Lucas 10

Jesús ijliu' papo jika'niyewos, siupapo setenta y dos

1Jlampa paja'ni ape'e siupuwa iyot'iyipi, Saka'niona isimat'i'yik'ijpe papo setenta y dos t'eyasajnas. Timesiamk'i'ni ti ijliuyet'i'nijpe ti iniajnate'n jik'ioye ti ijioyits'i siupuwa isi'il ji'wetis papo i'nio', siupuwa iyo ka ijnoyits'i. 2Iyonat'iyijpe 'ate:

—Isajk'i siunie inwomik ja tiliena'a ti wakal, 'yina je 'loj siunapo jankima ti janla'ne. Jakajliete, 'ajlayi siunie jikimet ni inwomik, ka injlo' papo ijiaja 'nakayeyijna'a ka poye siunapo jankima ti janla'ne. 3¡Maye'ni asa'am! 'Yejne'n, ti ajloye'ni jiwoye'yi 'ate niwa 'wolepo' ti k'iwajlas tijwajiape'n. 4Ti jakinie'ni, ká awoye eliye ka akijmatis ejni, ká atonie japa aska wikiniet'aj jiweja', ni'ne ka asatiye puwa. Siuti jakiutieyi pa i'nio' 'nayiji, ká apajanitiejiap ka ajapajiap ti jitijwilayi.#Lc 9.3-5 5'Wukpe japa ja 'oye kiajwe ti jleyeyetaja, ka kiak awoyeyipi 'ate ti janajnata ti jatejwila' ask'ioye, “Inkamankiye ja ine'yipe siujlie'e 'wuk.” 6Siuti janapokaye siunapo i'nio' yijap ta'a ni inkamankiye, ijiate siunie inkamankiye jiwoyeyi ka aleyeyejap, ja'wanjliyejap. Siuti ja lajak'ipa ka inkamankiyeja' ka nejiap, ijiate siunie inkamankiye ni jikinieyijin'ni ja ke 'wanjliyejap, ka inapilie'asenie'e asa'am.

7“'Wuk siojopa jleye'yi ká atajlayi, kima'yi ilia'm pi k'iejliyi ti janwe'nase'm, siuti ja inkojnienajyi'n, ni'ne ka in'yayinajyi pi k'iejliyi. Lapakawo ti jlam je isijmi wek ilia'm ni i'nio siojona jikaja, kajeyepa ti isijme'n ni i'nio'.#1 Co 9.14; 1 Ti 5.18 Ká ajlasayejap, siojopa 'wuk jloyeyi ká atajlayi, ká ekiajlajyi'ni puwa ji'wetis papo i'nio'. 8Jawayeyipi siupa isi' jloyeyi, siupapo janki'm aselia'm, ja k'iejliyeyipe pa janwe'nase'm kima'yi ilia'm, ka towayepe. 9Siuti japoye papo je isis sekjane'yi jwajietajyi'n, ka awonayipe 'ate, “Siunie Sinia' jika anechijiayas je toj'wase'm.” 10Jawayeyi siupa isi' yi'i siupapo ja ke inki'm aselia'm, jika'wulisk'i japa isi' ka sek anoyeye'yipe, pa jakiniets'i'ni ti jawoye'yi 'ate, 11“¡Siunie ajnat ti tajla'm jla as'wet, ti yi'i pet niwa sisietis, apatajats'i, 'nak 'yakajanit ti ijiate ti astes po'!#Hch 13.51 ¡'Yina 'esiji ka 'najanayi ti Sinia' jika anechijiayas je pa tojwa'ase'm!”

12“Ajwe'lase'm, siuka netiejenie'e janak jloma, jana jiliayeja' japak isi' ti ja tisiejek'i janka'm ape'e siupa tiwonat'iyipi japak isi' Sodoma ti tisiejek'i.”#Gén 19.24-28; Mt 11.23-24

Kakiujnietas siupapo i'nio' yiji japa ajnat Galilea

(Mt 11.20-24)

13“¡Ja imp'elisisa' wata'a asa'am ti jleyejyi jana Corazín, asa'am 'neje ti jiwayejyi jana Betsaida, aswet'ia japoye! Jlam'ne t'ipi ka janakaye Tiro siu'neje jana Sidón#Is 23; Ez 26—28; Jl 3.4-8; Am 1.9-10; Zac 9.2-4 ka sek tenaja'a niwak siuniwa ti ti'wenkinaja'm napo i'nio' iyo'ate siuniwa a'wenki'n ti ji'wena', jlam pajtak'i'ne ka iwo jlosikis ink'iejyisa' siunapo i'nio' yiji. Je k'iejets'i'ni ka 'nots'iji'n siuniwa ji'wuye ti je isis, jla'yi ka intatisi'ni jitipe'e ni tijlat. Kiak janiwonisi kajeyepa ti ijiate ti ilik'i ni jike', yapilisi pa Sinia'. 14Janeyi janak jloma ti aswet'ia japoye, ti ja tisiejek'iase'm asam ja ijiatayiji ti aswet'ia janka'm ape'e siupa jiwet'ia iyot'iyipi siupapo yiji puwak isi'il t'ipi Tiro, siu'neje japa Sidón. 15Asa'am ti as'wet jana Capernaum, ¿jijwelat'e ka tikinie'asena'a pijia'm poliyi? ¡Ja jeye, 'wenajliyi ni siunie ja tiwona'ase ti ja intatayi isia'm siunie kiawe ti je ti'wena k'ioyi, siunie inlaye 'wet!”#Is 14.13-15

