Марк 5

Иисус шумбралгавты аванькс оймеялтсо колазь ломань

1Састь сынь эрькенть омбоце пелев, Гадарань масторс. 2Зярдо Иисус лиссь венчстэнть, Сонзэ сеске вастызе калмосто* лисезь ломань, кона колазель аванькс оймеялтсо. 3-4Сон эрясь калмова, ды кшнинь тертьсэяк киненьгак а кирдевиль, ламоксть сонзэ сюлмсекшнизь кедьга-пильгева кшнинь рисьмесэ ды тертьсэ, сон сынст сезнилинзе ды туиль. Киненьгак сон а оймавтовиль. 5Чинек-венек сон азгондсь пандо юткова ды калмова, пижнесь пиже-ожо вайгельсэ, прянзо-пильгензэ порксась кевсэ.

6Зярдо сон васолдо неизе Иисусонь, чийсь Эйзэнзэ ды прась икелензэ кумажа лангс. 7Мейле, верьга вайгельть пижакадозь, мерсь: «Иисус, Верепазонь Цёра! Мезе Тонеть эряви монь пельде? Энялдан, Пазонть кисэ – иля пиштевте эйсэнь!» 8Иисус эдь мерькшнесь тензэ икеле: «Аванькс оймеялт, лиссть те ломаненть эйстэ!» 9Мейле кевкстизе сонзэ: «Кода тонь леметь?» Сон каршозонзо мерсь: «Монь лемем Легион*, лиякс, минь ламонек». 10Таго сон пек энялдсь Иисуснэнь, аволинзе пане сынст те масторстонть.

11Сесэ, пандо чиресэ, вановсь тувонь покш стада. 12Весе аванькс оймеялтнэ Иисуснэнь энялдозь кортасть: «Кучомизь минек тувотнес, минь соватано эйзэст». 13Иисус эзь моле каршо. Аванькс оймеялтнэ лиссть ломаньстэнть ды совасть тувотнес. Ды стаданек сеске сэрей чирестэнть кирнявтнесть эрькес, весе ваясть эйзэнзэ, эйстэдест ульнесть кавтошка тёжат.

14Тувонь ваныцятне тосто тусть чиезь, ёвтнесть теевезденть пертьпельксэнь оштнэва ды велетневаяк. Ломантне састь теевезенть ваномо. 15Сынь мольсть Иисус ваксс, неизь идемевсьсэ кирдевезь ломаненть, конань эйсэ икеле ульнесть ламо аванькс оймеялтнэ. Сон ней аштесь озадо, оршазь, паро превсэ, ды сынь тандадсть. 16Неицятне ёвтнесть сыненст, кода весе ульнесь идемевсьсэ кирдевезенть ды тувотнень марто. 17Сестэ сынь кармасть энялдомо Иисусонь икеле, туевель Сон сынст ёнкссто.

18Иисусонь венчес озамсто, ломанесь, конась икеле кирдевезель идемевсьсэ, энялдсь Тензэ кадомс сонзэяк мартонзо. 19Иисус сонзэ эзизе сае. Сон мерсь тензэ: «Азё кудов тонсетненень, ды ёвтник тенст, кодат ине тевть тейсь теть Азорось, кодамо седеймарицякс ульсь тонеть». 20Сон тусь ды кармась ёвтнеме таркаванть, конанень мерильть Кемень ошт, мезе мартонзо тейсь Иисус. Ды весе дивсесть.

Тейтернень вельмевтемась ды сэредиця авань шумбралгавтомась

21Зярдо Иисус мекев печтясь венчсэнть эрькенть омбоце пелев, ваксозонзо промсть пек ламо ломанть. Сон аштесь эрьке чиресэнть. 22Вана сась Тензэ синагогань прявтнэнь эйстэ вейкесь, лемезэ Яир, неизе Сонзэ, прась пильгезэнзэ, 23Пек энялдозевсь: «Монь тейтернем кулома лангсо, сак, путыть лангозонзо кедеть, шумбралгавтык, илязо куло». 24Иисус тусь мартонзо.

Мельганзо мольсть ламо ломанть, пек эцесть малазонзо. 25Ютксост ульнесь ве ава, кона кемгавтово иеть сэредиль верень чудемасо. 26Сон ламо майсесь ормаменстицятнень эйстэ, ютавтызе весе ули-паронзо. Ансяк кодамояк менькс сон эзь муе, мекевланк, теевиль тензэ седеяк берянь. 27Сон марясь кортамот Иисусто, мольсь ломантнень юткова Сонзэ удалов ды токизе Сонзэ оршамонзо. 28Авась эськанзо кортась: «Токиндеряса куш Сонзэ оршамонзо, мон пичкан». 29Сеске лоткась эйстэнзэ верень молемась, весе рунгосонзо марясь: сон шумбралгавтозь.

30Иисус сеске маризе Эсь эйстэнзэ виень лисеманть, велявтсь ломантнень ютксо ды кевкстинзе: «Кие токизе Монь оршамом?» 31Тонавтницянзо мерсть Тензэ: «Несак, зяро ломанть эцить перькат, Тон жо кевкстнят: “Кие Монь токимим?”» 32Иисус сельмесэнзэ пертьпельга яла вешнесь сень, кие Сонзэ токизе. 33Авась, кона содась, мезе мартонзо теевсь, тандадозь ды сорнозь мольсь ваксозонзо, прась пильгезэнзэ ды ёвтнизе Тензэ весементь истя, кода ульнесь. 34Иисус мерсь тензэ: «Сазором! Кемемат шумбралгавтынзеть тонь, азё седейоймамо марто, эсеть ормадот ульть менстезь».

35Зярдо Иисус кортась аванть марто, састь синагогань прявтонть кудосто зярыя ломанть, ёвтасть тензэ: «Тейтернеть уш кулось, мезекс сыргавтсак тонавтыцянть?» 36Иисус, ёвтазенть лангс апак вано, мерсь синагогань прявтонтень: «Иля пеле, ансяк кемть». 37Сон эзь мере киненьгак мартонзо молемадо, Петрадо, Яковдо ды Иоанндо, Яковонь ялакстонзо, башка. 38Зярдо сынь пачкодсть синагогань прявтонть кудонзо ваксс, Иисус неинзе лужакадозь аштицятнень ды авардицятнень. 39Сон совась кудонтень, кевкстсь: «Мейс лужакадыде ды авардтядо? Тейтернесь эзь куло, сон уды». 40Кармасть лангсонзо пеедеме. Сон кудостонть весень панинзе, саинзе мартонзо тейтерненть тетянзо-аванзо, колмо тонавтницянзо, совась икельце кудос, косо ульнесь тейтернесь. 41Сон саизе тейтерненть кедте, мерсь тензэ: «Талита кум!» Тень смустезэ: “Тейтерне, тонеть кортан: стяк!” 42Тейтернесь сеске стясь, кармась якамо. Сон ульнесь кемгавтово иесэ. Весе дивасть покш дивамосо. 43Иисус пек кармавтсь тенст, киненьгак теде а ёвтнемс, ды мерсь андомс тейтерненть.

Currently Selected:

Марк 5: ОВ

Highlight

Copy