Лк 19

19 ГЛАВА

1-10 Йозакым погышо Закхей. 11-27 Лу мина окса нерген туштен ойлымаш. 28-44 Иисус Иерусалимыш пура. 45-48 Иисус храм гыч сатучо-влакым поктен луктеш.

1Иерихоныш пурымеке, Иисус ола гоч эртен. 2Туштак Закхей лӱман еҥ лийын, тудо йозак погышо-влакым вуйлатен, поян лийын. 3Иисусым, Кӧ Тудо манын, пешак ужнеже улмаш, но изи капан улмыжлан калык шеҥгеч ужын кертын огыл. 4Тунам тудо ончык куржын, Иисусым ужаш манын, Тудын эртышаш корно воктенсе смоква пушеҥгыш кӱзен. 5Тиде верыш миен шумеке, Иисус кӱшкӧ ончалын, тудым ужын да каласен: «Закхей, писынрак воло! Мый таче тыйын мӧҥгыштет лийшаш улам». 6Тудыжо писын волен да Иисусым, куанен, унам ыштен. 7Тидым ужын, чылан ӧпкелен ойлаш тӱҥалыныт: «Языкан еҥ деке пурен!» 8Закхей ончыко лектын да Господьлан каласен: «Господь, пел погем йорло-влаклан пуэм, а кӧ деч ондален налынам гын, ныл пачаш шукырак пӧртылтем!» 9Иисус тудлан каласен: «Таче тиде пӧртыш утаралтмаш толын, вет тиде еҥат Авраамын эргыже. 10А Айдеме Эрге йомшым кычал муаш да утараш толын».

11Тидым колыштшо-влаклан Иисус эше туштен каласкален, вет Тудо Иерусалим воктене лийын да, Юмын Кугыжаныш вашке толеш манын, еҥ-влак шоненыт. 12Иисус ойлен: «Лӱмлӧ тукым гыч лекше ик еҥ, кугыжа лийын пӧртылаш манын, мӱндыр элыш каен. 13Кайымыж деч ончыч шкеж деке лу тарзыжым ӱжын, нунылан лу минам#19:13 Мина – шӱдӧ кечаш пашадар, але шӱдӧ динарий. пуэн да каласен: ”Мыйын толмешкем, моштен кучылтса”. 14Но тысе илыше-влакын тудым ужмышт шуын огылат, почешыже еҥ-влакым ”Тудо мемнан кугыжана ынже лий, тиде мыланна ок келше” манын каласаш колтеныт.

15Кугыжа лийын пӧртылмекыже, кӧ мом ыштен налмым палаш манын, саде еҥ оксам налше тарзе-влакым шкеж деке ӱжаш кӱштен. 16Икымше толын да каласен: ”Оза, тыйын ик минат лу мина парышым пуэн”. 17”Сай, поро тарзе, – тудлан кугыжа каласен. – Изи пашаште ӱшанле лийметлан мый тылат лу олам вуйлаташ пуэм.” 18Кокымшо толын да каласен: ”Оза, тыйын ик минат вич мина парышым пуэн”. 19Кугыжа тудлан каласен: ”Тыйым вич олам вуйлаташ шогалтем”.

20А кумшо толын да ойлен: ”Оза, теве тыйын минат. Шовычеш пӱтырал пыштен, мый тудым араленам. 21Мый тый дечет лӱдынам. Тый чаманыдыме еҥ улат: мом пыштен отыл, налат, мом ӱден отыл, тудым тӱредат”. 22Кугыжа тудлан каласен: ”Йӧрдымӧ тарзе, шке мутет денак тыйым судитлем. Тый паленат: мый чаманыдыме еҥ улам, мом пыштен омыл, налам, мом ӱден омыл, тудым тӱредам. 23Молан тый мыйын оксам торгайыше-влаклан пуэн отыл? Тунам мый, толмекем, оксам парыш дене налам ыле”. 24Вара воктенже шогышо-влаклан каласен: ”Тудын деч минам налза да, кӧн лу минаже уло, тудлан пуыза”. 25”Оза, – каласеныт нунышт, – тудын лу минаже уло!” 26”Мый тыланда ойлем: кӧн уло, тудлан пуалтеш, а кӧн уке, улыжат налалтеш. 27А нунын кугыжашт лиймем ваштареш шогышо тушманем-влакым тышке кондыза да ончылнем руал пуштса”».

