Yohana 1
1
Korme a zaya a gəə ɓwaara
1A tiyatə, a ite myaa nda kwak vɨratə, ite taa asə də, Korme nə də, Kormɨngɨn mgban nee ɓwaa ka Həmɨnpwa, Kormɨngɨn nə Həmɨnpwa. 2Kormɨngɨn nee ɓwaa ka Həmɨnpwa a tiyatɨ vɨratə.
3Nagi ndo sə kat a vɨratə, dɨ haka Kormɨngɨn mya ɗa. Taa asə də a mya ɗa a vɨratə aa dɨ haka Kormɨngɨn. 4Dɨ haka Kormɨngɨn gə myentə, dɨ haka myentɨngɨn nə mgban gə ɓɨrtə gə le da mi vɨratə kat. 5Ɓɨrtɨngɨn nə ɓɨrə vor kulitə, shezə kulitɨngɨn aa mba ɓɨrtə a gbərə.
6Ama nee də Həmɨnpwa a lyanarən, kwakɨngɨn nə Yohana. 7Mangɨn a shi vɨratə gəkɨlə nda byelə a takale a bɨldə ɓɨrtɨngɨn gə mi vɨratə a mwadiyale ka ɓɨrtɨngɨn dɨ haka Yohana. 8Yohana ka nənəngɨn aa sɨnə ɓɨrtɨngɨn, hɨnggən nda shi gə nda byelə a takale a nə ɓɨrtɨngɨn. 9Ɓɨrtɨngɨn nə i diyala dɨ shi vɨratə, a ite ɓa ɓɨrə nə ɓwaare kat.
10Ɓɨrtɨngɨn a shi vɨrate nda ɗa, mi vɨratɨngɨn aa leerən. 11Nda shi vɨrasən a haka myee dan, mingɨn aa lurən. 12Myee mwa lurən mgban, a tən myee mwadiyale kan, nda vərən gətə təna gəə je da Həmɨnpwa nə, 13a je mya mwasa aa ɓətɨya ɓwaare a dɨ mwasa, aa ka ɗyangale da ɓwaara, aa ka kanata ɓwaara. Wule jingɨn, mya mwasa dɨ gəta Həmɨnpwa.
14Kormɨngɨn a zaya a gəə ɓwaara, a nza wakasəm a vor vɨratə, hɨm kat hɨm naa fukasən a wule fukate Kormɨngɨn ndi Nze da Həmɨnpwa Baatə hiɗə kal-kal a gə kaarə. Dɨ haka Kormɨngɨn wuladəha da Həmɨnpwa ka diyale dan a shi hakam.
15Yohana a byelə a takale a nə Yesu a bɨldən bwang. Nda maddə kormɨngɨn a sa atɨ, “Mangɨn nə ma na səwnə atɨ, ‘Ma dɨ kwaɗa beeshi ɓə pɨrgi gəkɨlə ite myaa nda mwasari sɨne də ka myentə.’ ” 16Gəkɨlə dɨ ha gbaktɨ wuladəha dan, ɓwaare a ɗɨm gwadəha da Həmɨnpwa anəsə. 17Ɓashita Həmɨnpwa dɨ haka Musa ngga shi, wuladəha da Həmɨnpwa ka diyale dan a shi hakam dɨ haka Yesu Ma Həmɨnpwa a Yaɓwarən.#1.17 Naarə Kɨristi nə, Ma Həmɨnpwa a Yaɓwarən ka kwa-Yawude. 18Taa ndəng ama gi naa Həmɨnpwa, ndi Yesu Nzəngɨn hiɗə kal-kal, ndi ma gi ɓwaa ka Həmɨnpwa Baatə sɨnə ɓəmbə naa Həmɨnpwa leerən, ɓwaare a lee Həmɨnpwa dɨ hakan.
