Gimpuunan 33
33
Ti Pagkarabtaan ni Isaw ag ni Hakub
1Pagka namantay si Hakub, nakitan niya si Isaw magras-ug kaibahan ti 400 lalaki. Nakan ipinakuyug niya ti manga anak sa kanda ina. 2Ipinauna niya ti duwa ka suruguun babayi hanggan kanda manga anak, dinmasun si Liya hanggan kay manga anak, bag-u si Rakil ag kay anak si Husi. 3Si Hakub sa kanda tanan unahan ag pitu ka ulit siya nagluhud habang magpakarani sa kay patar-ari.
4Dapat nalagiw si Isaw hampay sulangun siya. Hinagkung siya ni Isaw ag inarkan, bag-u nanlulumian sida duwa. 5Igu nakitan ni Isaw ti manga babayi hanggan ti manga anak, nagpaingana siya sa kan Hakub, “Si unu tunda kanmu iba?”
Sinmagut si Hakub, “Sida kang manga anak ti ipinakaun Diyus sa kangku dahil sa kay pangaawa.”
6Susun napakarani sa kan Isaw ti duwa ka suruguun babayi hanggan ti manga anak nida, ag napayuk-ub sida bilang paggalang sa kanya. 7Dinmasun diman si Liya hanggan kay manga anak ag yinmuk-ub. Ti uryan dinmulud ag nagyuk-ub si Husi hanggan kay ina si Rakil.
8Nagpaingana waya si Isaw sa kan Hakub, “Hintay kay ibug sabihun manga gurupu hayup kang nasulang?”
Magkun si Hakub, “Pakaun niku tunda sa kanmu hampay tanggapun nimu aku.”
9Dapat nagsagut si Isaw, “Patar-ari niku, mayamu yi kang manga kasiyunan, nakan sa kanmu lang tunda.”
10Dapat magpilit gid si Hakub, “Tanggapa yi gid duy nimu tunda. Nu ungud ngani pinatawad yi nimu aku, tanggapa kang pakaun sa kanmu. Dahil igu nakitan niku kanmu uyahun, naungdan niku kanmu pagtanggap sa kangku, ga nakitan diman niku ti uyahun Diyus. 11Tanggapa yi duy kang pakaun sa kanmu dahil mayad gid ti Diyus sa kangku ag balaw aku kinurang sa kang manga pangangailangan.” Pinilit ni Hakub si Isaw tugka sa tinanggap yi lang ni Isaw kay manga pamakaun.
12Pagkatapus, magkun si Isaw, “Abala yi, dungan yi kita man-ginan.”
13Dapat sinmagut si Hakub, “Alam duy nimu malumuy maglakaw ti manga anak, ag kailangan niku alagaan kaayad ti manga magpasusu pag manga hayup. Nu pilitun nita ti manga hayup paglakaw sa buu sirang, barang mamatay sida. 14Ti mayad waya, pag-una yi lang kawu sa kanmi. Dumasun kami sa kanmu angay sa bisug manga anak hanggan manga hayup kaibahan nimi. Ati yi lang kita magsampak sa Siir.”
15Magkun si Isaw, “Nu katida, tayakan yi lang niku sa kanmu kang iba ka manga tawuhan.”
Nagsagut si Hakub, “Balaw yi kailangan. Ti mahalaga tinanggap nimu aku.”
16Nakan binmalik yi lang ngani si Isaw sa Siir sa tunda diman pag sirang. 17Dapat sida ni Hakub nag-ati sa Sukut. Igu rinmas-ug sida ati, nagbuwat si Hakub ulian ag nagbuwat diman siya parasirngan manga hayup niya. Nakan tunda pag rugar iningarnan Sukut.#33:17 Sukut: Kay ibug sabihun, parasirngan.
18Ud dinmugay, nakaras-ug diman sida sa Kanaan ginan sa Padan Aram unman may daut nangyari sa kanda. Nakaras-ug sida sa banwa nu naan pag mag-uli si Sikim. Nagpatindug sida kanda manga turda sa arani banwa. 19Ti pinatindugan nida turda pag daga binili ni Hakub sa manga anak ni Hamur sa halaga 100 bilug pilak. Si Hamur kay ama ni Sikim. 20Nagbuwat si Hakub harandugan kay iningarnan Il Iluhi Israil.#33:20 Il Iluhi Israil: Kay ibug sabihun, Makamaskihan pag Diyus ni Israil.
Currently Selected:
Gimpuunan 33: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
