Lucas 8
8
Siupapo asejnia iniuyeje'ni pa Jesús
1Yam'niji pak siupa iyot'iyipi pa Jesús, 'yina yam'ne ti iniuk'i'ni puwa isi'il, jla'yi puwa ji'wetis jilis papo i'nio', ti iyoyi jlamtikie' puwa Sinia' jlamtis ti isis, ti ijwi'il pa jika anechijiayas. Siojopo t'eyasajnas ti itijwa'm niwa sikioye times tom'niji 'yuninisk'i, 2siu'neje papo ijwiejiett'ijyimpe jla'am siupapo asejnia, yit'iyipe papo iyo ka nekk'i, siu'neje papo ti kia'iyo ti ijwiejiett'ijyimpe ti imose'l yijits'i. María japokajimpe, siujlieja ti tiwonaja'ni 'ate Magdala jleliki, siujlieja ijwienjli sikio' itij'we times tom'niji puwa imose'l yijinipi. 3Siu'neje jlaja asejnia jle' iyo'ate Juana, i'nio' siojo jle' iyo'ate Cuza jik'iemjla, siupa Herodes#8.3 Herodes siupa jlamt'iyijipe jlas paka, Herodes Antipas (8.3) jika wikiniet'awojimpe. Siu'neje jlaja i'nioki jle' iyo'ate Susana. Je japokata, po 'neje siupapo ijia asejnia ti i'yenisie pa Jesús, siu'neje japo t'eyasajnas, k'iejlit'iyijpe pa iwinisia'm.#Mc 15.40-41
Jesús yamtiyi siupa ti jlam i'yejnap jiwekie'e siunie i'nio' ti takawijna'n
(Mt 13.1-9; Mc 4.1-9)
4'Loj papo i'nio' ti tajlits'i puwa isi'il jilis, nojwisiji pa Jesús siupa yi'i. Pakayi ti yamtiyi k'iye papo siunie ti i'yejnap jiwekie'e ti iyo'ate:
5—Pojompe pa i'nio' ya'am ti jankawijna'n. Ti iyoyeyi ka inkawijna'n itietayik'iji'n puwa jlalisi' puwa jisiliaki, siupuwa ijniuj'li siupa iniu'we pa 'nayi puwak i'nio' t'ask'i'ni'ne, jla'yi ti ajwejnas itiujwits'i. 6Jlampet siupuwa ijniuj'li siupa ajnat sisajas ji'wet, ti tekijlat'ipi, je paja ti 'yalat'ipi, kajeyepa ti je 'ejts'i pa ajnat, i'niat je 'wanjle'e'ni. 7Siupuwa ijniuj'li pet pa ajnat k'itienis yi'i, puwak ti 'nesat'ik'ipe pijia'm ti ijniujliji puwa k'itienis, ijlias'ni pijia'm paj ti k'itienis 'yakama ape'e, sekyi'i ilian'ne. 8Siupuwa ijniuj'li pa ajnat ti 'ejts'i, tekil'ne puwaka jlam yamjli pijia'm, paj ti yiyeyi ti iyo jlaye, iyot'iyipi japa yiyi japa cien puwa jlo', ti ijwienjli japa inseliaki tajla'm.
Kiak iyo kiwa Jesús yamtiyi, yine ape'e ti 'yakets'iyejap ti iyo'ate:
—¡I'nio' ni jik'iot tiojwa'l po', kank'iuyeyijna'a!
Siupa it'imina ti Jesús i'yejnap jiwekie'e pa k'iejliyi
(Mt 13.10-17; Mc 4.10-12)
9T'eyasajnas i'yasat'iyis'nijpe pa Jesús ti iyonisi 'ate:
—¿Tepat'e iyo siojopa inseliaki ti jijwe'el?
