Lucas 13

Siuti ja ke aninekiajlayi pa Sinia' kia'iyo janojwa'yi

1Pak siupa jloma po' papo i'nio' ijioyi pa Jesús ti iyonisi 'ate:

—Pojompe papo i'nio' tal Galiléaja, siupapo iliajnen'ni puwa wakiajas, ti iyunitisieta pa Sinia'. Papok siupapo anechiyas Pilato takajlunie ka tilianaja'n, siupa ji'woyis tijlijnataja puwa wakiajas ji'woyis, siupuwa ilianisin'ni jlamis.

2Jesús isiujlie ti iyo'ate:

—¿Jijwelt'e ka jloski'la inka'm ape'e papo ijia yi'i japa jika ajnatis, ka nak int'emina ni jiwet'ia iyo? 3Ya'am awo'ate, ¡Jeyi! Jet'i 'wanjliyi siuti ja ke awoye asosikis ink'iejyisa', kiak jawoyeyi janojwa'yi. 4¿Ent'a jijwela' ka jitis inka'm ape'e siupapo i'nio' yiji japa Jerusalén, siupapo i'niot'ipi ti 'wuk siojopa toj pijia'm iliajne'n ti iniuyet'ipi ape'e, siupapo dieciochojimpe? 5Awo'ate, ¡Jeyi! Jet'i 'wanjliyi siuti ja ke awoye asosikis ink'iejyisa' ka apilieyi pi Sinia', kiak jawo'ojyi janojwa'yi.

Jesús yamtiyi siupa ti jla'm i'yejnap jiwekie'e japa higok

6Jesús kiak t'ipa iyoyeyipi ti yamtiyi siupa i'yejnap jiwekie'e:

—Pojompe pa i'nio' ti yikiaj'l isia'm puwa higok yi'i pa jiwasok, yam'ne pa i'nio' ti i'yentaja ka jla' poye, 'yina je i'wi'in kajeyepa ti je iyo jlaye. 7Iyonat'iyijpe 'ate siupa i'yena inwasok, “Najapejap'an kiwa najkapis ti apitieje'ni siujlie'e higok ka jla' pope, 'yina ka 'nakayeyi wata'a ka 'wi'in ka jla' poye. Jwajanie'e, ¿yot'iyi'ni ka jlam nak ne'yi'ni wek?” 8Siupa i'yena pa inwasok iyo'ne 'ate, ti isiujlie, “Ejlo'okiu wek naka'a, ka inekiamkiu wek siu'nie najkap. Jajyijlitena'a ka iwiets'ilat pijia'm ni ajnat, sekjane'yi ka iyoyejyinna'a paka ijlijnate ni ajnat. 9Ent'a ka jiwekie'ejana'a ka iwo jlaye. Siuti ja ke iwo jlaye, ijiatayijijna'a ka ajwaja.”#Is 5.1-7

Jesús yiniji japa jloma ti i'nio 'wanjlijyi'n ti ijwiejiet japa i'nioki

10Yit'iyipe japa jloma, ijyiwitajam'ni siojopa jloma ti i'nio 'wanjlijyi'n, Jesús taka'neyasa'n yi'i japa 'najla'wet. 11'Yina po' japa i'nioki ti jika najkapis dieciocho puwa yiji ti je 'es'ni, iyont'iyijipi siupa jiwet'ia ti je 'esiji ka ijna pijia'm, iyone jla'am siupa imosik ti yiji. 12Ti Jesús i'winayi, tanat'iyipi, sekyi'i iyonat'iyijpe 'ate:

—Jla'a i'nioki, jijwajyi ki iyo ki awet'ia.

13Jikioye yinatk'ipe ape'e, je yi' jlomayi ti 'esiet'ipi japa i'nioki, 'esieyiji ti tijna pijia'm. Sektaj'le ti iyunitiet'ipi pa Sinia'.

