Gimpuunan 26
26
Nangulian si Isaak sa Girar
1Rinmas-ug ti lun-us sa pag-ulian ni Isaak pag rugar, bukud waya inda sa nangyari lun-us sa kaudasan ni Abraham. Nakan nag-ati si Isaak sa kan Abimilik, usa ka hari manga Pilistiyu sa Girar. 2Napakakit sa kanya ti Panginuun ag magkun, “Danga kawu mag-atag sa Ihiptu; pagpirmaminti kawu sa itudlu niku pag rugar sa kanmu. 3Sitay lang dap kawu pag tahan dahil giyahan niku kawu ag papaladan. Ipakaun niku sa kanmu hanggan sa kanmu manga linahi inda tanan pag daga. Tupadun niku kang taratu sa kanmu ama, sa kan Abraham. 4Payamuun niku kanmu manga linahi ga pamgasan sa langit kay kayamu, ag ipakaun niku sa kanda inda tanan pag daga. Ag sa panab-anan nida, papaladan niku ti tanan tawu sa kalibutan. 5Buwatun niku inda dahil sinunud aku ni Abraham, ag tinupad niya ti tanan niku sugu hanggan tudlu.” 6Nakan nangulian ngani si Isaak sa Girar.
7Nu may magpaingana taga Girar sa kan Isaak tungkul sa kay asawa, pagkumnun niya kay patar-ari si Ribika. Marinu si Ribika, nakan magkadala siya magsabi kuntay kay asawa inda, dahil barang matyun nida siya hampay mab-ul si Ribika.
8Dugay yi waydi kanda mag-ulian ni Isaak sa Girar. Sa usa ka sirang, nitpung waydi nangalantaw si Abimilik, ti hari manga Pilistiyu, ginan sa kay gaha ag nakitan niya magmahalan sida ni Isaak ni Ribika. 9Nakan ipinatawag niya si Isaak ag magkun, “Kanmu maaw asawa siya? Hayga bati magkun kawu kanmu patar-ari siya?” Sinmagut si Isaak, “Magkadala duy aku barang matyun niyu aku dahil lang sa kanya.” 10Magkun si Abimilik, “Balaw mayad kanmu binwat sa kanmi. Nu nakaulid lang ti usa sa manga tawuhan niku sa kanya, kawu ti may saragtun sa kanmi kasalanan.” 11Susun sinabihan ni Abimilik ti tanan tawu, magkun siya, “Una si unu ti bumuwat daut sa inda pag lalaki ngatay sa kay asawa niya pihu gid matyun.”
12Sa tunda diman pag timpu nantanum si Isaak sa ati pag rugar ag nakaani siya 100 ka ulit, dahil pinapaladan siya Panginuun. 13Parargu kay mag-unlad tugka sa nagyaman gid siya. 14Nanhirak sa kanya ti manga Pilistiyu dahil mayamu yi kay karanidu, manga kambing, manga baka hanggan suruguun. 15Dahil sa kanda maghirak sa kan Isaak, tinakbunan nida daga ti manga bubun kinali kaybi manga suruguun niya ama, ni Abraham.
16Taynguna, magkun si Abimilik sa kan Isaak, “Pag-ighit yi kawu sitay, dahil mas makamaskihan yi kamu kaysa kanmi.” 17Nakan nighit ngani si Isaak, ag namatindug kay turda sa Luung Girar ag ati pag nangulian. 18Ipinakutkut maan niya ti manga bubun niya ama, ni Abraham, dahil tinakbunan inda manga Pilistiyu katpung namatay si Abraham. Pinangaranan ni Isaak ti manga bubun kay daan diman ngaran kaybi kay ipinaingaran ni Abraham.
19Ati sa luung, nankutkut bag-u pag bubun ti manga suruguun ni Isaak ag nakakit sida bulbugan. 20Dapat nan-aratwan ti manga manug-alaga hayup taga Girar laban sa manga manug-alaga hayup ni Isaak kuntay kanda kunu tunda pag bubun. Nakan iningarnan ni Isaak tunda pag bubun Isik,#26:20 Isik: Kay ibug sabihun, aratwan. dahil nan-aratwan ti manga taga Girar tag sa kanya.
21Nankutkut gid maan ti manga suruguun ni Isaak tuhay pag bubun, dapat nangaratwan maan sida hanggan ti manga taga Girar. Nakan iningarnan ni Isaak ti bubun Sitna.#26:21 Sitna: Kay ibug sabihun, arawayan. 22Nighit maan siyun ginan sida ni Isaak ag nankutkut maan tuhay pag bubun. Balaw yi nida inda inaratwanan, nakan iningarnan inda ni Isaak Rihubut.#26:22 Rihubut: Kay ibug sabihun, maluang pag rugar. Dahil magkun siya, “Taynguna pinakan-an kita Panginuun maluang pag rugar hampay lalu waya kita yumamu sa inda pag rugar.”
23Makalawuy ti pira ka sirang, nighit si Isaak ginan sa tunda pag rugar ag inmati sa Biirsiba. 24Sa tunda pag yabi sa kay pagras-ug, napakakit sa kanya ti Panginuun ag magkun, “Aku ti Diyus nimu ama, ni Abraham. Danga kawu magkadala dahil kaibahan nimu aku. Papaladan niku kawu ag pakan-an mayamu pag lahi dahil sa kan Abraham kang manugsirbi.” 25Nakan nagbuwat harandugan si Isaak ag nagsamba sa Panginuun. Nagpatindug siya turda sa tunda pag rugar ag nanpakutkut bubun sa kay manga suruguun.
Ti Kasunduan ni Isaak ag ni Abimilik
26Nag-ati si Abimilik sa kan Isaak ginan sa Girar kaibahan si Ahusat kay manugpayu ag si Pikul kay takinan manga sundalu niya. 27Nagpaingana si Isaak sa kanda, “Hayga kamu inmataytag? Unman aw magkagalit kabay kamu sa kangku, nakan pinaighit niyu aku sa kanyu rugar?”
28Sinmagut sida, “Napatutuuhanan nimi ti Panginuun kaibahan nimu, nakan nag-isip kami kailangan kita bumuwat kasunduan. Pagsumpa kawu sa kanmi 29balaw kawu bumuwat kadautan sa kanmi, dahil balaw diman waydi nimi kawu binwatan daut katpung ati di waya kawu sa kanmi. Pinakakitan nimi kawu kaayadan ag pinaighit nimi kawu may mayad pag pakiusa. Taynguna, pinapaladan yi gid kawu Panginuun.”
30Nakan nanhandaan si Isaak para sa kanda ag nangaran-an sida ag nan-inuman.
31Pagka sa sunud pag sirang, surip waya nagsumpa sida sa kada usa. Bag-u pinaginan ni Isaak sida may pagkarausa.
32Sa tunda diman pag sirang, rinmas-ug kay manga suruguun ni Isaak ag ibinarita sa kanya kuntay may danum yi ti bubun nida kinutkut. 33Iningarnan ni Isaak tunda pag bubun Shiba. Nakan tugka taynguna, tunda pag rugar pag-ingarnan Biirsiba.#26:33 Biirsiba: Bantayi ti footnote sa 21:31.
Nag-asawa si Isaw sa Balaw Nida Kalahi
34Pagka 40 yi ka timpu si Isaw, naasawa niya si Yudit kay anak ni Biiri usa ka Hitiyu. Naasawa diman niya si Basimat kay anak ni Ilun usa diman ka Hitiyu. 35Tunda pag duwa ka babayi nagpakaun gid subra pag karukuan sa kanda ni Isaak ag ni Ribika.
Currently Selected:
Gimpuunan 26: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