10Iyo'ate pa Jesús ti isiujlie japo t'eyasajnas:
—Siuti asa'am siunie iyo'nase ni Sinia', tijna'yase'm pet ti iwi'nase'm ka intant'iejayi siuniwa wask'i'nela'aja yiji ni jika anechijiayas ti je 'yaka ape'e. Jlampet siunapo 'wenayi, napok akimits'ik'iye pet siuniwa ti jlam a'yejnap jiwekie'e ti amtiyeta, 'nakayeyijna'a 'wanjliyi kan'yenis'ni, 'yina jitiej ja ke iname, 'wanjliyi kampe'yayis, 'yina ja ke intant'iejesk'i.#Is 6.9-10; Jn 12.37-40; Hch 28.25-28
Jesús ti 'yakajanitiek'ijine siupa yamtiyi ti i'yejnap jiwekie'e pa kawijnanata
(Mt 13.18-23; Mc 4.13-20)
11“Siunie ijio'weyi ni siunie a'yejnap jiwekie'e iyo'ate: Siojona inseliaki a'yejnap niwa Sinia' jlamtis. 12Siuniwa inseliaki ti ijniuj'li pa 'nayi, napoka siunapo i'nio' ti its'iutieje niwa Sinia' jlamtis, 'yina na'am ni imosik, ijialayi ti yitaja ni jlosik, ti iyo ka je ink'iuyisie, jla'yi ti iyo ka je injwajyi'n. 13Siupuwa inseliaki ijniuj'li siupa ajnat sisajas ji'wet pet, napoka pet siunapo i'nio' iyoyi ni inamtik, wuj ti yimi'n, 'es ti iyoyisi, 'yina lapakawo ti iyot'i 'ate ti jijwetise'l je tosits'i. Je pajta'aja ti iyoyi, yiyi jana jloma ti inkajejlasaye yiyetaja, mom iliyeyisi. 14Inseliaki siupuwa ijniuj'li pet pa ajnat k'itienis yi'i, napoka pet siunapo iyoyi ni inamtik, 'yina ti po' siuniwa 'yuyits'i, siuniwa jikijmatis ti i'winis, siu'neje niwa ki iyo ape'e 'ni ajnat jinikanitiejeyejes. Niwaka'ne jla'am ti 'wes ti ijiok'i'ni, yamjliyi ti to'm ape'e ni siunie jitienkiujnieye ti 'esta, jak je iyoyiji ka iwoyi jlaye. 15Jlam'ne pet siupuwa inseliaki ijniuj'li pa ajnat ti 'ejts'i, napoka siunapo i'nio' ti ijiate ti 'es ti isi'm ilia'm jla'yi ti iyoyi niwa Sinia' jlamtis, jla'yi ti its'iuyeje ni iyo. Jlam sek iniujliye'e pet siunie 'es ti iyo jlaye, siupapo tajla'm.
Jesús i'yejnap jiwekie'e japa kates ti iyo jlamtikie'
(Mc 4.21-25)
16“Je ti'wena wekie'e paka ne'yi ka imp'o'n ape'e ni'ne ka inen kiajwe pa jlo'wet ti jwat yi'ne japa jika kates. 'Wenajliyi wek ni jawone ti janen pijia'm, 'nakayeyi siunapo ijia ti ijioyi jlam pak ja ke int'opits'i'ni, kajeyepa ti jla'al 'yije'en ape'e.
17“'Yina kiak iyoyi'ni pet siunie tijwekie ts'ijiye ja 'nakaj ape'e, siu'neje ni istie' ts'ijiye ja ti'wena kajeyepa ti ja ke insta'ne.
18“'Yejne'n ask'iote ká alanayi'i siunie jipe'yaye. I'nio' ni its'iuye siunie ajwe'el, Sinia' je ijiat ka je iwomeje k'iye ni k'ie ni 'yijene pet pi iyone. Jlampet siunie i'nio' ni je its'iuye ni ajwe'el, Sinia' je ijiat ka je ijnale siunie ijwilta ka ijiatayi ka 'najane.”
Siupapo Jesús ji'yijnis, siu'neje japa jletis María
(Mt 12.44-50; Mc 3.31-35)
19Jesús ji'yijnis ijioyi jla'yikiyis jlaja jlet María, siupa yit'iyipe. 'Yina ka wo'ate ka i'yakanisi, ti je jlase' papo i'nio' nojweje. 20'Yina po'ne siupa ijwile ti iyo'ate:
—A'yijnis siusiapo yits'e kisie'e, jla'yikiyis jasie et, iyotaja ka in'wenis.
