Huwan 9

Pinaayad ni Hisus ti Tawu Buta

1Sa kay maglakaw ni Hisus, may nakitan siya usa ka lalaki buta. Ginan waya sa kay pagkaanak daan buta siya. 2Pinmaingana kay manga tuludluan magkun, “Maisturu, si unu nguna ti nagkasala nakan iinanak siya buta, ngatay siya ti nagkasala aw ngatay kay gurang?” 3Sinmagut si Hisus magkun, “Balaw sa nagkasala duy una inda pag tawu una kay gurang. Nakan siya iinanak buta hampay mipaburayhaw ngap sa panab-anan niya ti manga buwat Diyus. 4Ti Ama ti nagsugu sa kangku, nakan hanggan may sirang waya kailangan tupadun nita ti buruwatun niya. Nu bay yabi yi aban, udyi may makabuwat una si unu pag tawu. 5Nu aku sitay waya sa babaw daga, aku tigpakaun karayawan sa manga tawu sa kalibutan.”

6Pagka sinabi ni Hisus katida, nagbuga siya sa daga, pinalutuk niya ti buga bag-u kay ipinayid sa mata tawu buta. 7Bag-u kay sinabi niya magkun, “Pag-ati duy kawu pag-iram-us sa may pararigsan sa Siluam.” (Tunda pag bagaw Siluam kay kahulugan sinugu.) Nag-ati ngani ti tawu buta nangiram-us. Pagka siya binmalik, maghiling yi siya.

8Nakan naglingut gid kay manga kamalay hanggan ti manga tawu nakakit sa kanya kaybi maghagad kay pangailangan. Magkun sida, “Balaw aw inda pag tawu ti matukawan kaybi magpakahagad kay pangailangan?” 9Sinabi manga iba magkun, “Imaw yi ngani.” Magkun ti manga iba, “Bukun imaw, nagkaparihu lang sa kanya kay uyahun.” Bag-u sinabi niya magkun, “Aku yi ngani ti buta kaybi.” 10Pinmaingana sida sa kanya magkun, “Kabitay duy ti nangyari, maghiling yi taynguna kanmu mata?” 11Sinmagut siya magkun, “Ti tawu kanda pagkumnun si Hisus nagbuwat lutuk bag-u kay ipinayid sa kang mata bag-u sinabi niya sa kangku, ‘Pag-ati duy kawu sa Siluam, pag-iram-us kawu.’ Inmati ngani aku nag-iram-us. Pagka aku nakairam-us, naghiling yi kang mata.” 12Pinmaingana ti manga tawu sa tawu buta kaybi magkun, “Naan tag ati si Hisus?” Sinmagut siya magkun, “Tau duy nu naan tag siya.”

Nag-usisa ti manga Parisiyu kay Nagpaayad sa Tawu Buta

13Bag-u kanda dinara atag sa manga Parisiyu tunda pag tawu buta kaybi. 14Sa Sirang Pamahari pag nagbuwat lutuk si Hisus kay nagpaayad sa tawu buta. 15Nakan nagpaingana waydi ti manga Parisiyu sa kanya nu kabitay hinmiling kay mata. Bag-u itinultul niya sa kanda magkun, “Pinayidan niya lutuk kang mata, bag-u aku nangiram-us. Pagka aku nakairam-us, maghiling yi aku.” 16Ti iba Parisiyu magkun, “Balaw ginan sa Diyus tunda pag tawu ti nagbuwat katida, dahil maglabag siya sa Kasuguan tungkul sa Sirang Pamahari.” Dapat sinabi maan manga iba magkun, “Kabitay pag makabuwat ti tawu katunda pag manga makadululaw, nu siya makasalanan?” Nakan magkabululag kanda naisipan tungkul sa kan Hisus.

17Nakan namaingana maan ti manga Parisiyu sa tawu buta kaybi magkun, “Kanmu sabi siya ti nagpaayad sa kanmu mata. Kabitay kanmu magkilala sa kanya?” Sinmagut ti tawu magkun, “Purupita duy siya.” 18Ti manga pinunu Hudiyu unman naniwala kuntay tunda pag tawu kaybi buta bag-u maghiling yi taynguna. Pagka dugay nagpasugu sida hampay bul-un kay manga gurang tunda pag tawu. 19Bag-u pinmaingana sida sa kay manga gurang magkun, “Inda aw duy kanyu anak ti kanyu pagsabihun iinanak buta? Kabitay duy pag maghiling siya taynguna?” 20Nagsagut kay manga gurang magkun, “Alam duy nimi inda kanmi ngani anak. Tutuu gid siya iinanak buta. 21Dapat unman nimi alam nu kabitay pag maghiling siya taynguna. Unman diman nimi alam nu si unu pag tawu ti nagpaayad sa kay mata. Paingan-a duy niyu siya. May idad yi siya, bahala siya magsagut.” 22Nakan katida ti binagaw manga gurang niya, dahil magkadala sida sa manga pinunu Hudiyu magkun nu may tawu magsabi si Hisus ti Pinili Diyus Manugribri pag Hari, siya ipalwas ginan sa simbahan manga Hudiyu. 23Nakan ngani sinabi manga gurang tawu buta kaybi magkun, “May idad yi siya, paingan-a duy niyu siya.”

