Lucas 9

Jesús ijliu' papo t'eyasajnas ka injwelis pa Sinia' jika anechijiayas

(Mt 10.5-15; Mc 6.7-13)

1Jesús ijiutiet'ik'ipe wita'm siojopo t'eyasajnas ti itijwa'm niwa sikioye times tom'niji, jijweye iwijnamk'i, jla'yi ti yikiajle ka inkajlisi pet ka inokiosk'i kisie'e puwa imose'l ti yijits'i papo i'nio', jla'yi ti ja injwajiete'n papo je isis. 2Ti ijliuye'ni, iyonat'iyijpe 'ate:

—Maye'ni, mayeyiji'n ni Sinia' jika anechijiayas ti jajwela', jwajietajyi'n napo je isis. 3Siuti ja akinie'ni, ká atonie paka k'iejliyeyi 'najk'i — ka akiajata pa, ni'ne ka eliye japa, ni'ne ka woyeja' japa, ka wikiniet'aja japa, ka a'lonitie puwa as'wuyeye, siupuwa jatonie.#Lc 10.4-11 4Ja 'oye'yi pa ja 'oye'yi, ji'wet siupa jloyeyi, sek i'wanjliye'yijimpe, paj ka awayeyets'ipe siupuwa jlomas jininenajyi. 5Siuti japoye papo ti ja ke inki'm aselia'm, siupa isi' jloyetaja, sekjane'yi ka tajlayeyijpe, sekjane'yi ka asatis apatajiets'ipe k'iye, 'nakayi ti jan'wenis ti ijiate ti jiwet'ia japoye, kajeyepa ti je isimits'i aselia'm.#Hch 13.51

6Ijiatjliyi yamat'i'nijpe ti iniuk'i'ni siupuwa isi'il jilis, ti iyoyis jlamtikie' pa Sinia' jika'niye ti 'es, jla'yi ti ijwiejiete'n papo i'nio' je isis.

Herodes iyojonk'iye ka in'we'en pa Jesús

(Mt 14.1-2; Mc 6.14-16)

7Siupa anechiyas t'ipi Herodes#9.7 Herodes siupa jlamt'iyijipe jlas paka, Herodes Antipas (9.7) ti t'ijieyet'iyijpe ti tijwela'ni pi Jesús, jla'yi ti t'ijieyeyi wikie'eyi siupuwa iyot'iyipi jla'am pa Jesús, je 'yijene pa ka inwone jitienkiujnieyeja' ape'e, kajeyepa ti po' papo ijwi'il ka pakaye Juan inajiejnawo ka inapi pijia'm, 8ijia papo ijwi'il ka pakaye injwejlanik jiwo Elías ka 'nese'n pakaja, ijia papo ijwil ka pakaye siupapo injwejlanawosjimpe inian'ni ka 'nes pijia'm. 9'Yina Herodes iyo'ate:

—Je 'esiji, yampe ti jletik ala'ne ki Juan. ¿Tenat'ijyi siu'nie i'nio' 'yina ti jle' poyi, jla'yi ti poyi siuniwa iyo?

It'imina'ne pa Herodes ti iyo ka in'weneje pet pa Jesús.

Jesús 'yakojniejne'n papo i'nio' cinco mil (Mt 14.13-21; Mc 6.30-44; Jn 6.1-14)

10Ti 'nesat'i'nijpe japok injlojwajnas, ijwilisiam'ne pa Jesús ti yiyeyisi wikie'eyi siupuwa iyoyisi ti t'iskiunk'iji'n. Jesús i'winakit'ne siupa ijioyiji, ti iyone 'ate:

—Naja'ni jajiok Betsáidaja.

11Siupapo i'nio' ti t'ijieyeyisi yamat'i'nijpe ti ijiutisik'iji'n. 'Yina Jesús je takama'yi ilia'm, jlam ijwiljlijia'm pet ni iyo ni Sinia' jika anechijiayas, ijwiejietjlijyi'n papo je isis.

