Mateo 18

“¿Tent'i siupa t'an pijiam'ni wata'a?”

(Mc 9.33-37; Lc 9.46-48)

1Sekyi'i siojopo t'eyasajnas ijioyeyisi ja Jesús ti i'yasis'ni, ti iyonisi 'ate:

—¿Tepat'e yi'i siupa ti t'an'ni pijia'm yi'i pa Sinia' jika anechijiayas?

2Jesús tanayi'ni ja kia'le, yinis jika kiowe'e, 3sekyi'i iyo'ne 'ate:

—Ijiatk'i siu'nie jayo'nase, siuti ja ke awoye asosikis ink'iejyisa', siu'neje ti ja ke anitewijnatayik'i siunapo kia'lis, je pajna'a ka 'oyeyi nak jika anechijiayas ni Sinia'.#Lc 18.17; 22.24-26 4Siunie ti ijiate jla'am ti jle' po' yi'i ni jika anechijiayas ni Sinia' naka ni je initonit, siunie iniwone 'ate siu'nie kia'le. 5Siunie janki'm ilia'm siunie kia'le naka'ne siunie na'am ijyik'i, ijiate je 'wena paka inki'm ilia'm, ya'am ti isi'm ijyilia'm.

Siunie ti yija'm ni jike' jiwet'ia po'

(Mc 9.42-48; Lc 17.1-2)

6“Jane'yi pa siupi ti jank'ajlinit ti janwoyi ni jike' siunapo je 'esijiyi ti sajmela'aja'n ti je ilijin'ni ijyik'i, iyo'ate siu'nie kia'le. Janakaye'ne siunie ti ja titietaja ni i'niat jlajlik'i ti ja tits'ijwana 'woyi siojona sisaj ti kiojieti, ti janemk'ana'ni. 7¡Wuj ti je 'es siuti poyeta niwaka ti ik'ajlinit napo i'nio' ti iyo ni jike'! Ja ke paja ka inetia'n aska kiowe'e niwaka 'yina awo'ate, ¡naka ni siunie ti jank'ajlinit ni jikiecha ti ja woyi ni jike' ja wujwa ni jiwet'iaye ti ja poye!

8“Siunie akio' ni'ne ka nakaye ni asat ti jat'emina ti ja ajia'm ni ake', esiti sek jane'yi ka atatayijna'a. 'Wanjliyi ka akio' ni'ne ka nakaye asat ijwanjlik'i 'yina lapawo ti ja ajia'm janaka in'wasankiye ti laj jlaja, je'ne ka nakaye ka i'nesi siunie ti 'wanjli wita'm niwa akioye siu'neje niwa asatis ti ja intatajaja nak jwat ti je paj ka 'no'me. 9Siupet ka janakaye atate ka int'emi'na ka ajia'm ni ake', laj'ni, tate. 'Wanjliyijna'a ka atate injwanjli 'yina ti ja ajia'm jiwek jana in'wasankiye siojona laj jlaja, siuka 'wanjliye wita'm niwa atate 'wanjliyi ja ke i'nesi siuti ja intatajaja nak inlaye 'wet ni jwat ti je paj ka 'no'me.

Jesús yamtiyi siojopa sonta 'wolepo' ti i'yejnap jiwek

(Lc 15.3-7)

10“Ke ine'wajayi ka ne'yi pa siunapo je 'esijiyi kia'lis ti 'yiyasajnas. Ajwela'yase'm ti siunapo jijliujwajnas poli jlele pet je paj ka int'ekiyisiap ni Inia' ti yi' poliyi ti i'ye'n ape'e.#18.10 Siojopa v. 11 ti inkio' tikienat'iyijpe laje siupuwa inamtis ti jlamtiyijpe, ti iyo'ate: Kajeyepa siunie I'nio' Jlas na'am ti iyojyi'n siunapo netiajne'n (18.10)

12“¿Tepi iyo? Siunie i'nio' cien niwa jiliajwas 'wolepo', 'yina netia'n jana ijwienjli. ¿Ma je iliyi kiu wek ts'e niwa ijia, siuniwa noventa y nueve, ti ya'am ti iyojyin'ni? 13I'wi'in, ti wujwa ti inkaj'ni. Je jlase' pi iyo ti ipini'yi, 'yina 'yaka'm ape'e siupi iyo pi jinikanitieyi ape'e puwak siupuwa noventa y nueve siupuwa je netiajne'n. 14'Yina kia'iyo ni Asna' ti yi' poliyi, ti je iyojonk'iye ka injwanjli paka inetia'n siunapo kia'lis ti je sakakiuyis.

Siunie jawone ni akiecha ti jawo jlosikie' ti po' ni iyo'na

(Lc 17.3)

15“Siunie akiecha ti po' ni je 'es ni iyo'na, joyi jwankite'n, jwejla'm siunie ti je 'esk'i iyo'na. Siuti jank'iu'wa'm, ijiate naka ti jikajle'n ni akiecha. 16'Yina jlampet siuti ja ke ink'iu'wa'm, ja apilieyinie'e siupapo ja a'yisa, ni'ne ka timesie papo ja a'asi Sinia' jilis, ja 'nakayeyijna'a ti jan'wena'a'm siupi iyo pi akiecha. Ja 'nakayeyi ti ja ke amkataja ti ja 'najane paka jawone, 'yina ti ja timesie ni'ne ti janajapeja siupapo jan'wena'a'm.#Deut 19.15 17Siuti kiak jawo ja ke ink'iuye papoka ti a'yista, sek jane'yi ijiatayijna'a ti ja ane wikie'eyi napo Sinia' jilis, ka jwelajamna'a. 'Yina siuti ja ke ink'iuyeje papoka, ja aleyeyijna'a ti jiwo akiechaye ti a'nayi ijwienjliyetaja k'iye ni iyo ti Sinia' jilists'ase'm. Jawonayijna'a 'ate ni k'iejliyi, iyoye'ate siunapo isi'm ilia'm niwa inkat'ijnieyejes.