14Jlam'ne pet siupa tijna'yi japa 'najla'wet ti i'yena jwesie'ne, kajeyepa ti itiajlata pa Jesús ti yiniji japak jloma ti i'nio 'wanjlijyi'n ti ijwiejiet japa i'nioki. Sekyi'i iyone'ne 'ate papo i'nio':

—Siunapo iyojonk'iye kanjwajyi'n, ja ke inam'nipe ti yiyi siojona jloma ti i'nio 'wanjlijyi'n. Ijwienjli sikio' itij'we ijwienjli tom'niji jiwekie'e siuniwa jlomas 'esiji ka isimajajyi'n, niwak 'esiji ka nama'ni siunapo ti iyojyi'n ni jijwajieti.

15Saka'niona isiujlie ti iyo'ate:

—¡Sintijyisat'itie'ase'm! Siojona jloma ti i'nio 'wanjlijyi'n, ¿jilienajyi'ijyi niwa aslajwas wakiajas ti inkijmayewos, ni'ne ti malekiatiok pa, jloyeyi i'niate ti ji'yayina? ¿Mi ijiate? 16¿Tepi iyo pet siujlie'e i'nioki? Napok tajla'm pet siunapo Abraham jilis t'ipi, dieciocho niwa najkapis ti imosik iliaki ti ilie'nit, iyone ni jiliaye. ¿Jet'imi 'esiji pet ka tilienaja iyo ni jiwet'ia ti imosik iliaki, ka tenajaja janak jloma ti i'nio 'wanjlijyi'n?

17Ti kia'iyo pa Jesús, siupapo jikojwas 'yajwejlank'i wita'm. Siupapo i'nio' wikie'eyi pet ti inkase'n, ti i'winis siupi iyo pa Jesús, ti wuj ti 'es.

Jesús i'yejnap jiwekie'e japa mostaza jlo' ti taka'neyasa'n

(Mt 13.31-32; Mc 4.30-32)

18Jesús iyoyet'ipi'iji 'ate:

—¿Tent'i siupa 'yiniye ni Sinia' jika anechijiayas? ¿Tent'i siupa ka'yejnap, jla'm ijiate? 19Siunie Sinia' jika anechijiayas iyot'i 'ate jana mostaza jlo', janak a'yejnap, ti 'yutieta isia'm ni i'nio' yi'i ni jiwasok. 'Yina ti tekijlata, yamjli ti ijlias'ni pijia'm, paj ti je jlasiye jana a'la', ajwejnas iyoye jlopisieje ti yi'nik'i niwa jik'ase'l.

Jesús i'yejnap jiwekie'e pa woyejes ijliasat pijia'm ti taka'neyasa'n

(Mt 13.33)

20Kia'iyo Jesús iyoyet'ipi'iji 'ate:

—¿Tent'ipa ka'yejnap ni Sinia' jika anechijiayas? 21Nak a'yejnap na woyejes ijliasat pijia'm, ti isimataja jana i'nioki, isime ni inwakiwa mak, treinta kílojos ni siunie itieteje, naka'ne ni siunie ti ijliasat pijia'm, ti wakajlata ti 'yak'asaje.

'Wuk kiwet ti je k'isaja'm

(Mt 7.13-14,21-23)

22Ti Jesús yamat'ijyi ti teje 'niji yi'i jlaja Jerusalén, jlam 'yiyasanjlijyi'n papo i'nio' yijits'i puwa isi'il, jla'yi ti ijioyits'i puwa ji'wetis jilis papo i'nio', siupa iniu'we. 23Po' pa i'nio' ti i'yase'n ti iyo'ate:

—Inka'neyasajnawo, ¿jet'i 'loj siupapo tijwajyi'n?

