Gimpuunan 27
27
Pinapaladan ni Isaak si Hakub
1Gurangun yi gid si Isaak ag harus udyi maghiling. Igu sa usa ka sirang, tinawagan niya kay anak panganay si Isaw. Magkun siya, “Anak.” Sinmagut si Isaw, “Hayga duy amang?” 2Magkun si Isaak, “Gurangun yi aku, udyi dumugay mamatay yi aku. 3Bul-a kanmu bangkaw ag pag-ati kawu sa katalunan, pangidu kawu para sa kangku. 4Bag-u tamaa nimu kang pagkaibgan pag karan-unun ag susun daraha sitay tabug sa kangku hampay makakaun aku. Papaladan niku kawu bag-u aku mamatay.”
5Magpatingi maaw si Ribika habang magharampangan sida ni Isaak ni Isaw. Nakan igu nag-ati si Isaw sa katalunan hampay man-idu, 6hinampang ni Ribika kay anak si Hakub, “Nasaydan niku ti sinabi nimu ama sa kan Isaw kuntay 7pan-idu ag susun tamaa kay pagkaibgan pag karan-unun. Dahil bag-u kunu siya mamatay papaladan dap niya si Isaw sa atubangan Panginuun. 8Nakan anak, sunda nimu kang isugu sa kanmu: 9Pag-ati kawu sa manga hayup nita ag pagbuul kawu duwa ka matabul pag anak kambing, ag tamaan niku kanmu ama kay pagkaibgan pag karan-unun. 10Bag-u daraha nimu inda sa kanya hampay papaladan niya kawu bag-u siya mamatay.”
11Dapat magkun si Hakub sa kay ina, “Alam diman waydi nimu bulbulin si Isaw ag aku unman. 12Barang hikapun aku ni amang ag maalaman niya paglukuhun lang niku siya ag saadan niya aku sa halip papaladan.”
13Sinmagut si Ribika, “Anak, aku ti bahala nu saadan niya kawu, basta buwata lang nimu kang pag-isugu sa kanmu. Paglakaw yi kawu ag darahi nimu aku duwa ka kambing.”
14Nakan nagbuul ngani si Hakub duwa ka kambing ag dinara niya sa kay ina, bag-u susun waydi tinama ni Ribika ti pagkaibgan pag karan-unun ni Isaak. 15Pagkatapus, bin-ul niya ti pinakamarinu pag rutay ni Isaw ati sa kanda balay ag ipinasulung sa kan Hakub. 16Pinaulian niya lukub kambing kay takyay ni Hakub hanggan kay liug balaw may bulbul. 17Bag-u ipinakaun niya sa kan Hakub ti karan-unun hanggan ti tinapay kay tinama.
18Dinara ngani tunda ni Hakub sa kay ama ag magkun, “Amang!”
Sinmagut si Isaak, “Si unu duy kawu pag anak niku?” 19Magkun si Hakub, “Aku duy si Isaw, kanmu panganay pag anak. Nabuwat yi duy niku kanmu pag-isugu sa kangku. Pagbangun duy kawu ag pagkaun kang iniduan hampay papaladan nimu aku.”
20Magkun si Isaak, “Anak, kabitay duy nimu inda pag nablay madali?” Sinmagut si Hakub, “Inawatan duy aku Panginuun nimu Diyus.” 21Magkun si Isaak, “Pagpakarani kawu sa kangku anak niku hampay mahiyaptan niku kawu nu kawu yi ngani ungud si Isaw.”
22Nakan napakarani ngani si Hakub, ag hiniyaptan siya niya ama ag magkun, “Kanmu busis bilang ga si Hakub, dapat kanmu takyay bilang ga kan Isaw.” 23Unman nakilala ni Isaak si Hakub, dahil kay takyay bulbulin diman ga kan Isaw.
Bag-u niya pinapaladan si Hakub, 24nagpaingana waya siya, “Kawu aw ungud si Isaw?” Sinmagut si Hakub, “Hu duy, aku ngani.” 25Magkun si Isaak, “Malu, daraha sitay tabug kanmu tinama ginan sa kanmu iniduan, pagkatapus niku kaun bag-u di niku kawu papaladan.”
Nakan pinakan-an siya ni Hakub karan-unun hanggan irinmun, ag kinmaun ngani siya ag nanginum. 26Bag-u magkun si Isaak sa kanya, “Pagpakarani kawu sa kangku, anak, hagkunga aku.”
27Napakarani ngani si Hakub sa kanya ag hinagkung kay ama. Pagka nahungaw ni Isaak kay rutay, susun niya pinapaladan si Hakub magkun,
“Kay hungaw niku anak parihu sa hungaw katalunan pinapaladan Panginuun.
