Lucas 11

Jesús 'yiyasane papo t'eyasajnas pi t'ajlaye

(Mt 6.9-13)

1Yit'iyipe pa jloma Jesús iyo t'ajlayeja' ts'e yi'i siupa yi'i. Jlampa itimayi, sekyi'i ijwienjli'ne siupa t'eyasanik ti iyone 'ate:

—'Yaka'niona, kasts'eyasane pet ka iyok ts'ajlayeja', iyot'iyipi pa Juan ti 'yiyasajne'n papo t'eyasajnas.

2Jesús isiujlie ti iyo'ate:

—Siuti jit'iejla', woye 'ate:

“Sinia', 'esijyi ka tilisanaja ki e'e.

'Esijyi ka inesajap ni aka anechijiayas.

3Jlomape ka wents'e'm ni jatiuwa.

4Ojmatk'ijimpe sik'ioye siunie sitis iyo,

wona'ate awoki, siunie ti ojmatak'i wekie'e jitis iyo

napo si'lijwas ni iyonts'e ti je 'es.

Ke kassena'ate siunie inkajejlasaye, 'nakayipe ka je kaskajli.”

Ke 'nome ni 'ajlaye ti jiwoyi

5Jesús iyoyet'ipi'iji 'ate:

—Ka poye pa asjajnajwaye jane'yi pa ti asa'am, ja joyi ti ajnaj kiowe, sekjane'yi ka awonayijna'a 'ate, “Isiecha wenk'i'm kiu wata'a puwa najapeja woyejesa', jlam jayikiaj'lanie'e ka poyetana'a puwa. 6'Yijejnajwa ja awotajyin'ni paka intojw, lajk'iyi paka 'wi'in k'iye, je pajk'i ti 'nes.”

7“Jot'itie ka je iwo'ate kiu' pi akiechaye ka inkiuj'lia, ka into'm 'wuk kiajwe, “Se'nate. Ap'ojna'm 'ni ika 'wuk kiwet, ilis jla'yi ti ya'am amakk'iji'n, 'wanjliyi je akajli ka inippijia'm ka iwi'na'm ni jisitia'n.”

8“Awo'ate, 'wanjliyi ka injwe'el ka je i'ye'n ajelia'm 'yaka ajajnajwa, 'yina siuti ja ke aleyi ti ja'yasi'ni janeppijia'm ka we'na'm ni jisitia'n ti jit'iejla. 9It'imina ti kiak awo'nase, 'ajlayi pi Sinia' siupa jisitiana', janwe'nase'm. Woyejyi'n, je ijiat ka je a'wena'. 'Yasayi pi Sinia', ja 'najlinit ask'ioye. 10Siunie i'nio' ti 'yasane pi k'iejliyi, tiwenaja'm ni siunie ti'yasane. I'nio' pet ni iyojyi'n, i'wi'in ni iyojyi'n. I'nio' ni i'yase ni Sinia', ijiate Sinia' ja i'najlinit k'iye.

11“¿Ni'ne ka poye ti asa'am ti asles po', jlas t'ajla pa si'yus, sekyi'i itiujmatayi ni injla ti iwijna'm, 12ni'ne ka jlas int'ajla jana ajwenta jlets'iu, sekyi'i itiujmatayi jana ajliu pastana? 13Jlajmiliet ti asa'am ti je insisie, siuniwa asles t'ajla'asem'ni, je wenajia'm paka jiniliakie. ¿Tepi iyo siunie Asna' ti yi' poliyi? ¡Jlajma ijiatayi ti janwe'nase'm jana Sinia' jikimet ti 'es, siunapo jant'ajle!”#Mt 7.7-11; Jn 14.13-14; 15.7,16; 16.23-24; 1 Jn 3.21-22; 5.14-15

Tijwela ka sitiejiejwa imosik jijweyeja' pa yiyi pa Jesús

(Mt 12.22-30; Mc 3.20-27)

14Jesús iniujwa'n kisie'e pa imosik ti yiji pa i'nio' ti iyojwa'n 'ne'liaja. 'Yina ti iniuyet'ipi kisie'e, sekyi'i 'esieyiji ti tamti pa i'nio'. Wuj ti jnots'ijnits'i papo i'nio' ti i'winayis ti kia'iyo. 15Po' papo iyo'ate:

—Beelzebú, imose'l jika anechiyas, paka ti iwijna'm ni jijweye, it'imina ti 'yakajli ti iniujwank'i kisie'e.#Mt 9.34; 10.25

16Ijia papo iyo'ate ti ijyijlitis kajeyepa ti 'yakakiuyis:

—Jejlitkiame kiu' ka'wenkints'e'm paka k'iejliyeyi, 'nakayeyijna'a ka je ikakiuk ti jijwe'el jitiajleje pa Sinia' ni ajweye.

