Gimpuunan 31
31
Linayasan ni Hakub si Laban
1Nasaydan ni Hakub kay manga anak lalaki ni Laban magkun, “Bin-ul ni Hakub ti harus tanan pag kasiyunan nita ama. Ti tanan pag kayamanan niya ginan sa kasiyunan nita ama.” 2Napansin diman ni Hakub tuhay yi kay magpakiusa ni Laban sa kanya.
3Magkun ti Panginuun sa kan Hakub, “Pagbalik yi kawu sa daga nimu manga ginurang, ati sa kanmu manga katawuhan, ag kaibahan nimu aku.”
4Nakan ipinatawag ni Hakub kay manga asawa, sida ni Rakil ni Liya, kuntay pag-atag sa kay pasturan niya manga hayup. 5Magkun siya tag sa kanda, “Napansin niku tuhay yi kay magpakiusa niyu ama sa kangku. Dapat balaw aku pinabay-anan Diyus niku ama. 6Alam diman waydi niyu nagsirbi aku sa buu kabisugan niku sa kanyu ama, 7dapat dinaya waya niya aku. Sampulu ka ulit niya binag-u ti kabaydanan niku. Dapat balaw aku pinabay-anan Diyus api-apihun lang niya. 8Katpung ngani kay magsabi ni Laban ti buntuk-buntukan pag manga kambing imaw ti kabaydanan niku, lunsay yi ngani buntuk-buntukan ti manga anak kambing. 9Bin-ul Diyus ti manga hayup niyu ama ag ipinakaun sa kangku.”
10Magkun waya si Hakub, “Katpung udas mag-aramaan manga hayup, nanagin-up aku. Nakitan niku ti manga lalaki pag kambing magtakpal sa manga babayi pag kambing may buntuk-buntukan. 11Sa kang tagin-up tinawag aku anghil Diyus. Magkun siya, ‘Hakub!’ Sinmagut aku sa kanya, 12ag magkun siya, ‘Bantayi, ti tanan lalaki pag kambing mag-ama sa manga babayi pag kambing may buntuk-buntukan. Binwat niku inda dahil nakitan niku ti tanan pagbuwatun ni Laban sa kanmu. 13Aku ti Diyus ti napakakit sa kanmu ati sa Bitil, sa daga nu naan pag binuhusan nimu lana ulibu ti batu kanmu ipinatindug bilang alaala. Ag ati diman kawu pag nagtaratu sa kangku. Taynguna, pag-alistu kawu ag pag-ighit sa inda pag rugar, pagbalik sa rugar nu naan kawu pag iinanak.’ ”
14Sinmagut si Rakil ag si Liya sa kan Hakub, “Udyi kami may manahun sa kanmi ama. 15Iba tawu yi kami sa kay magbantay. Ipinabili yi niya kami ag tinabu yi gid niya kay kabaydanan sa kanmi. 16Ti tanan pag kayamanan binawi Diyus sa kanya ag ipinakaun sa kanmu tunda ngap kanmi maranahun hanggan nimi manga anak. Nakan ngani buwata ti sinabi Diyus sa kanmu.”
17-18Nag-alistu si Hakub hampay bumalik sa Kanaan, sa daga niya ama sa kan Isaak. Ipinasakay niya kay manga anak hanggan manga asawa sa kamilyu. Dinara niya ti manga hayup hanggan ti tanan natipun pag kasiyunan niya sa Padan Aram.
19Nitaun waydi ginminan si Laban hampay uguyan kay manga karanidu, ag habang udwaya siya, bin-ul ni Rakil ti manga diyus-diyusan niya ama. 20Dinaya ni Hakub si Laban taga Aram, dahil balaw niya ipinaalam kay magginan. 21Igu nighit si Hakub, dara niya ti tanan pag kasiyunan niya. Dinmipay siya sa Sapa Iyupratis ag nag-atag sa bantud Gilyad.