Takale da Yohana a nə Yesu
19Ite mi kpanye da Yawude 'ye nza vor Urshelima a lyen i kɨsehəmi ka i ji-gwaha 'ye dɨ ɗa lyentə a Shafe#1.19 Ji-gwaha 'ye dɨ ɗa lyentə a Shafe, tənə mi Levi. gəkɨlə təna ɗiyə Yohana atɨ sɨnə wonə yə, 20ndaa ɓorən də alə, nda takale a nə Yesu a boyərən bwang atɨ, “Aa hɨnə Ma Həmɨnpwa a Yaɓwarən.”
21Təna luwa a san, “Ɓə hyenə wona? Hyenə Iliya ma?”
Nda sarən atɨ, “Ə'ə, aa hɨnə.”
“Hyenə Kpaləngɨn ma?#1.21 Naasə: Gɨraha 18.15,18.”
Nda luwarən atɨ, “Ə'ə.”
22Təna mɨna ɗiyən, “Ɓə hyenə wona? Boyenə ləməgyee hin ɓa ɗɨmə a boyə myee lyanarenə. Ɓə hye sa ka nanga atɨ a shiya?”
23Yohana a boyərən le ka kormi kpale Ishaya atɨ, “Hɨnə korma dɨ wagaha a vor kaake, ‘Maa tɨfe da Həmɨnpwa a tɨɗə shant.’ ”
24I Farise mya lyanatɨrən a haka Yohana, 25a ɗiyən, “Anda aa hyenə Ma Həmɨnpwa a Yaɓwarən, aa hyenə Iliya, aa hyenə Kpaləngɨn, ɓə ya hye dɨ ɗa ɓwaare batisɨmata?”
26Yohana a sarən atɨ, “Hɨnggi na dɨ ɗa ɓwaare batisɨmatə ka haɓye ɓəmbə, ama nee kanggə vorsəwnə, a hwunaa leerən, 27sɨnə ma ɓa kwaɗa beeshi, nagi salaki hwanye dan nə, taa kəni na mbarən a para.”
28Shinə kat a Betani mya ɗa, a lawuttɨ kwaka gbɨnuwo Urdun, a haa Yohana a dɨ ɗa ɓwaare batisɨmatə də.
Yesu nə Nzə-mbaga da Həmɨnpwa
29Ite haa a kɨɗa, Yohana a naa Yesu dɨ shi hakan nda sa, “Niyəm namə Nzə-mbagaa Həmɨnpwa a vədən gə nda nggurgə səhase da mi vɨratə. 30Sɨnə ma na boyownə le a nəngɨn, a ite na səwnə atɨ, ‘Ma dɨ kwaɗa beeshi ɓə pɨrgi gəkɨlə ite myaa nda mwasari sɨnə də ka myentə.’ 31Hɨn ka nəna taa leyi atɨ sɨnə Ma Həmɨnpwa a Yaɓwarən. Səngɨn ɗa na shi a dɨ ɗa ɓwaare batisɨmatə ka haɓye, gəkɨlə mya bɨldən a haka mi Israila.”
32Də Yohana a byelə a takale atɨ, “Hɨn naa Pita Həmɨnpwa janga dɨ pwa nza nəngɨn ɓətɨ nji-gulati. 33Taa dɨ nda leerən atɨ sɨnə Ma Həmɨnpwa a Yaɓwarən, anda aa gə ma lyanari atɨ a na ɗa ɓwaare batisɨmatə ka haɓye a se atɨ, ‘Ma hye naa Pita Həmɨnpwa a janga a nza nəngɨn, mangɨn nə ɓa ɗa ɓwaare batisɨmatə ka Pitɨ Ɗəmɗəmtə.’ 34Hɨn naa shingɨn kat, takale atɨ, sɨnə Nze da Həmɨnpwa.”
Lagbe da Yesu i kwamətə
(Matta 4.18-22; Markus 1.16-20; Luka 5.2-11)
35Haa ɓe kɨɗa, Yohana nee kanyi ka lagbe dan kpe, 36də nda naa Yesu nee woyi dɨ pɨri, nda sa, “Niyəm, zə namə Nzə-mbagaa Həmɨnpwa a vədən.”