12Ti no'otie t'ipi siojopo t'eyasajnas ti itijwa'm niwa sikioye times tom'niji ijioyet'iyisipi ti iyonisi 'ate:

—Jlam woni'ni 'ate, nijwejla'm napo i'nio', jloye ka ijnoyi siuniwa isi'il je kastojwape'n, ka inwoyisijyi'n pa ka ijnoyits'iji'n, jla'yi ti jan'yekiujni'n kiu wata'a pet. 'Wanjliyi lajk'iyi pa ka k'iejliyeyi ka winaja'm 'ni awak'i.

13'Yina Jesús isiujlie'ne ti iyo'ate:

—Wenajia'm asa'am paka intowis.

Isiujlisie ti iyo'ate:

—Ijwienjli sikio' itij'we wek 'niwa woyejes yits'e, times 'neje wek 'niwa si'yus. ¿Jijwelp'anta ka iyokijyi'n k'iye paka jlaka k'iye siu'napo i'nio', ti je pini'?

14Kajeyepa ti cinco miljimpe papo i'nio'. Sekyi'i Jesús ijliuyeyi papo t'eyasajnas ti iyone 'ate:

—Jloyeyi napo i'nio' ka inek'iji'n, cincuéntajape papo 'wena janitotiji.

15Ijiatjliyi kiak t'ipa iyonayipi japo t'eyasajnas, yiyek'iji'n papo i'nio'. 16Sekyi'i Jesús isimat'iyipi siupuwa woyejes ijwienjli sikio' itij'we, siu'neje puwa si'yus ti times, i'yenat'ipi poliyi, iyoye jinikanitieyeja' ape'e, itime ti its'isajamk'i. Yikiajlayi japo t'eyasajnas ka inwenk'i papo i'nio'. 17Ti'yekiunieje'n papo i'nio', paj ti yip'isieje'n. Siojopo t'eyasajnas yamat'iyisk'i'nijpe siupuwa jijwa'al 'wanjle'e, paj ti itijwa'm niwa sikioye times tom'niji puwa tenajats'i ti tipoyitiejek'i.

Pedro 'yakajanit'i ape'e pa Jesús ti pak Injwajieti ti Sinia' jijliujwanik

(Mt 16.13-19; Mc 8.27-29)

18Yit'iyipe japa jloma ti Jesús inijwankite'n ti iyo t'ajlayeja', jlam'ne japo t'eyasajnas yijap, Jesús i'yasat'ijyimpe japo t'eyasajnas ti iyo'ate:

—¿Tent'ipa itijnisieje napo i'nio' ka yama?

19Isiujlie ti iyo'ate:

—Po' napo i'nio' ijwi'il ka Juan inajiejnawoye'a'm, ijia napo ijwil ka Elíassa'a'm, po 'neje napo ti ijwil ka injwejlanik jiwoye'a'm ka papokaye siupapo iniant'i'nijpe, ka inapi pijia'm.

20'Yina iyo'ate:

—¿Tepi jiwoyeyi pet ti asa'am? ¿Ten pet pi jijwela' ka yama?

Pedro isiujlie'ne jla'am ti iyo'ate:

—A'am ti Injwajieti'a'm siunie Sinia' jijliujwanik.#Jn 6.68-69

21Jesús ji'lij 'yitiajapk'i japo t'eyasajnas ti iyone 'ate:

—Ká ajwelajiamna'a paka ne'yi pa i'nioye.

Jesús inijwe'el ti japoye pa janwo ts'ijiye ti ja tiliana

(Mt 16.20-28; Mc 8.30—9.1)

22Yine 'neje ape'e ti iyo'ate:

—Siunie I'nio' Jlas ja ke inka'm ape'e siunie ja tiwonaja, ti wuj ti janilayiti ni ja tena'a. Siunapo kijilas, siu'neje napo pa'yijis jika anechiyasas, siu'neje napo jiwos pet ni Moisés jika'neyasajnaye, napok jankaj ti jane'wajasi, sekjane'yi ja tiliana. Jlomas janajapeja sekjane'yi inapiliena'a pijia'm ti jantajli ni a'no'.

