Gimpuunan 14
14
Irinibri ni Abram si Lut
1Ati katpung, si Amrapil hari sa Sinar, si Aryuk hari sa Ilasar, si Kidurlawmir hari sa Ilam, ag si Tidal hari sa Guyim 2ti naggira sa kanda ni Bira hari sa Suduma, ni Birsa hari sa Gumura, ni Sinab hari sa Adma, ni Simibir hari sa Sibuyim hanggan sa kan hari Bila pag-ingarnan diman Suar. 3Nagkaraminsan inda pag lima ka hari kaibahan kanda manga sundalu ati sa Luung Sidim, taynguna pag-ingarnan Dagat Namatay.#14:3 Dagat Namatay: sa Hibriyu, maasin gid pag dagat. 4Inda pag manga hari nasakup kaybi ni Kidurlawmir sa sulud sampulu may duwa ka timpu, dapat pagka sa ika-13 pag timpu naglaban sida sa kanya. 5Ag pagka sa ika-14 pag timpu, tinalu ni Kidurlawmir hanggan niya manga kakampi hari ti manga Ripaimiyu sa Astirut Karnaim, ti manga Susita sa Kam, ti manga Imita sa Karatagan Kiryataim, 6hanggan ti manga Hurita sa bantud Siir tugka sa Il Paran arani sa may pangawakawaan. 7Siyun ginan, binmalik sida ag nakaras-ug sa In Mispat pag ingarnan Kadis taynguna. Ag nasakup nida ti tanan daga manga Amalikita hanggan manga Amuriyu mag-uli sa Hasasun Tamar.
8Taynguna, tinipun manga hari Suduma, Gumura, Adma, Sibuyim ag Bila kanda manga sundalu sa Luung Sidim 9ag naggira sida sa kanda ni Kidurlawmir hari sa Ilam, ni Tidal hari sa Guyim, ni Amrapil hari sa Sinar, hanggan ni Aryuk hari sa Ilasar — lima ka hari laban sa upat ka hari. 10Ti Luung Sidim may imaw mayamu kali bulul-an alkitran. Pagka nalagiw ti hari Suduma hanggan Gumura kaibahan kanda manga tawuhan, ti iba sa kanda nalagpak sa manga kali, ag ti iba nalagiw atabug sa kabantudan. 11-12Ti tanan kasiyunan Suduma ag Gumura hanggan kanda manga karan-unun tabu bin-ul manga kalaban. Binihag diman nida si Lut kan Abram bapa ag bin-ul kay manga kasiyunan, dahil ati ngani siya pag mag-uli sa Suduma. Igu nab-ul inda manga kalaban, ginminan yi sida.
13Taynguna, may usa ka tawu nakapalagiw ag nagbarita sa kan Abram tungkul sa nangyari. Si Abram usa ka Hibriyu, mag-uli sa may arani daka puun kayu ni Mamri usa ka Amuriyu. Si Mamri hanggan kay manga patar-ari, sida ni Iskul ni Anir, ti manga kakampi ni Abram. 14Pagka nasaydan ni Abram binihag maaw kay bapa, susun niya tinipun kay 318 ka anad gid pag tawuhan, mismu ati pag ainanak sa kay kampu, ag linagas nida ti upat ka hari tugka sa Dan. 15Igu yabi, tinunga ni Abram kay manga tawuhan ag ginira nida ti manga kalaban, ag natalu nida inda. Ti iba ka manga nakapalagiw kanda linagas tugka sa Huba, sa salatan Damasku. 16Binawi nida ti tanan bin-ul manga kalaban pag manga kasiyunan. Binawi diman nida si Lut hanggan kay manga kasiyunan kaibahan ti manga babayi ag ti iba waya manga tawu.
Pinapaladan ni Milkisidik si Abram
17Pagka nuli yi si Abram, pagkatapus nida taluhun si Kidurlawmir hanggan kay manga kaibahan hari, sinulang siya hari Suduma sa Luung Sabi (pag-ingarnan diman Luung Hari). 18Sinulang diman siya ni Milkisidik hari sa Salim ag manughandug waya Diyus Makamaskihan sa tanan. Si Milkisidik may dara karan-unun ag irinmun. 19Pinapaladan niya si Abram magkun:
“Abram, mana papaladan kawu Diyus Makamaskihan sa tanan
ti naglalang langit ag daga.
20Dayawun ti Diyus Makamaskihan sa tanan
ti nagpakaun panalu sa kanmu laban sa kanmu manga kalaban!”
Bag-u ipinakaun ni Abram sa kan Milkisidik ti ikasampulu pag huray sa tanan niya nab-ul pag bagay sa girahan.
21Magkun waydi ti hari Suduma sa kan Abram, “Kanmu yi ti tanan nabawi nimu pag kasiyunan niku; ulian lang sa kangku ti tanan niku manga tawuhan.” 22Dapat magkun si Abram sa hari Suduma, “Magsumpa aku sa atubangan Panginuun, ti Diyus Makamaskihan sa tanan, ti naglalang langit ag daga, 23balaw gid aku mam-ul una hintay pag kasiyunan ginan sa kanmu, una bunang ngatay panhigut lapak, hampay balaw nimu masabi, ‘Pinayaman niku si Abram.’ 24Balaw gid aku mantanggap una hintay para sa kang sadili. Purya lang sa manga kinaun niku manga tawuhan, dapat pasnui nimu kang manga kaibahan sida ni Anir, ni Iskul ag ni Mamri sa pagbuul kanda kabahagi ginan sa manga nab-ul pag manga bagay sa girahan.”
Currently Selected:
Gimpuunan 14: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