18“Ijiatk'i siu'nie jayo'nase, ja k'iejliyeyipe pa jawonayi napo ika kia'lis ti jawonayi 'ate, Je 'esiji naka ka awoyeyi, - Sinia' kiak jawo'ojyi pet ja ke tijliena'ni. Kiak iyojliyi, siuti kiak jawonayi'ate, Jla'm ijiate jla'am 'esiji ka woyeyi, - Sinia' kiak jawo'ojyi, ja lajk'ipa kanwo ja ke int'onieye'yi pet.#Mt 16.19; Jn 20.23

19“Kia'iyo ijiatk'i siu'nie jayo'nase ti ja poye napo times ti iyoyi t'ajlaye ti ijniul wita'm ti t'ajle ni Inia' ti yi' poliyi siunie isitia'n, ijiate Inia' janwejna'm ni siunie t'ajle. 20Kajeyepa ti ajiap siunapo times ni'ne ti najape ti initotisi wita'm ki iyo ni yi' ti siwunitis.”

Jesús yamtiyi siupapo i'nio' times, ti i'yejnap jiwek, ti jikapia' po'

21Pedro ijioyi'ni ja Jesús, sekyi'i iyo'ne 'ate ti i'yase'n:

—'Yaka'niona, ¿tepa jawo pet siunie isiecha ti po' ni iyonk'i? ¿Ent'a ja yiyi jana ijwienjli sikio' itij'we times tom'niji ti jap'ilisin'ni, sek jane'yi ka iliyeyi?

22Jesús isiujlie ti iyo'ate:

—Pedro, je ajwe'la'm ka iyo'ate ka ayi jana ijwienjli sikio' itij'we times tom'niji ka sek ine'yi ka aleyeyi, je'e. Jajotk'i'ni paj ka ayeyinie'e jana cuatrocientos noventa (490) ti jap'elisi'n. Ja ayipi ka ekiajlayik'ipe janaka 490, laj jlaja ti jakap'ijliuski, ka atajlata ni jitis iyo. 23Nak it'imina ti Sinia' jika anechijiayas iyoye'ate siu'nie: 'Yejne'n, pojompe pi i'nio' ti iyo ka 'ye'en siupapo 'yasa'n jitieyi'i, ti kia'iyo anechiyasas, siupapo jikapia'lis yiyi. 24Ijyijlitat'iyijpe ti i'ye'en tikinieje'ni siupa ti 'lojwe puwa millones jikapia'. 25'Yina ti lajk'i japa ka inejni japa jikapia', it'imina'ne siupa anechiyas ti takajlunie ka tiwena 'ate iyo ni inkipinik ti tiwenajata, ti jwanaja'a japa jik'iemjla siu'neje papo jilis, siojopa laja japak ja tenaja japa jikapia'. 26Pak siupa i'nio' yam'ne ti t'akos kiajwe pa jika anechiyas ti inip'elisine, ti iyo'ate, “¡'Yaka'niona, nilayiti kiu' wekie'e. Je ijiatna'a ka je itijwi jakia ikapia'!” 27Siupa anechiyas inilayitieyi wek, sekyi'i ip'ilisin'ne. Iliyek'i siupi iyotaja ka iwone, sekyi'i iyoni'ne 'ate, “'Esiji, maj jiwek.”

28“Ti iniuyet'ipi kisie'e pak siupa i'nio', isiuti'ne siupa jla'yi ti isimk'iji'n, 'yina ti jikapia' yiyi. Jlam'ne je wujwata siojopa jikapia'. T'ekiyet'iyijpe ti isim'ni ji'wojwa'm, paj ti jiyel initiajnata'ni pi jikiecha ti iyonat'iyijpe 'ate, “¡Nisiama sitis siojokia akapia'!”

29“Jikiecha t'akosjlete'l itiyetajan kiajwe ti inip'elisinta, 'yina iyo'ne 'ate, “¡Nilayiti kiu' wek, je ijiat ka je itijwi jakiak 'yakapia'!” 30Je iyo kank'iuye pi jikiecha ti inip'elisinta. Iyo'ni ka t'otie a'laja'm, ka inejni japa jikapia'.

31“Siupapo jla'yis'ni ti isimk'iji'n wuj ti jitienkiujnieyi ilianis ti i'winis ti kia'iyo, sekyi'i ti yamat'i'nijpe ti ijioyisi pi anechiyas ti ijwilisia'm. 32Siupi anechiyas tane'ni, yiyi ti kiak t'ipa iyonayijipi, “¡Ijiate wat ti laj ajosikie'! Jlam'ne ap'elisin'ne, it'imina ti itiej je awunitk'i ki iyo ki ates. 33'Yina kiak kawontaja'ni pet pi akiecha, siukia awo'na ti ap'elisi'n.” 34Sekyi'i ti ijiatat'iyijpe ti jwesie pak anechiyas, takajlunieyi ka ijiatayi ka tisiejek'i, lapawo ka kiak je iwo ti japak tenajaja japak jikapia'.”

35Jesús yine ape'e ti iyo'ate:

—'Yina kiak janwo'nase ni Inia' ti yi' poliyi, jane'yi pa ti asa'am siuti kiak jawoyeyi ja ke anip'elisina, ti ja ke ijiatayi ka anetiajnata ni jitis iyo napo a'lejwas.

Currently Selected:

Mateo 18: CRT97

Highlight

Copy