17'Yina Jesús 'yijene pi iyone pi jitienkiujnieye iyonisi, sekyi'i iyo'ne 'ate:

—Ajnat japa yi'i ti inik'isa, siunapo i'nio' anechiyasas yiji ti tejets'i wita'm, tepa jawo ka je inetiajne'n. Siunie ti ji'wet jlele tejets'i wita'm, kia'iyojliyi netiajne'n jana 'wuk. 18'Yina kia'iyojliyi pet ni sitiejiejwa imosik, siuti janik'isa siuniwa imose'l, janetiajne'n, sekjane'yi ka inetianana'a pet ni iyo ti iyo anechiyasa'. Awoyi kajeyepa ti jikanitiejyi ti jijwela ka pakaye Beelzebú ka ijwiye itiajleje, ti anojwank'i kisie'e niwa imose'l. 19Siut'itie ka kiak inwo siunie jiwoyeyi ti jijwela', ¿ten jiat'eje siupa jijweye iwijna'm siupapo yit'iyipe ti asa'am ti iniujwank'i kisie'e puwa imose'l? Napoka'ne ti 'yakajanit astepe'e ti jikamats'iji'n, je ijiate siunie jijwela'. 20'Yaka naka jla'am ni Sinia' jijweye ti akiene ti anojwank'i kisie'e, je int'ayeyiji'n pet ti 'nets'ase ni jika anechijiayas ni Sinia'.

21“'Yejne'n, i'nio' siunie t'on'ni, jla'yi ti po' niwa jikio' jlele, i'yena ni ji'wet, siojopa je ijwi'yape'e laj jiwet'iaye. 22Tal 'niji siunie jijweye 'yaka'm ape'e, nak je itieyeyi pet, ijialayi niwa jikio' jlele niwa jitiej iyoma, ijialayi wikie'eyi niwa jikijmatis, sekyi'i ti iwinajamk'i pet napo ijia.

23“Siunie i'nio' je 'yu ijyik'i, nak itiejiejwa. I'nio' ni je iniuyijk'i'm ti ajot wita'm napo i'nio' yi' ape'e 'ni ajnat, naka pet siunie ti initiajnatk'iji'n napo i'nio' ape'e 'ni ajnat.

Imosik ti yapili siupa talt'ijiampe

(Mt 12.43-45)

24“Siuti iniu kisie'e ni imosik ti tajli ni i'nio', yama ti yikiajlin'ni ape'e 'ni ajnat, yi'i pa laj i'nioye'e, ti iyojyi'n paka ji'weta' ka ne'yi. Siuti je i'winata, kiak iyoyeyi, “Jayapilinie'e siojo ataj'lepe.” 25Ijiatjliyi yapilieyi, i'wi'in pa i'nio' ti iyo'ate jla'a 'wuk ti wakal ti tiliejlajan kiajwe. 26Iniajnata kiu' ti iyojyi'n siupapo jla'yis ijwienjli sikio' itij'we times tom'niji, ti ijiateje ti je isisi, sekyi'i ti 'yuyeyi isia'm pi i'nio', kat'ajayi pi i'nio' pi iyo pi jiwet'ia, 'yakamayi ape'e siupa ti 'nelanjie'e.”

Sinia' 'es ti jikap'ijliuskiye yi'ne siunapo iyoyi niwa jlamtis

27'Yina ti Jesús ijwi'il niwaka, poyet'ipi japa asejnia ti yiji papo i'nio' ti iyo'ate, ti tane'ni:

—¡Sinia' wuj ti ip'ilisi'n siojopa jitiajla ti jleyet'ijyimpe, jla'yi ti intoyit!

28Jesús isiujlie ti iyo'ate:

—¡Jla'm ijiatayi ti 'yaka'm ape'e siunie Sinia' iyone ti ip'ilisi'n siunapo its'iuye niwa jlamtis jla'yi ti iyoyi!

Jesús ti'yasajaja'n ka in'wenki'n paka k'iejliyeyi

(Mt 12.38-42; Mc 8.11-12)

29Je nojwi papo i'nio' ti 'nes'ni ti ijioyi pa Jesús, sekyi'i Jesús kiak t'ipa iyonayipi:

—Kat'ajayi'ne siu'napo ti ijiate ti je isis, itiejajam'ni siu'niwa jlomas. Iyotajasink'iye kan'wenis paka k'iejliyeyi paka ti'wenkinaja'm,#Lc 11.16 'yina ja ke kiechaye pa janakaye siunie iyot'iyipi pa Jonás. 30Jawo'ate pa Jonás ti paka jla'am ti Sinia' isi'me ti i'winkina ta'a papo i'nio' t'ipi Nínive jlele siupa jiwet'ia ts'ijiye, 'wena ja ke ijno'we pet ni I'nio' Jlas k'iye napo i'nio' siu'nie jloma ti jan'wenis. 31Janeyi janak jloma ti ja takajanitie ape'e wikie'eyi 'napo i'nio', siojona anechiyaski tal 'niji iniwuki janamana'a ti jan'ye'en pi jitis iyo 'napo i'nio' 'nakayi. 'Wanjliyi tojwataja siupa ajnat tajli japa anechiyaski, ti ijioyi pa Salomón, ti its'iuyi pa t'ajankijnieye iyo.#1 R 10.1-10 ¡'Yejne'n siu'nie yi'ne jla'm ijiate ti 'yaka'm ape'e pa iyo pa Salomón t'ipi! 32Kiak jawo pet siunapo yiji jana Nínive, janam'ni ti jan'yenisi pi jitis janwo 'napo i'nio' siu'nie jloma, ka inetiejenie'e janak jloma, ka takajanitie ape'e 'napo i'nio'. Kajeyepa ti iyojonispe jlosikis ink'iejyisa' papoka Nínive jlele ti ipi'yayisiet'ipi pa Jonás ti iyo jlamtikie'.#Jon 3.5 ¡'Yejne'n, siunie yi'ne 'yaka'm ape'e pi iyot'iyipi pa Jonás!

'Najwes jika kates

(Mt 5.15; 6.22-23; Mc 4.21; Lc 8.16)

33“Lajk'i wek paka ti'wena ka injweki'n japa jika kates ti jwat yi'ne, ka inen kiajwe paka k'iejliyeyi kamp'o'n ape'e. 'Wenajliyi siunie janwone ti janen pijia'm 'nakayeyi siunapo 'yu kiajwe jana 'wuk ja 'nakaj ape'e siupa ijiojwi ti t'iskiunk'iji'n. 34Siuniwa 'ajwes jika kates niwaka atate. Ka inses niwa atate kiak janwo'ojyi pet niwa 'ajwes, siunie jla'al janejyi. Jlampet ti ja ke inses, kiak jawo pet ni 'ajwes, siunie ajnaj janejyi. 35Siuti kia'iyo ni'yejne'n, 'nakayeyijna'a siunie jla'al siojona yi' awa'am ja ke inejyi ni ajnaj. 36Siuti kiak jawo ja pajlata awa'am ni jla'al jana kates ka inejyi ni 'ajwes, ijiate siunie ajnaj ja ke ine'yi awa'am, ka 'wenana'a wikie'eyi niwa wask'i'nelaja, ka woyena 'ate iyo ti jlejyi ni jla'al jana kates.”

Siupa Jesús itiajlata papo Fariséojos, siu'neje papo jiwos pet pa Moisés jika'neyasajnaye

(Mt 23.1-36; Mc 12.38-40; Lc 20.45-47)

37Jesús iliyi ti takamtijnie'n, ijwienjli pa Fariseo i'yase ka ijno 'wete, ti iyo ka inkijwane ti jan'yekiu'n. Jesús yamk'i'ne yiyi pi ji'wet, 'yuye kiajwe japa ji'wuk, sekyi'i ti tejeyeyits'i ape'e japa jlak ijiutis'i'ni ape'e. 38Jlam jnots'iniji'ni pak Fariseo ti i'wina pa Jesús ti jikio' je ilij, ti iyoyeyisi ka 'yekiujni'n, siupa iniwonisi jla'am papo Fariséojos.#Mc 7.1-9 39Saka'niona iyone'ne 'ate pak Fariseo:

—Asa'am ti Fariséojosts'ase'm, kisie'e 'nejie'e wek ti jijwela' ka lejajiamk'i niwa asat jijwa'al, aka teti'l siuniwa ji'yekiuniejiamk'i kia'iyojliyi. Jlam'ne jik'ioyi tipoyeyiji siuniwa askajlajnatis, jla'yi niwa jitiajlayiji ni siunie je 'es. 40¡Ijnoski'lanajyi'n! ¿Jet'imi 'najanayi siunie i'nio' 'yotate ni tom kisie'e, 'yotate 'neje ni yi jik'ioyi? 41Siuti jawoye 'wajieta' pa jane'yi pa, 'esijyi ka ijiatayiji ka intajle ni ajosik ti 'es, 'nakayeyipe ti ja 'esie siunie jawoyeyi.