24Bin-ul maan nida kadwa ginan ti tawu buta kaybi. Bag-u sinabi nida sa kanya magkun, “Sabiha yi nimu ti katutuuhanan sa atubangan Diyus. Alam gid nimi makasalanan tunda pag tawu ti nagpaayad sa kanmu.” 25Nagsabi siya magkun, “Unman duy niku alam nu ngatay makasalanan siya. Inda lang ti magkaalaman niku, madi kaybi aku buta, taynguna maghiling yi aku.” 26Nagpaingana maan sida magkun, “Hintay kay binwat niya sa kanmu? Kabitay pag pinaayad niya kawu sa kanmu pagkabuta?” 27Sinmagut maan siya magkun, “Itinultul yi niku tunda sa kanyu, dapat unman kamu naniwala. Hayga gustu maan niyu maalaman nu hintay ti nangyari? Gustu aw lugud kamu tuludluan waydi niya?” 28Pagka katida kay sinabi tawu buta kaybi, pinuya siya manga pinunu Hudiyu. Sinabi nida sa kanya magkun, “Kawu baga kay tuludluan yi ngap tunda pag tawu. Kami bay tuludluan di ni Muysis. 29Alam nimi ti Diyus nagbagaw sa kan Muysis. Dapat nu tunda bay pag tawu, unman nimi alam nu taga naan siya.”

30Sinabi tawu buta kaybi magkun, “Nakan aku maglingut sa kanyu, unman niyu alam nu taga naan siya, dapat siya ngapu ti nagpaayad sa kang buta. 31Alam nita ti Diyus unman magpatingi sa tawu nu siya makasalanan. Dapat nu ti tawu magsamba sa Diyus ag magtupad sa kay kagustuhan, pihu gid patingihan Diyus. 32Ginan waya sa pagkalalang kalibutan unman may naalaman kuntay may tawu pinmaayad sa tawu iinanak buta. 33Unman diman may mabuwat tunda pag tawu purya lang nu siya ginan sa Diyus.” 34Sinabi maan manga pinunu Hudiyu sa kanya magkun, “Lubus yi lang kawu makasalanan ginan waya sa kanmu pagkalusad, bag-u kawu aw lugud ti tumudlu waya sa kanmi?” Bag-u kanda ipinalwas siya ginan sa kanda simbahan.

Ti manga Unman Maghiling sa kay Kaayadan Panginuun

35Nabaritaan ni Hisus ipinalwas ngani manga pinunu Hudiyu ti tawu buta kaybi ginan sa kanda simbahan. Nakan hinanap siya ni Hisus. Bag-u pinmaingana si Hisus sa kanya magkun, “Magsarig yi aw kawu sa Anak Tawu?” 36Sinmagut siya magkun, “Sabiha duy nimu nu si unu siya hampay aku sumarig sa kanya.” 37Sinabi ni Hisus sa kanya magkun, “Nakitan yi duy nimu siya, dahil aku ngani tigbagaw sa kanmu kainda imaw yi ngani ti Anak Tawu.” 38Sinabi niya sa kan Hisus magkun, “Magsarig aku duy, Panginuun.” Bag-u siya nagluhud sa atubangan ni Hisus.

39Sinabi ni Hisus magkun, “Nagsitay aku sa kalibutan hampay sintinsiyahan niku ti kasalanan manga tawu, hampay ti manga buta humiling yi, ag ti manga maghiling bumaliw ngap ga buta.” 40May manga Parisiyu diman ati sa kan Hisus nakadnug diman sa kay binagaw. Pinmaingana sida sa kanya magkun, “Balaw nguna kanmu gustu sabihun kuntay kami hanggan buta?” 41Sinmagut si Hisus magkun, “Nu abi kamu manga buta unman mana kamu may kasalanan. Dapat taynguna kanyu pagsabihun magkun, ‘Kami maghiling’, nakan unman mab-ul kanyu kasalanan.”

Currently Selected:

Huwan 9: HNN

Highlight

Copy