28Тидым ойлымеке, Иисус умбакыже Иерусалим велке тайыл ваштареш кӱзен. 29Елеон манме курыкеш верланыше Виффагий ден Вифаний деке лишемме годым Иисус кок тунемшыжым колтен: 30«Ончылно койшо ялыш кайыза. Тушко пурымеке, йолыштен шогалтыме самырык оселым ужыда. Тудым але нигӧ нигунам кушкыжын огыл. Мучыштарыза да вӱден кондыза. 31”Молан мучыштареда?” манын, тендан деч иктаж-кӧ йодеш гын, тыге вашештыза: ”Тудо Господьлан кӱлеш”».

32Колтымо тунемшыж-влак каеныт да Иисус каласыме семынак чыла лиймым ужыныт. 33Кунам нуно самырык оселым мучыштараш тӱҥалыныт, озаж-влак нунылан ойленыт: «Те молан оселым мучыштареда?» 34Нунышт вашештеныт: «Тудо Господьлан кӱлеш». 35Вара самырык оселым Иисус деке вӱден конденыт, тупшым вургемышт дене леведыныт да ӱмбакыже Иисусым шынденыт. 36Кайымыж годым еҥ-влак вургемыштым корнеш шареныт.

37Елеон курык гыч волаш тӱҥалме верыш Иисус миен шумо годым уло тунемшыж-влак куанымышт дене чыла ужмо чудылан кугу йӱкын Юмым мокташ тӱҥалыныт:

38«Тек Господь лӱм дене толшо Кугыжа

моктымо лиеш!

Пылпомышто тыныслык да кӱшнӧ чап лийже!»#19:38 Ончо: Пс 117:26.

39Калык тӱшкаште лийше фарисей-влак кокла гыч южышт Иисуслан каласеныт: «Туныктышо, тунемшет-влакым чаре!» 40Но Тудо нунылан каласен: «Тыланда ойлем, нуно шыпланат гын, кӱ-влак кычкыраш тӱҥалыт».

41Иисус ола деке лишемын. Олам ужмеке, тудын верч шортын колтен 42да каласен: «О, тыланет тыныслыкым мо конда, шке кечетын тыят палет ыле гын! Но кызыт тидым тыйын шинчат деч шылтыме. 43Теве тугай кече-влакым тыланет ужаш логалеш, кунам тушманет-влак йырет чашмам нӧлтат, тыйым авырен налыт да чыла могырым шыгыремдаш тӱҥалыт. 44Шке декет Юмо лишемме жапым пален отыл, сандене нуно тыйым мланде ӱмбаке сӱмыралыт да икшывет-влакым кырен пытарат да олмыштет кӱ ӱмбалан кӱм огыт кодо».

45Иисус храмыш пурен да тушто сатум ужалыше да налше-влакым поктен лукташ тӱҥалын. 46Нунылан ойлен: «Возымо: ”Мыйын пӧртем – кумалме пӧрт”,#19:46 Ис 56:7. а те тудым агыше-влакын пыжашышкышт савыренда!»

47Иисус кече еда храмыште туныктен. Архиерей, закон туныктышо да калык вуйлатыше-влак Тудым пушташ йӧным кычалыныт. 48Но Тудын дене мом ышташ, нуно пален огытыл. Вет Иисус воктене эре калык лийын да тӱткын колыштын.

Currently Selected:

Лк 19: УС

Highlight

Copy