28Mana pakan-an kawu Diyus abunda sa ani pag daga pirmi may tun-ug papalad niya,#27:28 tun-ug papalad niya: sa litiral, tun-ug langit. hampay abunda kawu sa karan-unun hanggan irinmun ubas.
29Mana pumasakup ag sumirbi sa kanmu ti mayamu manga tawu.
Mana kawu ti humari sa kanmu manga katawuhan ag pumasakup sida sa kanmu.
Mana ti magsaad sa kanmu, saadan diman,
ag ti magpapalad sa kanmu, papaladan diman.”
Napaawa-awa si Isaw Papaladi di Siya
30Igu pinapaladan ni Isaak si Hakub susun yi siya ginminan. Ag udway dugay kay ginminan ni Hakub ginan sa atubangan niya ama, rinmas-ug waydi ngap si Isaw kay patar-ari ginan sa pangiduan. 31Nantama diman siya masarap pag karan-unun ag dinara niya sa kay ama. Magkun siya, “Amang, pagbangun duy kawu ag pagkaun kang iniduan hampay papaladan nimu aku.” 32Nagpaingana si Isaak sa kanya, “Si unu kawu?” Sinmagut siya, “Aku duy si Isaw, kanmu anak panganay.” 33Pagka nasaydan inda ni Isaak, nangirkirug gid siya ag magkun, “Si unu nguna ti un-an nangidu ag nagdara sitay sa kangku karan-unun? Bag-u lang niku kaun kanmu magras-ug. Ipinakaun yi niku sa kanya kang papalad ag balaw yi gid niku mabawi tunda. Pinapaladan niku siya ag sa kanya yi tunda hanggan aban.”
34Igu nasaydan tunda ni Isaw, nan-nguynguy siya sa lumi. Magkun siya, “Amang, papaladi diman nimu aku!”
35Dapat sinmagut si Isaak, “Pinaumang aku nimu ari ag nab-ul yi niya ti papalad niku para mana sa kanmu.”
36Magkun si Isaw, “Pangadwa yi ginan inda pinaumang niya aku. Nakan maaw Hakub#27:36 Hakub: Kay ibug sabihun, manugluku. kay ngaran. Bin-ul yi niya kang karampatan bilang panganay ag taynguna bin-ul waya niya ti papalad para sa kangku.” Bag-u nagpaingana siya, “Amang, udyi aw ungud may sawad papalad para sa kangku?”
37Sinmagut si Isaak, “Binwat yi niku siya kanmu amu ag binwat diman niku suruguun niya ti tanan niya katawuhan. Ipinakaun yi niku sa kanya ti abunda pag karan-unun ag irinmun ubas. Nakan hintay waya anak ti miayaw niku sa kanmu?”
38Napaawa-awa waya si Isaw sa kay ama, “Amang, udyi aw gid ungud una di usa ka papalad para sa kangku? Papaladi diman nimu aku.” Bag-u magpakalumi waya gid siya.
39Magkun si Isaak sa kanya,
“Unman pumatubas abunda kanmu ulian pag daga,
ag pirmi inda unman may tun-ug papalad Diyus.#27:39 tun-ug papalad Diyus: sa Hibriyu, tun-ug langit.
40Pirmi kawu man-gira,
ag sumirbi kawu sa kanmu patar-ari.
Dapat nu lumaban kawu sa kanya,
kumalpas di kawu ginan sa kay kapangyarihan.”
41Pagtimaan ni Isaw si Hakub dahil sa ipinakaun papalad niya ama sa kan Hakub. Magkun si Isaw sa kay sadili, “Arani yi mamatay si amang; nu tigbak yi siya, matyun niku kang patar-ari si Hakub.” 42Dapat nabaritaan ni Ribika kay gayak ni Isaw, nakan ipinatawag niya si Hakub ag magkun, “Kanmu aka si Isaw maggayak mumatay sa kanmu hampay madura kay galit sa kanmu. 43Nakan pagpatingi kawu sa kang sabihun: Pagpalagiw yi kawu ag pag-ati sa Haran, ati sa kang patar-ari sa kan Laban. 44Pag ati dap kawu tugka sa madura ti pangagalit nimu aka, 45ag malimtan yi niya kanmu binwat sa kanya. Ipab-ul lang niku kawu ahan ginan nu udyi siya magkagalit sa kanmu. Ud niku makaya dungan kamu madura sa kangku nu manmaratyan kamu.”
Pinaati ni Isaak si Hakub sa kan Laban
46Kas-a magkun si Ribika sa kan Isaak, “Magkasamuk yi gid aku sa kang buhi dahil sa manga asawa Hitiyu ni Isaw. Nu ti maasawa ni Hakub taga sitaay lang diman waydi usa ka babayi Hitiyu mayad waya mamatay yi lang aku.”
Currently Selected:
Gimpuunan 27: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