21Jesús isiujlie'ne pet ti iyo'ate:
—Siunapo its'iuye niwa Sinia' jlamtis, jla'yi ti isima, napoka jla'm ijiate ti tete, jla'yi ti napok 'yijnis.
Jesús ilinkine pa jlajwu, siu'neje puwa ji'wukijlimpejes ti tiwakiats'i pijia'm
(Mt 8.25-27; Mc 4.35-41)
22Po' japa jloma Jesús tisiojmajia'm japa kasejkana, sekyi'i iyone'ne 'ate japo t'eyasajnas ti i'yase:
—Naja'ni jatiuma 'wechaja siujlie'e i'niat.
Yamat'i'nijpe. 23Ti yiyet'ipi jikiowe'e siojopa i'niat, Jesús imia'a'ne. Pakayi'ne ti yejwutije' siupa jlajwu, ti wujwi, i'niatt'ipa itiyejajam'nijpe japa kasejkana, je ininayits'i ti i'winis ti janek'isia'm. 24Yamat'iyisipi pa Jesús ti 'yujwatis'ni, iyoyet'iyispe 'ate:
—¡Inka'neyasajnawo! ¡Inka'neyasajnawo! ¡Ja kassemk'anaja'n!
Jesús takasitiet'ipi, sekyi'i ti tamtiyet'i'yijpe pa jlajwu siu'neje puwa ji'wukijlimpejes, ti iyo'ate:
—¡Kamaja'!
Siupa jlajwu mamiyek'i, siupa i'niat kia'iyojliyi 'yakamaja. 25Sekyi'i ti japokayet'ipi pet japo t'eyasajnas ti iyone 'ate:
—¿Tepi jiwoyeyi ti laja astankiujnieyeja'?
Jlam'ne siupa iyo, jnots'ijnits'i kanwojlijint'iyisipi pa i'nijmajlit'iyispe ti ini'yasis ti iyoyits'i 'ate:
—¿Tent'i 'ni i'nio? ¡'Yina ti siuni jlajwu siu'neje 'ni i'niat, je 'yaka'm ape'e ti ijliuye!
Jesús ijwiejiet pa i'nio' yi' Gerásaja, ti jitiej je 'es
(Mt 8.28-34; Mc 5.1-20)
26Jiwekie'ejat'ipi ti 'nes'ni yi'i japa ajnat jle' iyo'ate Gerasa, ti to'm i'niat ji'wechaja, 'yakama'a jlaja Galilea. 27-29Sekyiyet'i'yijpe pak i'nio' ti jitiej je 'es, je ink'ie' siupa jiwet'ia iyo, paj ti ik'alitie'ni siupuwa iliaki, jlam sek yik'i'ni puwakata jla'am puwa a'no'ol ti iyo 'weta'. 'Wanjlijinijpe ti wikijnies tilie'nitietaja puwa jisietis siu'neje puwa jikioye, ka je inek, 'yina je to'm ilia'm lapakawo ti imosik iyo jijweyeja'. Paka jla'am siupa yiji ti yajmajne'n, it'imina'ne ti yajme'n ojk'i pa i'nio'. Jesús yiji wek ajnat'e ti tisiojmajiet'ijyimpe, iyoyet'ipi 'ate pak jitiej je 'es, ti i'winayi pa Jesús, sekyi'i ti namat'iyipi, yiyi wekie'e ti t'akosat'iyijpe kiajwe. Jesús tamtiyet'i'yipe siupa yiji ti iliaki ti iyo'ate:
—¡Tajli 'ni i'nio'!
Sekyi'i ti tajwiyet'i'nijpe ti iyo'ate:
—¿Yot'iyi'ni ti je se'nate, Jesús Ina' wuj jlas? Anip'elisi'na, ¡ke k'iejliyeyijna'a paka awonk'i!
30Jesús i'yasen'ne ti iyo'ate:
—¿Tepa e'e ijio'we?
Isiujlie'ne pet ti iyo'ate:
—Yi'i iyo'ate Kas'lo'weje'n.