Linagas ni Laban si Hakub
22Tulu ka sirang yi ti nakalawuy bag-u di naalaman ni Laban linmayas si Hakub. 23Nakan linagas niya si Hakub sa sulud pitu ka sirang. Iniba niya kay manga katawuhan. Natakdan nida sida ni Hakub ati sa bantud Gilyad. 24Tunda katpung pag yabi, napakakit ti Diyus sa kan Laban taga Aram, sa panab-anan tagin-up. Magkun ti Diyus sa kanya, “Danga nimu pagbuwati daut si Hakub.”
25Ati katpung magpatindug si Hakub kay turda sa bantud Gilyad igu natakdan siya ni Laban. Ag ati diman pag namatindug kanda turda sida ni Laban. 26Magkun si Laban sa kan Hakub, “Hayga binwat nimu inda sa kangku? Hayga aku pinaumang nimu? Dinara waya nimu kang manga anak ga manga binihag sa girahan. 27Hayga pinaumang nimu aku ag ginminan kawu unman may paalam? Nu magsabi lang kawu, paginanun mana niku kawu may kabayaan sa panab-anan karantahan ag pamakaransing hanggan alpa. 28Udyi lang waydi nimu aku pinakan-an rugar hampay maarkan niku kang manga laki hanggan manga anak bag-u sida ginminan. Balaw gid mayad inda kanmu binwat. 29May dahilan aku hampay buwatan niku kawu kadautan, nakan lang pinaandaman aku kis-ab yabi Diyus nimu ama kuntay danga niku kawu pagbuwati daut. 30Alam niku magkaibug yi gid kawu muli. Dapat hayga tinakaw nimu kang manga diyus-diyusan?”
31Sinmagut si Hakub, “Unman aku namaalam sa kanmu dahil magkadala aku barang bawiun nimu sa kangku kanmu manga anak. 32Dapat nu tungkul sa kanmu nadura pag manga diyus-diyusan, nu makitan nimu inda una sa kantapu sa kanmi, parusahi siya kamatayan. Sa atubangan nita manga katawuhan bilang manga kastigus, bantayi nimu nu may imaw kawu magkaapu atay sa kanmi, ag nu may imaw bul-a nimu.” Unman alam ni Hakub si Rakil maaw ti nagbuul manga diyus-diyusan ni Laban.
33Nakan linigaw ngani ni Laban kay manga diyus-diyusan sa turda ni Hakub, sa turda ni Liya, hanggan sa turda duwa ka suruguun babayi manga asawa ni Hakub. Dapat unman niya nakitan tunda. Igu linmuwas siya sa turda ni Liya, sinmulud siya sa turda ni Rakil. 34Dapat itinagu yi ni Rakil ti manga diyus-diyusan sa panhampilu sa kamilyu, bag-u kay tinukawan inda. Linigaw ni Laban ti manga diyus-diyusan sa turda ni Rakil dapat unman niya inda mag-akitan.
35Magkun si Rakil sa kanya, “Amang, danga duy kawu magkaisug nu unman aku makatindug dahil magkadugu aku.” Ag parargu di gid maghanap si Laban dapat unman niya mag-akitan kay manga diyus-diyusan.
36Unman yi magkapigilan ni Hakub kay isug, nakan magkun siya sa kan Laban, “Hintay lugud pag kadautan kang nabwat sa kanmu ag linagas waya nimu aku? 37Hinakwat yi nimu ti tanan kasiyunan niku, may nakitan aw kawu kanmu magkaapu? Nu may imaw, paulian sitaay sa atubangan hampay makitan niku manga katawuhan hanggan nimu katawuhan, ag bahala yi sida maghusay sa kanta. 38Sa sulud duwapulu ka timpu katpung ati aku sa kanmu, una di unman may nalunas sa kanmu manga kambing hanggan karanidu. Ag una di usa ka lalaki karanidu unman aku nagpanghas mangaun. 39Unman yi niku pagdarahun sa kanmu ti manga hayup minatay maisug pag hayup; pag-ilisan wadi rargu niku inda. Pagpabayadun diman nimu aku sa manga tinakaw pag hayup sirang man ngatay sa yabi. 40Kaindaay kang kahamtangan: Nu sirang mag-agwanta aku sa init, ag nu sa yabi mag-agwanta aku sa ramig. Ag pirmi kurang kang turug. 41Sa sulud duwapulu ka timpu sa kang mag-ulian sa kanmu, 14 timpu aku nagsirbi sa kanmu para sa duwa nimu ka anak babayi. Nagsirbi waya aku unum ka timpu hampay bantayan kanmu manga hayup. Dapat hintay kanmu binwat? Sampulu ka ulit nimu binag-u ti pagbayad nimu sa kangku. 42Nu balaw siguru aku giniyahan Diyus, ti paggalangun niku ama, ni Isaak, imaw diman ti Diyus ni Abraham, barang tinulak yi nimu aku unman may kadara-dara. Dapat nakitan Diyus kang pag-agwanta hanggan magtarabahu, nakan pinaandaman niya kawu kis-ab yabi.”
