Luka 4

Sattan oppiu muanitella Iisussua

(Matf. 4:1-11; Mark. 1:12-13)

1Iisus lähti Jordanjovelpäi täyzi Pyhiä Hengie. Hengi vietteli Händy elämättömäs muas 2n՚ellikymmen päiviä, a pahalaine muanitteli Händy. Net n՚ellikymmen päiviä Iisus ei syönnyh nimidä, i konzu tämä aigu oli jo jällel, Hänele rodih n՚älgy. 3Sit pahalaine sanoi Iisusale: «Ku kerran olet Jumalan Poigu, ga käske tälle kivele muuttuo leiväkse.» 4No Iisus vastai hänele: «Pyhis Kirjutuksis on sanottu: ‘Ei ristikanzu elä leiväl yhtel.’»

5Sit pahalaine vedi Iisussua korgiele kohtale da yhtel silmän lipahutandal ozutti Hänele kai muailman muat 6da sanoi: «Kaiken tämän, kogo muailman da sen bohattuon minä annan sinule. Se, näit, on annettu minun valdah, i minä voin andua sen kelle vai tahton. 7Ku kumardannettos minule, kai tämä roih sinun.» 8No Iisus vastai: «Pyhis Kirjutuksis on sanottu: ‘Kumardai vai Ižändäle, sinun Jumalale, da sluuži vai Hänele.’» 9Sit pahalaine vedi Iisusan Jerusalimah, pani Händy seizomah jumalankoin levole da sanoi: «Ku kerran sinä olet Jumalan Poigu, ga hyppiä tiäpäi alah. 10Onhäi Pyhis Kirjutuksis sanottu: ‘Häi käsköy anheliloile kaččuo sinuu. 11Hyö kannetah sinuu käzil, ku sinä et satattas jalgua kiveh.’» 12No Iisus vastai: «A vie on sanottu: ‘Älä tyhjäs opi Ižändän, sinun Jumalan mielii.’»

13Pahalaine kaikkeh luaduh opii muanitella Iisussua, a sit kodvazekse jätti Händy rauhah.

IISUSAN RUAVOT GALILEIS 4:14-9:50

Iisus algau ruavon

(Matf. 4:12-17; Mark. 1:14-15)

14Iisus tuli järilleh Galileih täyzi Hengen vägie, i paginat Häneh niškoi levittih kogo sil čupul. 15Häi opasti rahvastu sinagougis, i kaikin kiitettih Händy.

Kodilinnas ei suvaija Iisussua

(Matf. 13:53-58; Mark. 6:1-6)

16Iisus tuli Nazarietan linnah, kus Häi oli kazvanuh, i suovattan, kui ainos, meni sinagougah. Sie Häi nouzi lugemah, 17i Hänele annettih kädeh Jumalan iänenkandajan Isaijan kniigu. Häi avai kniigan da löydi sen kohtan, kus on kirjutettu:

18– Ižändän Hengi on Minun piäl,

ku Häi voideli Minuu sanelemah jevangeliedu köyhile.

Häi työndi Minuu sanomah kiiniotettuloile: «Työ piäzettö välläle»,

sanomah sogieloile: «Työ suatto silmät»,

piästämäh painetut välläle,

19da sanomah: «Tänä vuonnu

Taivahalline Ižändy luadiu rahvahale hyviä!»

20Sit Häi salbai kniigan, andoi sen abulazele da istuihes. Kaikin, ket oldih sinagougas, tarkah kačottih Häneh. 21Häi rubei pagizemah: «Tänäpäi, kuni työ kuundelitto tämän kirjutuksen sanoi, net jo tuldih tovekse.» 22Rahvas hyvin otettih vastah Hänen paginat da diivittih niilöi hyvii sanoi, kudamat lähtiettih Hänen suuspäi.