16Yiyik'i ti kia'iyo pa Jesús, sekyi'i ti kiak t'ipa iyonayipi japo t'eyasajnas:

—Siunie jank'iu'wase'm, nak its'iuk'i'm pet. Jlampet siunie ti je isima'yi aselia'm, nak 'yaka pet ti je isi'm ijyilia'm. Siunie i'nio' je isi'm ijyilia'm, nak 'yaka pet ti je isi'm ilia'm siunie I'nio' sijliu'.

Ti 'nesat'i'nijpe siupapo setenta y dos Jesús t'eyasajnas

17Siupapo setenta y dos Jesús t'eyasajnas wuj ti inkase'n ti 'nesat'i'nijpe yiyisi pa jika anechiyas, ti iyonat'iyisijpe 'ate:

—¡'Yaka'niona, siuniwa imose'l kia'iyojliyi its'iuts'e'm ti etinajata!

18Jesús isiujlie papo ti iyo'ate:

—Jlam je woyeyi, a'wenk'i ja sitiejiejwa imosik ti iniujwe'n ti tal poliyi, 'yiniye na tak'ajyi. 19'Yejne'n, ijwiye awe'nase'm ka 'asak'i'ni niwa injlajas jitio', jla'yi ka 'asak'i'ni niwa ajliu pastanayis,#Sal 91.13 siu'neje ni jijweye iyo ni astajiejwa imosik ti t'on'ni ka akama'yi ape'e, 'yina ja lajk'i pa ka k'iejliyeyi paka aswet'iaye. 20'Yina ká anitonitieyi niwaka, jla'm ijiate jla'am ka anitonitieyi ti wakal niwa aseyis ti t'etaja'a ts'iji poliyi.#Fil 4.3; Heb 12.23; Apoc 3.5; 20.12

Inkaj'ni pa Jesús

(Mt 11.25-27; 13.16-17)

21Pakat'iyijpe ti Jesús wuj ti inkaj'ni, ka lajak'i ki iyo japa Sinia' jikimet ti 'es, ti iyoyet'ipi 'ate:

—Awunit Inia' ti poli jla'yi 'ni ajnat jika'niona'a'm. Ji'wenkijna'm siunapo lajk'iyi pa kawo, ti je 'yijejne'n. Siuniwa wask'i'nelaja jijwekia'm napo i'nio 'yijejne'n, siu'neje napo i'nio 'yijen jlosiki. Ijiate 'ni Inia', kajeyepa ti jlam kiak jiwont'iyipi ka kiak inwoyi.

22Yiyik'i ti kiak iyoyi sekyi'i iyo'ne 'ate:

—Inia' yikialk'i wikie'eyi niwa wask'i'nelaja.#Jn 3.35 Lajk'ipa ka 'najane paka wone siunie jlas, ijwienjli jla'am siunie Jinia' ti 'yijene pi iyone. Siunie Jinia' kia'iyojliyi, lajk'ipa ka 'najane paka iwone, ijwienjli jla'am ni jlas ti 'yijene pi iyone, siu'neje napo iyo ni jlas ka intant'ieje.#Jn 1.18; 10.15

23Tejeyet'iyipi japo t'eyasajnas ti 'najli siupa yiyits'i, iyone'ne 'ate:

—Sinia' jikap'ijliuskiye yi'ne siupapo i'wi'in siunie iyo pet ni ji'wena'. 24Jajwi'lase'm, 'lojjimpe papo injwejlanawos, siu'neje papo anechiyasas, ijialasista kan'wenis siuniwa iyo niwa ji'wena 'nakayi, 'yina je i'winis. Iyoyetajas ka impe'yayis, kia'iyojliyi je ipi'yayis.

Samaria jlele siupa jlosik po'

25Siupapo taka'neyasane pak Moisés jika'neyasajnaye, ijwienjli'ne siupa ijioyi pa Jesús ti jankamtijniene,#Mc 12.28-34 ti iyo ka ijnejlit, ti iyone'ate:

—Inka'neyasajnawo, ¿tepat'e ka iniwontaja ka ya'm ape'e siojopa in'wasankiye ti laj jlaja?#Lc 18.18

26Jesús isiujlie ti iyo'ate:

—¿Ten siunie ijwi'il ni Moisés jika'neyasajnaye? ¿Tepi iyo naka ti jlamtijie'n?