Kiak ijio'we kajeyepa ti 'lojompe puwak imose'l yiji pak i'nio'. 31Siupuwa imose'l inip'elisijnin'ni'ne, ti iyonisi 'ate pa Jesús:
—¡Ke kastatena'a isia'm siunie kiawe, ti je ti'wenaja paka jlaja, siunie inlaye 'wet!
32'Yina pojompe puwa ijnisies jitio' sekyi'i, yi'i japa tikijnaki, ti its'ipk'ijin'ni. Puwaka'ne ti iyo ka 'nojiamk'i puwak imose'l, it'imina ti i'yasisi'ni pa Jesús ti iyonisi 'ate:
—¡Wents'emna'a ka 'yuyejamk'i siuniwa ijnisies jitio'!
Jesús 'yajlinit'ne k'iye. 33Siupuwa imose'l tajli'ni siupa i'nio', sekyi'i ti 'yuyet'ijiamk'ipe puwaka ijnisies jitio'. Tisiojmayet'ijiamk'ipe pa i'niat, ti taj'l ape'e pa tikina, yimk'anajan'ne puwak ijnisies jitio'.
34Jlam'ne pet siupapo i'yena jnots'ijnits'i ti i'winayis ti kia'iyo. Yamat'i'nijpe ti t'osi'ni takajwejlanayi papo yiji japa isi', siu'neje papo yi' kisie'e, ti iniujwape'n japa isi'. 35Sekt'ipa tajla'ape papo i'nio' ti 'yakapajle, ti i'yenisi pak iyot'iyipi pa i'nio'. Yiyet'iyisipi siupa yi'i pa Jesús, i'winat'iyisipi pak i'nio', je t'eki'yi siupa yi'i kiajwe pa Jesús, poye puwa 'yuts'iji'n jla'yi ti i'nioye. Wuj ti jnots'ijnits'i papo i'nio' t'ipi. 36Siupapo sekyi'i ti i'wint'iyejepe siupa iyo ti Jesús ijwiejiet pak i'nio' ti jitiej je 'es, papoka'ne ti ijwijla'm siupapo ijia je i'winisieje. 37Wikie'eyi siupapo i'nio' sek ji'wet'e, yiji japa Gerasa, kiak t'ipa iyonayisipi pa Jesús, ti ijliuyis'ni:
—¡Majna'a ka 'nak ataj'le!
Lapakawo ti jnots'ijnits'i papo i'nio'. Jlampa iyoyeyi ka insojmajia'm pa Jesús japa kasejkana, ti iyoyet'iyi'ijyi ka inek, 38sekyi'i pak siupa jitiejt'i je 'espe, iyone'ne 'ate pa Jesús:
—¿Ma je jiwotaja pet ka iyik ajak'i Jesús?
Jesús isiujlie ti iyo'ate:
—Je'e, 'nak 'wanjle'e. 39Apili papo a'wet jlele, sekjane'yi ka anijwelajamna'a wikie'eyi siunie Sinia' iyo'naja.
Yam'ne pa i'nio', sekyi'i inijwelajamk'i papo i'nio' yiji japak isi' siupa Jesús iyone ti ijwiejiet.
Jairo jlase' siu'neje japa asejnia ti isiejts'e pa Jesús ji'wu'
(Mt 9.18-26; Mc 5.21-43)
40Ti Jesús yapiliet'ipi i'niat ji'wechaja, siupapo i'nio' its'iuyisin'ni k'iye, wuj ti inkase'n 'yaka iyoyisink'iye. 41Jlampa iyoyet'ipi 'ate siupa i'nio' jle' iyo'ate Jairo, tijna'yi pet siojopa 'najla'wet ti i'yena, t'akosat'iyijpe kiajwe pa Jesús ti iyo'ate, ti inip'elisini ti ijialas'ni:
—Sip'elisin wata'a, jo kiu wat i'wite. 42Yase' ijwienjli jlaja je 'esi. Je pa 'esieyiji, ja'na'al. Jika najkapis itijwa'm niwa sikioye times tom'niji jlaja yase'.