23Sekyi'i ti ipijlanitieye ape'e papo i'nio' ti kiak iyone:

—I'nio' ni iyo pet ka ijna ijyik'i, ka je wujwakiunie'e ka neki siuniwa jitienkiujnieyejes iyone ti jla'am, jlomas ti jantejlia jana jika cruz, ka inamana'a ijyik'i. 24I'nio' ni janite'en ka jiliaye poye, nak janetia'n. Jlampet siunie ti ja ke inite'en ti jiliaye jane'yi ape'e ki iyo niwa yamtis, nak janjwa'.#Mt 10.38-39; Jn 12.24-25 25¿Tent'ipa ja 'esieyi ni i'nio' siuti jankajli siuniwa wask'i'nelaja yi' ape'e 'ni ajnat, ti ja 'naka ti jlama ti janetia'n? 26I'nio' ni ja'najwelk'i siu'neje niwa yamtis ti ja'najwejle, I'nio' Jlas kiak janwo'ojyi pet ja'najwe'l ape'e, ka 'nesta ti ja ke jlasiye ni jijweye janwo, ti jantajleje ni Jinia', siu'neje napo injlojwajnas poli jlele ti isis. 27Jlam je awo siunie jayo'nase ti asa'am pa ja inojwajia'm ti jleye'ne, ja ke i'nalajyi'n 'yina paj ka ineyeyinie'e siojona jloma ti jitiete jan'we'en ni jika anechijiayas ni Sinia'.

Jesús initataja'm siupa jloniye ti 'es

(Mt 17.1-8; Mc 9.2-8)

28Jlampa jlomas ijwienjli sikio' itij'we najape tom'niji puwa yam'niji pakayi ti jitiej ijiutie siupa janwo, Jesús yam'ne ti ijio ape'e japa tikijnaki ti iyo t'ajlayeja'. Tane ja Pedro jla'yi pa Santiago, siu'neje ja Juan.#2 P 1.17-18 29Jlampa t'ajlat'ipi, siupa jloniyet'ipi 'wena k'iejlit'iyijpe, jlampet siupa ji'wu' kat'ajat'iyijpe ti lemi, 'esiet'itie pa k'iejliyi. 30Jlam jnots'inijits'i'ni japo t'eyasajnas ti i'winayisi siupapo i'nio' times ti ijwienjli takasitisiap'eje'n pa Jesús ti takamtijnienisi. Papokajimpe papo Moisés siu'neje pa Elías, 31yiyis jikiowe'e siupa jla'al siojopa kates ti tal poliyi. Jitiej ijiutisie siupa jiliaye jawo jla'am pa Jesús, ti jane' Jerusalenne.

32Jlam'ne pet ja Pedro siu'neje japo jla'yis jika ijnieti poyeta, 'yina inilayitisi wekie'e. It'imina ti je imiak'iji'n, i'winis siupi iyo ti initataja'm siupa jloniye kiecha, jla'yi ti i'winis siupapo i'nio' times ti yijap pa Jesús. 33Jlampa tajlat'iyisijpe pa Jesús siupapo i'nio', 'yina Pedro iyone'ne 'ate pa Jesús:

—Inka'neyasajnawo, 'esp'an ka 'nak iwiek'i. Jalisanajajna'a puwa 'wukiu'l jilisa' ka najapeja, janjwanjlina'a siojopa ti jajna'ya'm pet, siojopa jikiecha jajna'yi pet ni Moisés, jikiecha 'neje japa jajna'yi ni Elías.