Yksikai hyö sanottih: «Ga eigo ehki neče ole Josifan poigu?» 23Iisus sanoi heile: «Tiettäväine, työ nygöi sanotto minule sananpolven ‘Parandai, paranda iččiedäs!’ da vie: ‘Luaji tiägi, omas linnas, kaikkie sidä, midä sinä, kuuluu, olet luadinuh Kapernauman linnas!’» 24Häi jatkoi: «Toven sanon teile: ni yhty Jumalan iänenkandajua ei pietä hyvänny omal roindurannal. 25Uskokkua minuu: Izrail՚as oli äijy leskiakkua Il՚l՚an aigua, konzu taivas ei andanuh vetty kolme puolenke vuottu, i kogo muah rodih suuri n՚älgy. 26No Il՚l՚ua ei työtty niilöin leskiakoin luo, a työttih Sidonan muah, Sareptas eläjän leskiakan luo. 27I Izrail՚as oli äijy prokuazal voimattomua Jumalan iänenkandajan Jelisein aigua, no ni yhty heis ei puhtastettu, a puhtastettih vai Naeman, kudai oli siirieläine.»

28Tämän paginan kuultuu kaikin, ket oldih sinagougas, suututtih äijäl. 29Hyö nostih pystyi, ajettih Iisussua iäre linnaspäi da viettih Händy jyrkändehele, ku lykätä Händy siepäi alah; se linnu, näit, oli luajittu korgiele mäile. 30No Iisus astui rahvasjoukos läbi da lähti iäre.

Iisus Kapernauman sinagougas

(Mark. 1:21-28)

31Sen jälgeh Iisus lähti Kapernauman linnah, kudai on Galileis. Sie Häi opasti rahvastu suovattan, 32i kaikin diivittih Hänen opastandoi, ku Hänen sanois oli vägi.

33Sinagougas oli yksi mies, kudamas oli karu. Se rubei kirgumah äijäl: 34«Aa... Iisus Nazariettalaine! Midäbo sinule meis pidäy? Tulitgo hävittämäh meidy? Minä tiijän, ken sinä olet! Sinä olet Jumalan Pyhä!» 35Iisus jyrkäh käski karule: «Ole vaikkani! Lähte hänes!» Sit karu räigäi mužikan muah rahvasjoukon keskeh i lähti iäre hänes satattamattah händy. 36Kaikin hämmästyttih i sanottih toine toizele: «Mi paginoi tämä on? Häi käsköy vallal da väil paganhengii, i net lähtietäh iäre.» 37Nygöi kaikin sil peräl ruvettih pagizemah Iisussah näh.

Iisus piästäy Simonan muatkoin da toizii voimattomii

(Matf. 8:14-17; Mark. 1:29-34)

38Iisus lähti sinagougaspäi da meni Simonan taloih. Simonan muatkoi virui voimattomannu, hänes oli suuri žuaru. Iisussua kyzyttih avvuttamah. 39Iisus painui naizeh päi da käski žuarule lähtie hänes, i se lähti. Naine kerras nouzi jalloilleh da rubei gostittamah taloih tulluzii.

40Äijis kodilois oli vie voimattomua, kel migi oli. Päiväzen laskehuu heidy tuodih Iisusan luo. Iisus pani käit jogahizen piäle i piästi heidy. 41Äijis lähti i karuloi, kudamat kirruttih: «Sinä olet Jumalan Poigu!» No Iisus kieldi heidy, ei andanuh paista, ku hyö tiettih, Häi on Messii.

Iisus lähtöy Kapernaumaspäi

(Mark. 1:35-39)

42Päivän vallettuu Iisus lähti pihale da meni kohtah, kus sai olla yksin, no rahvas lähtiettih Händy eččimäh. Hyö löyttih Iisus da ei tahtottu piästiä Händy lähtemäh heijän luopäi. 43No Iisus sanoi: «Minul pidäy toizisgi linnois sanella hyviä viestii Jumalan valdukundah näh. Siksehäi minuu on työtty.» 44I Häi saneli Jumalan sanua Juudien sinagougis.

Currently Selected:

Luka 4: LIVVI

Highlight

Copy