Lukas 23

Si Hisus sa Atubangan ni Pilatu

(Mat. 27:1-2; 27:11-14; Mk. 15:1-5; Hu. 18:28-38)

1Pagka nakatapus kanda pululungan nagtindug sida tanan-tanan, dinara nida si Hisus sa atubangan ni Gubirnadur Pilatu. 2Bag-u kanda isinumbung si Hisus magkun, “Naalaman nimi inda pag tawu magpan-gulu sa kanmi nasyun. Magbawal siya sa magbayad buhis tag sa Pangulu Hari. Pagsabihun niya siya yi ngani ti Pinili Diyus Manugribri pag Hari.” 3Pinaingana siya ni Pilatu magkun, “Kawu aw ti Hari manga Hudiyu?” Sinmagut si Hisus, “Kawu yi waydi ti magsabi kuntay aku ngani.”

4Sinabi ni Pilatu sa manga pangulu manughandug hanggan sa kayamuan tawu siyun magkun, “Unman may nakitan aku kasalanan sa inda pag tawu.” 5Dapat lalu ngap pag-ipalugus nida kanda sumbung sa kan Pilatu magkun, “Magpan-gulu kay tudlu sa bilug Hudiya, ginan sa Galiliya hanggan sitay tugka sa Hirusalim.” 6Pagka nadnugan ni Pilatu pinaingana niya ngatay taga Galiliya inda pag tawu.

7Pagka naintindihan ni Pilatu kan Hirudis nasakupan si Hisus, ipinadara niya si Hisus sa kan Hirudis. Ati katpung pag panahun siyun diman waydi sa Hirusalim si Hirudis. 8Pagka nakitan ngani ni Hirudis si Hisus lalu gid nagbaya siya. Dahil dugay yi magtagakabtai siya sa kan Hisus. Dahil nakaalam si Hirudis sa kan Hisus ag maggagad siya sa makitan niya ti manga makadululaw pag buwat niya. 9Mayamu kan Hirudis paingana sa kan Hisus dapat siya unman nagsagut una di. 10Ti manga pangulu manughandug ag ti manga manugtudlu Kasuguan nagtindug bag-u mahigpit masyadu kanda pagsumbung sa kan Hisus. 11Minsan sa kan Hirudis kay manga sundalu inurug nida si Hisus, kanda hinangalhangal. Kanda pinabistihan marinu pagka rutay bag-u ipinabalik siya tag kan Pilatu. 12Tunda ginan pag sirang nagmalahalan yi sida ni Hirudis ni Pilatu. Dahil kaybi ginan daan di sida magkalagalitan.

Nasintinsiyahan si Hisus sa Kamatayan

(Mat. 27:15-26; Mk. 15:6-15; Hu. 18:39; 19:16)

13Pinatipun ni Pilatu ti manga pangulu manughandug, ti manga pinunu hanggan ti tanan banwa Hirusalim. 14Sinabi niya sa kanda magkun, “Ipinabahala niyu inda pag tawu sa kangku, idinimanda niyu sa kangku kuntay siya magpan-gulu sa manga tawu. Pagka inusisa niku siya sa kanyu atubangan, unman may mag-akitan aku kasalanan sa kanya tungkul sa kanyu manga dimanda laban sa kanya. 15Unman gid, una waya si Hirudis unman may nakitan kasalanan sa kan Hisus. Dahil pinabalik maan siya ni Hirudis tag sa kanta. Unman duy dapat siya matyun, unman may kasalanan. 16Siya kang lang ipagaruti bag-u kang palpasan maan.” 17Sa katpung Kapistahan sa Pag-alaala sa Karibrihan kailangan ngani kay usa ka pirisu ipalpas ni Pilatu.

18Dapat sida tanan-tanan namaragritan ngapu magkun, “Matya yi gid tunda. Si Barabas ti palpasi lang nimu!” 19Pinirisu si Barabas dahil siya ti nag-arburutu laban sa gubirnu, naglibun waya siya tawu. 20Nagbagaw maan si Pilatu sa kayamuan dahil kay gustu mana palpasan si Hisus. 21Dapat sida nanriringgitan magkun, “Ipaku sa kurus. Ipaku siya sa kurus!”

22Katlu ginan namaingana si Pilatu sa kanda, “Hayga duy hintay pag kadautan ti binwat inda pag tawu? Unman aku may nakitan kasalanan sa kanya sa ikamatay niya. Ipagaruti niku siya bag-u kang palpasan.” 23Dapat unman nag-apas kanda paragritan, kanda gustu ipaku gid si Hisus sa kurus. Daug si Pilatu sa paragritan kayamuan tawu. 24Pinasibut-an yi lang niya ti kagustuhan nida. 25Pinalpasan yi ngani niya si Barabas imaw kanda hinagad pag pirisu. Pinirisu dahil sa pag-arburutu hanggan sa kay naglibun tawu. Dapat ipinabahala ni Pilatu si Hisus sa kanda hampay una hintay kanda gustu buwatun sa kanya.