Pedro je ijiat pa kanjwe'el siupuwa iyo puwa jlamtis, kajeyepa ti yisi'liet siupa iyo pi i'wi'in. 34'Yina ti je iliyi ti tamti'ni, jlampa tajlat'ipi 'niji siojopa poli, sekyi'i japaka'ne ti it'imina ti je 'yakajayi, kajeyepa ti yiyisi, sekyi'i ti wuj ti jnots'ijnits'i ti i'winayis ti kia'iyo. 35Japaka'ne siojopa tojma'm siupa jla'lap siupa tamti, ti iyo'ate:

—'Nak siu'nie yas, ti ya'am ti aki'me.#Is 42.1; Lc 3.22 K'iuyeyi.

36Yiyik'i wek siupa ina'lap, siojopo t'eyasajnas je i'winayisi papo Moisés, siu'neje pa Elías ka nejiap pa Jesús. Ijwienjli jla'am pa Jesús ti 'yakaje. Pak siupa jloma je iyo ka intanisi'ni, siupa iyo ti i'winis.

Jesús ijwiejiet pa jwemik ti jitiej je 'es

(Mt 17.14-20; Mc 9.14-29)

37Yit'iyipe'eje japa jloma, ti tajlits'i ape'e japa tikijnaki, je pini' siupapo yisitis k'iye siupa jano'we pa Jesús. 38Tajlat'ipi ts'e jikiowe'e papo i'nio' siupa i'nio' ti i'yask'i'ni pa Jesús, ti iyo'ate:

—Inka'neyasajnawo, sip'elisin wata'a. 'Yejne'n pet 'ni yas ijwienjli, 39siunie iyone siupa yiji. Yejlat'ni sekyi'i ti jiyel initiajnata'aja, paj ti je 'esieyi'iji ni jlats'ilis jikiwiti. Ijiate wata'a ti iliaki, jla'yi ki iyo ti jikio' je k'as. 40Itiejen wujtaja'ajyi napo 'eyasajnas, 'yina je 'yakajlisi.

41Jesús iyo'ne 'ate ti isiujlie ti ipi'yayet'ipi ti kia'iyo:

—¡Ijiatt'iyiji 'napo yi'ne ti laja astankiujnieyeja', jla'yi ti je insisie! ¿Jot'e ka k'ieyeyik'i'ni ka je itiaj'lasap, ka inilayit'iase? Namkiame kiu'ne pa as.

42Siupa jwemik ti ijioyeyi, yamat'ipi isia'm paka jla'am siupa yiji ti sek itiete'eje'n jiwekie'e, sekyi'i ti jiyel netiana. 'Yina Jesús tamti'yi'ne siupa yiji, ijwiejiet'ne pak jwemik, sekyi'i yikiajlayi pa jinia'. 43Jlam jnots'inijits'i'ni papo i'nio' ti i'winis pi iyo pa Sinia' jit'iuni ti jla'am ti wuj.

Jesús yikiajlayi'iji ti ijwi'il siupa jiliaye jawo

(Mt 17.22-23; Mc 9.30-32)

'Wanjliyi papo i'nio' ti jitiej yinisi'ni 'ate siupa iyo pa Jesús i'winki'n, sekyi'i Jesús iyone'ate japo t'eyasajnas:

44—K'iuyek'i'm, mayina'yisia'm siuniwa yamtis. Siunie I'nio' Jlas ja tekiajla kiojyi napo i'nio'.

45'Yina ti Sinia' je iyojliyi'ijyi ka 'najanisi paka iwonisi, it'imina'ne ti ka poye paka jitienkiujnieyeja' ka intejnisisie ka kia'iwo. Jla'yi ti isipits'i pa Jesús ka in'yasis'ni siupa iyoyiyi.

¿Ten siupa t'an'ni wat ape'e pi jikiecha?

(Mt 18.1-5; Mc 9.33-37)

46Pak it'imina japo t'eyasajnas ti iyo'ate, ti inijwelis:

—¿Tent'i siupa jwajla'a ti t'an'ni wat pijia'm?

