, Wenaalina lee wilina ara wenaali raayo para waloaripu. Gupuma Isaraelimi mandu rangala pae wenaali mombeaeme lena pange mo Godena angele kuruaeme anda paranu pange mo Gode repara alinau puaisimiya andaa anda para pange neme go para ara angele walala pawa. Angele menda kundiripu na-lawa. 21Go pawa einare niri akepeanda lora pula ara lalepae. Go eina neme walawa ei pangame wenaali para lora pa. Neme nimu para walawa einuri kone suma aeme. Go eina neme walawa ei pangainya nimu para lora pa, lisaya.

22Yesumi go angele lisayanda endali ripinyi ali komeame nipuna ki parame Yesu liiala ara lalore, Go Gode repara alinau puaisimiya alinuna kalu alinuna andaa alina angele yango liada ara akepeanda gupi angele lalepa, lisaya.

23Yesumi nipuna angele yango liada ara lalore, Neme angele lo koyaripu ei pangelendare gore go alinu raayo pangena la alae lomare ora angele lawa einale pilindare gore niri akepeanda liiaepae, lisaya.

24Go eina Anasimiri Yesuri kopeme rongaoma ainyare mo Gode repara alinau puaisimiya alinuna kalu alinuna andaa ali Kaiapasi para rapaisaya.

Pidame Yesu ni na-ande, wala lisaya ei

(Madiu 26:71-75; Maka 14:69-72; Luka 22:58-62)

25Pidame nipuna do riripu pinyaya go para pa aisaya. Gupuma ainya mo alinu menda parame nipu para lalore, Neere monde alina kou nane raluae ali menda alepa, lisimiyapare Pidame kundiripu pula ara lalore, Niri dia, lisaya.

26Mo Gode repara alinau puaisimiya alinuna kalu alinuna andaa alina pupudengi nae ali mendame Pidame kale rungula poaisaya alina anda repaa alimi angele loma lalore, Neere monde ali rapu mo e mapu para arimi eiri nemere andawa, loma lora pisaya.

27Pidame wala lalore, Ni dia, loma ainyare ali kokola ee lisaya.

Yesu mo Pailadi para karu popisimiya ei

(Madiu 27:1-2; Maka 15:1-5; Luka 23:1-5)

28Kaiapasi aisaya lena giomare mo gapamani kalu alina anda para Yesu karu ma-paisimiya. Yapi pena kepeala-ainya ma-paisimiya. Isaraelimi mandu rangala pae alinumiri mo Pasopa enda pambolame lombae pupa pope eina enda pambisimiya ei nolameya nimu koyapana, nimuna nidi pi ei kone siala ara mo anda rupara na-pe kama pa aisimiya. 29Go eina Pailadimi kama nane puma nimu para lalore, Go alimiri ake au pea eina nipuna angele lala epamepae, lisaya.

30Mo alinumi nipuna angele yango liada ara lalore, Go alimi rudule angele na-runguda payalore nee para na-karu epola pama, lisimiya.

31Pailadimi nimu para lalore, Nimimi niminale karu puma nimina rudule angele wimi lena ara angele yokanali pipape, lisaya. Mo Isaraelimi mandu rangala pae alinumi nipuna angele yango liada ara lalore, Naamere naana kone suma ali menda lu komape-na-ya, lisimiya. 32Go lisimiya eiri Yesu nipumi ambala angele la siala ara nipu komala pea rupare penameyaluame, lisimiya.

33Pailadimi anda rupara perekeya puma pua ara Yesu epenaya wi loma nipu para angaa meala ara lalore, Neere Isaraelimi mandu rangala pae wenaalina Kalu Kini ali alepae, lisaya.

34Yesumi nipuna angele yango liada ara lalore, Neeme nena kone suma ni para angaa meala ara lalepae, o alinu menda parame neme pe ei nee para la giamepae, lisaya.

35Pailadimi nipuna angele yango liada ara lalore, Nena konemere niri Isaraelimi mandu rangala pae aliyapa leme lalepae. Nena anda ruru wenaalimi pange nimuna Gode repara alinau puaisimiya alinuna kalu alinumi pange ni para nee karu epame. Neemere aki au paepae, lisaya.

36Yesumi nipuna angele yango liada ara lalore, Nina Ki Rambuao-ayo Eiri go suna ei dia, lisaya. Na Ki Rambuao-ayo Eiri go suna eiyalore ni raluma pamualeme alinumiri Isaraelimi mandu rangala pae alinumi ni ripinyapanaya, nimumi yanda liiala pameae, lisaya. Dia. Na Ki Rambuao-ayo Eiri go para ei dia, lisaya.

37Go lisaya eina Pailadimi nipu lora pulu arare Neere Kini aliyapae, lisaya. Yesumi nipu para lalore, Neeme niri kini ali lale, lisaya. Nina amame go suna epanoya ni mandia eina reere go eina pea. Ora ree angele walaluameya epawa. Go ree angele milia alimiri nina angele pange lea, lisaya.

38Pailadimi lalore, Ora angele da eiri aiyapae, loma lisaya.

Pailadimi Yesu ekeraisa repanana komena dapa lisaya ei

(Madiu 27:15-31; Maka 15:6-20; Luka 23:13-25)

Go angele loma Pailadimi kama nane puma mo Isaraelimi mandu rangala pae alinu para lalore, Go alimi koae au menda pea eiri neme na-andasiawa. 39Go pawapare ande Pasopa naare lombae pupa pupuaya dinare puaeme rupa, neme dipula ali komea wala rapao-ayo. Go peale go Isaraelimi mandu rangala pae wenaalina Kini ali wala rapanopae, lisaya.

40Mo alinumi nipuna angele yango liada ara wi lalolo puma lalore, Nipuri dia. Naana kone pea eiri Barabasi rapae, lisimiya. Barabasi nipumi ali lu pange reena alenda alenda pakama yolanalipu ae ali aisaya.

Currently Selected:

Dioni 18: POLENT23

Highlight

Copy