42“¡Aswet'ia japoye, asa'am ti Fariséojosts'ase'm! 'Wanjliyi ka niwakaye siuniwa sajmela'aja'n ti jiwoye as'wajietayi pa Sinia', iyoye'ate siuniwa a'la'wole ti inkas, wikie'eyi siuniwa inkas 'neje.#Lev 27.30 Jlam'ne je kiak jiwonayi napo as'lejwas ka ena'yi ni siuni tijnajyi, 'yaka ti je jlemina' pa Sinia'. It'imina ti awo'ate, kiak wonayi napo a'lejwas ka ena'yi ni siuni tijnajyi, jla'yi ti ja emina' ni Sinia', 'niwak jla'm ijiate ti laja po'. Ká aleyeyi ti ekiajlayi pi Sinia' siojona tajlaja'm ti ji'yakana'ni itijwa'm niwa sikioye, siu'neje niwa ijia ti isis ti jiwoyeyi.

43“¡Aswet'ia japoye asa'am ti Fariséojosts'ase'm! Yi'i puwa 'najla'wetis ti jleyeta kiajwe, je i'nenieyi ka je awaye'yiji'n siuniwa in'wetis ti jiniliaja, ti jiwoyeyi ka in'wena napo i'nio'. Jiwoyejyink'iye ka titijwila'ase'm ti jleyeyeta isija'm, ka i'nio' inwunitie, ti ti'wenajata aselia'm.

44“¡Aswet'ia japoye asa'am ti Fariséojosts'ase'm! Ti jiwoye'ate niwa i'nio mases tenajats'i'ni ti je 'yakajk'i ape'e, t'asak'i'ni napo i'nio', jlam'ne ki iyo ni yiji ti insot.”

45Siupapo taka'neyasane pak Moisés jika'neyasajnaye, ijwienjli pa sek yi'i paka'ne ti iyone'ate pa Jesús, ti ipi'yaye ti kia'iyo:

—Inka'neyasajnawo, ti a'lej kiak jiwone, jlamt'e kaspechin'ni.

46Jesús isiujlie ti iyo'ate:

—¡Kiak jiwoyeyi, asam pet ti jika'neyasane ni inka'neyasajnaye, aswet'ia japoye! Jiwoye jijliuye napo i'nio', siunie kiojieti, ti lajk'ipa ka ne'yi paka 'noyi. Siunie 'eyasajnaye ti lajk'ipa ka inkajli ka woyi, tiwet'ianaja ka ajwuki jlasiye japa ka akienayi ka anoyeje ka ena'yi ape'e ni jijliuk.

47“¡Aswet'ia japoye, asa'am ti jilisanayi niwa i'nio mases t'o'l, siupapo injwejlanawos t'ipi, siupapo ti aska kijilas iliant'ijyimpe! 48Nak 'yakajanit ti jiniuyeyeje papo aska kijilas mases t'ipi ti iliajne'n papo injwejlanawos t'ipi, je liyeyi ti jit'iotata niwa t'o'l t'ipi.

49“'Yina Sinia' 'yijene naka, it'imina ti iyo'ate niwa jlamtis, “Jajliuyinie'e napo ijwijlanawos, siu'neje napo ijliujwajnas, ijia papo janlajne'n, ijia 'neje papo jantayis ilia'm ti ja tak'ajaki'n.” 50Naka'ne ni siunie Sinia' jantajlate napo i'nio' napo itiejajam'ni siu'nie jloma siupapo injwejlanawos t'ipi no'we ti tilianaja'n ti Sinia' k'iejlit'ipa 'yotatat'iyijpe 'ni ajnat. 51Yi'i pa Abel t'ipi,#Gén 4.8 sek jantajlap'e paj ka ineyeyinie'e pa Zacarías t'ipi,#2 Cr 24.20-21 ti tiliana ti tenaja kiajwe japa 'najla'wet, yi'i japa altar jik'ioyi ti t'otata. Ijiatk'i siunie ti ajwe'lase'm, ti Sinia' nak jantajlata napo i'nio' ijyiwitajam'ni pet siu'nie jloma, ti titijwajat'i'yipe papok i'nio' t'ipi.

52“¡Aswet'ia japoye, asa'am ti jika'neyasane ni Moisés jika'neyasajnaye! Ti jlajlanayi siojona 'wuk jikie' tejeye ni 'najankijnieye ti ijiatk'i, je wenayi napo i'nio' ti iyo ka 'noyi, ka asama 'neje wekie'e ka 'oyeyi.”

53Ti Jesús tajlat'iyijpe pak Fariseo, siupapo i'nio' taka'neyasane pak Moisés jika'neyasajnaye jwesis'ne, 'loj siupuwa ti'yasanik'i ti i'yas'ni pa Jesús, 54ti jla'm iyotajasi ka ji'lij je 'esie pa Jesús ka pakaye ka inenisiji ka iwo jitisa'.

Currently Selected:

Lucas 11: CRT97

Highlight

Copy