Dioni 19

1Gupuma Pailadimi Yesu mumare lu rakilinya, lisaya. 2-3Mo endali ripinyi alinumiri reke reke ae mambopu muma paki puma kalu ranguna waruma nipuna kaluna pambaisimiya. Gupumare busupi muni andaaimi kamboae aka mea anda paomare nipu para puala puma lalore, Andae, Isaraelimi mandu rangala pae wenaalina Kini ali, lomare ki parame liiala pisimiya.

4Gupisimiyandare Pailadimi kama nane wala perekeya puma mo wenaali para lalore, Andalepa. Nipu parare koae au menda pea eiri neme na-andasiawa eiri nimimi andaliminyaya, nimi para go lena karu epola, lisaya. 5Go eina Yesuri mo reke reke ae mambopumi wari kalu ranguna pambaoma mo busupi aka anda puma kama nane paisaya. Pailadimi nimu para lalore, Andalepa. Ande ali goyale andalepa, lisaya.

6Mo Gode repara alinau puaisimiya alinuna kalu alinumi pange mo Gode repara alinau puaisimiya andaa andana endali ripinyi alinumi pange Yesu andomare wi andapu lalolo puma lalore, Ekeraisa wape pi repanana komena liia, lisimiya. Ekeraisa wape pi repanana komena liia, loma lisimiya. Go lisimiyapare Pailadimi nimu para lalore, Gore niminale nipu ma-puma ekeraisa wape pi repanana dia pa lisaya. Nemere nipu koae au menda pea ei na-andasiawa, lisaya.

7Mo Isaraelimi mandu rangala pae alinumi nipuna angele yango liada ara lalore, Naana angele wimi einu menda wia. Go pema eina gupi ali komena lapeya. Nipuri Godena Naki ayo landa damae, lisimiya.

8-9Pailadimi go lisimiya angele pangomare paalame waru komomare mo anda andaai para pua konda pambomare Yesu para angele angaa meala ara lalore, Neere ane aoma ipuma paepae, lisayapare Yesumi nipuna angele yango na-liaisaya. 10Pailadimi nipu para lalore, Ni para angele menda na-lalepae. Nee anda wala rapaluanda pange ekeraisa wape pi repanana nee liinya doanda pange, neme anana pape eiri kone sialepae, lisaya.

11Yesumi nipuna angele yango liada ara lalore, Neeme ni para papere so mandaa aya Godeme nee para na-gula payalore ni para au menda pape-na-da pa, lisaya. Go einare nee para ni karu ma-epa ali, go aliri koae au andaai waru pi ali, lisaya.

12Go lisaya angele Pailadimi pangomare Yesu wala rapaluame para aisa puma kone wisayapare mo Isaraelimi mandu rangala pae wenaalimi angele andapumi wi lalolo puma lalore, Neeme go ali wala rapalindare neere Sisana yango na-ali, lisimiya. Ali apimi nipunale kalu ali kini aluame rapeleandare go aliri Sisana yanda rungili ali alia, lisimiya.

13Pailadimi go lisimiya angelenu pangomare Yesu kama nane karu paisaya. Gupuma Pailadiri angele yokanali pulame piruaisimiya sea wisaya lena biri Kana Rambole ei, Iburu angelemere Gapada lea alena pirisaya. 14Gupisimiya eimi ande Pasopa enda pambolame lombae pupa pope eina naare kalu rikirana ainya pisimiya. Pailadimi mo Isaraelimi mandu rangala pae wenaalinu para lalore, Nimina Kini aliri goyale andalepa, lisaya.

15Mo wenaalimi ee wi andapu lalolo puma lalore, Liia, liia. Ekeraisa wape pi repanana lu andia, lisimiya. Pailadimi nimu para lalore, Nimina Kini aliri ekeraisa wape pi repanana, neme liianoyapa, lisaya. Mo Gode repara alinau puaisimiya alinuna kalu alinumi nipuna angele yango liada ara lalore, Naana kini aliri menda dia. Mo Romo andasu andere-ao-aya aliri Sisa komea naana kini ali ao-aya, lisimiya.