Jesús yamk'i'ne ti ipi'yaye ti kia'iyo. Jlam ini'nomajasjli papo i'nio', 'yaka 'loj papo i'nio' yamk'i. 43Sekyi'i japak siojopa asejnia yiji papo i'nio', je 'es. Siupa jiliaye iyot'iyipi ti ji'woyis je netiank'i, 'esta wekie'e sekyi'i yikiajle'e'ni, paj ti itijwa'm niwa sikioye times tom'niji t'ipi puwa jika najkapis yiji ti je tijwajyi. Paj ti itijwat'i'yijpe puwa jikijmatis ti takat'inta'ni jitipe'e, ti ijioyits'i papo inkakiewos, 'yina ka pakayeyi ka 'esie. 44Yamat'ik'ipe pa Jesús ti tajlap ji'wechaja, ti isiejts'e pa ji'wu'. Ka pajat'iyijpe wata'a ti isiejts'e, yi'is'ne ilia'm pi ji'woyis japak asejnia.
45Jesús i'yasat'ijiampe papo i'nio' ti iyo'ate:
—¿Tempa isiesk'i'm?
'Yina papo i'nio' tomts'e pa iyo'ate:
—T'eyi, je ya'am.
Sekyi'i ja Pedro iyone'ne 'ate pa jika'niona:
—'Yaka'niona, ji'wenjie'e 'napo i'nio' jle kiowe'e, ti inipa'nomajayis.
46Jesús jlam yinjliyi ape'e ti i'yasam'ni papo, ti iyo'ate:
—Jlam je awoyi, po' siupa isiesk'i'm. Alatk'i pa ijwiye ti taj'l iwia'am ti iniu kisie'e.
47Siojopa asejnia inijwekieta wata'a, paj ti yamat'ipi ti t'akos kiajwe pa Jesús, kititiyeyi'ni jiwekie'eja ti inijwe'el. Yine jikiowe'e papo i'nio', ti ijwila siupa it'imina ti iyo ka inkiejts'e pa Jesús ji'wu', ijwil'neje ti isiesa'a ta'a 'neje ti 'es.
48Yiyik'i ti Jesús kiak t'ipa iyonayipi:
—Yase', i'nes, lapakawo ti atankiujnieye po'. Maj, kama ti ja ak.
49Jesús je ilit'itiejepe ti takamtijniene japa asejnia, ti 'nesat'ipi siupa takajwejlane pa Jairo. Yiyi ti iyonat'iyijpe 'ate:
—Leyi wek ti jlalas'ni ni Inka'neyasajnawo, e'nate. Pajk'iji ti 'ya'al jakia ase' masa.
50'Yina ti Jesús ipi'yaye, sekyi'i iyone'ne 'ate pa Jairo:
—Ataj ká eni'ni 'ate, 'wenajliyi ka awo atankiujnieyeja'. Siojopa ase' ja 'esie.
51'Yina 'nesat'i'nijpe, 'yuyet'iyisipi siupa yi'i japa jlosie masa. 'Yakawonat'iyijpe papo i'nio', jla'yis pajata jla'am ja Pedro ti tane, ijwiene'e ja Juan siu'neje pa Santiago, siu'neje papo jiniewot japa jlosie masa. 52Wojoyeyija'm ti tajwik'i wita'm siupapo i'nio', ti yapisi. Sekyi'i Jesús iyonat'iyijpe 'ate:
—Ká ajwiyets'i wita'm, je 'ya'al jana jlosie, 'najata wek jla'am ti imia'a.
53Siupapo i'nio' ti ipi'yayis ti kia'iyo, jlam iliakijlit'iyispe, tepa jawo ka kiak je iwo ti i'winis ti 'ya'al japa jlosie. 54Pakayi'ne ti Jesús isimat'ipi jikio'yi japa jlosie masa, ti iyone'ate:
—¡Jla'a jlosie, neppijia'm!
55Je paja wata'a ti jiyel yapiliet'ijiampe japa jlosie, ta'a 'ne'je ti inippijia'm. Jesús iyo'ne 'ate:
—Wenajia'm paka intojw.
56Siupapo jiniewot japa jlosie kawojlijinisipi ti i'winis. 'Yina Jesús iyone'ne 'ate ti ijwijla'm papo jiniewot:
—Ká ajwelanie'e siukia iyo ki jiwoyeyi.
Currently Selected:
Lucas 8: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
