Gimpuunan 32
32
Nag-alistu si Hakub sa kay Pagpakabta sa kan Isaw
1Habang maglakaw sida ni Hakub, sinulang siya manga anghil Diyus. 2Igu nakitan sida ni Hakub, magkun siya, “Manga sundalu inda Diyus.” Nakan iningarnan niya Mahanaim#32:2 Mahanaim: Kay ibug sabihun, duwa ka gurupu manga sundalu. tunda pag rugar.
3May manga sinugu si Hakub pag-una sa kanya hampay manpakabta sa kay patar-ari, sa kan Isaw ati sa daga Siir, ti pag-ingarnan diman Idum pag rugar. 4Tinudluan niya sida nu hintay kanda sabihun sa kan Isaw. Magkun si Hakub, “Sabiha niyu sa kan Isaw: Aku si Hakub ti pinakaababa pag manugsirbi nimu, dugay aku nangulian sa kan Laban ag unman waya aku nakauli tugka taynguna. 5Ag sabiha niyu sa kanya kuntay may manga baka aku, manga asnu, karanidu, kambing hanggan manga suruguun lalaki ag babayi. Sabiha niyu sa kanya kamu kang sinugu hampay hilingun sa kanya ti mayad pag pakiusa niya sa kangku.”
6Igu binmalik ti manga sinugu ni Hakub, magkun sida, “Naatihan yi duy nimi si Isaw, ag ataytabug yi siya hampay kawu kay sulangun. May kaibahan siya 400 lalaki.”
7Magkadala yi gid si Hakub ag magkaarimputu, nakan tinunga niya sa duwa ka gurupu kay manga kaibahan hanggan kay manga karanidu, baka, kambing ag kamilyu. 8Dahil mag-isip siya barang nu rumas-ug si Isaw ag girahun ti usa ka gurupu, makapalagiw di kay usa ka gurupu.
9Nandarangin si Hakub, “Diyus niku laki ni Abraham ag Diyus niku ama ni Isaak, kawu duy ti Panginuun ti magkumun sa kangku pagbalik aku sa kang manga katawuhan, ati sa daga nu naan aku pag iinanak, ag papaladan nimu aku. 10Balaw duy aku karapat-dapat mantanggap tanan kaayadan ag katapatan kanmu ipinakakit sa kangku, sa kanmu manugsirbi. Dahil katpung nandipay aku sa Hurdan, unman duy aku may iba dara nu unman sugkud lang, dapat taynguna may duwa ka gurupu yi duy aku ka kaibahan. 11Paghagadun niku sa kanmu ribrihan nimu aku sa kang patar-ari, sa kan Isaw. Magkadala duy aku barang umataytag siya ag matyun kami hanggan yi kang magtal-anakan. 12Dapat nagtaratu kawu sa kangku papaladan nimu aku ag payamuun nimu kang manga linahi ga baras sa baybay dagat dayu mabilang.”
13Pagka yabi, ati sida ni Hakub pag naturug. Igu surip, nagpili manga hayup si Hakub kay ipakaun sa kan Isaw: 14200 babayi kambing ag 20 ka lalaki kambing, 200 babayi karanidu ag 20 ka lalaki karanidu, 1530 ka ina kamilyu pagbul-an gatas kaibahan waya kay manga anak, 40 ka babayi baka ag 10 ka tudu, 20 ka babayi asnu ag 10 ka lalaki asnu. 16Ginurupu ni Hakub ti manga hayup, ag ti kada gurupu may suruguun magbantay. Magkun siya sa kay manga suruguun, “Pag-una kamu sa kangku, ag paglakaw kamu may tab-anan ti kada gurupu.”
17Magkun siya sa manga suruguun magbantay sa un-an pag gurupu, “Nu masulang niyu si Isaw ag magpaingana siya nu kantapu kamu pag suruguun ag nu naan tabug kamu, ag nu kantapu pag hayup kanyu dara, 18saguta niyu siya kuntay kangku tunda pag manga hayup, pakaun niku tunda sa kanya. Sabiha diman niyu sa kanya magdasun aku sa kanyu.”
19Katida diman kay sinabi sa ikadwa, sa ikatlu hanggan sa tanan suruguun kaibahan manga hayup. 20Ag pinaandaman niya sida danga magkalimut magsabi sa kan Isaw kuntay magdasun siya sa uryan. Magkumun si Hakub sa kay sadili, “Pakan-an niku si Isaw manga pamakaun inda kang ipauna. Ag nu mansarampakan kami, barang patawadun yi niya aku.” 21Nakan pinauna ngani niya ti manga pamakaun, dapat napatayak siya sa tunda katpung pag yabi ati sa kanda pinat-ungan.
May Nandumug sa kan Hakub sa Pinwil
22Tunda katpung pag yabi, binmangun si Hakub ag ikinuyug kay duwa ka asawa, ti duwa ka suruguun niya babayi, ag ti 11 ka anak niya, bag-u ipinadipay sida sa Sapa Habuk. 23Ipinadipay diman ni Hakub ti tanan manga kasiyunan niya. 24Igu usa-usa wadi siya, may rinmas-ug usa ka lalaki ag nandumug sa kanya. Nandurumugan sida sadsad gid surip. 25Pagka magkapansin niya balaw magkatalu si Hakub, pinildis niya kay baliw-ang ni Hakub ag naliw-as ti magkatupad pag but-ul. 26Magkun ti tawu, “Bul-iwi yi nimu aku dahil magkasurip yi.”
Dapat sinmagut si Hakub, “Balaw niku kawu bul-iwan tugka sa unman nimu aku pagpapaladan.”
27Nagpaingana ti tawu sa kanya, “Hintay kanmu ngaran?”
Sinmagut siya, “Hakub duy.”
28Magkun ti tawu, “Kainda ginan balaw yi Hakub kanmu ngaran nu unman Israil#32:28 Israil: Kay ibug sabihun, nanlaban sa Diyus. yi dahil nandumug kawu sa Diyus hanggan sa manga tawu, ag kawu nanalu.”
29Nagpaingana diman si Hakub sa kanya, “Sabihan diman nimu sa kangku kanmu ngaran.”
Dapat sinmagut ti tawu, “Danga yi pag paingan-a kang ngaran.” Bag-u kay pinapaladan ati si Hakub.
30Iningarnan ni Hakub tunda pag rugar Pinwil,#32:30 Pinwil: Kay ibug sabihun, uyahun Diyus. dahil magkun siya, “Nakitan niku ti uyahun Diyus dapat buhi di aku.”
31Magsinggit yi ti init kay magginan ni Hakub ginan sa Pinwil. Mag-ikang wadi siya dahil naliw-as kay but-ul sa baliw-ang. 32Inda kay dahilan nu hayga tugka taynguna ti manga Israilita unman magkaun kusug sa magkatupad pag but-ul sa baliw-ang hayup. Dahil siyun katpung pag pinildis Diyus si Hakub.
Currently Selected:
Gimpuunan 32: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