Si Hisus Ipinaku sa Kurus

(Mat. 27:32-44; Mk. 15:21-32; Hu. 19:17-27)

26Pagka dinara nida si Hisus hampay siya ipaku sa kurus, nasulang nida ti usa ka tawu kay ngaran si Simun taga Sirini. Kanda tinawidan bag-u ipinapas-an sa kanya ti kurus hampay daran-un sa kan Hisus uryan. 27Nagkuyug sa kan Hisus ti kadamlan tawu ginan sa banwa hanggan manga babayi maglulumian magwarawawan dahil sa kanya. 28Dapat nag-aliwliw si Hisus sa kanda bag-u magkun, “Kamu pag manga babayi taga Hirusalim danga aku kanyu lumian. Kanyu lumian ngap kanyu sadili hanggan kanyu manga anak. 29Dahil rumas-ug aban ti sirang sumabi ti manga tawu magkun, ‘Mayad waya ti manga babayi unman nagkaanak, ti unman nakalakaw panhinganak, ti manga unman may pag-alagaan lapsag.’ 30Ati katpung pag manga sirang sumabi ti manga tawu sa manga bantud, ‘Tabuni kami!’ Ag sa manga tagudtud, ‘Rup-agi kami!’#23:30 Bantayi diman ti Husyas 10:8. 31Dahil nu inda kanda pagbuwatun sa puun kayu buhi unman aw mas lalu makuri ti mangyari sa manga nalayung?”

32May dinara waya sida duwa ka tulisan agud matyun dungan kan Hisus. 33Pagka rinmas-ug sa bantud kay ngaran Barut Ulu, kanda ipinaku siya ati sa kurus, bag-u ipinaku waydi ti manga tulisan, ti usa sa wala baliwa pag kurus, ti usa sa sikun baliwa. 34Sinabi ni Hisus, “Amang, patawada duy nimu sida, dahil unman nida alam kanda pagbuwatun.” Bag-u kanda inayaw-ayaw kay manga rutay ni Hisus, kanda waya alinaban sa lunggungan.

35Matindugan magbantay ti manga tawu taga banwa. Paghangal-hangalun siya manga pinunu magkun, “Irinibri niya ti manga iba, ribrihan waydi niya kay sadili bilug, nu ungud siya ti Pinili Diyus Manugribri pag Hari.”

36Pagsurugun diman siya manga sundalu, nagpakarani sida sa kanya, binwatan lawganan tinur-ug tabug sa tungud pinasupsup sa kan Hisus ti bahal intus. 37Magkun sida, “Nu kawu ungud ti Hari manga Hudiyu, ribrihan nimu kanmu sadili bilug.” 38Sa kay tungud ulu may surat magkun, “Inda ti Hari manga Hudiyu.”

39Pinuyaan diman siya usa ka tulisan mabitinan sa kurus magkun, “Kuntay kawu yi ngani ti Pinili Diyus Manugribri pag Hari, ribrihan yi nimu kanmu sadili hanggan kami.” 40Dapat sinmungyaw kay usa ka tulisan magkun, “Unman aw waya lugud kawu maggalang sa Diyus? Parihu kita nasintinsiyahan. 41Nu sa ungud tama inda pag sintinsiya sa kanta kasalanan. Inda kita magbayad yi lang sa kanta binwat. Dapat inda pag tawu unman may binwat una hintay pag kadautan.” 42Bag-u sinabi niya magkun, “Alaalaha nimu aku, Hisus, nu kawu bumalik aban maghari yi.”

43Magkun si Hisus sa kanya, “Ungud duy kang pagsabihun sa kanyu, taynguna yi ngap pag sirang sab kawu kang kaibahan sa ulian manga may buhi unman may katapusan.”

Ti Pagkamatay ni Hisus

(Mat. 27:45-56; Mk. 15:33-41; Hu. 19:28-30)

44Pagka udtu yi ti init nagdulum sa bilug kalibutan hanggan tugka palis ti init. 45Nagisi sa karaw-an ti limbun rutay sa Balay Diyus. 46Nagtawag laun si Hisus magkun, “Amang iintirga yi niku kang buhi sa kanmu kamang.”#23:46 Bantayi diman ti Kanta 31:5. Pagka sinabi niya katida, naugtasan siya arup.

47Pagka nakitan kapitan sundalu ti nangyari, dinayaw gid niya ti Diyus, magkun, “Tutuu matadlung gid inda pag tawu.”

48Ti manga kayamuan tawu nagtiripun gid nanuud. Pagka nakitan nida ti manga nangyari, nuli sida nagtaptap sa kanda dubdub dahil sa kanda karukuan. 49Tanan manga kakilala ni Hisus hanggan ti manga babayi kay kaibahan ginan sa Galiliya, nagtindug ginan sa arayu namantay sa nangyari sa kan Hisus.

Kay Naglubung sa kan Hisus

(Mat. 27:57-61; Mk. 15:42-47; Hu. 19:38-42)

50-51May usa ka lalaki kay ngaran si Husi taga Arimatiya, banwa sakup Hudiyu. Mayad siya paggalangun manga tawu ag mag-alagad paghari Diyus. Madi siya usa waydi ka pinunu unman siya nagpasnu sa harampangan Katipunan manga Pinunu hanggan sa kanda binwat sa kan Hisus. 52Nag-ati si Husi tag sa kan Pilatu, hinagad niya ti bangkay ni Hisus. 53Bin-ul niya kay bangkay ni Hisus ginan sa kurus bag-u kay sinaput sa pisahan rutay bag-u kay ipinauli sa tinigiban batu udwaya napaulian bangkay. 54Ati katpung sa Biyarnis pag sirang, arani yi Sirang Pamahari.

55Ti manga babayi ti nagkuyug sa kan Hisus ginan sa Galiliya, nagkuyug sa kan Husi nanduaw sa tinaguktukan batu, nu kabitay pag ipinauli ti bangkay. 56Nuli maan sida nag-alistu manga pamanglu, kay iba hampay iwaswas sa kay bangkay ni Hisus, kay iba hampay ihaplas. Nagpahari sida sa sirang Sabadu angay sa Kasuguan.

Currently Selected:

Lukas 23: HNN

Highlight

Copy