47Jlam'ne pa Jesús, ti itijnisieyi ti kiak jitienkiujnieye iyone japo t'eyasajnas, isimayi pa kia'le yina'ni jlajap. 48Kiak t'ipa iyonayijipi:

—I'nio' ni janki'm ilia'm siunie kia'le iyoye'ate siunie na'm ijyik'i, ijiate ya'am ti isi'm ijyilia'm. I'nio' ni isi'm ijyilia'm, nakayep'ajne pet siunie ti isi'm ilia'm siunie I'nio' sijliu'. Jla'm ijiate jla'am siunie i'nio' je 'esijiyi ti lajk'iyipa kawo ti jane askiowe'e, nak ijiate ti t'an pijia'm.

“Siunie ti je teje'yi aselia'm, 'nak asa'yi”

(Mc 9.38-40)

49Juan iyonat'iyijpe 'ate pa Jesús:

—Inka'neyasajnawo, a'wena ja i'nio' ti iniujwa'n kisie'e jawa imose'l, ti isiene ki e'e. Je enaja 'ate kajeyepa ti je tal siwa'm.

50'Yina Jesús isiujlie ti iyo'ate:

—Ena wek'iate, kajeyepa ti nak asa'yi siuti je teje'yi aselia'm.

Jesús isilaja pa Santiago siu'neje pa Juan

51Jlampa jet'ipa tojwa ape'e ka inapi poliyi pa Jesús, wuj ti ijialas ape'e ti iyo ka inek, ka ijnoyi siujlieja ajnat Jerusalén. 52Iyoyet'ipi jikawosa' ti iyoyeyi ka inek ka iwakajlanit ta'a k'iye siupa janajapeje'n yi'i jlaja Samaria. 53'Yina siupapo Samaria jlele je iyoyis ji'weta', lapakawo ti 'yijene pi iyone ti Jesús teje 'niji yi'i jlaja Jerusalén. 54Siojopo t'eyasajnas, Santiago siu'neje ja Juan, i'winis ti kia'iyo, sekyi'i iyoyis'ne 'ate:

—'Yaka'niona, ¿'est'iyiji ka 'yejlaja pa jwat ka intal poliyi, ka intej'we siu'napo i'nio'?#2 R 1.9-16

55Jesús tejeyet'ipi ilia'm japok t'eyasajnas, isilajat'iyijpe. 56Sekyi'i ti yamat'iyis'nijpe ti ijioyis 'niji yi'i puwa ji'wetis t'ipi papo i'nio'.

Siupapo iyot'iyipi ka inekk'ijin'ni pa Jesús

(Mt 8.19-22)

57Yit'iyipe 'nayiji, po' pa i'nio' iyone 'ate pa Jesús:

—'Yaka'niona, awotaja pet kayik ajak'i, ajnat siupa jajojwi.

58Jesús isiujlie ti iyo'ate:

—Siuniwa yosis jijwa'l po' wek jla'am, ajwejnas kia'iyojliyi jlopis po' wek. Siunie I'nio' Jlas je kia'iyo, laj ji'wukie ka ine'yi ka ima'a, ka ininop'it.

59Jesús iyonat'iyijpe'eje 'ate siupa jikiecha:

—Na'm ijyik'i.

Isiujlie ti iyo'ate:

—Ejlo'o kiu', janiajnat kiu' ka ip'io'ne ki ika kijil masa.

60Jesús isiujlie ti iyo'ate:

—Ejlo'okiu wek, ena'ate siunapo 'yajle'n ka imp'o'ne pet napok jika amejyi. Naj woyi pet amtikieyi ni Sinia' jika anechijiayas.

61Jikiecha 'neje pa iyo'ate:

—'Yaka'niona, awotaja ka yik ajak'i. Ejlokiu' janiajnat kiu' ka inijwele japo i'wit jlele.

62Jesús isiujlie ti iyo'ate:

—I'nio' siunie ti jla'm i'yenjli'ni ji'wechaja ti isimataja'n ti iwiets'ilat pijia'm ni ajnat, ti isie'e jana wakiajas jlojnate, nak siunie je 'yakajli ni jikijmaye iyo ni Sinia' jika anechijiayas.

Currently Selected:

Lucas 9: CRT97

Highlight

Copy