Markus 13
13
Sɨgbəshi kpawtɨ vɨratə
(Matta 24.1-2; Luka 21.5-6)
1Ite sɨne dɨ dɨmgə Shafe ɓa muɗə, hiɗə dɨ vor lagbe dan a san, “Nzə-kəndəshe, zə niyi! Naa wule faree mya nwo vəninə kaarən, ka wule fawna mya ɗa vəningɨn!”
2Yesu a san, “A hye naa wule nwoshi kɨr-kɨrye kanyi? Nagi hiɗə itɨ farati aa dɨ mbiɗi a kangə nə itə, kat mya ləkədərən a fəlgərən təna kəji njiya.”
Tənətɨ kwamətə
(Matta 24.3-14; Luka 21.7-19)
3Ite Yesu nee nza nə Motɨ Kade Zetun, a ite dɨ basa humwa Shafe a itɨ ɓayati, Bitrus ka Yakubu ka Yohana ka Andrawus a ɗiyən le a ɓotə atɨ, 4“Boyenə pe, goɗinə shingɨn 'ye hye boyə nə Shafe ɓa ɗa? Mɨnə sɨgbəshi ləngɨn a ɓa bɨlenə atɨ tən ɓa dɨ ɗa?”
5Yesu a tiya bwetə boyərən atɨ, “Bəmdə myensəwnə gə ɓe ama aa vwakarəwnə. 6Gəkɨlə ɓwaare hananang ɓa shi ta kər-jeronye ka kwaka atɨ, ‘Hɨnə Ma Həmɨnpwa a Yaɓwarən,’ tən ɓa woyo ta vwaka ɓwaare furi-furi. 7Mbak-mbak hwun ɓa kɨl lə pa-kawatə ka dɨk-dɨkə pa-kawatə, ɓe kala aa gəwnə. Wule shingɨn kat mbak-mbak ɓa ɗa, sɨgbəshi ɓəmbə, aa kpawtɨ fəre nə. 8Ɓwaare dɨ njiya som-som ɓa markasə, həmye ɓa ndɨlkasə, myatə ɓa fuka, njiya ɓa humuro hee som-som. Angɨn nə tiyatɨ tənəte ɓaga shi ɓətɨ otɨ yedi mwasati.
9“Bəmdə myensəwnə hwuna nza ka ɗaasɨtə. Gəkɨlə mye ɓa kəttəwnə a zə kəwnə a humwa ji-ɓashitə mya byengrəwnə a vor vəni kəndəshe dam. Mya zə kəwnə a humwa həmi njiya ka nggwamne gə le de, hwun ɓa takale a na. 10Mya hiwa ka ləmə feme de a mbəgə hee a haka kwaami vɨratə kat. 11Nagi goɗi təna kəttəwnə a zə kəwnə a vəni ɓashitə, ɓe hwunaa ɗyengle a nə ɓashitɨngɨn gə la hwun ɓa boyo, zəm boyom la shi kwa-hubosəwnə, gəkɨlə aa hwunə dɨ byeli, Pitɨ Ɗəmɗəmtə nə.
12“Jibiye ɓa vədə mufe, mufe a vədə jibiyəngɨn gə mya ɓɨlə, sə mgban baatə ɓa vədə je. Je ɓa maɗə nə yə sɨnggərən a dɨmə kaarən gə mya ɓələ. 13Ɓwaare kat ɓa kwo nəngəwnə gə le de. Ma kanyi dwat mbasɨsən tɨlə kpawtə ɓa ɗɨm mbətə.