27Iyo'ne 'ate pak i'nio' ti isiujlieyi:

—Emi'n ni Inka'niona ti Ana', nayi wita'm ki iyo ni ajosik, jla'yi ki iyo ni asak'al, jla'yi ki iyo ni ajweye ti janayi wita'm, atankiujnieye kia'iyojliyi ti janayi wita'm.#Deut 6.5 Ni'namakiti na akiecha niwone 'ate ti jininemi'n.#Lev 19.18

28Jesús iyone'ne 'ate:

—Jlewiteje. Siuti jawoyi niwaka, ja'we'en janaka a'wasankiye.#Lev 18.5

29Pak i'nio' ti iyo ka ti'wena ti ijwil ka jlamkataja ka 'esie, it'imina ti yinat'iyi'iji ape'e ti i'yas'ni pa Jesús, ti iyo'ate:

—¿Tent'ipa isiechat'e?

30Pakayi ti Jesús isiujlie ti iyo'ate:

—Pojompe pa i'nio' ijiota Jericoje, ti tal Jerusalenne. Yit'iyipe 'nayiji ti isiutieyi papo i'nio' kalankijietas, sekyi'i isimat'iyits'ipe ti yejes'ni, sekyi'i ji'wuye ilienat'iyits'ipe, sekt'ipa iliyeyisi'ipe wekie'e ti ilianis'ni wekie'e. 31'Yina po' siupa pa'yi ti sek iniuyeta'a, kajeyepa ti iniuk'i siupa 'nayi siupa yiji. Tojwe ti i'wine, sekyi'i ti iniuyet'ijiappe 'nijiye ti je iyo ka inoyi. 32Po 'neje pa Levita sek iniuyeta'a, yi'i pak i'nio'. Kiak iyojliyi iniuyet'ijiappe 'niji, je iyo ka inajapap. 33Po 'neje siupa i'nio' Samaria jlele ti kia'iyo iniuk'i pak 'nayi yiji pi i'nio'. I'wine wek jla'am ta'a ti iyo ti ip'ilisi'n. 34Yamayi ti iyo kieye puwa ji'wetis siupa tiwonaja ti tajakk'i'ni, 'yilinits'i pa impe' siu'neje pa at'es, sekyi'i ti ilie'niti ape'e siupuwa jikie' pa tiwonaja. Itietayi ape'e pi jiliajwa, ti ijioyiji siupa yajap'ejen'ni papo i'nio' askiujnietas. Wuj ti i'yena paka. 35Siupa ti jlomayet'ipi itionat'ipi kisie'e japa wikiniet'aj, iwijnam'ne siupa ji'wuk japa yin kiajwe, ti iyone'ate, “'Yenajajna'a siu'nie i'nio'. Siuti jatejwe'e japa aka wikiniet'aj, jayama'aja ti jatis ka yapitiemet.”

36Sekyi'i Jesús i'yasen'ne pak i'nio' inka'neyasajnawo, ti iyone'ate:

—'Yina ¿tepi yi'i siupapo najape ti jijwel ka jikiechaye pak siupa i'nio' ti kalankijietas yej'ni?

37Pak siupa i'nio' ti taka'neyasane pa Moisés jika'neyasajnaye isiujlie, ti iyo'ate:

—Siupa ti ip'ilisi'n jla'yi ti i'mienit.

Jesús iyone'ne 'ate:

—Maj, kiak niwone pet ti a'am.

Jesús yi 'wete papo Marta jla'yiki japa María

38Sekyi'i pa Jesús yamat'ijyi ti iniuk'i puwa isi'il, yiyet'iyipi siupa yi'i siujlieja asejnia jle' iyo'ate Marta. Jlajak wuj ti 'es ti isi'm ilia'm. 39Marta ji'yijnia jlaja po', jle' iyo'ate María,#Jn 11.1 siujlieja ti yit'ijyin'nijpe 'niji jisietisi pa Jesús, ti its'iuye siupa ijwi'il, pakayik'i. 40'Yina Marta ti je itime'ni siupa isima ji'wet'e, yamat'ipi ti ijioyi pa Jesús ti i'yase'n, ti iyo'ate:

—'Yaka'niona, ¿jet'i si'we'en ti siujlieja i'niayi ijwienjliyi sijwankitayi 'ni akima? Jloye wata'a ka inoyijk'i'm.

41Jesús isiujlie ti iyo'ate:

—Marta, Marta, wuj ti jiwo ajlak'aliye siuniwa wask'i'nelaja. 42Jlam'ne ka ajwankit siunie atankiujnieye jawone. Jet'i ji'we'en jla'a María ti ijiate jla'am ti 'es siunie iyoyi, siunie tijna'yi ti lajak'ipa ka ijnale.

Currently Selected:

Lucas 10: CRT97

Highlight

Copy