Marku 16
16
Iisusan kuollieloisnouzendu
(Matf. 28:1-8; Luk. 24:1-12; Iiv. 20:1-10)
1Suovatan mendyy Magdalan Marija, Juakoin muamah Marija da Salomei ostettih hyväle tulijua voijettu, ku tahtottih mennä voidamah Iisussua. 2N՚edälin enzimäzenny päivänny, pyhänpiän, ylen aijoi, vai ku päiväine nouzi, hyö tuldih kalmale.
3Hyö paistih keskenäh: «Ken meile vierettäs kiven kalmansuus?» 4Konzu hyö nostettih silmät, nähtih: kivi oli vieretetty; a se oli ylen suuri kivi. 5Konzu mendih sydämeh, nähtih oigiel puolel istumas nuori mies valgielois sovis. Hyö pöllästyttih. 6No se sanoi: «Älgiä pöllästykkiä. Työ ečittö Iisussua Nazariettalastu, kudai oli ristah nuaglittu. Häi nouzi kuollielois, Händy ei ole tiä. Täs on se kohtu, kunne Händy oli pandu. 7Nygöi mengiä da sanokkua Hänen opastujile, dai Pedrile sanokkua: Häi enne teidy roihes Galileis. Sie työ näittö Händy, muga kui Häi teile sanoi.» 8Naizet lähtiettih kalmukolospäi, säristen da varaten pajettih iäre. Hyö nikelle ei sanottu nimidä, ku varattih.
Iisus ozuttahes opastujile
(Matf. 28:9-10, 16-20; Luk. 24:13-53; Iiv. 20:11-18; 20:19-23; Ap.r. 1:6-11)
[ 9Konzu Iisus nouzi kuollielois aijoi huondeksel suovattupäivän jälgeh, Häi ozuttihes enzimäzekse Magdalan Marijale, kudamas oli ajanuh seiččie karuu. 10Marija lähti siepäi i vedi viestin niilöile, ket oldih Iisusanke da ket nygöi itkiettih pahasmieles. 11No konzu hyö kuultih, Iisus on hengis i Marija nägi Händy, hyö ei uskottu.
12Tämän jälgeh Iisus jiäviihes toizen nägözenny kahtele heis, konzu hyö oldih matkal linnaspäi. 13Hyö kiännyttih järilleh sanomah toizile, no heidygi ei uskottu.
14Jälgimäi Iisus jiäviihes yhteletostu opastujale, konzu hyö oldih syömäs. Häi moitii heidy uskomattomuon täh da sydämen kovevuon täh, ku hyö ei uskottu niilöi, kudamat nähtih Händy kuollielois nossuonnu. 15Häi sanoi heile: «Mengiä kaikele muailmale da kuuloitakkua jevangeliedu kaikile täl mual eläjile. 16Ken uskou da ottau ristindän, se piäzöy. Ken ei usko, sidä suuditah häviendäh. 17Ket uskotah, luajitah nengomii tunnusruadoloi: Minun nimes hyö ajetah iäre karuloi, hyö paistah uuzil kielil, 18tartutah madoloih käzin, i hos hyö juodaneh tappajua juaduu, no se ei luaji vahinguo heile. Hyö pannah käit voimattomien piäle, i net tervehtytäh.»
19Konzu Ižändy Iisus sanoi heile kai, Händy otettih yläh taivahah, i Häi istuihes Jumalan oigiele puolele. 20Opastujat lähtiettih matkah i kuuloitettih jevangeliedu kaikkiel. Ižändy ruadoi heijänke da lujendi oman sanan tunnusruadoloil.]
Currently Selected:
Marku 16: LIVVI
Highlight
Share
Copy
Want to have your highlights saved across all your devices? Sign up or sign in
(c) Biblienkiännändyinstituuttu, Helsinki 2003