16Go lisimiyanda Pailadimi ekeraisa wape pi repanana Yesu liinyaya, mo alinu para Yesu alisaya. Go eina Yesu pa ripinyi liisimiya.

Yesu ekeraisa wape pi repanana lu andiaisimiya ei

(Madiu 27:32-44; Maka 15:21-32; Luka 23:26-43)

17Gupuma Yesu nipuna ekeraisa wape pi repana ma-ria puma mo ree anda para kama wia lena opapala paisaya. Mo su raidasina biri Kalu Kuli loaisimiya. (Iburu angele lomare Golokoda, loaisimiya). 18Go lena mo ekeraisa wape pi repana mandaame Yesu luma ma-minyasiao yaruaisimiya. Ali laapo pange ree laapona menda mendane andiao puma Yesu rupara andiaomare nimu repo komenayanda andiaisimiya. 19Pailadimi angelesi wape puma mo ekeraisa wape pi repanana ma-ralaisaya. Go wape pisaya eiri gurupa.

Nasarere ali Yesuri Isaraelimi mandu rangala pae wenaalina Kini Ali wape pisaya.

20Mo ekeraisa wape pi repanana, Yesu andiaisimiya lena Diurusaleme ree anda reparayala ara andomare mo Isaraelimi anda ree wenaali waru andapumi mo wape pi eiri andisimiya. Mo wape pisaya angelere Iburu angele pange Romo Ladini angele pange Giriki angelenumi wape pisaya. 21Mo Gode repara alinau puaisimiya alinuna kalu alinumi Pailadi para lalore, Isaraelimi mandu rangala pae wenaalina kini ali, loma na-wape piri go ei wape pa. Go alimiri Niri Isaraelimi mandu rangala pae wenaalinuna kini ali aloaya loma wape pape, lisimiya.

22Pailadimi nimuna angele yango liada ara lalore, Neme wape pawa eiri ambala wape pawa, lisaya.

23-24Mo endali ripinyi alinumi mo ekeraisa wape pi repanana Yesu luma andiomare nipuna akanu ma-lapu eiri rali pisimiya. Gupumare endali ripinyi alinu komea komeapumi aka komea meala, ali mendame komea meala, ali mendame komea meala pisimiya. Nipuna aka andalu pi ei pambao lombae paya ei pange misimiyapare go akare na-kimbumaya ei, komea kamale rambuluma lopainyayanda mo alinumi nimuna nimunale lalore, Go aka na-rekele pipape lisimiya. Ali komeame puri paloma mida ei andaminya. Masisi relepo mandana, relepo laminya, lisimiya.

Ande Godena angele wape pea ei penameyaluame pisimiya. Mo wape pea eiri gurupa.

Na akanuri nimunale rali puma mumare

na aka andalu ei mulame masisi kase mandana

pilimiae, loma wape pea.

Mo endali ripinyi alinumi gupisimiya.

25Mo Yesu nipuna ekeraisa wape pi repana reparare nipuna ama pange nipuna amana aki pange Kolopasina wena Meari pange gupuma mo Makedala wena Meari pange nimu raayosi go para pamboaisimiya. 26Yesumiri nipuna ama pange nipuna ande pumi raname kome kou nane raluaisaya ali pange nipu repara aisaya ei andomare nipuna ama para lalore, Wenao, nena naki gondae, lisaya.

27Nipuna kou nane raluaisaya ali para pange lalore, Nena ama gondae, lama lisaya. Go dinare nipuna kou nane raluaisaya alimi Meari nipuna anda para karu puma andere-aisaya.

Yesu ora komisaya ei

(Madiu 27:45-56; Maka 15:33-41; Luka 23:44-49)

28Yesu kone wi eiri Neme pape eiri ambala pu pereyaripu, loma kone suma mo Godena angele wape pea ei minyaya nipumi lalore, Ni ipa nala pia, lisaya.