Ti Kasunduan ni Hakub ag ni Laban
43Sinmagut si Laban, “Tunda pag manga babayi kangku pag anak, ag kanda manga anak kang manga laki. Tunda pag manga hayup kangku diman. Tanan mag-akitan nimu kangku. Dapat taynguna, unu waya kang mabuwat sa kang manga anak hanggan manga laki? 44Ti mayad siguru, bumuwat kita kasunduan. Manpatindug kita batu pumaalaala sa kanta ag pumatutuu sa kanta kasunduan.”
45Nakan binmuul si Hakub daka pag batu ag ipinatindug niya inda bilang alaala. 46Bag-u sinugu niya kay manga katawuhan pagtumpuk manga batu ati sa kay ipinatindug pag batu. Ag nangaun sida ati sa may tinumpuk manga batu. 47Iningarnan ni Laban ti tinumpuk manga batu Higar Sahaduta.#31:47 Higar Sahaduta: Kay ibug sabihun inda sa bagaw Aramiku, tumpuk bilang patutuu. Dapat pinangaranan inda ni Hakub Gal-id.#31:47 Gal-id: Kay ibug sabihun inda sa bagaw Hibriyu, tumpuk bilang patutuu.
48Sinabi ni Laban, “Inda pag manga batu matumpukan ti pumatutuu sa kasunduan nita duwa.” Inda kay dahilan nu hayga iningarnan Gal-id. 49Iningarnan diman tunda Mispa,#31:49 Mispa: Kay ibug sabihun, bantayaw. dahil magkun waya si Laban, “Mana giyahan kita Panginuun sa kanta pagbululagan. 50Ag nu balaw mayad kanmu magpakiusa sa kang manga anak, ngatay man-asawa waya kawu iba, alalahana nimu una unman niku inda alam, ti Diyus ti pumatutuu sa kanta kasunduan.”
51Magkun waya gid si Laban sa kan Hakub, “Indaay ti manga batu matumpukan hanggan ti alaala pag batu pumatutuu sa kanta kasunduan. 52Inda pag manga batu matumpukan hanggan alaala pag batu imaw ti pumatutuu sa kanta kasunduan kuntay balaw aku lumampas sa inda pag batu hampay girahun kawu, ag unman diman kawu lumampas sa inda pag manga tinumpuk batu hanggan sa alaala pag batu hampay girahun aku. 53Mana ti Diyus nimu laki ni Abraham hanggan ti Diyus niku ama ni Nahur, imaw diman ti Diyus nida ama ni Tira, imaw ti humusay sa kanta duwa.” Nansumpa diman si Hakub sa kan Laban sa ngaran Diyus paggalangun niya ama ni Isaak. 54Naghandug hayup si Hakub ati sa bantud, ag tinawagan niya kay manga katawuhan hampay mangaun. Igu yabi, ati sida pag naturug sa bantud.
55Igu sa sunud pag sirang, maaga waya hinagkung ni Laban ag pinapaladan kay manga anak hanggan manga laki, bag-u nuli yi siya.
Currently Selected:
Gimpuunan 31: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