Jesús iyone'ne 'ate papo i'nio':

24—Jwajla'a wata'a pa ka woyeyi, 'nakayijna'a ka akajlajyi ka 'oyeyi naka ni 'wuk kiwet ni je k'isaja'm. Jajwi'lase'm ti ja 'lojwa napo i'nio' ti jawo ka 'noyi nak 'wuk kiwet ti je k'isaja'm, 'wanjliyi ja ke inkajli ka 'noyisi. 25Paj ka inamana'a ni jikimet jana 'wuk, sekjane'yi ka imp'onajamna'a ni 'wuk kiwet. Asa'am ti ja in'wanjliye kisie'e, ja anayek'ina'a wita'm, jawoyena'a 'ate, “'Yaka'niona, 'ajlinit its'ioye.” Ka woyena'a pet 'ate ti jankiuj'liase'm, “Je sitiant'ie'ase. ¿Tepi jitiajlajyi?” 26Ka kiak awoyenie'e pet ti ja akiujlieyi, “Sampe ti akijwana ti ji'yekiu'n jla'yi ti ji'ya i'niati. Ampe ti jika'neyasa'n ti jlene si'wetits'ijk'i.” 27'Yina jankiuj'liase'm ti jawo'ate, “Pajk'i ti ajwe'laseme ti awo'ate, “Je sitiant'ie'ase. ¿Tepi jitiajlajyi?” ¡Tajlak'i'm, asa'am ti jiwoyeyi siunie je 'es!”

28“Siuti ja'wena' napo Abraham, jla'yi ni Isaac, jla'yi ni Jacob, siu'neje napo injwejlanawos wikie'eyi ti janejyi ni Sinia' jika anechijiayas, jlam'ne ti asa'am ja in'wanjliye kisie'e. Ja apayek'ina'a wita'm 'yaka ja wujwa ti ja a'tieja. 29Kajeyepa ti janam'ni siunapo i'nio' ti jantal 'niji wikinaja, siu'neje napo tal iniwuki, siu'neje napo jantal 'niji taj'le ni kilie', siu'neje napo tal 'niji 'yu'yi ni kilie', ti janikijwa'n ti jan'yekiujni'n yi'i ni Sinia' jika anechijiayas.

30“Jak je iyoyiji siunapo nak nojwaja'm, ti 'wanjlik'i isia'm siu'nie jloma, napok janank'iji'n pet, jlampet siunapo inian'ni siu'nie jloma, napok ja 'wanjliyek'iji pet isia'm.”

Jesús iyo jijliak'aliye ape'e japa Jerusalén

(Mt 23.37-39)

31Pak siupa jloma, 'nesat'i'nijpe siupapo ijia Fariséojos ti takajwejlanisia'm pa Jesús ti iyo'ate:

—'Nak ká a'yina'a. Herodes#13.31 Herodes siupa jlamt'iyijipe jlas paka, Herodes Antipas (13.31) iyo ka inla'an.

32Jesús isiujlie papoka ti iyonat'iyijpe 'ate:

—Maye'ni, jwelajia'm ni i'lij siojo ijiuski'la'n. Ti 'nakayi siu'neje kajlomata janiujwank'i kisie'e niwa imose'l yijits'i napo i'nio', jla'yi ti jajwiejiete'n napo je isis. Jloma kiecha ka itimayijna'a ni isijmaye. 33Je 'esiji ka je iyiyi siunie ja ijiojwi, siu'nie jloma jla'yi siupa kajlomata, lapakawo ti je 'esiji ka lajak'i pa injwejlanik jiwoye ka tenajaja Jerusalenne ka tiliana.

34Pakayi'ne ti iyoyet'ipi 'ate:

—¡Jerusalén, Jerusalén, jitij'we ti jiliajne'n kiapo injwejlanawos,#1 R 19.10; 2 Cr 24.20-21; Jer 26.20-23 sisajas jikiene kiapo Sinia' jikawosta'ni ti ijliutie'a'ni! ¡Pa nojwat'ijia'm ti ajotta'ni isiajwe napo aka kia'lis, iyoye'ate jana ajwenta ti ijiut jikiajwe niwa jilis, 'yina ka jakayeyi wata'a ka woyi! 35'Yejne'n, siunie a'wet ja lajak'i papo ine'yi. Ajwe'lase'm ta'a ti ja ke si'wena, ijiatjliyijna'a ka inetieje janak jloma ti jawo'ate, “¡'Esiji ka Sinia' iwejna'm siu'nie 'es siunie i'nio' ti Saka'niona ji'lij iwijna'm!”#Sal 118.26

Currently Selected:

Lucas 13: CRT97

Highlight

Copy