29Anga likine waini ipa rumbia piri ipa kenenge komea go para wisaya. Go eina nimumi lumbimi andeale menda muma mo anga likine waini ipa para renge laoma repana kuli munduna koraoma ma-minyasiaoma Yesuna kambulu para ma-kapuraisimiya.

30Yesumi mo pinika ipa noma lalore, Ambiare pereya, lisaya. Go lomare nipuri kalu andainyaoma nipuna remo rapaoma komisaya.

Endali ripinyi alimi Yesuna perali naneyame dolome awisaya ei

31Gupisimiya eiri ande Pasopa naare lombae pupa popisaya naare repara raname lisayandare mo Isaraelimi mandu rangala pae alinumiri Ruliri ande koro pia naare ora andaa naarele kone siala ara mo ali ronu ekeraisa wape pi repana mandaa na-andiambao-ainya kone wisimiya. Go eina nimumi Pailadi para pua lalore, Mo ali repona ange kimbu pala kulinu rondope luma nimuna ronu pange konda minyalo, konge lisimiya. 32Go eina mo endali ripinyi alinumi puma mo Yesu rapu mendaa para liisimiya ali laapona ange kimbu pala kulinu rondopelisimiya. 33-34Yesu para pange paisimiyapare nipuri ambala komoma ro wisaya ei andomare nipuna ange kimbu pala kuli na-rondopelisimiyapare endali ripinyi ali komeame nipuna dolome Yesuna perali para awe siaya. Gupisayanda wee wangepu ipisaya pange ipa rapu mendaa para epa kolopema lopisaya. 35Gupisaya ei andisaya ali komeame ambala lisaya. Gupuma nipumi da angelere ora ei kone sialema. Nimimi angele pangoma siambaliminyaya, nipuna angele da eiri ora ei Ialo loma nipumiri ora angelenu lea. 36Go au pi eina, mo Godena angele wia bukana wape pea ei mula ipisaya. Mo wape pea eiri gurupa.

Nipuna kuli komeasinda pange na-rondope dimiae,

loma wape pea.

37Mo Godena angele wia bukana wape pea ei mendare gurupa.

Wenaalimi mo aweme ali andeleme, loma wape pea.

Yesu dapa pisimiya ei

(Madiu 27:57-61; Maka 15:42-47; Luka 23:50-56)

38Go au pisimiya ei pinyaloma kou nanere mo Arimadia ree anda nane aoma ipisaya ali Diosepare Yesu ro ma-polameya, Pailadi para pua konge lisaya. Diosepamere Yesuna angele pangoaisayapare mo Isaraelimi mandu rangala pae alinu para paalame komala ara kundiripu pisaya. Pailadimi Epelea, lisayanda Diosepame pua muma ma-paisaya. 39Ambala ririna ande rimbale para Yesu andola paisaya ali Nikodimasi pange Diosepa laapo pumare repana laapona pange yupi muma dakole paya ei menda manduma paisaya. Mo wambala alena kenda pi eiri ali ria komea pereyoma ki laapopu pereyoma angena malapu kilo manda. 40Mo ali laapome Yesu ro konda mumare ande wambala ma-kiraomare akanumi ambulu koraoma wala menda korainyala pisipiya. Mo Isaraelimi mandu rangala pae wenaalimi ali dapa pulame ali ro wamo pu rongaluame puaisimiya rupa, pisipiya.

41Mo Yesu ekeraisa mandaa liisimiya lena go para e poaisimiya. Go e rupara ali dapa papele kangai waruma wi ei menda wisaya. Ambala ririnare ali ro menda go para dapa na-pisimiya. 42Go para Yesu ro ma-pumare dapa pisimiya eiri mo ali dapa pape lena reparayanda pange mo Isaraelimi mandu rangala pae wenaalina lombae pupa pope Pasopa naarena pape einu wamo pulameya pisipiya.

Currently Selected:

Dioni 19: POLENT23

Highlight

Copy