Gimpuunan 13
13
Namululagan Sida ni Abram ni Lut
1Ginan sa Ihiptu, nag-ati si Abram sa Nigib kaibahan kay asawa dara ti tanan kasiyunan niya, ag kinmuyug diman sa kanda si Lut. 2Mayaman yi gid masyadu si Abram; mayamu yi kay manga hayup, manga pilak hanggan gintu. 3Ginan sa Nigib, pahalin-halin sida tugka sa nakabalik sida sa rugar nida daan nagpatindugan turda. Inda pag rugar ati sa may tab-anan Bitil ag Hay. 4Siyun diman sida un-an nagpatindug harandugan katpung rinmas-ug sida sa Kanaan. Ati nagsamba maan si Abram sa Panginuun.
5Si Lut ti pirmi makuyugan sa kan Abram una naan tag may imaw di waydi sadili manga hayup hanggan manga turda. 6Ag dahil mayamu yi kanda manga hayup hanggan iba waya manga kasiyunan, balaw yi sida mahimu mangulian sa usa-usa ka rugar. Ti pasturan balaw yi kang-ud para sa kanda. 7Dahil siyun, mag-arawayan yi ti manga manug-alaga nida manga hayup. (Ati katpung, ti manga Kananiyu hanggan ti manga Pirisiyu mag-ulian waya sa tunda pag daga.)
8Nakan magkun si Abram sa kan Lut, “Kita hanggan kanta manga tawuhan balaw mahimu mag-arawayan, dahil magkatawuhan kita. 9Ti mayad, manbululagan yi lang kita dahil mayamu waya pag rugar ti mahimu malipatan nita. Kawu ti pagpili nu naan pag parti daga kanmu gustu. Nu tag sa wala kawu, sa sikun aku; nu sa sikun kawu, sa wala waydi aku.”
10Nan-alantaw si Lut sa sangput ag nakitan niya ti Karatagan Hurdan tugka sa Suar abunda sa danum, parihu sa halamanan Idin ag daga Ihiptu. (Nangyari inda katpung udwaya rinuris Panginuun ti Suduma ag Gumura.) 11Nakan pinili ni Lut ti buu Karatagan Hurdan sa butlakan. Sa katida pag paraan, namululagan ngani sida ni Abram. 12Si Abram napatayak sa Kanaan habang si Lut waydi ati sa manga banwa sa karatagan. Nagpatindug si Lut kay turda sa may arani Suduma. 13Ti manga tawu sa Suduma daut gid ag makasalanan. Subra gid kanda kadautan laban sa Panginuun.
Napasalyu si Abram sa Hibrun
14Pagka nakaginan yi si Lut, magkun ti Panginuun sa kan Abram, “Ginan sa kanmu pagtindugan, bantayi nimu kaayad ti palibut. 15Ti tanan maalantaw nimu pag daga ipakaun niku sa kanmu hanggan sa manga linahi nimu, ag kanyu yi inda tugka aban. 16Payamuun niku kanmu linahi ga taypuk sa kalibutan kay kayamu. Ti taypuk dayu mabilang, nakan kanmu linahi balaw diman mabilang. 17Paglakaw kawu ag palibuta ti buu daga dahil ipakaun niku inda tanan sa kanmu.”
18Nakan hinalin ni Abram kay turda, ag ati siya pag nangulian sa may arani daka puun kayu ni Mamri ati sa Hibrun, bag-u nagbuwat siya ati harandugan para sa Panginuun.
Currently Selected:
Gimpuunan 13: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