Tənətɨ hattə
(Matta 24.15-31; Luka 21.20-28)
14“A hwun naa ‘Sə guname a dɨ shi ka kɨɗashe’#13.14 Naasə: Daniyel 9.27; 11.31; 12.11. mye kangdən a haa ndaa kana nda gə də – ma dɨ bəli a nda lee naarə ləngɨn itɨngɨn – myee a vor njiya Yawudiya a təna gyeɓə a nggɨrə mogye. 15Ɓe ma nza pwatɨ-nə vɨne dan aa sa atɨ ndi ɓa janga a mɨna pɨrə vor hwodan atɨ ɓa nggur asə. 16Ma a gaashe, ɓe ndaa viriwa atɨ ɓa nggura ɓarawtɨ dan. 17A fərəngɨn, sə oti ka mandyee ka wape, ka 'ye dɨ shəwdə je! 18Hwuna ɗa hiwtə ɓe fərəngɨn aa pɨrə vor ɓoole ka tale, 19gəkɨlə wule tənəte a fərəngɨn aa ndaga ɗa dɨ fəra Həmɨnpwa a sɨra vɨratə də, baa dɨma a fəranə supo, myaa diyə ga naa wule tənətɨngɨn. 20Anda Həmɨmiye Baatə aa liya bənggə furo bətɨ tənətɨngɨn, taa ndəng ma də ɓa nda mbə. Shezə gəkɨlə le da myee Həmɨnpwa a taɗə mye ɓa bənggə bətɨngɨn. 21A fərəngɨn ama kana səwnə atɨ, ‘Niyəm, Ma Həmɨnpwa a Yaɓwarən nə ganə,’ naasə mgban, ‘Niyəm, sɨndə gaarə,’ ɓe hwunaa mwaka ləngɨn. 22Gə wule myee dɨ kər-jeronye atɨ tənə myee Həmɨnpwa a yaɓwatɨrən, ka kpali jeronye ɓa dɨma ta ɗa zərgi shikoshopye ka sɨndəle som-som gə təna vwaka myee Həmɨnpwa a taɗə, anda tən ɓa mba vwakatə vwaka mingɨn. 23Gə ləngɨn, kangəm dwat hwuna bədə myensəwnə. Hɨn boyownə nagi ndo sə ka haa-tan. Shingɨn kana maɗə a dɨ ɗa, hwuna ɗyanga atɨ hɨn boyownə.
24“Beetɨ tənətɨngɨn a fərəngɨn,
“ ‘Fəre ɓa gə kulit,
likɨtə aa diyə ɓɨrə,
25tyekəlye ɓa fwaka dɨ pwa,
gəte a pwa ɓa humuro.’
26“A fərəngɨn, də tən ɓa shea ne hɨn Nze da Ɓwaara a vor pərɓye dɨ janga ka gbaktɨ gətə ka fukatə. 27Hɨn ɓa lyen malyenye de gə təna payadə myee Həmɨnpwa a taɗə dɨ vor vɨratə kat, a bətɨ vɨratə, pwa kat ka njiya.
Byelə səɗe a nə kada nggwale
(Matta 24.32-35; Luka 21.29-33)
28“Ɗyegənəmshe dɨ haka kada nggwale. Basengɨn kana tiya twasatə ta mana jiba a sɨsən, hwun leyə atɨ ɓoole janga. 29Sə mgban hwun kana naa sɨgbəshi shingɨn, hwuna leyə atɨ sawtə tɨla a kwa-vɨnke. 30Diyalə na dɨ boyownə, imi a vɨra wanetɨnə aa dɨ mbərə a pɨrə ɓaa anda shinə na boyo kat aa ɗa kat. 31Pwa ka njiya ɓa pɨrə ɓaa, shezə ləməgye de aa dɨ ga pɨrə ɓaa.
Taa ndəng ama lee fərə mɨnata Nze da Ɓwaara
(Matta 24.36-44; Luka 17.26-30,34-35)
32“Taa ndəng ma lee fərəngɨn. Nagi malyenirə a vor pwa nə, tənaa leyə. Hɨn ka nəna hɨn Nze taa leyi. Baatə nə ɓəmbə leyi. 33Bəmdə myensəwnə, nzam ka ɗaasɨtə hwun ta sardə kwakingəwnə gəkɨlə hwunaa lee fəre. 34Ləngɨn nə ɓətɨ həmɨ-hwoɗyee maɗi ɓa muɗə omotə. Nda və kɨse dan hwoɗye gə ta nidərən, nda ɓyanarən lyentə nagi ndo ma ka hɨnggən lyenti, nda sa ma dɨ gɨra kwatɨfe atɨ nda nidə hwoɗye a gɨra pepe.
35“Sə mgban hwuna bəə myensəwnə ta gɨra gəkɨlə hwunaa lee fəra Həmɨ-hwoɗingɨn ɓa mɨna də, ndəng ka kaade, ndəng ka vor tukotə, ndəng ɗeke tadɨ wa, ndəng ka hakpite. 36Anda ɓə nza dɨma kəwnə, ɓe ndaa shi asɨ pəwnə hwune dɨ sheni. 37Gə ləngɨn lanə na boyownə, sə mgban na dɨ boyə mbiɗitɨ ɓwaare kat atɨ, ‘Hwuna nza ka ɗaasɨtə, hwun ta gɨra.’ ”
Currently Selected:
Markus 13: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