37Naya lagbengɨn ɓe kɨlə she, təna koɗə Yesu. 38Yesu a virwo a naarən dɨ kwaɗan, nda ɗiyərən, “Mɨnə hwuna dɨ mwo?”
Təna luwa a san, “Rabi,” (naarəngɨn nə nzə-kəndəshe), “A ndo haa hye gə ka nzata?”
39Nda sarən, “Wam hwun ɓa naa hangɨn.”
Təna koɗən a naa haa nzaasən. Itɨngɨn mbwayi fəre tɨlə fwattɨ kaade, təna bə hakan.
40Hiɗə dɨ vor lagbe kpeye kɨl la Yohana a boyo nda ɓə koɗə Yesu nə Andrawus, mufə Siman Bitrus. 41Sə kwaməte Andrawus a ɗa nə nda pa jibiyəngɨn Siman, a san atɨ, “Hin naa ‘Mezaya!#1.41 Naarə Mezaya, ka kwa-Yawude nə Ma Həmɨnpwa a Yaɓwarən ka kwa-Heline sɨnə Kɨristi.’ Ma mya dɨ kula shisən” (sɨnə Ma Həmɨnpwa a Yaɓwarən). 42Andrawus a zə ka Siman Bitrus a haka Yesu.
Yesu a nidən a san atɨ, “Hyenə Siman nze da Yohana.#1.42 Aa Yohana tɨnə nə ma dɨ ɗa ɓwaare batisɨmatə. Mye ɓa wara ka kwaka atɨ Bitrus” (naarəngɨn nə faratə).#1.42 Kpeyə kwakɨngɨn nə Kefas.
Yesu a waga yə Filibus ka Nataniyel
43Haa ɓe kɨɗa, Yesu a bənggə le atɨ ndi ɓa muɗə njiya Galili. Də nda zə a dɨ pa Filibus, nda san atɨ, “Kwaɗe.”
44Ndi Filibus, sɨnə dɨ Betesda, vɨrata Andrawus ka Bitrus. 45Filibus a zə a dɨ pa Nataniyel a san, “Hin naa mangɨn, a mya dorshe a nəngɨn a vor ɓashita Musa ka Kpalye, ndi Yesu a dɨ Nazarat, nze da Yusufu.”
46Nataniyel a san, “Kək! Dɨ Nazarat? Asə femə nə də ɓa dɨma dɨ Nazarat mgban?”
Filibus a san atɨ, “Zə wa pe, wa niyi.”
47Ite Yesu a naa Nataniyel dɨ shi hakan, nda sa atɨ, “Daasə nzə-Israilatə a tikɨse ma aawa tɨmbɨrha.”
48Nataniyel a ɗiyə Yesu, “Hye ɗa ya hye ɓə leeri?”
Yesu a luwa a san, “Di hɨn nəw ite hye nee a mgba kada nggwaltə, a ite Filibus aa nda wara.”
49Nataniyel a luwa a sa Yesu, “Nzə-kəndəshe, hyenə Nze da Həmɨnpwa, hyenə həme da mi Israila.”
50Yesu a san, “Gəkɨlə na səw atɨ na nəw a mgba kada nggwaltə, də hye ɓə mwadiyale? Hye ɓa naa shee hananang 'ye pɨrgə inə.” 51Yesu a mɨna san, “Diyalə na dɨ boyownə, hwun ɓa naa pwa wunə bwang, malyenye da Həmɨnpwa nee dɨ pərəsə, dɨ nggɨri dɨ janga dɨ pwa#1.51 Naasə: Tiyatə 28.12. a na hɨn Nze da Ɓwaara.#1.51 Naasə: Daniyel 7.13,14.”
Currently Selected:
Yohana 1: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
